| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[381] 6. மிகா³லோபஜாதகவண்ணனா
[381] 6. Migālopajātakavaṇṇanā
ந மே ருச்சீதி இத³ங் ஸத்தா² ஜேதவனே விஹரந்தோ ஏகங் து³ப்³ப³சபி⁴க்கு²ங் ஆரப்³ப⁴ கதே²ஸி. ஸத்தா² தங் பி⁴க்கு²ங் பக்கோஸாபெத்வா ‘‘ஸச்சங் கிர த்வங் பி⁴க்கு² து³ப்³ப³சோ’’தி புச்சி²த்வா ‘‘ஆம, ப⁴ந்தே’’தி வுத்தே ‘‘ந கோ² பி⁴க்கு² இதா³னேவ, புப்³பே³பி த்வங் து³ப்³ப³சோயேவ, து³ப்³ப³சபா⁴வஞ்ச பன நிஸ்ஸாய பண்டி³தானங் வசனங் அகரொந்தோ வேரம்ப⁴வாதமுகே² ப்³யஸனங் க³தோஸீ’’தி வத்வா அதீதங் ஆஹரி.
Name ruccīti idaṃ satthā jetavane viharanto ekaṃ dubbacabhikkhuṃ ārabbha kathesi. Satthā taṃ bhikkhuṃ pakkosāpetvā ‘‘saccaṃ kira tvaṃ bhikkhu dubbaco’’ti pucchitvā ‘‘āma, bhante’’ti vutte ‘‘na kho bhikkhu idāneva, pubbepi tvaṃ dubbacoyeva, dubbacabhāvañca pana nissāya paṇḍitānaṃ vacanaṃ akaronto verambhavātamukhe byasanaṃ gatosī’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ கி³ஜ்ஜ²யோனியங் நிப்³ப³த்தித்வா அபனந்த³கி³ஜ்ஜோ² நாம அஹோஸி. ஸோ கி³ஜ்ஜ²க³ணபரிவுதோ கி³ஜ்ஜ²கூடபப்³ப³தே வஸி. புத்தோ பனஸ்ஸ மிகா³லோபோ நாம தா²மப³லஸம்பன்னோ அஹோஸி, ஸோ அஞ்ஞேஸங் கி³ஜ்ஜா²னங் ஸீமங் அதிக்கமித்வா அதிஉச்சங் உப்பதி. கி³ஜ்ஜா² ‘‘புத்தோ தே அதிதூ³ரங் உப்பததீ’’தி கி³ஜ்ஜ²ரஞ்ஞோ ஆசிக்கி²ங்ஸு. ஸோ தங் பக்கோஸெத்வா ‘‘த்வங் கிர, தாத, அதிஉச்சங் க³ச்ச²ஸி, அதிஉச்சங் க³ச்ச²ந்தோ ஜீவிதக்க²யங் பாபுணிஸ்ஸஸீ’’தி வத்வா திஸ்ஸோ கா³தா² அபா⁴ஸி –
Atīte bārāṇasiyaṃ brahmadatte rajjaṃ kārente bodhisatto gijjhayoniyaṃ nibbattitvā apanandagijjho nāma ahosi. So gijjhagaṇaparivuto gijjhakūṭapabbate vasi. Putto panassa migālopo nāma thāmabalasampanno ahosi, so aññesaṃ gijjhānaṃ sīmaṃ atikkamitvā atiuccaṃ uppati. Gijjhā ‘‘putto te atidūraṃ uppatatī’’ti gijjharañño ācikkhiṃsu. So taṃ pakkosetvā ‘‘tvaṃ kira, tāta, atiuccaṃ gacchasi, atiuccaṃ gacchanto jīvitakkhayaṃ pāpuṇissasī’’ti vatvā tisso gāthā abhāsi –
34.
34.
‘‘ந மே ருச்சி மிகா³லோப, யஸ்ஸ தே தாதி³ஸீ க³தீ;
‘‘Na me rucci migālopa, yassa te tādisī gatī;
அதுச்சங் தாத பதஸி, அபூ⁴மிங் தாத ஸேவஸி.
Atuccaṃ tāta patasi, abhūmiṃ tāta sevasi.
35.
35.
‘‘சதுக்கண்ணங்வ கேதா³ரங், யதா³ தே பத²வீ ஸியா;
‘‘Catukkaṇṇaṃva kedāraṃ, yadā te pathavī siyā;
ததோ தாத நிவத்தஸ்ஸு, மாஸ்ஸு எத்தோ பரங் க³மி.
Tato tāta nivattassu, māssu etto paraṃ gami.
36.
36.
‘‘ஸந்தி அஞ்ஞேபி ஸகுணா, பத்தயானா விஹங்க³மா;
‘‘Santi aññepi sakuṇā, pattayānā vihaṅgamā;
அக்கி²த்தா வாதவேகே³ன, நட்டா² தே ஸஸ்ஸதீஸமா’’தி.
Akkhittā vātavegena, naṭṭhā te sassatīsamā’’ti.
தத்த² மிகா³லோபாதி புத்தங் நாமேன ஆலபதி. அதுச்சங் தாத பதஸீதி தாத, த்வங் அஞ்ஞேஸங் கி³ஜ்ஜா²னங் ஸீமங் அதிக்கமித்வா அதிஉச்சங் க³ச்ச²ஸி. சதுக்கண்ணங்வ கேதா³ரந்தி இமினாஸ்ஸ ஸீமங் ஆசிக்க²தி. இத³ங் வுத்தங் ஹோதி – தாத, யதா³ தே அயங் மஹாபத²வீ சதுக்கண்ணங் கேதா³ரங் விய ஸியா, ஏவங் கு²த்³தி³கா விய ஹுத்வா பஞ்ஞாயேத², அத² த்வங் எத்தகா டா²னா நிவத்தெய்யாஸி, எத்தோ பரங் மா க³மீதி. ஸந்தி அஞ்ஞேபீதி ந கேவலங் த்வமேவ, அஞ்ஞேபி கி³ஜ்ஜா² ஏவங் கரிங்ஸூதி தீ³பேதி. அக்கி²த்தாதி தேபி கி³ஜ்ஜா² அம்ஹாகங் ஸீமங் அதிக்கமித்வா க³தா வாதவேகே³ன ஆகட்³டி⁴தா நஸ்ஸிங்ஸு. ஸஸ்ஸதீஸமாதி ஸஸ்ஸதீஹி பத²வீபப்³ப³தாதீ³ஹி ஸமங் அத்தானங் மஞ்ஞமானா அத்தனோ வஸ்ஸஸஹஸ்ஸபரிமாணங் ஆயுங் அபூரெத்வாபி அந்தரா நட்டா²தி அத்தோ².
Tattha migālopāti puttaṃ nāmena ālapati. Atuccaṃ tāta patasīti tāta, tvaṃ aññesaṃ gijjhānaṃ sīmaṃ atikkamitvā atiuccaṃ gacchasi. Catukkaṇṇaṃva kedāranti imināssa sīmaṃ ācikkhati. Idaṃ vuttaṃ hoti – tāta, yadā te ayaṃ mahāpathavī catukkaṇṇaṃ kedāraṃ viya siyā, evaṃ khuddikā viya hutvā paññāyetha, atha tvaṃ ettakā ṭhānā nivatteyyāsi, etto paraṃ mā gamīti. Santi aññepīti na kevalaṃ tvameva, aññepi gijjhā evaṃ kariṃsūti dīpeti. Akkhittāti tepi gijjhā amhākaṃ sīmaṃ atikkamitvā gatā vātavegena ākaḍḍhitā nassiṃsu. Sassatīsamāti sassatīhi pathavīpabbatādīhi samaṃ attānaṃ maññamānā attano vassasahassaparimāṇaṃ āyuṃ apūretvāpi antarā naṭṭhāti attho.
மிகா³லோபோ அனோவாத³கத்தா பிது வசனங் அகத்வா லங்க⁴ந்தோ பிதரா அக்கா²தங் ஸீமங் தி³ஸ்வா தங் அதிக்கம்ம காலவாதே பத்வா தேபி சி²ந்தி³த்வா உப்பதிதோ வேரம்ப⁴வாதமுக²ங் பக்க²ந்தி³, அத² நங் வேரம்ப⁴வாதா பஹரிங்ஸு. ஸோ தேஹி பஹடமத்தோவ க²ண்டா³க²ண்ட³ங் ஹுத்வா ஆகாஸேயேவ அந்தரதா⁴யி.
Migālopo anovādakattā pitu vacanaṃ akatvā laṅghanto pitarā akkhātaṃ sīmaṃ disvā taṃ atikkamma kālavāte patvā tepi chinditvā uppatito verambhavātamukhaṃ pakkhandi, atha naṃ verambhavātā pahariṃsu. So tehi pahaṭamattova khaṇḍākhaṇḍaṃ hutvā ākāseyeva antaradhāyi.
37.
37.
‘‘அகத்வா அபனந்த³ஸ்ஸ, பிது வுத்³த⁴ஸ்ஸ ஸாஸனங்;
‘‘Akatvā apanandassa, pitu vuddhassa sāsanaṃ;
காலவாதே அதிக்கம்ம, வேரம்பா⁴னங் வஸங் அகா³.
Kālavāte atikkamma, verambhānaṃ vasaṃ agā.
38.
38.
‘‘தஸ்ஸ புத்தா ச தா³ரா ச, யே சஞ்ஞே அனுஜீவினோ;
‘‘Tassa puttā ca dārā ca, ye caññe anujīvino;
ஸப்³பே³ ப்³யஸனமாபாது³ங், அனோவாத³கரே தி³ஜே.
Sabbe byasanamāpāduṃ, anovādakare dije.
39.
39.
‘‘ஏவம்பி இத⁴ வுத்³தா⁴னங், யோ வாக்யங் நாவபு³ஜ்ஜ²தி;
‘‘Evampi idha vuddhānaṃ, yo vākyaṃ nāvabujjhati;
அதிஸீமசரோ தி³த்தோ, கி³ஜ்ஜோ²வாதீதஸாஸனோ;
Atisīmacaro ditto, gijjhovātītasāsano;
ஸப்³பே³ ப்³யஸனங் பப்பொந்தி, அகத்வா வுத்³த⁴ஸாஸன’’ந்தி. –
Sabbe byasanaṃ papponti, akatvā vuddhasāsana’’nti. –
இமா திஸ்ஸோ அபி⁴ஸம்பு³த்³த⁴கா³தா².
Imā tisso abhisambuddhagāthā.
தத்த² அனுஜீவினோதி தங் நிஸ்ஸாய ஜீவனகா. அனோவாத³கரே தி³ஜேதி தஸ்மிங் மிகா³லோபே கி³ஜ்ஜே² ஓவாத³ங் அக³ண்ஹந்தே ஸப்³பே³பி தே தேன ஸத்³தி⁴ங் அதிஸீமங் க³ந்த்வா வினாஸங் பாபுணிங்ஸு. ஏவம்பீதி, பி⁴க்க²வே, யதா² ஸோ கி³ஜ்ஜோ², ஏவங் யோ அஞ்ஞோபி க³ஹட்டோ² வா பப்³ப³ஜிதோ வா ஹிதானுகம்பகானங் வுத்³தா⁴னங் வசனங் ந க³ண்ஹாதி, ஸோபி அயங் ஸீமங் அதிக்கமித்வா சரந்தோ தி³த்தோ க³ப்³பி³தோ கி³ஜ்ஜோ²வ ப்³யஸனங் பாபுணாதீதி.
Tattha anujīvinoti taṃ nissāya jīvanakā. Anovādakare dijeti tasmiṃ migālope gijjhe ovādaṃ agaṇhante sabbepi te tena saddhiṃ atisīmaṃ gantvā vināsaṃ pāpuṇiṃsu. Evampīti, bhikkhave, yathā so gijjho, evaṃ yo aññopi gahaṭṭho vā pabbajito vā hitānukampakānaṃ vuddhānaṃ vacanaṃ na gaṇhāti, sopi ayaṃ sīmaṃ atikkamitvā caranto ditto gabbito gijjhova byasanaṃ pāpuṇātīti.
ஸத்தா² இமங் த⁴ம்மதே³ஸனங் ஆஹரித்வா ஸச்சானி பகாஸெத்வா ஜாதகங் ஸமோதா⁴னேஸி – ‘‘ததா³ மிகா³லோபோ து³ப்³ப³சபி⁴க்கு² அஹோஸி, அபனந்தோ³ பன அஹமேவ அஹோஸி’’ந்தி.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi – ‘‘tadā migālopo dubbacabhikkhu ahosi, apanando pana ahameva ahosi’’nti.
மிகா³லோபஜாதகவண்ணனா ச²ட்டா².
Migālopajātakavaṇṇanā chaṭṭhā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 381. மிகா³லோபஜாதகங் • 381. Migālopajātakaṃ
