| Library / Tipiṭaka / ཏིཔིཊཀ • Tipiṭaka / ཨིཏིཝུཏྟཀ-ཨཊྛཀཐཱ • Itivuttaka-aṭṭhakathā |
༣. ཏཏིཡཝགྒོ
3. Tatiyavaggo
༡. མིཙྪཱདིཊྛིཀསུཏྟཝཎྞནཱ
1. Micchādiṭṭhikasuttavaṇṇanā
༧༠. ཏཏིཡཝགྒསྶ པཋམེ དིཊྛཱ མཡཱཏི མཡཱ དིཊྛཱ, མམ སམནྟཙཀྑུནཱ དིབྦཙཀྑུནཱ ཙཱཏི དྭཱིཧིཔི ཙཀྑཱུཧི དིཊྛཱ པཙྩཀྑཏོ ཝིདིཏཱ། ཏེན ཨནུསྶཝཱདིཾ པཊིཀྑིཔཏི, ཨཡཉྩ ཨཏྠོ ཨིདཱནེཝ པཱལི༹ཡཾ ཨཱགམིསྶཏི། ཀཱཡདུཙྩརིཏེན སམནྣཱགཏཱཏི ཀཱཡདུཙྩརིཏེན སམངྒཱིབྷཱུཏཱ། ཨརིཡཱནཾ ཨུཔཝཱདཀཱཏི བུདྡྷཱདཱིནཾ ཨརིཡཱནཾ ཨནྟམསོ གིཧིསོཏཱཔནྣཱནམྤི གུཎཔརིདྷཾསནེན ཨབྷཱུཏབྦྷཀྑཱནེན ཨུཔཝཱདཀཱ ཨཀྐོསཀཱ གརཧཀཱ། མིཙྪཱདིཊྛིཀཱཏི ཝིཔརཱིཏདསྶནཱ། མིཙྪཱདིཊྛིཀམྨསམཱདཱནཱཏི མིཙྪཱདསྶནཧེཏུ སམཱདིནྣནཱནཱཝིདྷཀམྨཱ ཡེ ཙ, མིཙྪཱདིཊྛིམཱུལཀེསུ ཀཱཡཀམྨཱདཱིསུ ཨཉྙེཔི སམཱདཔེནྟི། ཨེཏྠ ཙ ཝཙཱིམནོདུཙྩརིཏགྒཧཎེནེཝ ཨརིཡཱུཔཝཱདམིཙྪཱདིཊྛཱིསུ གཧིཏཱསུ པུནཝཙནཾ མཧཱསཱཝཛྫབྷཱཝདསྶནཏྠཾ ནེསཾ། མཧཱསཱཝཛྫོ ཧི ཨརིཡཱུཔཝཱདོ ཨཱནནྟརིཡསདིསོ། ཡཐཱཧ –
70. Tatiyavaggassa paṭhame diṭṭhā mayāti mayā diṭṭhā, mama samantacakkhunā dibbacakkhunā cāti dvīhipi cakkhūhi diṭṭhā paccakkhato viditā. Tena anussavādiṃ paṭikkhipati, ayañca attho idāneva pāḷiyaṃ āgamissati. Kāyaduccaritena samannāgatāti kāyaduccaritena samaṅgībhūtā. Ariyānaṃ upavādakāti buddhādīnaṃ ariyānaṃ antamaso gihisotāpannānampi guṇaparidhaṃsanena abhūtabbhakkhānena upavādakā akkosakā garahakā. Micchādiṭṭhikāti viparītadassanā. Micchādiṭṭhikammasamādānāti micchādassanahetu samādinnanānāvidhakammā ye ca, micchādiṭṭhimūlakesu kāyakammādīsu aññepi samādapenti. Ettha ca vacīmanoduccaritaggahaṇeneva ariyūpavādamicchādiṭṭhīsu gahitāsu punavacanaṃ mahāsāvajjabhāvadassanatthaṃ nesaṃ. Mahāsāvajjo hi ariyūpavādo ānantariyasadiso. Yathāha –
‘‘སེཡྻཐཱཔི, སཱརིཔུཏྟ, བྷིཀྑུ སཱིལསམྤནྣོ, སམཱདྷིསམྤནྣོ, པཉྙཱསམྤནྣོ, དིཊྛེཝ དྷམྨེ ཨཉྙཾ ཨཱརཱདྷེཡྻ; ཨེཝཾསམྤདམིདཾ, སཱརིཔུཏྟ, ཝདཱམི ཏཾ ཝཱཙཾ ཨཔྤཧཱཡ, ཏཾ ཙིཏྟཾ ཨཔྤཧཱཡ, ཏཾ དིཊྛིཾ ཨཔྤཊིནིསྶཛྫིཏྭཱ ཡཐཱབྷཏཾ ནིཀྑིཏྟོ ཨེཝཾ ནིརཡེ’’ཏི (མ॰ ནི॰ ༡.༡༤༩)།
‘‘Seyyathāpi, sāriputta, bhikkhu sīlasampanno, samādhisampanno, paññāsampanno, diṭṭheva dhamme aññaṃ ārādheyya; evaṃsampadamidaṃ, sāriputta, vadāmi taṃ vācaṃ appahāya, taṃ cittaṃ appahāya, taṃ diṭṭhiṃ appaṭinissajjitvā yathābhataṃ nikkhitto evaṃ niraye’’ti (ma. ni. 1.149).
མིཙྪཱདིཊྛིཏོ ཙ མཧཱསཱཝཛྫཏརཾ ནཱམ ཨཉྙཾ ནཏྠི། ཡཐཱཧ –
Micchādiṭṭhito ca mahāsāvajjataraṃ nāma aññaṃ natthi. Yathāha –
‘‘ནཱཧཾ, བྷིཀྑཝེ, ཨཉྙཾ ཨེཀདྷམྨམྤི སམནུཔསྶཱམི, ཡཾ ཨེཝཾ མཧཱསཱཝཛྫཏརཾ ཡཐཡིདཾ, བྷིཀྑཝེ, མིཙྪཱདིཊྛི། མིཙྪཱདིཊྛིཔརམཱནི, བྷིཀྑཝེ, ཝཛྫཱནཱི’’ཏི (ཨ॰ ནི॰ ༡.༣༡༠)།
‘‘Nāhaṃ, bhikkhave, aññaṃ ekadhammampi samanupassāmi, yaṃ evaṃ mahāsāvajjataraṃ yathayidaṃ, bhikkhave, micchādiṭṭhi. Micchādiṭṭhiparamāni, bhikkhave, vajjānī’’ti (a. ni. 1.310).
ཏཾ ཁོ པནཱཏིཨཱདི ཡཐཱཝུཏྟསྶ ཨཏྠསྶ ཨཏྟཔཙྩཀྑབྷཱཝཾ དལ༹ྷཏརཾ ཀཏྭཱ དསྶེཏུཾ ཨཱརདྡྷཾ། ཏམྤི སུཝིཉྙེཡྻམེཝ།
Taṃkho panātiādi yathāvuttassa atthassa attapaccakkhabhāvaṃ daḷhataraṃ katvā dassetuṃ āraddhaṃ. Tampi suviññeyyameva.
གཱཐཱསུ མིཙྪཱ མནཾ པཎིདྷཱཡཱཏི ཨབྷིཛ྄ཛྷཱདཱིནཾ ཝསེན ཙིཏྟཾ ཨཡོནིསོ ཋཔེཏྭཱ། མིཙྪཱ ཝཱཙཉྩ བྷཱསིཡཱཏི མིཙྪཱ མུསཱཝཱདཱདིཝསེན ཝཱཙཾ བྷཱསིཏྭཱ། མིཙྪཱ ཀམྨཱནི ཀཏྭཱནཱཏི པཱཎཱཏིཔཱཏཱདིཝསེན ཀཱཡཀམྨཱནི ཀཏྭཱ། ཨཐ ཝཱ མིཙྪཱ མནཾ པཎིདྷཱཡཱཏི མིཙྪཱདིཊྛིཝསེན ཙིཏྟཾ ཝིཔརཱིཏཾ ཋཔེཏྭཱ། སེསཔདདྭཡེཔི ཨེསེཝ ནཡོ། ཨིདཱནིསྶ ཏཐཱ དུཙྩརིཏཙརཎེ ཀཱརཎཾ དསྶེཏི ཨཔྤསྶུཏོཏི, ཨཏྟནོ པརེསཉྩ ཧིཏཱཝཧེན སུཏེན ཝིརཧིཏོཏི ཨཏྠོ། ཨཔུཉྙཀརོཏི ཏཏོ ཨེཝ ཨརིཡདྷམྨསྶ ཨཀོཝིདཏཱཡ ཀིབྦིསཀཱརཱི པཱཔདྷམྨོ། ཨཔྤསྨིཾ ཨིདྷ ཛཱིཝིཏེཏི ཨིདྷ མནུསྶལོཀེ ཛཱིཝིཏེ ཨཏིཔརིཏྟེ། ཏཐཱ ཙཱཧ ‘‘ཡོ ཙིརཾ ཛཱིཝཏི, སོ ཝསྶསཏཾ ཨཔྤཾ ཝཱ བྷིཡྻོ’’ཏི (དཱི॰ ནི॰ ༢.༩༣; སཾ॰ ནི॰ ༡.༡༤༥), ‘‘ཨཔྤམཱཡུ མནུསྶཱན’’ནྟི (སཾ॰ ནི॰ ༡.༡༤༥; མཧཱནི॰ ༡༠) ཙ། ཏསྨཱ བཧུསྶུཏོ སཔྤཉྙོ སཱིགྷཾ པུཉྙཱནི ཀཏྭཱ སགྒཱུཔགོ ནིབྦཱནཔཏིཊྛོ ཝཱ ཧོཏི། ཡོ པན ཨཔྤསྶུཏོ ཨཔུཉྙཀརོ, ཀཱཡསྶ བྷེདཱ དུཔྤཉྙོ ནིརཡཾ སོ ཨུཔཔཛྫཏཱིཏི།
Gāthāsu micchā manaṃ paṇidhāyāti abhijjhādīnaṃ vasena cittaṃ ayoniso ṭhapetvā. Micchāvācañca bhāsiyāti micchā musāvādādivasena vācaṃ bhāsitvā. Micchā kammāni katvānāti pāṇātipātādivasena kāyakammāni katvā. Atha vā micchā manaṃ paṇidhāyāti micchādiṭṭhivasena cittaṃ viparītaṃ ṭhapetvā. Sesapadadvayepi eseva nayo. Idānissa tathā duccaritacaraṇe kāraṇaṃ dasseti appassutoti, attano paresañca hitāvahena sutena virahitoti attho. Apuññakaroti tato eva ariyadhammassa akovidatāya kibbisakārī pāpadhammo. Appasmiṃ idha jīviteti idha manussaloke jīvite atiparitte. Tathā cāha ‘‘yo ciraṃ jīvati, so vassasataṃ appaṃ vā bhiyyo’’ti (dī. ni. 2.93; saṃ. ni. 1.145), ‘‘appamāyu manussāna’’nti (saṃ. ni. 1.145; mahāni. 10) ca. Tasmā bahussuto sappañño sīghaṃ puññāni katvā saggūpago nibbānapatiṭṭho vā hoti. Yo pana appassuto apuññakaro, kāyassa bhedā duppañño nirayaṃ so upapajjatīti.
པཋམསུཏྟཝཎྞནཱ ནིཊྛིཏཱ།
Paṭhamasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / ཨིཏིཝུཏྟཀཔཱལི༹ • Itivuttakapāḷi / ༡. མིཙྪཱདིཊྛིཀསུཏྟཾ • 1. Micchādiṭṭhikasuttaṃ
