| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5-10. மிக³ஸாலாஸுத்தாதி³வண்ணனா
5-10. Migasālāsuttādivaṇṇanā
75-80. பஞ்சமே இமஸ்ஸ ஹி புக்³க³லஸ்ஸ ஸீலவிரஹிதஸ்ஸ பஞ்ஞா ஸீலங் பரிதோ⁴வதீதி அக²ண்டா³தி³பா⁴வாபாத³னேன ஸீலங் ஆதி³மஜ்ஜ²பரியோஸானேஸு பஞ்ஞாய ஸுவிஸோதி⁴தங் கரோதி. யஸ்ஸ ஹி அப்³ப⁴ந்தரே ஸீலஸங்வரோ நத்தி², உக்³க⁴டிதஞ்ஞுதாய பன சாதுப்பதி³ககா³தா²பரியோஸானே பஞ்ஞாய ஸீலங் தோ⁴வித்வா ஸஹ படிஸம்பி⁴தா³ஹி அரஹத்தங் பாபுணாதி, அயங் பஞ்ஞாய ஸீலங் தோ⁴வதி நாம ஸெய்யதா²பி ஸந்ததிமஹாமத்தோ.
75-80. Pañcame imassa hi puggalassa sīlavirahitassa paññā sīlaṃ paridhovatīti akhaṇḍādibhāvāpādanena sīlaṃ ādimajjhapariyosānesu paññāya suvisodhitaṃ karoti. Yassa hi abbhantare sīlasaṃvaro natthi, ugghaṭitaññutāya pana cātuppadikagāthāpariyosāne paññāya sīlaṃ dhovitvā saha paṭisambhidāhi arahattaṃ pāpuṇāti, ayaṃ paññāya sīlaṃ dhovati nāma seyyathāpi santatimahāmatto.
ஸீலவா பன பஞ்ஞங் தோ⁴வதி. யஸ்ஸ (தீ³॰ நி॰ அட்ட²॰ 1.317) ஹி புது²ஜ்ஜனஸ்ஸ ஸீலங் ஸட்டி²அஸீதிவஸ்ஸானி அக²ண்ட³ங் ஹோதி, ஸோ மரணகாலேபி ஸப்³ப³கிலேஸே கா⁴தெத்வா ஸீலேன பஞ்ஞங் தோ⁴வித்வா அரஹத்தங் க³ண்ஹாதி கந்த³ரஸாலபரிவேணே மஹாஸட்டி²வஸ்ஸத்தே²ரோ விய. தே²ரே கிர மரணமஞ்சே நிபஜ்ஜித்வா ப³லவவேத³னாய நித்து²னந்தே திஸ்ஸமஹாராஜா ‘‘தே²ரங் பஸ்ஸிஸ்ஸாமீ’’தி க³ந்த்வா பரிவேணத்³வாரே டி²தோ தங் ஸத்³த³ங் ஸுத்வா புச்சி² ‘‘கஸ்ஸ ஸத்³தோ³ அய’’ந்தி. தே²ரஸ்ஸ நித்து²னநஸத்³தோ³தி. ‘‘பப்³ப³ஜ்ஜாய ஸட்டி²வஸ்ஸேன வேத³னாபரிக்³க³ஹமத்தம்பி ந கதங், இதா³னி ந தங் வந்தி³ஸ்ஸாமீ’’தி நிவத்தித்வா மஹாபோ³தி⁴ங் வந்தி³துங் க³தோ. ததோ உபட்டா²கத³ஹரோ தே²ரங் ஆஹ ‘‘கிங் நோ, ப⁴ந்தே, லஜ்ஜாபேத², ஸத்³தோ⁴பி ராஜா விப்படிஸாரீ ஹுத்வா ‘ந வந்தி³ஸ்ஸாமீ’தி க³தோ’’தி. கஸ்மா, ஆவுஸோதி? தும்ஹாகங் நித்து²னநஸத்³த³ங் ஸுத்வாதி. ‘‘தேன ஹி மே ஓகாஸங் கரோதா²’’தி வத்வா வேத³னங் விக்க²ம்பெ⁴த்வா அரஹத்தங் பத்வா த³ஹரஸ்ஸ ஸஞ்ஞங் அதா³ஸி ‘‘க³ச்சா²வுஸோ, இதா³னி ராஜானங் அம்ஹே வந்தா³பேஹீ’’தி. த³ஹரோ க³ந்த்வா ‘‘இதா³னி கிர தே²ரங் வந்த³தா²’’தி ஆஹ. ராஜா ஸுஸுமாரபதிதேன தே²ரங் வந்த³ந்தோ ‘‘நாஹங் அய்யஸ்ஸ அரஹத்தங் வந்தா³மி, புது²ஜ்ஜனபூ⁴மியங் பன ட²த்வா ரக்கி²தஸீலமேவ வந்தா³மீ’’தி ஆஹ. ஏவங் ஸீலேன பஞ்ஞங் தோ⁴வதி நாம. ஸேஸங் வுத்தமேவ. ச²ட்டா²தீ³ஸு நத்தி² வத்தப்³ப³ங்.
Sīlavā pana paññaṃ dhovati. Yassa (dī. ni. aṭṭha. 1.317) hi puthujjanassa sīlaṃ saṭṭhiasītivassāni akhaṇḍaṃ hoti, so maraṇakālepi sabbakilese ghātetvā sīlena paññaṃ dhovitvā arahattaṃ gaṇhāti kandarasālapariveṇe mahāsaṭṭhivassatthero viya. There kira maraṇamañce nipajjitvā balavavedanāya nitthunante tissamahārājā ‘‘theraṃ passissāmī’’ti gantvā pariveṇadvāre ṭhito taṃ saddaṃ sutvā pucchi ‘‘kassa saddo aya’’nti. Therassa nitthunanasaddoti. ‘‘Pabbajjāya saṭṭhivassena vedanāpariggahamattampi na kataṃ, idāni na taṃ vandissāmī’’ti nivattitvā mahābodhiṃ vandituṃ gato. Tato upaṭṭhākadaharo theraṃ āha ‘‘kiṃ no, bhante, lajjāpetha, saddhopi rājā vippaṭisārī hutvā ‘na vandissāmī’ti gato’’ti. Kasmā, āvusoti? Tumhākaṃ nitthunanasaddaṃ sutvāti. ‘‘Tena hi me okāsaṃ karothā’’ti vatvā vedanaṃ vikkhambhetvā arahattaṃ patvā daharassa saññaṃ adāsi ‘‘gacchāvuso, idāni rājānaṃ amhe vandāpehī’’ti. Daharo gantvā ‘‘idāni kira theraṃ vandathā’’ti āha. Rājā susumārapatitena theraṃ vandanto ‘‘nāhaṃ ayyassa arahattaṃ vandāmi, puthujjanabhūmiyaṃ pana ṭhatvā rakkhitasīlameva vandāmī’’ti āha. Evaṃ sīlena paññaṃ dhovati nāma. Sesaṃ vuttameva. Chaṭṭhādīsu natthi vattabbaṃ.
மிக³ஸாலாஸுத்தாதி³வண்ணனா நிட்டி²தா.
Migasālāsuttādivaṇṇanā niṭṭhitā.
ஆகங்க²வக்³க³வண்ணனா நிட்டி²தா.
Ākaṅkhavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
5. மிக³ஸாலாஸுத்தங் • 5. Migasālāsuttaṃ
6. தயோத⁴ம்மஸுத்தங் • 6. Tayodhammasuttaṃ
7. காகஸுத்தங் • 7. Kākasuttaṃ
8. நிக³ண்ட²ஸுத்தங் • 8. Nigaṇṭhasuttaṃ
9. ஆகா⁴தவத்து²ஸுத்தங் • 9. Āghātavatthusuttaṃ
10. ஆகா⁴தபடிவினயஸுத்தங் • 10. Āghātapaṭivinayasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
5. மிக³ஸாலாஸுத்தவண்ணனா • 5. Migasālāsuttavaṇṇanā
7. காகஸுத்தவண்ணனா • 7. Kākasuttavaṇṇanā
9. ஆகா⁴தவத்து²ஸுத்தவண்ணனா • 9. Āghātavatthusuttavaṇṇanā
