| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. மெத்தாஸஹக³தஸுத்தவண்ணனா
4. Mettāsahagatasuttavaṇṇanā
235. சதுத்தே² மெத்தாஸஹக³தேன சேதஸாதிஆதி³ ஸப்³ப³ங் ஸப்³பா³காரேன விஸுத்³தி⁴மக்³கே³ (விஸுத்³தி⁴॰ 1.240-241) வித்தா²ரிதமேவ. மயம்பி கோ², ஆவுஸோ, ஸாவகானங் ஏவங் த⁴ம்மங் தே³ஸேமாதி இத³ம்பி தே புரிமனயேனேவ ஸத்து² த⁴ம்மதே³ஸனங் ஸுத்வா வத³ந்தி. தித்தி²யானஞ்ஹி ஸமயே பஞ்சனீவரணப்பஹானங் வா மெத்தாதி³ப்³ரஹ்மவிஹாரபா⁴வனா வா நத்தி². கிங் க³திகா ஹோதீதி கிங் நிப்ப²த்தி ஹோதி. கிங் பரமாதி கிங் உத்தமா. கிங் ப²லாதி கிங் ஆனிஸங்ஸா. கிங் பரியோஸானாதி கிங் நிட்டா². மெத்தாஸஹக³தந்தி மெத்தாய ஸஹக³தங் ஸங்ஸட்ட²ங் ஸம்பயுத்தங். ஏஸேவ நயோ ஸப்³ப³த்த². விவேகனிஸ்ஸிதாதீ³னி வுத்தத்தா²னேவ.
235. Catutthe mettāsahagatena cetasātiādi sabbaṃ sabbākārena visuddhimagge (visuddhi. 1.240-241) vitthāritameva. Mayampi kho, āvuso, sāvakānaṃ evaṃ dhammaṃ desemāti idampi te purimanayeneva satthu dhammadesanaṃ sutvā vadanti. Titthiyānañhi samaye pañcanīvaraṇappahānaṃ vā mettādibrahmavihārabhāvanā vā natthi. Kiṃ gatikā hotīti kiṃ nipphatti hoti. Kiṃ paramāti kiṃ uttamā. Kiṃ phalāti kiṃ ānisaṃsā. Kiṃ pariyosānāti kiṃ niṭṭhā. Mettāsahagatanti mettāya sahagataṃ saṃsaṭṭhaṃ sampayuttaṃ. Eseva nayo sabbattha. Vivekanissitādīni vuttatthāneva.
அப்படிகூலந்தி து³வித⁴ங் அப்படிகூலங் – ஸத்தஅப்படிகூலஞ்ச, ஸங்கா²ரஅப்படிகூலஞ்ச. தஸ்மிங் அப்படிகூலே இட்டே² வத்து²ஸ்மிந்தி அத்தோ². படிகூலஸஞ்ஞீதி அனிட்ட²ஸஞ்ஞீ. கத²ங் பனெத்த² ஏவங் விஹரதி? அஸுப⁴ப²ரணங் வா அனிச்சந்தி மனஸிகாரங் வா கரொந்தோ. வுத்தஞ்ஹேதங் படிஸம்பி⁴தா³யங் ‘‘கத²ங் அப்படிகூலே படிகூலஸஞ்ஞீ விஹரதி. இட்ட²ஸ்மிங் வத்து²ஸ்மிங் அஸுபா⁴ய வா ப²ரதி, அனிச்சதோ வா உபஸங்ஹரதீ’’தி. படிகூலே பன அனிட்டே² வத்து²ஸ்மிங் மெத்தாப²ரணங் வா தா⁴துமனஸிகாரங் வா கரொந்தோ அப்படிகூலஸஞ்ஞீ விஹரதி நாம. யதா²ஹ ‘‘கத²ங் படிகூலே அப்படிகூலஸஞ்ஞீ விஹரதி. அனிட்ட²ஸ்மிங் வத்து²ஸ்மிங் மெத்தாய வா ப²ரதி, தா⁴துதோ வா உபஸங்ஹரதீ’’தி (படி॰ ம॰ 2.17). உப⁴யமிஸ்ஸகபதே³ஸுபி ஏஸேவ நயோ. அப்படிகூலப்படிகூலேஸு ஹி ததே³வ அஸுப⁴ப²ரணங் வா அனிச்சந்தி மனஸிகாரங் வா கரொந்தோ படிகூலஸஞ்ஞீ விஹரதி நாம. படிகூலாபடிகூலேஸு ச ததே³வ மெத்தாப²ரணங் வா தா⁴துமனஸிகாரங் வா கரொந்தோ அப்படிகூலஸஞ்ஞீ விஹரதி நாம. ‘‘சக்கு²னா ரூபங் தி³ஸ்வா நேவ ஸுமனோ ஹோதீ’’திஆதி³னா (படி॰ ம॰ 2.17) நயேன வுத்தங் பன ச²ளங்கு³பெக்க²ங் பவத்தயமானோ ‘‘அப்படிகூலே ச படிகூலே ச தது³ப⁴யங் அபி⁴னிவஜ்ஜெத்வா உபெக்க²கோ தத்த² விஹரதி ஸதோ ஸம்பஜானோ’’தி வேதி³தப்³போ³.
Appaṭikūlanti duvidhaṃ appaṭikūlaṃ – sattaappaṭikūlañca, saṅkhāraappaṭikūlañca. Tasmiṃ appaṭikūle iṭṭhe vatthusminti attho. Paṭikūlasaññīti aniṭṭhasaññī. Kathaṃ panettha evaṃ viharati? Asubhapharaṇaṃ vā aniccanti manasikāraṃ vā karonto. Vuttañhetaṃ paṭisambhidāyaṃ ‘‘kathaṃ appaṭikūle paṭikūlasaññī viharati. Iṭṭhasmiṃ vatthusmiṃ asubhāya vā pharati, aniccato vā upasaṃharatī’’ti. Paṭikūle pana aniṭṭhe vatthusmiṃ mettāpharaṇaṃ vā dhātumanasikāraṃ vā karonto appaṭikūlasaññī viharati nāma. Yathāha ‘‘kathaṃ paṭikūle appaṭikūlasaññī viharati. Aniṭṭhasmiṃ vatthusmiṃ mettāya vā pharati, dhātuto vā upasaṃharatī’’ti (paṭi. ma. 2.17). Ubhayamissakapadesupi eseva nayo. Appaṭikūlappaṭikūlesu hi tadeva asubhapharaṇaṃ vā aniccanti manasikāraṃ vā karonto paṭikūlasaññī viharati nāma. Paṭikūlāpaṭikūlesu ca tadeva mettāpharaṇaṃ vā dhātumanasikāraṃ vā karonto appaṭikūlasaññī viharati nāma. ‘‘Cakkhunā rūpaṃ disvā neva sumano hotī’’tiādinā (paṭi. ma. 2.17) nayena vuttaṃ pana chaḷaṅgupekkhaṃ pavattayamāno ‘‘appaṭikūle ca paṭikūle ca tadubhayaṃ abhinivajjetvā upekkhako tattha viharati sato sampajāno’’ti veditabbo.
எத்தாவதா ச இமஸ்ஸ பி⁴க்கு²னோ மெத்தாய திகசதுக்கஜ்ஜா²னங் நிப்³ப³த்தெத்வா ததே³வ பாத³கங் கத்வா விபஸ்ஸனங் வட்³டெ⁴த்வா அரஹத்தங் பத்தஸ்ஸ ஸஹ விபஸ்ஸனாய மக்³க³ஸம்பொ³ஜ்ஜ²ங்கா³னங் அரியித்³தி⁴யா ச த³ஸ்ஸிதத்தா தே³ஸனா வினிவட்டேதப்³பா³ ஸியா. இத³ங் பன மெத்தாஜா²னங் பாத³கங் கத்வா ஸங்கா²ரே ஸம்மஸந்தோபி யோ அரஹத்தங் பாபுணிதுங் ந ஸக்கோதி, யஸ்மா தஸ்ஸ அரஹத்தபரமா மெத்தா ந ஹோதி. யங்பரமா பன ஹோதி, தங் த³ஸ்ஸேதப்³ப³ங். தஸ்மா தஸ்ஸ த³ஸ்ஸனத்த²ங் அயங் தே³ஸனா ஆரத்³தா⁴. பரதோ ஸப்³ப³ஸோ வா பன ரூபஸஞ்ஞானங் ஸமதிக்கமாதிஆதீ³ஸுபி இமினா நயேன புன தே³ஸனாரம்ப⁴பயோஜனங் வேதி³தப்³ப³ங்.
Ettāvatā ca imassa bhikkhuno mettāya tikacatukkajjhānaṃ nibbattetvā tadeva pādakaṃ katvā vipassanaṃ vaḍḍhetvā arahattaṃ pattassa saha vipassanāya maggasambojjhaṅgānaṃ ariyiddhiyā ca dassitattā desanā vinivaṭṭetabbā siyā. Idaṃ pana mettājhānaṃ pādakaṃ katvā saṅkhāre sammasantopi yo arahattaṃ pāpuṇituṃ na sakkoti, yasmā tassa arahattaparamā mettā na hoti. Yaṃparamā pana hoti, taṃ dassetabbaṃ. Tasmā tassa dassanatthaṃ ayaṃ desanā āraddhā. Parato sabbaso vā pana rūpasaññānaṃ samatikkamātiādīsupi iminā nayena puna desanārambhapayojanaṃ veditabbaṃ.
ஸுப⁴பரமந்தி ஸுப⁴னிட்ட²ங், ஸுப⁴கோடிகங், ஸுப⁴னிப்ப²த்திங். இத⁴பஞ்ஞஸ்ஸாதி இதே⁴வ பஞ்ஞா அஸ்ஸ, நயிமங் லோகங் அதிக்கமதீதி இத⁴பஞ்ஞோ, தஸ்ஸ இத⁴பஞ்ஞஸ்ஸ, லோகியபஞ்ஞஸ்ஸாதி அத்தோ². உத்தரிவிமுத்திங் அப்படிவிஜ்ஜ²தோதி லோகுத்தரத⁴ம்மங் அப்படிவிஜ்ஜ²ந்தஸ்ஸ. யோ பன படிவிஜ்ஜி²துங் ஸக்கோதி, தஸ்ஸ அரஹத்தபரமாவ மெத்தா ஹோதீதி அத்தோ². கருணாதீ³ஸுபி ஏஸேவ நயோ.
Subhaparamanti subhaniṭṭhaṃ, subhakoṭikaṃ, subhanipphattiṃ. Idhapaññassāti idheva paññā assa, nayimaṃ lokaṃ atikkamatīti idhapañño, tassa idhapaññassa, lokiyapaññassāti attho. Uttarivimuttiṃ appaṭivijjhatoti lokuttaradhammaṃ appaṭivijjhantassa. Yo pana paṭivijjhituṃ sakkoti, tassa arahattaparamāva mettā hotīti attho. Karuṇādīsupi eseva nayo.
கஸ்மா பனேதாஸங் மெத்தாதீ³னங் ஸுப⁴பரமாதி³தா வுத்தா ப⁴க³வதாதி? ஸபா⁴க³வஸேன தஸ்ஸ தஸ்ஸ உபனிஸ்ஸயத்தா. மெத்தாவிஹாரிஸ்ஸ ஹி ஸத்தா அப்படிகூலா ஹொந்தி, அத²ஸ்ஸ அப்படிகூலபரிசயா அப்படிகூலேஸு பரிஸுத்³த⁴வண்ணேஸு நீலாதீ³ஸு சித்தங் உபஸங்ஹரதோ அப்பகஸிரேனேவ தத்த² சித்தங் பக்க²ந்த³தி. இதி மெத்தா ஸுப⁴விமொக்க²ஸ்ஸ உபனிஸ்ஸயோ ஹோதி, ந ததோ பரங், தஸ்மா ஸுப⁴பரமாதி வுத்தா.
Kasmā panetāsaṃ mettādīnaṃ subhaparamāditā vuttā bhagavatāti? Sabhāgavasena tassa tassa upanissayattā. Mettāvihārissa hi sattā appaṭikūlā honti, athassa appaṭikūlaparicayā appaṭikūlesu parisuddhavaṇṇesu nīlādīsu cittaṃ upasaṃharato appakasireneva tattha cittaṃ pakkhandati. Iti mettā subhavimokkhassa upanissayo hoti, na tato paraṃ, tasmā subhaparamāti vuttā.
கருணாவிஹாரிஸ்ஸ உண்ஹாபி⁴கா⁴தாதி³ரூபனிமித்தங் ஸத்தது³க்க²ங் ஸமனுபஸ்ஸந்தஸ்ஸ கருணாய பவத்திஸம்ப⁴வதோ ரூபே ஆதீ³னவோ பரிவிதி³தோ ஹோதி , அத²ஸ்ஸ பரிவிதி³தரூபாதீ³னவத்தா பத²வீகஸிணாதீ³ஸு அஞ்ஞதரங் உக்³கா⁴டெத்வா ரூபனிஸ்ஸரணே ஆகாஸே சித்தங் உபஸங்ஹரதோ அப்பகஸிரேனேவ தத்த² சித்தங் பக்க²ந்த³தி. இதி கருணா ஆகாஸானஞ்சாயதனஸ்ஸ உபனிஸ்ஸயோ ஹோதி, ந ததோ பரங், தஸ்மா ஆகாஸானஞ்சாயதனபரமாதி வுத்தா.
Karuṇāvihārissa uṇhābhighātādirūpanimittaṃ sattadukkhaṃ samanupassantassa karuṇāya pavattisambhavato rūpe ādīnavo parividito hoti , athassa parividitarūpādīnavattā pathavīkasiṇādīsu aññataraṃ ugghāṭetvā rūpanissaraṇe ākāse cittaṃ upasaṃharato appakasireneva tattha cittaṃ pakkhandati. Iti karuṇā ākāsānañcāyatanassa upanissayo hoti, na tato paraṃ, tasmā ākāsānañcāyatanaparamāti vuttā.
முதி³தாவிஹாரிஸ்ஸ பன தேன தேன பாமோஜ்ஜகாரணேன உப்பன்னபாமோஜ்ஜஸத்தானங் விஞ்ஞாணங் ஸமனுபஸ்ஸந்தஸ்ஸ முதி³தாய பவத்திஸம்ப⁴வதோ விஞ்ஞாணக்³க³ஹணபரிசிதங் ஹோதி, அத²ஸ்ஸ அனுக்கமாதி⁴க³தங் ஆகாஸானஞ்சாயதனங் அதிக்கம்ம ஆகாஸனிமித்தகோ³சரே விஞ்ஞாணே சித்தங் உபஸங்ஹரதோ அப்பகஸிரேனேவ தத்த² சித்தங் பக்க²ந்த³தி. இதி முதி³தா விஞ்ஞாணஞ்சாயதனஸ்ஸ உபனிஸ்ஸயோ ஹோதி, ந ததோ பரங், தஸ்மா விஞ்ஞாணஞ்சாயதனபரமாதி வுத்தா.
Muditāvihārissa pana tena tena pāmojjakāraṇena uppannapāmojjasattānaṃ viññāṇaṃ samanupassantassa muditāya pavattisambhavato viññāṇaggahaṇaparicitaṃ hoti, athassa anukkamādhigataṃ ākāsānañcāyatanaṃ atikkamma ākāsanimittagocare viññāṇe cittaṃ upasaṃharato appakasireneva tattha cittaṃ pakkhandati. Iti muditā viññāṇañcāyatanassa upanissayo hoti, na tato paraṃ, tasmā viññāṇañcāyatanaparamāti vuttā.
உபெக்கா²விஹாரிஸ்ஸ பன ‘‘ஸத்தா ஸுகி²தா வா ஹொந்து, து³க்க²தோ வா விமுச்சந்து, ஸம்பத்தஸுக²தோ வா மா விக³ச்ச²ந்தூ’’தி ஆபோ⁴கா³பா⁴வதோ ஸுக²து³க்கா²தி³பரமத்த²கா³ஹவிமுக²ஸம்ப⁴வதோ அவிஜ்ஜமானக்³க³ஹணது³க்க²சித்தங் ஹோதி. அத²ஸ்ஸ பரமத்த²கா³ஹதோ விமுக²பா⁴வபரிசிதசித்தஸ்ஸ பரமத்த²தோ அவிஜ்ஜமானக்³க³ஹணது³க்க²சித்தஸ்ஸ ச அனுக்கமாதி⁴க³தங் விஞ்ஞாணாஞ்சாயதனங் ஸமதிக்கம்மஸம்ப⁴வதோ அவிஜ்ஜமானே பரமத்த²பூ⁴தஸ்ஸ விஞ்ஞாணஸ்ஸ அபா⁴வே சித்தங் உபஸங்ஹரதோ அப்பகஸிரேனேவ தத்த² சித்தங் பக்க²ந்த³தி. இதி உபெக்கா² ஆகிஞ்சஞ்ஞாயதனஸ்ஸ உபனிஸ்ஸயோ ஹோதி, ந ததோ பரங், தஸ்மா ஆகிஞ்சஞ்ஞாயதனபரமாதி வுத்தா. தே³ஸனாபரியோஸானே பஞ்சஸதா பி⁴க்கூ² அரஹத்தங் பத்தாதி.
Upekkhāvihārissa pana ‘‘sattā sukhitā vā hontu, dukkhato vā vimuccantu, sampattasukhato vā mā vigacchantū’’ti ābhogābhāvato sukhadukkhādiparamatthagāhavimukhasambhavato avijjamānaggahaṇadukkhacittaṃ hoti. Athassa paramatthagāhato vimukhabhāvaparicitacittassa paramatthato avijjamānaggahaṇadukkhacittassa ca anukkamādhigataṃ viññāṇāñcāyatanaṃ samatikkammasambhavato avijjamāne paramatthabhūtassa viññāṇassa abhāve cittaṃ upasaṃharato appakasireneva tattha cittaṃ pakkhandati. Iti upekkhā ākiñcaññāyatanassa upanissayo hoti, na tato paraṃ, tasmā ākiñcaññāyatanaparamāti vuttā. Desanāpariyosāne pañcasatā bhikkhū arahattaṃ pattāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 4. மெத்தாஸஹக³தஸுத்தங் • 4. Mettāsahagatasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 4. மெத்தாஸஹக³தஸுத்தவண்ணனா • 4. Mettāsahagatasuttavaṇṇanā
