| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
3. මිච්‌ඡත්‌තසුත්‌තං
3. Micchattasuttaṃ
103. ‘‘මිච්‌ඡත්‌තං , භික්‌ඛවෙ, ආගම්‌ම විරාධනා හොති, නො ආරාධනා. කථඤ්‌ච, භික්‌ඛවෙ, මිච්‌ඡත්‌තං ආගම්‌ම විරාධනා හොති, නො ආරාධනා? මිච්‌ඡාදිට්‌ඨිකස්‌ස, භික්‌ඛවෙ, මිච්‌ඡාසඞ්‌කප්‌පො පහොති, මිච්‌ඡාසඞ්‌කප්‌පස්‌ස මිච්‌ඡාවාචා පහොති, මිච්‌ඡාවාචස්‌ස මිච්‌ඡාකම්‌මන්‌තො පහොති, මිච්‌ඡාකම්‌මන්‌තස්‌ස මිච්‌ඡාආජීවො පහොති, මිච්‌ඡාආජීවස්‌ස මිච්‌ඡාවායාමො පහොති, මිච්‌ඡාවායාමස්‌ස මිච්‌ඡාසති පහොති, මිච්‌ඡාසතිස්‌ස මිච්‌ඡාසමාධි පහොති, මිච්‌ඡාසමාධිස්‌ස මිච්‌ඡාඤාණං පහොති, මිච්‌ඡාඤාණිස්‌ස 1 මිච්‌ඡාවිමුත්‌ති පහොති. එවං ඛො, භික්‌ඛවෙ, මිච්‌ඡත්‌තං ආගම්‌ම විරාධනා හොති, නො ආරාධනා.
103. ‘‘Micchattaṃ , bhikkhave, āgamma virādhanā hoti, no ārādhanā. Kathañca, bhikkhave, micchattaṃ āgamma virādhanā hoti, no ārādhanā? Micchādiṭṭhikassa, bhikkhave, micchāsaṅkappo pahoti, micchāsaṅkappassa micchāvācā pahoti, micchāvācassa micchākammanto pahoti, micchākammantassa micchāājīvo pahoti, micchāājīvassa micchāvāyāmo pahoti, micchāvāyāmassa micchāsati pahoti, micchāsatissa micchāsamādhi pahoti, micchāsamādhissa micchāñāṇaṃ pahoti, micchāñāṇissa 2 micchāvimutti pahoti. Evaṃ kho, bhikkhave, micchattaṃ āgamma virādhanā hoti, no ārādhanā.
‘‘සම්‌මත්‌තං, භික්‌ඛවෙ, ආගම්‌ම ආරාධනා හොති, නො විරාධනා. කථඤ්‌ච, භික්‌ඛවෙ, සම්‌මත්‌තං ආගම්‌ම ආරාධනා හොති, නො විරාධනා? සම්‌මාදිට්‌ඨිකස්‌ස, භික්‌ඛවෙ, සම්‌මාසඞ්‌කප්‌පො පහොති, සම්‌මාසඞ්‌කප්‌පස්‌ස සම්‌මාවාචා පහොති, සම්‌මාවාචස්‌ස සම්‌මාකම්‌මන්‌තො පහොති, සම්‌මාකම්‌මන්‌තස්‌ස සම්‌මාආජීවො පහොති, සම්‌මාආජීවස්‌ස සම්‌මාවායාමො පහොති, සම්‌මාවායාමස්‌ස සම්‌මාසති පහොති, සම්‌මාසතිස්‌ස සම්‌මාසමාධි පහොති, සම්‌මාසමාධිස්‌ස සම්‌මාඤාණං පහොති, සම්‌මාඤාණිස්‌ස 3 සම්‌මාවිමුත්‌ති පහොති. එවං ඛො, භික්‌ඛවෙ, සම්‌මත්‌තං ආගම්‌ම ආරාධනා හොති, නො විරාධනා’’ති. තතියං.
‘‘Sammattaṃ, bhikkhave, āgamma ārādhanā hoti, no virādhanā. Kathañca, bhikkhave, sammattaṃ āgamma ārādhanā hoti, no virādhanā? Sammādiṭṭhikassa, bhikkhave, sammāsaṅkappo pahoti, sammāsaṅkappassa sammāvācā pahoti, sammāvācassa sammākammanto pahoti, sammākammantassa sammāājīvo pahoti, sammāājīvassa sammāvāyāmo pahoti, sammāvāyāmassa sammāsati pahoti, sammāsatissa sammāsamādhi pahoti, sammāsamādhissa sammāñāṇaṃ pahoti, sammāñāṇissa 4 sammāvimutti pahoti. Evaṃ kho, bhikkhave, sammattaṃ āgamma ārādhanā hoti, no virādhanā’’ti. Tatiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 3. මිච්‌ඡත්‌තසුත්‌තවණ්‌ණනා • 3. Micchattasuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 1-12. සමණසඤ්‌ඤාසුත්‌තාදිවණ්‌ණනා • 1-12. Samaṇasaññāsuttādivaṇṇanā
