| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৩. মিচ্ছাদিট্ঠিনিদ্দেসো
3. Micchādiṭṭhiniddeso
১৩৬. মিচ্ছাদিট্ঠিযা কতমেহি দসহাকারেহি অভিনিৰেসো হোতি? ‘‘নত্থি দিন্ন’’ন্তি – ৰত্থু 1। এৰংৰাদো মিচ্ছাভিনিৰেসপরামাসো 2 দিট্ঠি। দিট্ঠি ন ৰত্থু, ৰত্থু ন দিট্ঠি। অঞ্ঞা দিট্ঠি, অঞ্ঞং ৰত্থু। যা চ দিট্ঠি যঞ্চ ৰত্থু – অযং পঠমা মিচ্ছাৰত্থুকা মিচ্ছাদিট্ঠি। মিচ্ছাদিট্ঠি দিট্ঠিৰিপত্তি…পে॰… ইমানি সঞ্ঞোজনানি, ন চ দিট্ঠিযো। ‘‘নত্থি যিট্ঠ’’ন্তি – ৰত্থু…পে॰… ‘‘নত্থি হুত’’ন্তি – ৰত্থু… ‘‘নত্থি সুকতদুক্কটানং কম্মানং ফলং ৰিপাকো’’তি – ৰত্থু… ‘‘নত্থি অযং লোকো’’তি – ৰত্থু… ‘‘নত্থি পরো লোকো’’তি – ৰত্থু… ‘‘নত্থি মাতা’’তি – ৰত্থু… ‘‘নত্থি পিতা’’তি – ৰত্থু… ‘‘নত্থি সত্তা ওপপাতিকা’’তি – ৰত্থু… ‘‘নত্থি লোকে সমণব্রাহ্মণা সম্মগ্গতা 3 সম্মাপটিপন্না, যে ইমঞ্চ লোকং, পরঞ্চ লোকং সযং অভিঞ্ঞা সচ্ছিকত্ৰা পৰেদেন্তী’’তি – ৰত্থু। এৰংৰাদো মিচ্ছাভিনিৰেসপরামাসো দিট্ঠি। দিট্ঠি ন ৰত্থু, ৰত্থু ন দিট্ঠি। অঞ্ঞা দিট্ঠি, অঞ্ঞং ৰত্থু। যা চ দিট্ঠি যঞ্চ ৰত্থু – অযং দসমা মিচ্ছাৰত্থুকা মিচ্ছাদিট্ঠি। মিচ্ছাদিট্ঠি দিট্ঠিৰিপত্তি…পে॰… মিচ্ছাদিট্ঠিকস্স পুরিসপুগ্গলস্স দ্ৰেৰ গতিযো…পে॰… ইমানি সঞ্ঞোজনানি, ন চ দিট্ঠিযো। মিচ্ছাদিট্ঠিযা ইমেহি দসহাকারেহি অভিনিৰেসো হোতি।
136. Micchādiṭṭhiyā katamehi dasahākārehi abhiniveso hoti? ‘‘Natthi dinna’’nti – vatthu 4. Evaṃvādo micchābhinivesaparāmāso 5 diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ paṭhamā micchāvatthukā micchādiṭṭhi. Micchādiṭṭhi diṭṭhivipatti…pe… imāni saññojanāni, na ca diṭṭhiyo. ‘‘Natthi yiṭṭha’’nti – vatthu…pe… ‘‘natthi huta’’nti – vatthu… ‘‘natthi sukatadukkaṭānaṃ kammānaṃ phalaṃ vipāko’’ti – vatthu… ‘‘natthi ayaṃ loko’’ti – vatthu… ‘‘natthi paro loko’’ti – vatthu… ‘‘natthi mātā’’ti – vatthu… ‘‘natthi pitā’’ti – vatthu… ‘‘natthi sattā opapātikā’’ti – vatthu… ‘‘natthi loke samaṇabrāhmaṇā sammaggatā 6 sammāpaṭipannā, ye imañca lokaṃ, parañca lokaṃ sayaṃ abhiññā sacchikatvā pavedentī’’ti – vatthu. Evaṃvādo micchābhinivesaparāmāso diṭṭhi. Diṭṭhi na vatthu, vatthu na diṭṭhi. Aññā diṭṭhi, aññaṃ vatthu. Yā ca diṭṭhi yañca vatthu – ayaṃ dasamā micchāvatthukā micchādiṭṭhi. Micchādiṭṭhi diṭṭhivipatti…pe… micchādiṭṭhikassa purisapuggalassa dveva gatiyo…pe… imāni saññojanāni, na ca diṭṭhiyo. Micchādiṭṭhiyā imehi dasahākārehi abhiniveso hoti.
মিচ্ছাদিট্ঠিনিদ্দেসো ততিযো।
Micchādiṭṭhiniddeso tatiyo.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / ৩. মিচ্ছাদিট্ঠিনিদ্দেসৰণ্ণনা • 3. Micchādiṭṭhiniddesavaṇṇanā
