| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
9. மெத்தஸுத்தவண்ணனா
9. Mettasuttavaṇṇanā
62. நவமே மா, பி⁴க்க²வே, புஞ்ஞானங் பா⁴யித்தா²தி புஞ்ஞானி கரொந்தா தேஸங் மா பா⁴யித்த². மெத்தசித்தங் பா⁴வேஸிந்தி திகசதுக்கஜ்ஜா²னிகாய மெத்தாய ஸம்பயுத்தங் பணீதங் கத்வா சித்தங் பா⁴வேஸிந்தி த³ஸ்ஸேதி. ஸங்வட்டமானே ஸுதா³ஹந்தி ஸங்வட்டமானே ஸுத³ங் அஹங். ஸங்வட்டமானேதி ஜா²யமானே விபஜ்ஜமானே. த⁴ம்மிகோதி த³ஸகுஸலத⁴ம்மஸமன்னாக³தோ. த⁴ம்மராஜாதி தஸ்ஸேவ வேவசனங். த⁴ம்மேன வா லத்³த⁴ரஜ்ஜத்தா த⁴ம்மராஜா. சாதுரந்தோதி புரத்தி²மஸமுத்³தா³தீ³னங் சதுன்னங் ஸமுத்³தா³னங் வஸேன சாதுரந்தாய பத²வியா இஸ்ஸரோ. விஜிதாவீதி விஜிதஸங்கா³மோ. ஜனபதோ³ தஸ்மிங் தா²வரியங் தி²ரபா⁴வங் பத்தோதி ஜனபத³த்தா²வரியப்பத்தோ. பரோஸஹஸ்ஸந்தி அதிரேகஸஹஸ்ஸங். ஸூராதி அபீ⁴ருனோ. வீரங்க³ரூபாதி வீரானங் அங்க³ங் வீரங்க³ங், வீரியஸ்ஸேதங் நாமங். வீரங்க³ரூபமேதேஸந்தி வீரங்க³ரூபா. வீரியஜாதிகா வீரியஸபா⁴வா வீரியமயா விய அகிலாஸுனோ தி³வஸம்பி யுஜ்ஜ²ந்தா ந கிலமந்தீதி வுத்தங் ஹோதி. ஸாக³ரபரியந்தந்தி சக்கவாளபப்³ப³தங் ஸீமங் கத்வா டி²தஸமுத்³த³பரியந்தங். அத³ண்டே³னாதி த⁴னத³ண்டே³னபி சே²ஜ்ஜபே⁴ஜ்ஜானுஸாஸனேன ஸத்த²த³ண்டே³னபி வினாயேவ. அஸத்தே²னாதி ஏகதோதா⁴ராதி³னா பரவிஹேட²னஸத்தே²னபி வினாயேவ. த⁴ம்மேன அபி⁴விஜியாதி ஏஹி கோ², மஹாராஜாதி ஏவங் படிராஜூஹி ஸம்படிச்சி²தாக³மனோ ‘‘பாணோ ந ஹந்தப்³போ³’’திஆதி³னா த⁴ம்மேனேவ வுத்தப்பகாரங் பத²விங் அபி⁴விஜினித்வா.
62. Navame mā, bhikkhave, puññānaṃ bhāyitthāti puññāni karontā tesaṃ mā bhāyittha. Mettacittaṃ bhāvesinti tikacatukkajjhānikāya mettāya sampayuttaṃ paṇītaṃ katvā cittaṃ bhāvesinti dasseti. Saṃvaṭṭamāne sudāhanti saṃvaṭṭamāne sudaṃ ahaṃ. Saṃvaṭṭamāneti jhāyamāne vipajjamāne. Dhammikoti dasakusaladhammasamannāgato. Dhammarājāti tasseva vevacanaṃ. Dhammena vā laddharajjattā dhammarājā. Cāturantoti puratthimasamuddādīnaṃ catunnaṃ samuddānaṃ vasena cāturantāya pathaviyā issaro. Vijitāvīti vijitasaṅgāmo. Janapado tasmiṃ thāvariyaṃ thirabhāvaṃ pattoti janapadatthāvariyappatto. Parosahassanti atirekasahassaṃ. Sūrāti abhīruno. Vīraṅgarūpāti vīrānaṃ aṅgaṃ vīraṅgaṃ, vīriyassetaṃ nāmaṃ. Vīraṅgarūpametesanti vīraṅgarūpā. Vīriyajātikā vīriyasabhāvā vīriyamayā viya akilāsuno divasampi yujjhantā na kilamantīti vuttaṃ hoti. Sāgarapariyantanti cakkavāḷapabbataṃ sīmaṃ katvā ṭhitasamuddapariyantaṃ. Adaṇḍenāti dhanadaṇḍenapi chejjabhejjānusāsanena satthadaṇḍenapi vināyeva. Asatthenāti ekatodhārādinā paraviheṭhanasatthenapi vināyeva. Dhammena abhivijiyāti ehi kho, mahārājāti evaṃ paṭirājūhi sampaṭicchitāgamano ‘‘pāṇo na hantabbo’’tiādinā dhammeneva vuttappakāraṃ pathaviṃ abhivijinitvā.
ஸுகே²ஸினோதி ஸுக²பரியேஸகே ஸத்தே ஆமந்தேதி. ஸுஞ்ஞப்³ரஹ்மூபகோ³தி ஸுஞ்ஞப்³ரஹ்மவிமானூபகோ³. பத²விங் இமந்தி இமங் ஸாக³ரபரியந்தங் மஹாபத²விங். அஸாஹஸேனாதி ந ஸாஹஸிககம்மேன. ஸமேன மனுஸாஸிதந்தி ஸமேன கம்மேன அனுஸாஸிங். தேஹி ஏதங் ஸுதே³ஸிதந்தி தேஹி ஸங்கா³ஹகேஹி மஹாகாருணிகேஹி பு³த்³தே⁴ஹி ஏதங் எத்தகங் டா²னங் ஸுதே³ஸிதங் ஸுகதி²தங். பத²ப்³யோதி புத²விஸாமிகோ.
Sukhesinoti sukhapariyesake satte āmanteti. Suññabrahmūpagoti suññabrahmavimānūpago. Pathaviṃ imanti imaṃ sāgarapariyantaṃ mahāpathaviṃ. Asāhasenāti na sāhasikakammena. Samena manusāsitanti samena kammena anusāsiṃ. Tehi etaṃ sudesitanti tehi saṅgāhakehi mahākāruṇikehi buddhehi etaṃ ettakaṃ ṭhānaṃ sudesitaṃ sukathitaṃ. Pathabyoti puthavisāmiko.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. மெத்தஸுத்தங் • 9. Mettasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 9. மெத்தஸுத்தவண்ணனா • 9. Mettasuttavaṇṇanā
