| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
அங்கு³த்தரனிகாயே
Aṅguttaranikāye
அட்ட²கனிபாத-அட்ட²கதா²
Aṭṭhakanipāta-aṭṭhakathā
1. பட²மபண்ணாஸகங்
1. Paṭhamapaṇṇāsakaṃ
1. மெத்தாவக்³கோ³
1. Mettāvaggo
1. மெத்தாஸுத்தவண்ணனா
1. Mettāsuttavaṇṇanā
1. அட்ட²கனிபாதஸ்ஸ பட²மே ஆஸேவிதாயாதி ஆத³ரேன ஸேவிதாய. பா⁴விதாயாதி வட்³டி⁴தாய. ப³ஹுலீகதாயாதி புனப்புனங் கதாய. யானிகதாயாதி யுத்தயானஸதி³ஸகதாய. வத்து²கதாயாதி பதிட்டா²னட்டே²ன வத்து² விய கதாய. அனுட்டி²தாயாதி பச்சுபட்டி²தாய. பரிசிதாயாதி ஸமந்ததோ சிதாய உபசிதாய. ஸுஸமாரத்³தா⁴யாதி ஸுட்டு² ஸமாரத்³தா⁴ய ஸுகதாய. ஆனிஸங்ஸாதி கு³ணா. ஸுக²ங் ஸுபதீதிஆதீ³ஸு யங் வத்தப்³ப³ங், தங் ஏகாத³ஸகனிபாதே வக்கா²ம.
1. Aṭṭhakanipātassa paṭhame āsevitāyāti ādarena sevitāya. Bhāvitāyāti vaḍḍhitāya. Bahulīkatāyāti punappunaṃ katāya. Yānikatāyāti yuttayānasadisakatāya. Vatthukatāyāti patiṭṭhānaṭṭhena vatthu viya katāya. Anuṭṭhitāyāti paccupaṭṭhitāya. Paricitāyāti samantato citāya upacitāya. Susamāraddhāyāti suṭṭhu samāraddhāya sukatāya. Ānisaṃsāti guṇā. Sukhaṃ supatītiādīsu yaṃ vattabbaṃ, taṃ ekādasakanipāte vakkhāma.
அப்பமாணந்தி ப²ரணவஸேன அப்பமாணங். தனூ ஸங்யோஜனா ஹொந்தி, பஸ்ஸதோ உபதி⁴க்க²யந்தி மெத்தாபத³ட்டா²னாய விபஸ்ஸனாய அனுக்கமேன உபதி⁴க்க²யஸங்கா²தங் அரஹத்தங் பத்தஸ்ஸ த³ஸ ஸங்யோஜனா பஹீயந்தீதி அத்தோ². அத² வா தனூ ஸங்யோஜனா ஹொந்தீதி படிக⁴ஞ்சேவ படிக⁴ஸம்பயுத்தஸங்யோஜனா ச தனுகா ஹொந்தி. பஸ்ஸதோ உபதி⁴க்க²யந்தி தேஸங்யேவ கிலேஸூபதீ⁴னங் க²யஸங்கா²தங் மெத்தங் அதி⁴க³மவஸேன பஸ்ஸந்தஸ்ஸ. குஸலீ தேன ஹோதீதி தேன மெத்தாயனேன குஸலோ ஹோதி. ஸத்தஸண்ட³ந்தி ஸத்தஸங்கா²தேன ஸண்டே³ன ஸமன்னாக³தங், ஸத்தப⁴ரிதந்தி அத்தோ². விஜெத்வாதி அத³ண்டே³ன அஸத்தே²ன த⁴ம்மேனேவ விஜினித்வா. ராஜிஸயோதி இஸிஸதி³ஸா த⁴ம்மிகராஜானோ. யஜமானாதி தா³னானி த³த³மானா. அனுபரியகா³தி விசரிங்ஸு.
Appamāṇanti pharaṇavasena appamāṇaṃ. Tanū saṃyojanā honti, passato upadhikkhayanti mettāpadaṭṭhānāya vipassanāya anukkamena upadhikkhayasaṅkhātaṃ arahattaṃ pattassa dasa saṃyojanā pahīyantīti attho. Atha vā tanū saṃyojanā hontīti paṭighañceva paṭighasampayuttasaṃyojanā ca tanukā honti. Passato upadhikkhayanti tesaṃyeva kilesūpadhīnaṃ khayasaṅkhātaṃ mettaṃ adhigamavasena passantassa. Kusalī tena hotīti tena mettāyanena kusalo hoti. Sattasaṇḍanti sattasaṅkhātena saṇḍena samannāgataṃ, sattabharitanti attho. Vijetvāti adaṇḍena asatthena dhammeneva vijinitvā. Rājisayoti isisadisā dhammikarājāno. Yajamānāti dānāni dadamānā. Anupariyagāti vicariṃsu.
அஸ்ஸமேத⁴ந்திஆதீ³ஸு போராணகராஜகாலே கிர ஸஸ்ஸமேத⁴ங், புரிஸமேத⁴ங், ஸம்மாபாஸங், வாசாபெய்யந்தி சத்தாரி ஸங்க³ஹவத்தூ²னி அஹேஸுங், யேஹி ராஜானோ லோகங் ஸங்க³ண்ஹிங்ஸு. தத்த² நிப்ப²ன்னஸஸ்ஸதோ த³ஸமபா⁴க³க்³க³ஹணங் ஸஸ்ஸமேத⁴ங் நாம, ஸஸ்ஸஸம்பாத³னே மேதா⁴விதாதி அத்தோ². மஹாயோதா⁴னங் ச²மாஸிகங் ப⁴த்தவேதனானுப்பதா³னங் புரிஸமேத⁴ங் நாம, புரிஸஸங்க³ண்ஹனே மேதா⁴விதாதி அத்தோ². த³லித்³த³மனுஸ்ஸானங் ஹத்த²தோ லேக²ங் க³ஹெத்வா தீணி வஸ்ஸானி வினா வட்³டி⁴யா ஸஹஸ்ஸத்³விஸஹஸ்ஸமத்தத⁴னானுப்பதா³னங் ஸம்மாபாஸங் நாம. தஞ்ஹி ஸம்மா மனுஸ்ஸே பாஸேதி ஹத³யே ப³ந்தி⁴த்வா விய ட²பேதி, தஸ்மா ஸம்மாபாஸந்தி வுச்சதி. ‘‘தாத, மாதுலா’’திஆதி³னா நயேன பன ஸண்ஹவாசாப⁴ணனங் வாசாபெய்யங் நாம, பியவாசாதி அத்தோ². ஏவங் சதூஹி ஸங்க³ஹவத்தூ²ஹி ஸங்க³ஹிதங் ரட்ட²ங் இத்³த⁴ஞ்சேவ ஹோதி, பீ²தஞ்ச, ப³ஹுஅன்னபானங், கே²மங், நிரப்³பு³த³ங். மனுஸ்ஸா முதா³ மோத³மானா உரே புத்தே நச்செந்தா அபாருதக⁴ரா விஹரந்தி. இத³ங் க⁴ரத்³வாரேஸு அக்³க³ளானங் அபா⁴வதோ நிரக்³க³ளந்தி வுச்சதி. அயங் போராணிகா பவேணி.
Assamedhantiādīsu porāṇakarājakāle kira sassamedhaṃ, purisamedhaṃ, sammāpāsaṃ, vācāpeyyanti cattāri saṅgahavatthūni ahesuṃ, yehi rājāno lokaṃ saṅgaṇhiṃsu. Tattha nipphannasassato dasamabhāgaggahaṇaṃ sassamedhaṃ nāma, sassasampādane medhāvitāti attho. Mahāyodhānaṃ chamāsikaṃ bhattavetanānuppadānaṃ purisamedhaṃ nāma, purisasaṅgaṇhane medhāvitāti attho. Daliddamanussānaṃ hatthato lekhaṃ gahetvā tīṇi vassāni vinā vaḍḍhiyā sahassadvisahassamattadhanānuppadānaṃ sammāpāsaṃ nāma. Tañhi sammā manusse pāseti hadaye bandhitvā viya ṭhapeti, tasmā sammāpāsanti vuccati. ‘‘Tāta, mātulā’’tiādinā nayena pana saṇhavācābhaṇanaṃ vācāpeyyaṃ nāma, piyavācāti attho. Evaṃ catūhi saṅgahavatthūhi saṅgahitaṃ raṭṭhaṃ iddhañceva hoti, phītañca, bahuannapānaṃ, khemaṃ, nirabbudaṃ. Manussā mudā modamānā ure putte naccentā apārutagharā viharanti. Idaṃ gharadvāresu aggaḷānaṃ abhāvato niraggaḷanti vuccati. Ayaṃ porāṇikā paveṇi.
அபரபா⁴கே³ பன ஓக்காகராஜகாலே ப்³ராஹ்மணா இமானி சத்தாரி ஸங்க³ஹவத்தூ²னி இமஞ்ச ரட்ட²ஸம்பத்திங் பரிவத்தெத்வா உத்³த⁴ங்மூலகங் கத்வா அஸ்ஸமேத⁴ங் புரிஸமேத⁴ந்திஆதி³கே பஞ்ச யஞ்ஞே நாம அகங்ஸு. தேஸு அஸ்ஸமெத்த² மேத⁴ந்தி வதெ⁴ந்தீதி அஸ்ஸமேதோ⁴. த்³வீஹி பரியஞ்ஞேஹி யஜிதப்³ப³ஸ்ஸ ஏகவீஸதியூபஸ்ஸ ஏகஸ்மிங் பச்சி²மதி³வஸேயேவ ஸத்தனவுதிபஞ்சபஸுஸதகா⁴தபி⁴ங்ஸனஸ்ஸ ட²பெத்வா பூ⁴மிஞ்ச புரிஸே ச அவஸேஸஸப்³ப³விப⁴வத³க்கி²ணஸ்ஸ யஞ்ஞஸ்ஸேதங் அதி⁴வசனங். புரிஸமெத்த² மேத⁴ந்தீதி புரிஸமேதோ⁴. சதூஹி பரியஞ்ஞேஹி யஜிதப்³ப³ஸ்ஸ ஸத்³தி⁴ங் பூ⁴மியா அஸ்ஸமேதே⁴ வுத்தவிப⁴வத³க்கி²ணஸ்ஸ யஞ்ஞஸ்ஸேதங் அதி⁴வசனங். ஸம்மமெத்த² பாஸந்தீதி ஸம்மாபாஸோ. தி³வஸே தி³வஸே யுக³ச்சி²க்³க³ளே பவேஸனத³ண்ட³கஸங்கா²தங் ஸம்மங் கி²பித்வா தஸ்ஸ பதிதோகாஸே வேதி³ங் கத்வா ஸங்ஹாரிமேஹி யூபாதீ³ஹி ஸரஸ்ஸதீனதி³யா நிமுக்³கோ³காஸதோ பபு⁴தி படிலோமங் க³ச்ச²ந்தேன யஜிதப்³ப³ஸ்ஸ ஸத்ரயாக³ஸ்ஸேதங் அதி⁴வசனங். வாஜமெத்த² பிவந்தீதி வாஜபெய்யோ. ஏகேன பரியஞ்ஞேன ஸத்தரஸஹி பஸூஹி யஜிதப்³ப³ஸ்ஸ பே³லுவயூபஸ்ஸ ஸத்தரஸகத³க்கி²ணஸ்ஸ யஞ்ஞஸ்ஸேதங் அதி⁴வசனங். நத்தி² எத்த² அக்³க³ளாதி நிரக்³க³ளோ. நவஹி பரியஞ்ஞேஹி யஜிதப்³ப³ஸ்ஸ ஸத்³தி⁴ங் பூ⁴மியா ச புரிஸேஹி ச அஸ்ஸமேதே⁴ வுத்தவிப⁴வத³க்கி²ணஸ்ஸ ஸப்³ப³மேத⁴பரியாயனாமஸ்ஸ அஸ்ஸமேத⁴விகப்பஸ்ஸேதங் அதி⁴வசனங்.
Aparabhāge pana okkākarājakāle brāhmaṇā imāni cattāri saṅgahavatthūni imañca raṭṭhasampattiṃ parivattetvā uddhaṃmūlakaṃ katvā assamedhaṃ purisamedhantiādike pañca yaññe nāma akaṃsu. Tesu assamettha medhanti vadhentīti assamedho. Dvīhi pariyaññehi yajitabbassa ekavīsatiyūpassa ekasmiṃ pacchimadivaseyeva sattanavutipañcapasusataghātabhiṃsanassa ṭhapetvā bhūmiñca purise ca avasesasabbavibhavadakkhiṇassa yaññassetaṃ adhivacanaṃ. Purisamettha medhantīti purisamedho. Catūhi pariyaññehi yajitabbassa saddhiṃ bhūmiyā assamedhe vuttavibhavadakkhiṇassa yaññassetaṃ adhivacanaṃ. Sammamettha pāsantīti sammāpāso. Divase divase yugacchiggaḷe pavesanadaṇḍakasaṅkhātaṃ sammaṃ khipitvā tassa patitokāse vediṃ katvā saṃhārimehi yūpādīhi sarassatīnadiyā nimuggokāsato pabhuti paṭilomaṃ gacchantena yajitabbassa satrayāgassetaṃ adhivacanaṃ. Vājamettha pivantīti vājapeyyo. Ekena pariyaññena sattarasahi pasūhi yajitabbassa beluvayūpassa sattarasakadakkhiṇassa yaññassetaṃ adhivacanaṃ. Natthi ettha aggaḷāti niraggaḷo. Navahi pariyaññehi yajitabbassa saddhiṃ bhūmiyā ca purisehi ca assamedhe vuttavibhavadakkhiṇassa sabbamedhapariyāyanāmassa assamedhavikappassetaṃ adhivacanaṃ.
கலம்பி தே நானுப⁴வந்தி ஸோளஸிந்தி தே ஸப்³பே³பி மஹாயாகா³ ஏகஸ்ஸ மெத்தாசித்தஸ்ஸ விபாகமஹந்ததாய ஸோளஸிங் கலங் ந அக்³க⁴ந்தி, ஸோளஸமங் பா⁴க³ங் ந பாபுணந்தீதி அத்தோ². ந ஜினாதீதி ந அத்தனா பரஸ்ஸ ஜானிங் கரோதி. ந ஜாபயேதி ந பரேன பரஸ்ஸ ஜானிங் காரேதி. மெத்தங்ஸோதி மெத்தாயமானசித்தகொட்டா²ஸோ ஹுத்வா. ஸப்³ப³பூ⁴தானந்தி ஸப்³ப³ஸத்தேஸு. வேரங் தஸ்ஸ ந கேனசீதி தஸ்ஸ கேனசி ஸத்³தி⁴ங் அகுஸலவேரங் வா புக்³க³லவேரங் வா நத்தி².
Kalampite nānubhavanti soḷasinti te sabbepi mahāyāgā ekassa mettācittassa vipākamahantatāya soḷasiṃ kalaṃ na agghanti, soḷasamaṃ bhāgaṃ na pāpuṇantīti attho. Na jinātīti na attanā parassa jāniṃ karoti. Na jāpayeti na parena parassa jāniṃ kāreti. Mettaṃsoti mettāyamānacittakoṭṭhāso hutvā. Sabbabhūtānanti sabbasattesu. Veraṃ tassa na kenacīti tassa kenaci saddhiṃ akusalaveraṃ vā puggalaveraṃ vā natthi.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 1. மெத்தாஸுத்தங் • 1. Mettāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 1. மெத்தாஸுத்தவண்ணனா • 1. Mettāsuttavaṇṇanā
