| Library / Tipiṭaka / ติปิฎก • Tipiṭaka / ขุทฺทสิกฺขา-มูลสิกฺขา • Khuddasikkhā-mūlasikkhā |
๒๙. มิจฺฉาชีววิวชฺชนานิเทฺทสวณฺณนา
29. Micchājīvavivajjanāniddesavaṇṇanā
๒๐๙. จุณฺณนฺติ สิรีสจุณฺณาทิกนฺติ อโตฺถฯ มตฺติกาติ ปกติมตฺติกา วา ปญฺจวณฺณา วา สุทฺธา กุงฺกุฎฺฐอาทิกา วาฯ กุลสงฺคหาติ เอเตหิ สงฺคหิตานํ สนฺติเก ลาภาสาย กุลสงฺคหตฺถนฺติ อโตฺถฯ เอตฺถ ปน อิเมหิ สงฺคหิตานํ สนฺติเก ‘‘กิญฺจิ ลภิสฺสามี’’ติ สงฺฆิกํ วา ปุคฺคลิกํ วา ทาตุํ น วฎฺฎติ เอวฯ อิมินา ปน นเยน ลทฺธํ ปญฺจนฺนมฺปิ สหธมฺมิกานํ น วฎฺฎติ, มิจฺฉาชีวญฺจ โหติฯ
209.Cuṇṇanti sirīsacuṇṇādikanti attho. Mattikāti pakatimattikā vā pañcavaṇṇā vā suddhā kuṅkuṭṭhaādikā vā. Kulasaṅgahāti etehi saṅgahitānaṃ santike lābhāsāya kulasaṅgahatthanti attho. Ettha pana imehi saṅgahitānaṃ santike ‘‘kiñci labhissāmī’’ti saṅghikaṃ vā puggalikaṃ vā dātuṃ na vaṭṭati eva. Iminā pana nayena laddhaṃ pañcannampi sahadhammikānaṃ na vaṭṭati, micchājīvañca hoti.
๒๑๐-๒๑๑. ลาภาสาย ทายกานํ ทารเก อุกฺขิปิตฺวา ปริภฎภาโว ปาริภฎกตา, ตาย ปาริภฎกตาย น ชีวเยติ สมฺพโนฺธฯ เสเสสุปิ เอเสว นโยฯ เขตฺตาทีสุ เปสิตสฺส คมนํ ปเหณกมฺมํฯ สาสนปฺปฎิสาสนหรณํ ทูตกมฺมํฯ เปสิตสฺส เคหโต เคหคมนํ ชงฺฆเปสนิยํฯ ลาภาสาย ลญฺชทานมนุปฺปทานํฯ อเญฺญน วาปีติ องฺควิชฺชาทินาฯ
210-211. Lābhāsāya dāyakānaṃ dārake ukkhipitvā paribhaṭabhāvo pāribhaṭakatā, tāya pāribhaṭakatāya na jīvayeti sambandho. Sesesupi eseva nayo. Khettādīsu pesitassa gamanaṃ paheṇakammaṃ. Sāsanappaṭisāsanaharaṇaṃ dūtakammaṃ. Pesitassa gehato gehagamanaṃ jaṅghapesaniyaṃ. Lābhāsāya lañjadānamanuppadānaṃ. Aññena vāpīti aṅgavijjādinā.
๒๑๒. วิญฺญตฺตีติ (ปารา. ๕๑๕ อาทโย; ปารา. อฎฺฐ. ๒.๕๑๕ อาทโย) อญฺญาตกวิญฺญตฺติฯ อเนสนาติ ปุเพฺพ วุเตฺตน ปุปฺผทานาทินา ปจฺจเยสนาฯ กุหนาทีหีติ (วิภ. ๘๖๑; วิภ. อฎฺฐ. ๘๖๑; มหานิ. ๘๗) กุหนา ลปนา เนมิตฺตกตา นิเปฺปสิกตา ลาเภน ลาภํ นิชิคีสนตาติ อิเมหิ ปญฺจหิ วตฺถูหีติ อโตฺถฯ มิจฺฉาชีววินิจฺฉโยฯ
212.Viññattīti (pārā. 515 ādayo; pārā. aṭṭha. 2.515 ādayo) aññātakaviññatti. Anesanāti pubbe vuttena pupphadānādinā paccayesanā. Kuhanādīhīti (vibha. 861; vibha. aṭṭha. 861; mahāni. 87) kuhanā lapanā nemittakatā nippesikatā lābhena lābhaṃ nijigīsanatāti imehi pañcahi vatthūhīti attho. Micchājīvavinicchayo.
มิจฺฉาชีววิวชฺชนานิเทฺทสวณฺณนา นิฎฺฐิตาฯ
Micchājīvavivajjanāniddesavaṇṇanā niṭṭhitā.
