| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
29. மிச்சா²ஜீவவிவஜ்ஜனானித்³தே³ஸவண்ணனா
29. Micchājīvavivajjanāniddesavaṇṇanā
209. சுண்ணந்தி ஸிரீஸசுண்ணாதி³கந்தி அத்தோ². மத்திகாதி பகதிமத்திகா வா பஞ்சவண்ணா வா ஸுத்³தா⁴ குங்குட்ட²ஆதி³கா வா. குலஸங்க³ஹாதி ஏதேஹி ஸங்க³ஹிதானங் ஸந்திகே லாபா⁴ஸாய குலஸங்க³ஹத்த²ந்தி அத்தோ². எத்த² பன இமேஹி ஸங்க³ஹிதானங் ஸந்திகே ‘‘கிஞ்சி லபி⁴ஸ்ஸாமீ’’தி ஸங்கி⁴கங் வா புக்³க³லிகங் வா தா³துங் ந வட்டதி ஏவ. இமினா பன நயேன லத்³த⁴ங் பஞ்சன்னம்பி ஸஹத⁴ம்மிகானங் ந வட்டதி, மிச்சா²ஜீவஞ்ச ஹோதி.
209.Cuṇṇanti sirīsacuṇṇādikanti attho. Mattikāti pakatimattikā vā pañcavaṇṇā vā suddhā kuṅkuṭṭhaādikā vā. Kulasaṅgahāti etehi saṅgahitānaṃ santike lābhāsāya kulasaṅgahatthanti attho. Ettha pana imehi saṅgahitānaṃ santike ‘‘kiñci labhissāmī’’ti saṅghikaṃ vā puggalikaṃ vā dātuṃ na vaṭṭati eva. Iminā pana nayena laddhaṃ pañcannampi sahadhammikānaṃ na vaṭṭati, micchājīvañca hoti.
210-211. லாபா⁴ஸாய தா³யகானங் தா³ரகே உக்கி²பித்வா பரிப⁴டபா⁴வோ பாரிப⁴டகதா, தாய பாரிப⁴டகதாய ந ஜீவயேதி ஸம்ப³ந்தோ⁴. ஸேஸேஸுபி ஏஸேவ நயோ. கெ²த்தாதீ³ஸு பேஸிதஸ்ஸ க³மனங் பஹேணகம்மங். ஸாஸனப்படிஸாஸனஹரணங் தூ³தகம்மங். பேஸிதஸ்ஸ கே³ஹதோ கே³ஹக³மனங் ஜங்க⁴பேஸனியங். லாபா⁴ஸாய லஞ்ஜதா³னமனுப்பதா³னங். அஞ்ஞேன வாபீதி அங்க³விஜ்ஜாதி³னா.
210-211. Lābhāsāya dāyakānaṃ dārake ukkhipitvā paribhaṭabhāvo pāribhaṭakatā, tāya pāribhaṭakatāya na jīvayeti sambandho. Sesesupi eseva nayo. Khettādīsu pesitassa gamanaṃ paheṇakammaṃ. Sāsanappaṭisāsanaharaṇaṃ dūtakammaṃ. Pesitassa gehato gehagamanaṃ jaṅghapesaniyaṃ. Lābhāsāya lañjadānamanuppadānaṃ. Aññena vāpīti aṅgavijjādinā.
212. விஞ்ஞத்தீதி (பாரா॰ 515 ஆத³யோ; பாரா॰ அட்ட²॰ 2.515 ஆத³யோ) அஞ்ஞாதகவிஞ்ஞத்தி. அனேஸனாதி புப்³பே³ வுத்தேன புப்ப²தா³னாதி³னா பச்சயேஸனா. குஹனாதீ³ஹீதி (விப⁴॰ 861; விப⁴॰ அட்ட²॰ 861; மஹானி॰ 87) குஹனா லபனா நேமித்தகதா நிப்பேஸிகதா லாபே⁴ன லாப⁴ங் நிஜிகீ³ஸனதாதி இமேஹி பஞ்சஹி வத்தூ²ஹீதி அத்தோ². மிச்சா²ஜீவவினிச்ச²யோ.
212.Viññattīti (pārā. 515 ādayo; pārā. aṭṭha. 2.515 ādayo) aññātakaviññatti. Anesanāti pubbe vuttena pupphadānādinā paccayesanā. Kuhanādīhīti (vibha. 861; vibha. aṭṭha. 861; mahāni. 87) kuhanā lapanā nemittakatā nippesikatā lābhena lābhaṃ nijigīsanatāti imehi pañcahi vatthūhīti attho. Micchājīvavinicchayo.
மிச்சா²ஜீவவிவஜ்ஜனானித்³தே³ஸவண்ணனா நிட்டி²தா.
Micchājīvavivajjanāniddesavaṇṇanā niṭṭhitā.
