| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੪. ਮੇਤ੍ਤਾਸਹਗਤਸੁਤ੍ਤવਣ੍ਣਨਾ
4. Mettāsahagatasuttavaṇṇanā
੨੩੫. ਚਤੁਤ੍ਥੇ ਮੇਤ੍ਤਾਸਹਗਤੇਨ ਚੇਤਸਾਤਿਆਦਿ ਸਬ੍ਬਂ ਸਬ੍ਬਾਕਾਰੇਨ વਿਸੁਦ੍ਧਿਮਗ੍ਗੇ (વਿਸੁਦ੍ਧਿ॰ ੧.੨੪੦-੨੪੧) વਿਤ੍ਥਾਰਿਤਮੇવ। ਮਯਮ੍ਪਿ ਖੋ, ਆવੁਸੋ, ਸਾવਕਾਨਂ ਏવਂ ਧਮ੍ਮਂ ਦੇਸੇਮਾਤਿ ਇਦਮ੍ਪਿ ਤੇ ਪੁਰਿਮਨਯੇਨੇવ ਸਤ੍ਥੁ ਧਮ੍ਮਦੇਸਨਂ ਸੁਤ੍વਾ વਦਨ੍ਤਿ। ਤਿਤ੍ਥਿਯਾਨਞ੍ਹਿ ਸਮਯੇ ਪਞ੍ਚਨੀવਰਣਪ੍ਪਹਾਨਂ વਾ ਮੇਤ੍ਤਾਦਿਬ੍ਰਹ੍ਮવਿਹਾਰਭਾવਨਾ વਾ ਨਤ੍ਥਿ। ਕਿਂ ਗਤਿਕਾ ਹੋਤੀਤਿ ਕਿਂ ਨਿਪ੍ਫਤ੍ਤਿ ਹੋਤਿ। ਕਿਂ ਪਰਮਾਤਿ ਕਿਂ ਉਤ੍ਤਮਾ। ਕਿਂ ਫਲਾਤਿ ਕਿਂ ਆਨਿਸਂਸਾ। ਕਿਂ ਪਰਿਯੋਸਾਨਾਤਿ ਕਿਂ ਨਿਟ੍ਠਾ। ਮੇਤ੍ਤਾਸਹਗਤਨ੍ਤਿ ਮੇਤ੍ਤਾਯ ਸਹਗਤਂ ਸਂਸਟ੍ਠਂ ਸਮ੍ਪਯੁਤ੍ਤਂ। ਏਸੇવ ਨਯੋ ਸਬ੍ਬਤ੍ਥ। વਿવੇਕਨਿਸ੍ਸਿਤਾਦੀਨਿ વੁਤ੍ਤਤ੍ਥਾਨੇવ।
235. Catutthe mettāsahagatena cetasātiādi sabbaṃ sabbākārena visuddhimagge (visuddhi. 1.240-241) vitthāritameva. Mayampi kho, āvuso, sāvakānaṃ evaṃ dhammaṃ desemāti idampi te purimanayeneva satthu dhammadesanaṃ sutvā vadanti. Titthiyānañhi samaye pañcanīvaraṇappahānaṃ vā mettādibrahmavihārabhāvanā vā natthi. Kiṃ gatikā hotīti kiṃ nipphatti hoti. Kiṃ paramāti kiṃ uttamā. Kiṃ phalāti kiṃ ānisaṃsā. Kiṃ pariyosānāti kiṃ niṭṭhā. Mettāsahagatanti mettāya sahagataṃ saṃsaṭṭhaṃ sampayuttaṃ. Eseva nayo sabbattha. Vivekanissitādīni vuttatthāneva.
ਅਪ੍ਪਟਿਕੂਲਨ੍ਤਿ ਦੁવਿਧਂ ਅਪ੍ਪਟਿਕੂਲਂ – ਸਤ੍ਤਅਪ੍ਪਟਿਕੂਲਞ੍ਚ, ਸਙ੍ਖਾਰਅਪ੍ਪਟਿਕੂਲਞ੍ਚ। ਤਸ੍ਮਿਂ ਅਪ੍ਪਟਿਕੂਲੇ ਇਟ੍ਠੇ વਤ੍ਥੁਸ੍ਮਿਨ੍ਤਿ ਅਤ੍ਥੋ। ਪਟਿਕੂਲਸਞ੍ਞੀਤਿ ਅਨਿਟ੍ਠਸਞ੍ਞੀ। ਕਥਂ ਪਨੇਤ੍ਥ ਏવਂ વਿਹਰਤਿ? ਅਸੁਭਫਰਣਂ વਾ ਅਨਿਚ੍ਚਨ੍ਤਿ ਮਨਸਿਕਾਰਂ વਾ ਕਰੋਨ੍ਤੋ। વੁਤ੍ਤਞ੍ਹੇਤਂ ਪਟਿਸਮ੍ਭਿਦਾਯਂ ‘‘ਕਥਂ ਅਪ੍ਪਟਿਕੂਲੇ ਪਟਿਕੂਲਸਞ੍ਞੀ વਿਹਰਤਿ। ਇਟ੍ਠਸ੍ਮਿਂ વਤ੍ਥੁਸ੍ਮਿਂ ਅਸੁਭਾਯ વਾ ਫਰਤਿ, ਅਨਿਚ੍ਚਤੋ વਾ ਉਪਸਂਹਰਤੀ’’ਤਿ। ਪਟਿਕੂਲੇ ਪਨ ਅਨਿਟ੍ਠੇ વਤ੍ਥੁਸ੍ਮਿਂ ਮੇਤ੍ਤਾਫਰਣਂ વਾ ਧਾਤੁਮਨਸਿਕਾਰਂ વਾ ਕਰੋਨ੍ਤੋ ਅਪ੍ਪਟਿਕੂਲਸਞ੍ਞੀ વਿਹਰਤਿ ਨਾਮ। ਯਥਾਹ ‘‘ਕਥਂ ਪਟਿਕੂਲੇ ਅਪ੍ਪਟਿਕੂਲਸਞ੍ਞੀ વਿਹਰਤਿ। ਅਨਿਟ੍ਠਸ੍ਮਿਂ વਤ੍ਥੁਸ੍ਮਿਂ ਮੇਤ੍ਤਾਯ વਾ ਫਰਤਿ, ਧਾਤੁਤੋ વਾ ਉਪਸਂਹਰਤੀ’’ਤਿ (ਪਟਿ॰ ਮ॰ ੨.੧੭)। ਉਭਯਮਿਸ੍ਸਕਪਦੇਸੁਪਿ ਏਸੇવ ਨਯੋ। ਅਪ੍ਪਟਿਕੂਲਪ੍ਪਟਿਕੂਲੇਸੁ ਹਿ ਤਦੇવ ਅਸੁਭਫਰਣਂ વਾ ਅਨਿਚ੍ਚਨ੍ਤਿ ਮਨਸਿਕਾਰਂ વਾ ਕਰੋਨ੍ਤੋ ਪਟਿਕੂਲਸਞ੍ਞੀ વਿਹਰਤਿ ਨਾਮ। ਪਟਿਕੂਲਾਪਟਿਕੂਲੇਸੁ ਚ ਤਦੇવ ਮੇਤ੍ਤਾਫਰਣਂ વਾ ਧਾਤੁਮਨਸਿਕਾਰਂ વਾ ਕਰੋਨ੍ਤੋ ਅਪ੍ਪਟਿਕੂਲਸਞ੍ਞੀ વਿਹਰਤਿ ਨਾਮ। ‘‘ਚਕ੍ਖੁਨਾ ਰੂਪਂ ਦਿਸ੍વਾ ਨੇવ ਸੁਮਨੋ ਹੋਤੀ’’ਤਿਆਦਿਨਾ (ਪਟਿ॰ ਮ॰ ੨.੧੭) ਨਯੇਨ વੁਤ੍ਤਂ ਪਨ ਛਲ਼ਙ੍ਗੁਪੇਕ੍ਖਂ ਪવਤ੍ਤਯਮਾਨੋ ‘‘ਅਪ੍ਪਟਿਕੂਲੇ ਚ ਪਟਿਕੂਲੇ ਚ ਤਦੁਭਯਂ ਅਭਿਨਿવਜ੍ਜੇਤ੍વਾ ਉਪੇਕ੍ਖਕੋ ਤਤ੍ਥ વਿਹਰਤਿ ਸਤੋ ਸਮ੍ਪਜਾਨੋ’’ਤਿ વੇਦਿਤਬ੍ਬੋ।
Appaṭikūlanti duvidhaṃ appaṭikūlaṃ – sattaappaṭikūlañca, saṅkhāraappaṭikūlañca. Tasmiṃ appaṭikūle iṭṭhe vatthusminti attho. Paṭikūlasaññīti aniṭṭhasaññī. Kathaṃ panettha evaṃ viharati? Asubhapharaṇaṃ vā aniccanti manasikāraṃ vā karonto. Vuttañhetaṃ paṭisambhidāyaṃ ‘‘kathaṃ appaṭikūle paṭikūlasaññī viharati. Iṭṭhasmiṃ vatthusmiṃ asubhāya vā pharati, aniccato vā upasaṃharatī’’ti. Paṭikūle pana aniṭṭhe vatthusmiṃ mettāpharaṇaṃ vā dhātumanasikāraṃ vā karonto appaṭikūlasaññī viharati nāma. Yathāha ‘‘kathaṃ paṭikūle appaṭikūlasaññī viharati. Aniṭṭhasmiṃ vatthusmiṃ mettāya vā pharati, dhātuto vā upasaṃharatī’’ti (paṭi. ma. 2.17). Ubhayamissakapadesupi eseva nayo. Appaṭikūlappaṭikūlesu hi tadeva asubhapharaṇaṃ vā aniccanti manasikāraṃ vā karonto paṭikūlasaññī viharati nāma. Paṭikūlāpaṭikūlesu ca tadeva mettāpharaṇaṃ vā dhātumanasikāraṃ vā karonto appaṭikūlasaññī viharati nāma. ‘‘Cakkhunā rūpaṃ disvā neva sumano hotī’’tiādinā (paṭi. ma. 2.17) nayena vuttaṃ pana chaḷaṅgupekkhaṃ pavattayamāno ‘‘appaṭikūle ca paṭikūle ca tadubhayaṃ abhinivajjetvā upekkhako tattha viharati sato sampajāno’’ti veditabbo.
ਏਤ੍ਤਾવਤਾ ਚ ਇਮਸ੍ਸ ਭਿਕ੍ਖੁਨੋ ਮੇਤ੍ਤਾਯ ਤਿਕਚਤੁਕ੍ਕਜ੍ਝਾਨਂ ਨਿਬ੍ਬਤ੍ਤੇਤ੍વਾ ਤਦੇવ ਪਾਦਕਂ ਕਤ੍વਾ વਿਪਸ੍ਸਨਂ વਡ੍ਢੇਤ੍વਾ ਅਰਹਤ੍ਤਂ ਪਤ੍ਤਸ੍ਸ ਸਹ વਿਪਸ੍ਸਨਾਯ ਮਗ੍ਗਸਮ੍ਬੋਜ੍ਝਙ੍ਗਾਨਂ ਅਰਿਯਿਦ੍ਧਿਯਾ ਚ ਦਸ੍ਸਿਤਤ੍ਤਾ ਦੇਸਨਾ વਿਨਿવਟ੍ਟੇਤਬ੍ਬਾ ਸਿਯਾ। ਇਦਂ ਪਨ ਮੇਤ੍ਤਾਝਾਨਂ ਪਾਦਕਂ ਕਤ੍વਾ ਸਙ੍ਖਾਰੇ ਸਮ੍ਮਸਨ੍ਤੋਪਿ ਯੋ ਅਰਹਤ੍ਤਂ ਪਾਪੁਣਿਤੁਂ ਨ ਸਕ੍ਕੋਤਿ, ਯਸ੍ਮਾ ਤਸ੍ਸ ਅਰਹਤ੍ਤਪਰਮਾ ਮੇਤ੍ਤਾ ਨ ਹੋਤਿ। ਯਂਪਰਮਾ ਪਨ ਹੋਤਿ, ਤਂ ਦਸ੍ਸੇਤਬ੍ਬਂ। ਤਸ੍ਮਾ ਤਸ੍ਸ ਦਸ੍ਸਨਤ੍ਥਂ ਅਯਂ ਦੇਸਨਾ ਆਰਦ੍ਧਾ। ਪਰਤੋ ਸਬ੍ਬਸੋ વਾ ਪਨ ਰੂਪਸਞ੍ਞਾਨਂ ਸਮਤਿਕ੍ਕਮਾਤਿਆਦੀਸੁਪਿ ਇਮਿਨਾ ਨਯੇਨ ਪੁਨ ਦੇਸਨਾਰਮ੍ਭਪਯੋਜਨਂ વੇਦਿਤਬ੍ਬਂ।
Ettāvatā ca imassa bhikkhuno mettāya tikacatukkajjhānaṃ nibbattetvā tadeva pādakaṃ katvā vipassanaṃ vaḍḍhetvā arahattaṃ pattassa saha vipassanāya maggasambojjhaṅgānaṃ ariyiddhiyā ca dassitattā desanā vinivaṭṭetabbā siyā. Idaṃ pana mettājhānaṃ pādakaṃ katvā saṅkhāre sammasantopi yo arahattaṃ pāpuṇituṃ na sakkoti, yasmā tassa arahattaparamā mettā na hoti. Yaṃparamā pana hoti, taṃ dassetabbaṃ. Tasmā tassa dassanatthaṃ ayaṃ desanā āraddhā. Parato sabbaso vā pana rūpasaññānaṃ samatikkamātiādīsupi iminā nayena puna desanārambhapayojanaṃ veditabbaṃ.
ਸੁਭਪਰਮਨ੍ਤਿ ਸੁਭਨਿਟ੍ਠਂ, ਸੁਭਕੋਟਿਕਂ, ਸੁਭਨਿਪ੍ਫਤ੍ਤਿਂ। ਇਧਪਞ੍ਞਸ੍ਸਾਤਿ ਇਧੇવ ਪਞ੍ਞਾ ਅਸ੍ਸ, ਨਯਿਮਂ ਲੋਕਂ ਅਤਿਕ੍ਕਮਤੀਤਿ ਇਧਪਞ੍ਞੋ, ਤਸ੍ਸ ਇਧਪਞ੍ਞਸ੍ਸ, ਲੋਕਿਯਪਞ੍ਞਸ੍ਸਾਤਿ ਅਤ੍ਥੋ। ਉਤ੍ਤਰਿવਿਮੁਤ੍ਤਿਂ ਅਪ੍ਪਟਿવਿਜ੍ਝਤੋਤਿ ਲੋਕੁਤ੍ਤਰਧਮ੍ਮਂ ਅਪ੍ਪਟਿવਿਜ੍ਝਨ੍ਤਸ੍ਸ। ਯੋ ਪਨ ਪਟਿવਿਜ੍ਝਿਤੁਂ ਸਕ੍ਕੋਤਿ, ਤਸ੍ਸ ਅਰਹਤ੍ਤਪਰਮਾવ ਮੇਤ੍ਤਾ ਹੋਤੀਤਿ ਅਤ੍ਥੋ। ਕਰੁਣਾਦੀਸੁਪਿ ਏਸੇવ ਨਯੋ।
Subhaparamanti subhaniṭṭhaṃ, subhakoṭikaṃ, subhanipphattiṃ. Idhapaññassāti idheva paññā assa, nayimaṃ lokaṃ atikkamatīti idhapañño, tassa idhapaññassa, lokiyapaññassāti attho. Uttarivimuttiṃ appaṭivijjhatoti lokuttaradhammaṃ appaṭivijjhantassa. Yo pana paṭivijjhituṃ sakkoti, tassa arahattaparamāva mettā hotīti attho. Karuṇādīsupi eseva nayo.
ਕਸ੍ਮਾ ਪਨੇਤਾਸਂ ਮੇਤ੍ਤਾਦੀਨਂ ਸੁਭਪਰਮਾਦਿਤਾ વੁਤ੍ਤਾ ਭਗવਤਾਤਿ? ਸਭਾਗવਸੇਨ ਤਸ੍ਸ ਤਸ੍ਸ ਉਪਨਿਸ੍ਸਯਤ੍ਤਾ। ਮੇਤ੍ਤਾવਿਹਾਰਿਸ੍ਸ ਹਿ ਸਤ੍ਤਾ ਅਪ੍ਪਟਿਕੂਲਾ ਹੋਨ੍ਤਿ, ਅਥਸ੍ਸ ਅਪ੍ਪਟਿਕੂਲਪਰਿਚਯਾ ਅਪ੍ਪਟਿਕੂਲੇਸੁ ਪਰਿਸੁਦ੍ਧવਣ੍ਣੇਸੁ ਨੀਲਾਦੀਸੁ ਚਿਤ੍ਤਂ ਉਪਸਂਹਰਤੋ ਅਪ੍ਪਕਸਿਰੇਨੇવ ਤਤ੍ਥ ਚਿਤ੍ਤਂ ਪਕ੍ਖਨ੍ਦਤਿ। ਇਤਿ ਮੇਤ੍ਤਾ ਸੁਭવਿਮੋਕ੍ਖਸ੍ਸ ਉਪਨਿਸ੍ਸਯੋ ਹੋਤਿ, ਨ ਤਤੋ ਪਰਂ, ਤਸ੍ਮਾ ਸੁਭਪਰਮਾਤਿ વੁਤ੍ਤਾ।
Kasmā panetāsaṃ mettādīnaṃ subhaparamāditā vuttā bhagavatāti? Sabhāgavasena tassa tassa upanissayattā. Mettāvihārissa hi sattā appaṭikūlā honti, athassa appaṭikūlaparicayā appaṭikūlesu parisuddhavaṇṇesu nīlādīsu cittaṃ upasaṃharato appakasireneva tattha cittaṃ pakkhandati. Iti mettā subhavimokkhassa upanissayo hoti, na tato paraṃ, tasmā subhaparamāti vuttā.
ਕਰੁਣਾવਿਹਾਰਿਸ੍ਸ ਉਣ੍ਹਾਭਿਘਾਤਾਦਿਰੂਪਨਿਮਿਤ੍ਤਂ ਸਤ੍ਤਦੁਕ੍ਖਂ ਸਮਨੁਪਸ੍ਸਨ੍ਤਸ੍ਸ ਕਰੁਣਾਯ ਪવਤ੍ਤਿਸਮ੍ਭવਤੋ ਰੂਪੇ ਆਦੀਨવੋ ਪਰਿવਿਦਿਤੋ ਹੋਤਿ , ਅਥਸ੍ਸ ਪਰਿવਿਦਿਤਰੂਪਾਦੀਨવਤ੍ਤਾ ਪਥવੀਕਸਿਣਾਦੀਸੁ ਅਞ੍ਞਤਰਂ ਉਗ੍ਘਾਟੇਤ੍વਾ ਰੂਪਨਿਸ੍ਸਰਣੇ ਆਕਾਸੇ ਚਿਤ੍ਤਂ ਉਪਸਂਹਰਤੋ ਅਪ੍ਪਕਸਿਰੇਨੇવ ਤਤ੍ਥ ਚਿਤ੍ਤਂ ਪਕ੍ਖਨ੍ਦਤਿ। ਇਤਿ ਕਰੁਣਾ ਆਕਾਸਾਨਞ੍ਚਾਯਤਨਸ੍ਸ ਉਪਨਿਸ੍ਸਯੋ ਹੋਤਿ, ਨ ਤਤੋ ਪਰਂ, ਤਸ੍ਮਾ ਆਕਾਸਾਨਞ੍ਚਾਯਤਨਪਰਮਾਤਿ વੁਤ੍ਤਾ।
Karuṇāvihārissa uṇhābhighātādirūpanimittaṃ sattadukkhaṃ samanupassantassa karuṇāya pavattisambhavato rūpe ādīnavo parividito hoti , athassa parividitarūpādīnavattā pathavīkasiṇādīsu aññataraṃ ugghāṭetvā rūpanissaraṇe ākāse cittaṃ upasaṃharato appakasireneva tattha cittaṃ pakkhandati. Iti karuṇā ākāsānañcāyatanassa upanissayo hoti, na tato paraṃ, tasmā ākāsānañcāyatanaparamāti vuttā.
ਮੁਦਿਤਾવਿਹਾਰਿਸ੍ਸ ਪਨ ਤੇਨ ਤੇਨ ਪਾਮੋਜ੍ਜਕਾਰਣੇਨ ਉਪ੍ਪਨ੍ਨਪਾਮੋਜ੍ਜਸਤ੍ਤਾਨਂ વਿਞ੍ਞਾਣਂ ਸਮਨੁਪਸ੍ਸਨ੍ਤਸ੍ਸ ਮੁਦਿਤਾਯ ਪવਤ੍ਤਿਸਮ੍ਭવਤੋ વਿਞ੍ਞਾਣਗ੍ਗਹਣਪਰਿਚਿਤਂ ਹੋਤਿ, ਅਥਸ੍ਸ ਅਨੁਕ੍ਕਮਾਧਿਗਤਂ ਆਕਾਸਾਨਞ੍ਚਾਯਤਨਂ ਅਤਿਕ੍ਕਮ੍ਮ ਆਕਾਸਨਿਮਿਤ੍ਤਗੋਚਰੇ વਿਞ੍ਞਾਣੇ ਚਿਤ੍ਤਂ ਉਪਸਂਹਰਤੋ ਅਪ੍ਪਕਸਿਰੇਨੇવ ਤਤ੍ਥ ਚਿਤ੍ਤਂ ਪਕ੍ਖਨ੍ਦਤਿ। ਇਤਿ ਮੁਦਿਤਾ વਿਞ੍ਞਾਣਞ੍ਚਾਯਤਨਸ੍ਸ ਉਪਨਿਸ੍ਸਯੋ ਹੋਤਿ, ਨ ਤਤੋ ਪਰਂ, ਤਸ੍ਮਾ વਿਞ੍ਞਾਣਞ੍ਚਾਯਤਨਪਰਮਾਤਿ વੁਤ੍ਤਾ।
Muditāvihārissa pana tena tena pāmojjakāraṇena uppannapāmojjasattānaṃ viññāṇaṃ samanupassantassa muditāya pavattisambhavato viññāṇaggahaṇaparicitaṃ hoti, athassa anukkamādhigataṃ ākāsānañcāyatanaṃ atikkamma ākāsanimittagocare viññāṇe cittaṃ upasaṃharato appakasireneva tattha cittaṃ pakkhandati. Iti muditā viññāṇañcāyatanassa upanissayo hoti, na tato paraṃ, tasmā viññāṇañcāyatanaparamāti vuttā.
ਉਪੇਕ੍ਖਾવਿਹਾਰਿਸ੍ਸ ਪਨ ‘‘ਸਤ੍ਤਾ ਸੁਖਿਤਾ વਾ ਹੋਨ੍ਤੁ, ਦੁਕ੍ਖਤੋ વਾ વਿਮੁਚ੍ਚਨ੍ਤੁ, ਸਮ੍ਪਤ੍ਤਸੁਖਤੋ વਾ ਮਾ વਿਗਚ੍ਛਨ੍ਤੂ’’ਤਿ ਆਭੋਗਾਭਾવਤੋ ਸੁਖਦੁਕ੍ਖਾਦਿਪਰਮਤ੍ਥਗਾਹવਿਮੁਖਸਮ੍ਭવਤੋ ਅવਿਜ੍ਜਮਾਨਗ੍ਗਹਣਦੁਕ੍ਖਚਿਤ੍ਤਂ ਹੋਤਿ। ਅਥਸ੍ਸ ਪਰਮਤ੍ਥਗਾਹਤੋ વਿਮੁਖਭਾવਪਰਿਚਿਤਚਿਤ੍ਤਸ੍ਸ ਪਰਮਤ੍ਥਤੋ ਅવਿਜ੍ਜਮਾਨਗ੍ਗਹਣਦੁਕ੍ਖਚਿਤ੍ਤਸ੍ਸ ਚ ਅਨੁਕ੍ਕਮਾਧਿਗਤਂ વਿਞ੍ਞਾਣਾਞ੍ਚਾਯਤਨਂ ਸਮਤਿਕ੍ਕਮ੍ਮਸਮ੍ਭવਤੋ ਅવਿਜ੍ਜਮਾਨੇ ਪਰਮਤ੍ਥਭੂਤਸ੍ਸ વਿਞ੍ਞਾਣਸ੍ਸ ਅਭਾવੇ ਚਿਤ੍ਤਂ ਉਪਸਂਹਰਤੋ ਅਪ੍ਪਕਸਿਰੇਨੇવ ਤਤ੍ਥ ਚਿਤ੍ਤਂ ਪਕ੍ਖਨ੍ਦਤਿ। ਇਤਿ ਉਪੇਕ੍ਖਾ ਆਕਿਞ੍ਚਞ੍ਞਾਯਤਨਸ੍ਸ ਉਪਨਿਸ੍ਸਯੋ ਹੋਤਿ, ਨ ਤਤੋ ਪਰਂ, ਤਸ੍ਮਾ ਆਕਿਞ੍ਚਞ੍ਞਾਯਤਨਪਰਮਾਤਿ વੁਤ੍ਤਾ। ਦੇਸਨਾਪਰਿਯੋਸਾਨੇ ਪਞ੍ਚਸਤਾ ਭਿਕ੍ਖੂ ਅਰਹਤ੍ਤਂ ਪਤ੍ਤਾਤਿ।
Upekkhāvihārissa pana ‘‘sattā sukhitā vā hontu, dukkhato vā vimuccantu, sampattasukhato vā mā vigacchantū’’ti ābhogābhāvato sukhadukkhādiparamatthagāhavimukhasambhavato avijjamānaggahaṇadukkhacittaṃ hoti. Athassa paramatthagāhato vimukhabhāvaparicitacittassa paramatthato avijjamānaggahaṇadukkhacittassa ca anukkamādhigataṃ viññāṇāñcāyatanaṃ samatikkammasambhavato avijjamāne paramatthabhūtassa viññāṇassa abhāve cittaṃ upasaṃharato appakasireneva tattha cittaṃ pakkhandati. Iti upekkhā ākiñcaññāyatanassa upanissayo hoti, na tato paraṃ, tasmā ākiñcaññāyatanaparamāti vuttā. Desanāpariyosāne pañcasatā bhikkhū arahattaṃ pattāti.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੪. ਮੇਤ੍ਤਾਸਹਗਤਸੁਤ੍ਤਂ • 4. Mettāsahagatasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੪. ਮੇਤ੍ਤਾਸਹਗਤਸੁਤ੍ਤવਣ੍ਣਨਾ • 4. Mettāsahagatasuttavaṇṇanā
