| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
5. மெத்தஸுத்தவண்ணனா
5. Mettasuttavaṇṇanā
15. பஞ்சமே ஸுக²ங் ஸுபதீதி யதா² ஸேஸஜனா ஸம்பரிவத்தமானா காகச்ச²மானா து³க்க²ங் ஸுபந்தி, ஏவங் அஸுபித்வா ஸுக²ங் ஸுபதி. நித்³த³ங் ஓக்கமந்தோபி ஸமாபத்திங் ஸமாபன்னோ விய ஹோதி. ஸுக²ங் படிபு³ஜ்ஜ²தீதி யதா² அஞ்ஞே நித்து²னந்தா விஜம்ப⁴மானா ஸம்பரிவத்தந்தா து³க்க²ங் படிபு³ஜ்ஜ²ந்தி, ஏவங் அப்படிபு³ஜ்ஜி²த்வா விகஸமானங் விய பது³மங் ஸுக²ங் நிப்³பி³காரோ படிபு³ஜ்ஜ²தி. ந பாபகங் ஸுபினங் பஸ்ஸதீதி ஸுபினங் பஸ்ஸந்தோபி ப⁴த்³த³கமேவ ஸுபினங் பஸ்ஸதி, சேதியங் வந்த³ந்தோ விய பூஜங் கரொந்தோ விய ச த⁴ம்மங் ஸுணந்தோ விய ச ஹோதி. யதா² பனஞ்ஞே அத்தானங் சோரேஹி ஸம்பரிவாரிதங் விய வாளேஹி உபத்³து³தங் விய பபாதே பதந்தங் விய ச பஸ்ஸந்தி, ந ஏவங் பாபகங் ஸுபினங் பஸ்ஸதி.
15. Pañcame sukhaṃ supatīti yathā sesajanā samparivattamānā kākacchamānā dukkhaṃ supanti, evaṃ asupitvā sukhaṃ supati. Niddaṃ okkamantopi samāpattiṃ samāpanno viya hoti. Sukhaṃ paṭibujjhatīti yathā aññe nitthunantā vijambhamānā samparivattantā dukkhaṃ paṭibujjhanti, evaṃ appaṭibujjhitvā vikasamānaṃ viya padumaṃ sukhaṃ nibbikāro paṭibujjhati. Na pāpakaṃ supinaṃ passatīti supinaṃ passantopi bhaddakameva supinaṃ passati, cetiyaṃ vandanto viya pūjaṃ karonto viya ca dhammaṃ suṇanto viya ca hoti. Yathā panaññe attānaṃ corehi samparivāritaṃ viya vāḷehi upaddutaṃ viya papāte patantaṃ viya ca passanti, na evaṃ pāpakaṃ supinaṃ passati.
மனுஸ்ஸானங் பியோ ஹோதீதி உரே ஆமுக்கமுத்தாஹாரோ விய ஸீஸே பிளந்தி⁴தமாலா விய ச மனுஸ்ஸானங் பியோ ஹோதி மனாபோ. அமனுஸ்ஸானங் பியோ ஹோதீதி யதே²வ மனுஸ்ஸானங், அமனுஸ்ஸானம்பி பியோ ஹோதி விஸாக²த்தே²ரோ விய. வத்து² விஸுத்³தி⁴மக்³கே³ (விஸுத்³தி⁴॰ 1.258) மெத்தாகம்மட்டா²னநித்³தே³ஸே வித்தா²ரிதமேவ. தே³வதா ரக்க²ந்தீதி புத்தமிவ மாதாபிதரோ தே³வதா ரக்க²ந்தி. நாஸ்ஸ அக்³கி³ வா விஸங் வா ஸத்த²ங் வா கமதீதி மெத்தாவிஹாரிஸ்ஸ காயே உத்தராய உபாஸிகாய விய அக்³கி³ வா, ஸங்யுத்தபா⁴ணகசூளஸீவத்தே²ரஸ்ஸேவ விஸங் வா, ஸங்கிச்சஸாமணேரஸ்ஸேவ ஸத்த²ங் வா ந கமதி நப்பவிஸதி, நாஸ்ஸ காயங் விகோபேதீதி வுத்தங் ஹோதி. தே⁴னுவத்து²ம்பி செத்த² கத²யந்தி. ஏகா கிர தே⁴னு வச்ச²கஸ்ஸ கீ²ரதா⁴ரங் முஞ்சமானா அட்டா²ஸி. ஏகோ லுத்³த³கோ ‘‘தங் விஜ்ஜி²ஸ்ஸாமீ’’தி ஹத்தே²ன ஸம்பரிவத்தெத்வா தீ³க⁴த³ண்ட³ங் ஸத்திங் முஞ்சி. ஸா தஸ்ஸா ஸரீரங் ஆஹச்ச தாலபண்ணங் விய வட்டமானா க³தா , நேவ உபசாரப³லேன ந அப்பனாப³லேன, கேவலங் வச்ச²கே ப³லவஹிதசித்ததாய. ஏவங் மஹானுபா⁴வா மெத்தா.
Manussānaṃ piyo hotīti ure āmukkamuttāhāro viya sīse piḷandhitamālā viya ca manussānaṃ piyo hoti manāpo. Amanussānaṃpiyo hotīti yatheva manussānaṃ, amanussānampi piyo hoti visākhatthero viya. Vatthu visuddhimagge (visuddhi. 1.258) mettākammaṭṭhānaniddese vitthāritameva. Devatā rakkhantīti puttamiva mātāpitaro devatā rakkhanti. Nāssa aggivā visaṃ vā satthaṃ vā kamatīti mettāvihārissa kāye uttarāya upāsikāya viya aggi vā, saṃyuttabhāṇakacūḷasīvattherasseva visaṃ vā, saṃkiccasāmaṇerasseva satthaṃ vā na kamati nappavisati, nāssa kāyaṃ vikopetīti vuttaṃ hoti. Dhenuvatthumpi cettha kathayanti. Ekā kira dhenu vacchakassa khīradhāraṃ muñcamānā aṭṭhāsi. Eko luddako ‘‘taṃ vijjhissāmī’’ti hatthena samparivattetvā dīghadaṇḍaṃ sattiṃ muñci. Sā tassā sarīraṃ āhacca tālapaṇṇaṃ viya vaṭṭamānā gatā , neva upacārabalena na appanābalena, kevalaṃ vacchake balavahitacittatāya. Evaṃ mahānubhāvā mettā.
துவடங் சித்தங் ஸமாதி⁴யதீதி மெத்தாவிஹாரினோ கி²ப்பமேவ சித்தங் ஸமாதி⁴யதி, நத்தி² தஸ்ஸ த³ந்தா⁴யிதத்தங். முக²வண்ணோ விப்பஸீத³தீதி ப³ந்த⁴னா பவுத்ததாலபக்கங் விய சஸ்ஸ விப்பஸன்னவண்ணங் முக²ங் ஹோதி. அஸம்மூள்ஹோ காலங் கரோதீதி மெத்தாவிஹாரினோ ஸம்மோஹமரணங் நாம நத்தி², அஸம்மூள்ஹோ பன நித்³த³ங் ஓக்கமந்தோ விய காலங் கரோதி. உத்தரி அப்படிவிஜ்ஜ²ந்தோதி மெத்தாஸமாபத்திதோ உத்தரி அரஹத்தங் அதி⁴க³ந்துங் அஸக்கொந்தோ இதோ சவித்வா ஸுத்தப்பபு³த்³தோ⁴ விய ப்³ரஹ்மலோகங் உபபஜ்ஜதீதி.
Tuvaṭaṃ cittaṃ samādhiyatīti mettāvihārino khippameva cittaṃ samādhiyati, natthi tassa dandhāyitattaṃ. Mukhavaṇṇo vippasīdatīti bandhanā pavuttatālapakkaṃ viya cassa vippasannavaṇṇaṃ mukhaṃ hoti. Asammūḷho kālaṃ karotīti mettāvihārino sammohamaraṇaṃ nāma natthi, asammūḷho pana niddaṃ okkamanto viya kālaṃ karoti. Uttari appaṭivijjhantoti mettāsamāpattito uttari arahattaṃ adhigantuṃ asakkonto ito cavitvā suttappabuddho viya brahmalokaṃ upapajjatīti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. மெத்தாஸுத்தங் • 5. Mettāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 5. மெத்தாஸுத்தவண்ணனா • 5. Mettāsuttavaṇṇanā
