адтаганибаад̇а-адтагат̇аа

Aṭṭhakanipāta-aṭṭhakathā

1. батамабан̣н̣аасагам̣

1. Paṭhamapaṇṇāsakaṃ

1. мзд̇д̇ааваг̇г̇о

1. Mettāvaggo

1. мзд̇д̇аасуд̇д̇аван̣н̣анаа

1. Mettāsuttavaṇṇanā

1. адтаганибаад̇асса батамз аасзвид̇ааяаад̇и аад̣̇арзна сзвид̇ааяа. бхаавид̇ааяаад̇и вад̣дхид̇ааяа. б̣ахулийгад̇ааяаад̇и бунаббунам̣ гад̇ааяа. яаанигад̇ааяаад̇и яуд̇д̇аяаанасад̣̇исагад̇ааяа. вад̇т̇угад̇ааяаад̇и бад̇идтаанадтзна вад̇т̇у вияа гад̇ааяа. анудтид̇ааяаад̇и бажжубадтид̇ааяа. барижид̇ааяаад̇и саманд̇ад̇о жид̇ааяа убажид̇ааяа. сусамаарад̣̇д̇хааяаад̇и судту самаарад̣̇д̇хааяа сугад̇ааяа. аанисам̣саад̇и г̇ун̣аа. сукам̣ субад̇ийд̇иаад̣̇ийсу яам̣ вад̇д̇аб̣б̣ам̣, д̇ам̣ згаад̣̇асаганибаад̇з вагкаама.

1. Aṭṭhakanipātassa paṭhame āsevitāyāti ādarena sevitāya. Bhāvitāyāti vaḍḍhitāya. Bahulīkatāyāti punappunaṃ katāya. Yānikatāyāti yuttayānasadisakatāya. Vatthukatāyāti patiṭṭhānaṭṭhena vatthu viya katāya. Anuṭṭhitāyāti paccupaṭṭhitāya. Paricitāyāti samantato citāya upacitāya. Susamāraddhāyāti suṭṭhu samāraddhāya sukatāya. Ānisaṃsāti guṇā. Sukhaṃ supatītiādīsu yaṃ vattabbaṃ, taṃ ekādasakanipāte vakkhāma.

аббамаан̣анд̇и паран̣авасзна аббамаан̣ам̣. д̇ануу сам̣яож̇анаа хонд̇и, бассад̇о убад̇хигкаяанд̇и мзд̇д̇аабад̣̇адтаанааяа вибассанааяа ануггамзна убад̇хигкаяасан̇каад̇ам̣ арахад̇д̇ам̣ бад̇д̇асса д̣̇аса сам̣яож̇анаа бахийяанд̇ийд̇и ад̇т̇о. ат̇а ваа д̇ануу сам̣яож̇анаа хонд̇ийд̇и бадигхан̃жзва бадигхасамбаяуд̇д̇асам̣яож̇анаа жа д̇анугаа хонд̇и. бассад̇о убад̇хигкаяанд̇и д̇зсам̣язва гилзсуубад̇хийнам̣ каяасан̇каад̇ам̣ мзд̇д̇ам̣ ад̇хиг̇амавасзна бассанд̇асса. гусалий д̇зна ход̇ийд̇и д̇зна мзд̇д̇ааяанзна гусало ход̇и. сад̇д̇асан̣д̣анд̇и сад̇д̇асан̇каад̇зна сан̣д̣зна саманнааг̇ад̇ам̣, сад̇д̇абхарид̇анд̇и ад̇т̇о. виж̇зд̇ваад̇и ад̣̇ан̣д̣зна асад̇т̇зна д̇хаммзнзва виж̇инид̇ваа. рааж̇исаяод̇и исисад̣̇исаа д̇хаммигарааж̇аано. яаж̇амаанаад̇и д̣̇аанаани д̣̇ад̣̇амаанаа. анубарияаг̇аад̇и вижарим̣су.

Appamāṇanti pharaṇavasena appamāṇaṃ. Tanū saṃyojanā honti, passato upadhikkhayanti mettāpadaṭṭhānāya vipassanāya anukkamena upadhikkhayasaṅkhātaṃ arahattaṃ pattassa dasa saṃyojanā pahīyantīti attho. Atha vā tanū saṃyojanā hontīti paṭighañceva paṭighasampayuttasaṃyojanā ca tanukā honti. Passato upadhikkhayanti tesaṃyeva kilesūpadhīnaṃ khayasaṅkhātaṃ mettaṃ adhigamavasena passantassa. Kusalī tena hotīti tena mettāyanena kusalo hoti. Sattasaṇḍanti sattasaṅkhātena saṇḍena samannāgataṃ, sattabharitanti attho. Vijetvāti adaṇḍena asatthena dhammeneva vijinitvā. Rājisayoti isisadisā dhammikarājāno. Yajamānāti dānāni dadamānā. Anupariyagāti vicariṃsu.

ассамзд̇ханд̇иаад̣̇ийсу бораан̣агарааж̇агаалз гира сассамзд̇хам̣, бурисамзд̇хам̣, саммаабаасам̣, ваажаабзяяанд̇и жад̇д̇аари сан̇г̇ахавад̇т̇ууни ахзсум̣, язхи рааж̇аано логам̣ сан̇г̇ан̣хим̣су. д̇ад̇т̇а нибпаннасассад̇о д̣̇асамабхааг̇аг̇г̇ахан̣ам̣ сассамзд̇хам̣ наама, сассасамбаад̣̇анз мзд̇хаавид̇аад̇и ад̇т̇о. махааяод̇хаанам̣ чамаасигам̣ бхад̇д̇авзд̇анаануббад̣̇аанам̣ бурисамзд̇хам̣ наама, бурисасан̇г̇ан̣ханз мзд̇хаавид̇аад̇и ад̇т̇о. д̣̇алид̣̇д̣̇амануссаанам̣ хад̇т̇ад̇о лзкам̣ г̇ахзд̇ваа д̇ийн̣и вассаани винаа вад̣дхияаа сахассад̣̇висахассамад̇д̇ад̇ханаануббад̣̇аанам̣ саммаабаасам̣ наама. д̇ан̃хи саммаа мануссз баасзд̇и хад̣̇аяз б̣анд̇хид̇ваа вияа табзд̇и, д̇асмаа саммаабаасанд̇и вужжад̇и. ‘‘д̇аад̇а, маад̇улаа’’д̇иаад̣̇инаа наязна бана сан̣хаваажаабхан̣анам̣ ваажаабзяяам̣ наама, бияаваажаад̇и ад̇т̇о. звам̣ жад̇уухи сан̇г̇ахавад̇т̇уухи сан̇г̇ахид̇ам̣ радтам̣ ид̣̇д̇хан̃жзва ход̇и, пийд̇ан̃жа, б̣ахуаннабаанам̣, кзмам̣, нираб̣б̣уд̣̇ам̣. мануссаа муд̣̇аа мод̣̇амаанаа урз буд̇д̇з нажжзнд̇аа абааруд̇агхараа вихаранд̇и. ид̣̇ам̣ гхарад̣̇ваарзсу аг̇г̇ал̣аанам̣ абхаавад̇о нираг̇г̇ал̣анд̇и вужжад̇и. аяам̣ бораан̣игаа бавзн̣и.

Assamedhantiādīsu porāṇakarājakāle kira sassamedhaṃ, purisamedhaṃ, sammāpāsaṃ, vācāpeyyanti cattāri saṅgahavatthūni ahesuṃ, yehi rājāno lokaṃ saṅgaṇhiṃsu. Tattha nipphannasassato dasamabhāgaggahaṇaṃ sassamedhaṃ nāma, sassasampādane medhāvitāti attho. Mahāyodhānaṃ chamāsikaṃ bhattavetanānuppadānaṃ purisamedhaṃ nāma, purisasaṅgaṇhane medhāvitāti attho. Daliddamanussānaṃ hatthato lekhaṃ gahetvā tīṇi vassāni vinā vaḍḍhiyā sahassadvisahassamattadhanānuppadānaṃ sammāpāsaṃ nāma. Tañhi sammā manusse pāseti hadaye bandhitvā viya ṭhapeti, tasmā sammāpāsanti vuccati. ‘‘Tāta, mātulā’’tiādinā nayena pana saṇhavācābhaṇanaṃ vācāpeyyaṃ nāma, piyavācāti attho. Evaṃ catūhi saṅgahavatthūhi saṅgahitaṃ raṭṭhaṃ iddhañceva hoti, phītañca, bahuannapānaṃ, khemaṃ, nirabbudaṃ. Manussā mudā modamānā ure putte naccentā apārutagharā viharanti. Idaṃ gharadvāresu aggaḷānaṃ abhāvato niraggaḷanti vuccati. Ayaṃ porāṇikā paveṇi.

абарабхааг̇з бана оггаагарааж̇агаалз б̣раахман̣аа имаани жад̇д̇аари сан̇г̇ахавад̇т̇ууни иман̃жа радтасамбад̇д̇им̣ баривад̇д̇зд̇ваа уд̣̇д̇хам̣муулагам̣ гад̇ваа ассамзд̇хам̣ бурисамзд̇ханд̇иаад̣̇игз бан̃жа яан̃н̃з наама агам̣су. д̇зсу ассамзд̇т̇а мзд̇ханд̇и вад̇хзнд̇ийд̇и ассамзд̇хо. д̣̇вийхи барияан̃н̃зхи яаж̇ид̇аб̣б̣асса згавийсад̇ияуубасса згасмим̣ бажчимад̣̇ивасзязва сад̇д̇анавуд̇ибан̃жабасусад̇агхаад̇абхим̣санасса табзд̇ваа бхуумин̃жа бурисз жа авасзсасаб̣б̣авибхавад̣̇агкин̣асса яан̃н̃ассзд̇ам̣ ад̇хиважанам̣. бурисамзд̇т̇а мзд̇ханд̇ийд̇и бурисамзд̇хо. жад̇уухи барияан̃н̃зхи яаж̇ид̇аб̣б̣асса сад̣̇д̇хим̣ бхуумияаа ассамзд̇хз вуд̇д̇авибхавад̣̇агкин̣асса яан̃н̃ассзд̇ам̣ ад̇хиважанам̣. саммамзд̇т̇а баасанд̇ийд̇и саммаабаасо. д̣̇ивасз д̣̇ивасз яуг̇ажчиг̇г̇ал̣з бавзсанад̣̇ан̣д̣агасан̇каад̇ам̣ саммам̣ кибид̇ваа д̇асса бад̇ид̇огаасз взд̣̇им̣ гад̇ваа сам̣хааримзхи яуубаад̣̇ийхи сарассад̇ийнад̣̇ияаа нимуг̇г̇огаасад̇о бабхуд̇и бадиломам̣ г̇ажчанд̇зна яаж̇ид̇аб̣б̣асса сад̇раяааг̇ассзд̇ам̣ ад̇хиважанам̣. вааж̇амзд̇т̇а биванд̇ийд̇и вааж̇абзяяо. згзна барияан̃н̃зна сад̇д̇арасахи басуухи яаж̇ид̇аб̣б̣асса б̣злуваяуубасса сад̇д̇арасагад̣̇агкин̣асса яан̃н̃ассзд̇ам̣ ад̇хиважанам̣. над̇т̇и зд̇т̇а аг̇г̇ал̣аад̇и нираг̇г̇ал̣о. навахи барияан̃н̃зхи яаж̇ид̇аб̣б̣асса сад̣̇д̇хим̣ бхуумияаа жа бурисзхи жа ассамзд̇хз вуд̇д̇авибхавад̣̇агкин̣асса саб̣б̣амзд̇хабарияааяанаамасса ассамзд̇хавигаббассзд̇ам̣ ад̇хиважанам̣.

Aparabhāge pana okkākarājakāle brāhmaṇā imāni cattāri saṅgahavatthūni imañca raṭṭhasampattiṃ parivattetvā uddhaṃmūlakaṃ katvā assamedhaṃ purisamedhantiādike pañca yaññe nāma akaṃsu. Tesu assamettha medhanti vadhentīti assamedho. Dvīhi pariyaññehi yajitabbassa ekavīsatiyūpassa ekasmiṃ pacchimadivaseyeva sattanavutipañcapasusataghātabhiṃsanassa ṭhapetvā bhūmiñca purise ca avasesasabbavibhavadakkhiṇassa yaññassetaṃ adhivacanaṃ. Purisamettha medhantīti purisamedho. Catūhi pariyaññehi yajitabbassa saddhiṃ bhūmiyā assamedhe vuttavibhavadakkhiṇassa yaññassetaṃ adhivacanaṃ. Sammamettha pāsantīti sammāpāso. Divase divase yugacchiggaḷe pavesanadaṇḍakasaṅkhātaṃ sammaṃ khipitvā tassa patitokāse vediṃ katvā saṃhārimehi yūpādīhi sarassatīnadiyā nimuggokāsato pabhuti paṭilomaṃ gacchantena yajitabbassa satrayāgassetaṃ adhivacanaṃ. Vājamettha pivantīti vājapeyyo. Ekena pariyaññena sattarasahi pasūhi yajitabbassa beluvayūpassa sattarasakadakkhiṇassa yaññassetaṃ adhivacanaṃ. Natthi ettha aggaḷāti niraggaḷo. Navahi pariyaññehi yajitabbassa saddhiṃ bhūmiyā ca purisehi ca assamedhe vuttavibhavadakkhiṇassa sabbamedhapariyāyanāmassa assamedhavikappassetaṃ adhivacanaṃ.

галамби д̇з наанубхаванд̇и сол̣асинд̇и д̇з саб̣б̣зби махааяааг̇аа згасса мзд̇д̇аажид̇д̇асса вибаагамаханд̇ад̇ааяа сол̣асим̣ галам̣ на аг̇гханд̇и, сол̣асамам̣ бхааг̇ам̣ на баабун̣анд̇ийд̇и ад̇т̇о. на ж̇инаад̇ийд̇и на ад̇д̇анаа барасса ж̇ааним̣ гарод̇и. на ж̇аабаязд̇и на барзна барасса ж̇ааним̣ гаарзд̇и. мзд̇д̇ам̣сод̇и мзд̇д̇ааяамаанажид̇д̇агодтаасо худ̇ваа. саб̣б̣абхууд̇аананд̇и саб̣б̣асад̇д̇зсу. взрам̣ д̇асса на гзнажийд̇и д̇асса гзнажи сад̣̇д̇хим̣ агусалавзрам̣ ваа буг̇г̇алавзрам̣ ваа над̇т̇и.

Kalampite nānubhavanti soḷasinti te sabbepi mahāyāgā ekassa mettācittassa vipākamahantatāya soḷasiṃ kalaṃ na agghanti, soḷasamaṃ bhāgaṃ na pāpuṇantīti attho. Na jinātīti na attanā parassa jāniṃ karoti. Na jāpayeti na parena parassa jāniṃ kāreti. Mettaṃsoti mettāyamānacittakoṭṭhāso hutvā. Sabbabhūtānanti sabbasattesu. Veraṃ tassa na kenacīti tassa kenaci saddhiṃ akusalaveraṃ vā puggalaveraṃ vā natthi.

Next: 2. бан̃н̃аасуд̇д̇аван̣н̣анаа • 2. Paññāsuttavaṇṇanā

Related texts:

д̇ибидага (муула) • Tipiṭaka (Mūla) / суд̇д̇абидага • Suttapiṭaka / ан̇г̇уд̇д̇аранигааяа • Aṅguttaranikāya / 1. мзд̇д̇аасуд̇д̇ам̣ • 1. Mettāsuttaṃ

дийгаа • Tīkā / суд̇д̇абидага (дийгаа) • Suttapiṭaka (ṭīkā) / ан̇г̇уд̇д̇аранигааяа (дийгаа) • Aṅguttaranikāya (ṭīkā) / 1. мзд̇д̇аасуд̇д̇аван̣н̣анаа • 1. Mettāsuttavaṇṇanā

© 1991-2023 The Titi Tudorancea Bulletin | Titi Tudorancea^® is a Registered Trademark | Terms of use and privacy policy
Contact