| Library / Tipiṭaka / ติปิฎก • Tipiṭaka / ปฎิสมฺภิทามคฺค-อฎฺฐกถา • Paṭisambhidāmagga-aṭṭhakathā |
๓. มิจฺฉาทิฎฺฐินิเทฺทสวณฺณนา
3. Micchādiṭṭhiniddesavaṇṇanā
๑๓๖. มิจฺฉาทิฎฺฐิ เหฎฺฐา วุตฺตตฺถาเยวฯ อยํ ปน อปโร นโย – นตฺถิ ทินฺนนฺติ อุเจฺฉททิฎฺฐิกตฺตา ทานผลํ ปฎิกฺขิปติฯ นตฺถิ ยิฎฺฐนฺติ เอตฺถ ยิฎฺฐนฺติ ขุทฺทกยโญฺญฯ หุตนฺติ มหายโญฺญฯ ทฺวินฺนมฺปิ ผลํ ปฎิกฺขิปติฯ นตฺถิ สุกตทุกฺกฎานํ กมฺมานํ ผลํ วิปาโกติ ทานผลสฺส ปฎิกฺขิตฺตตฺตา สีลาทีนํ ปุญฺญกมฺมานํ, ปาณาติปาตาทีนํ ปาปกมฺมานํ ผลํ ปฎิกฺขิปติฯ นตฺถิ อยํ โลโกติ ปุเร กเตน กมฺมุนาฯ นตฺถิ ปโร โลโกติ อิธ กเตน กมฺมุนาฯ นตฺถิ มาตา, นตฺถิ ปิตาติ เตสุ กตกมฺมานํ ผลํ ปฎิกฺขิปติฯ นตฺถิ สตฺตา โอปปาติกาติ กมฺมเหตุกํ อุปปตฺติํ ปฎิกฺขิปติฯ นตฺถิ โลเก สมณพฺราหฺมณา…เป.… ปเวเทนฺตีติ อิธโลกปรโลเก ปสฺสิตุํ อภิญฺญาปฎิลาภาย ปฎิปทํ ปฎิกฺขิปติฯ อิธ ปาฬิยํ ปน นตฺถิ ทินฺนนฺติ วตฺถูติ นตฺถิ ทินฺนนฺติ วุจฺจมานํ ทานํ, ตสฺสา ทิฎฺฐิยา วตฺถูติ อโตฺถ ฯ เอวํวาโท มิจฺฉาติ เอวํ นตฺถิ ทินฺนนฺติ วาโท วจนํ มิจฺฉา วิปรีโตติ อโตฺถฯ
136.Micchādiṭṭhi heṭṭhā vuttatthāyeva. Ayaṃ pana aparo nayo – natthi dinnanti ucchedadiṭṭhikattā dānaphalaṃ paṭikkhipati. Natthi yiṭṭhanti ettha yiṭṭhanti khuddakayañño. Hutanti mahāyañño. Dvinnampi phalaṃ paṭikkhipati. Natthi sukatadukkaṭānaṃ kammānaṃ phalaṃ vipākoti dānaphalassa paṭikkhittattā sīlādīnaṃ puññakammānaṃ, pāṇātipātādīnaṃ pāpakammānaṃ phalaṃ paṭikkhipati. Natthi ayaṃ lokoti pure katena kammunā. Natthi paro lokoti idha katena kammunā. Natthi mātā, natthi pitāti tesu katakammānaṃ phalaṃ paṭikkhipati. Natthi sattā opapātikāti kammahetukaṃ upapattiṃ paṭikkhipati. Natthi loke samaṇabrāhmaṇā…pe… pavedentīti idhalokaparaloke passituṃ abhiññāpaṭilābhāya paṭipadaṃ paṭikkhipati. Idha pāḷiyaṃ pana natthi dinnanti vatthūti natthi dinnanti vuccamānaṃ dānaṃ, tassā diṭṭhiyā vatthūti attho . Evaṃvādo micchāti evaṃ natthi dinnanti vādo vacanaṃ micchā viparītoti attho.
มิจฺฉาทิฎฺฐินิเทฺทสวณฺณนา นิฎฺฐิตาฯ
Micchādiṭṭhiniddesavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / ขุทฺทกนิกาย • Khuddakanikāya / ปฎิสมฺภิทามคฺคปาฬิ • Paṭisambhidāmaggapāḷi / ๓. มิจฺฉาทิฎฺฐินิเทฺทโส • 3. Micchādiṭṭhiniddeso
