| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
২. মেত্তসুত্তং
2. Mettasuttaṃ
২২. ৰুত্তঞ্হেতং ভগৰতা, ৰুত্তমরহতাতি মে সুতং –
22. Vuttañhetaṃ bhagavatā, vuttamarahatāti me sutaṃ –
‘‘মা, ভিক্খৰে, পুঞ্ঞানং ভাযিত্থ । সুখস্সেতং, ভিক্খৰে, অধিৰচনং ইট্ঠস্স কন্তস্স পিযস্স মনাপস্স যদিদং পুঞ্ঞানি 1। অভিজানামি খো পনাহং, ভিক্খৰে, দীঘরত্তং কতানং পুঞ্ঞানং ইট্ঠং কন্তং পিযং মনাপং ৰিপাকং পচ্চনুভূতং। সত্ত ৰস্সানি মেত্তচিত্তং ভাৰেত্ৰা সত্ত সংৰট্টৰিৰট্টকপ্পে নযিমং লোকং পুনরাগমাসিং। সংৰট্টমানে সুদং, ভিক্খৰে, কপ্পে আভস্সরূপগো হোমি; ৰিৰট্টমানে কপ্পে সুঞ্ঞং ব্রহ্মৰিমানং উপপজ্জামি।
‘‘Mā, bhikkhave, puññānaṃ bhāyittha . Sukhassetaṃ, bhikkhave, adhivacanaṃ iṭṭhassa kantassa piyassa manāpassa yadidaṃ puññāni 2. Abhijānāmi kho panāhaṃ, bhikkhave, dīgharattaṃ katānaṃ puññānaṃ iṭṭhaṃ kantaṃ piyaṃ manāpaṃ vipākaṃ paccanubhūtaṃ. Satta vassāni mettacittaṃ bhāvetvā satta saṃvaṭṭavivaṭṭakappe nayimaṃ lokaṃ punarāgamāsiṃ. Saṃvaṭṭamāne sudaṃ, bhikkhave, kappe ābhassarūpago homi; vivaṭṭamāne kappe suññaṃ brahmavimānaṃ upapajjāmi.
‘‘তত্র সুদং, ভিক্খৰে, ব্রহ্মা হোমি মহাব্রহ্মা অভিভূ অনভিভূতো অঞ্ঞদত্থুদসো ৰসৰত্তী। ছত্তিংসক্খত্তুং খো পনাহং, ভিক্খৰে, সক্কো অহোসিং দেৰানমিন্দো; অনেকসতক্খত্তুং রাজা অহোসিং চক্কৰত্তী ধম্মিকো ধম্মরাজা চাতুরন্তো ৰিজিতাৰী জনপদত্থাৰরিযপ্পত্তো সত্তরতনসমন্নাগতো। কো পন ৰাদো পদেসরজ্জস্স!
‘‘Tatra sudaṃ, bhikkhave, brahmā homi mahābrahmā abhibhū anabhibhūto aññadatthudaso vasavattī. Chattiṃsakkhattuṃ kho panāhaṃ, bhikkhave, sakko ahosiṃ devānamindo; anekasatakkhattuṃ rājā ahosiṃ cakkavattī dhammiko dhammarājā cāturanto vijitāvī janapadatthāvariyappatto sattaratanasamannāgato. Ko pana vādo padesarajjassa!
‘‘তস্স ময্হং, ভিক্খৰে, এতদহোসি – ‘কিস্স নু খো মে ইদং কম্মস্স ফলং, কিস্স কম্মস্স ৰিপাকো, যেনাহং এতরহি এৰংমহিদ্ধিকো এৰংমহানুভাৰো’তি? তস্স ময্হং, ভিক্খৰে, এতদহোসি – ‘তিণ্ণং খো মে ইদং কম্মানং ফলং, তিণ্ণং কম্মানং ৰিপাকো, যেনাহং এতরহি এৰংমহিদ্ধিকো এৰংমহানুভাৰোতি, সেয্যথিদং 3 – দানস্স, দমস্স, সঞ্ঞমস্সা’’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Tassa mayhaṃ, bhikkhave, etadahosi – ‘kissa nu kho me idaṃ kammassa phalaṃ, kissa kammassa vipāko, yenāhaṃ etarahi evaṃmahiddhiko evaṃmahānubhāvo’ti? Tassa mayhaṃ, bhikkhave, etadahosi – ‘tiṇṇaṃ kho me idaṃ kammānaṃ phalaṃ, tiṇṇaṃ kammānaṃ vipāko, yenāhaṃ etarahi evaṃmahiddhiko evaṃmahānubhāvoti, seyyathidaṃ 4 – dānassa, damassa, saññamassā’’’ti. Etamatthaṃ bhagavā avoca. Tatthetaṃ iti vuccati –
‘‘পুঞ্ঞমেৰ সো সিক্খেয্য, আযতগ্গং সুখুদ্রযং।
‘‘Puññameva so sikkheyya, āyataggaṃ sukhudrayaṃ;
দানঞ্চ সমচরিযঞ্চ, মেত্তচিত্তঞ্চ ভাৰযে॥
Dānañca samacariyañca, mettacittañca bhāvaye.
অযম্পি অত্থো ৰুত্তো ভগৰতা, ইতি মে সুতন্তি। দুতিযং।
Ayampi attho vutto bhagavatā, iti me sutanti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ২. মেত্তসুত্তৰণ্ণনা • 2. Mettasuttavaṇṇanā
