| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৫-১০. মিগসালাসুত্তাদিৰণ্ণনা
5-10. Migasālāsuttādivaṇṇanā
৭৫-৮০. পঞ্চমে ইমস্স হি পুগ্গলস্স সীলৰিরহিতস্স পঞ্ঞা সীলং পরিধোৰতীতি অখণ্ডাদিভাৰাপাদনেন সীলং আদিমজ্ঝপরিযোসানেসু পঞ্ঞায সুৰিসোধিতং করোতি। যস্স হি অব্ভন্তরে সীলসংৰরো নত্থি, উগ্ঘটিতঞ্ঞুতায পন চাতুপ্পদিকগাথাপরিযোসানে পঞ্ঞায সীলং ধোৰিত্ৰা সহ পটিসম্ভিদাহি অরহত্তং পাপুণাতি, অযং পঞ্ঞায সীলং ধোৰতি নাম সেয্যথাপি সন্ততিমহামত্তো।
75-80. Pañcame imassa hi puggalassa sīlavirahitassa paññā sīlaṃ paridhovatīti akhaṇḍādibhāvāpādanena sīlaṃ ādimajjhapariyosānesu paññāya suvisodhitaṃ karoti. Yassa hi abbhantare sīlasaṃvaro natthi, ugghaṭitaññutāya pana cātuppadikagāthāpariyosāne paññāya sīlaṃ dhovitvā saha paṭisambhidāhi arahattaṃ pāpuṇāti, ayaṃ paññāya sīlaṃ dhovati nāma seyyathāpi santatimahāmatto.
সীলৰা পন পঞ্ঞং ধোৰতি। যস্স (দী॰ নি॰ অট্ঠ॰ ১.৩১৭) হি পুথুজ্জনস্স সীলং সট্ঠিঅসীতিৰস্সানি অখণ্ডং হোতি, সো মরণকালেপি সব্বকিলেসে ঘাতেত্ৰা সীলেন পঞ্ঞং ধোৰিত্ৰা অরহত্তং গণ্হাতি কন্দরসালপরিৰেণে মহাসট্ঠিৰস্সত্থেরো ৰিয। থেরে কির মরণমঞ্চে নিপজ্জিত্ৰা বলৰৰেদনায নিত্থুনন্তে তিস্সমহারাজা ‘‘থেরং পস্সিস্সামী’’তি গন্ত্ৰা পরিৰেণদ্ৰারে ঠিতো তং সদ্দং সুত্ৰা পুচ্ছি ‘‘কস্স সদ্দো অয’’ন্তি। থেরস্স নিত্থুননসদ্দোতি। ‘‘পব্বজ্জায সট্ঠিৰস্সেন ৰেদনাপরিগ্গহমত্তম্পি ন কতং, ইদানি ন তং ৰন্দিস্সামী’’তি নিৰত্তিত্ৰা মহাবোধিং ৰন্দিতুং গতো। ততো উপট্ঠাকদহরো থেরং আহ ‘‘কিং নো, ভন্তে, লজ্জাপেথ, সদ্ধোপি রাজা ৰিপ্পটিসারী হুত্ৰা ‘ন ৰন্দিস্সামী’তি গতো’’তি। কস্মা, আৰুসোতি? তুম্হাকং নিত্থুননসদ্দং সুত্ৰাতি। ‘‘তেন হি মে ওকাসং করোথা’’তি ৰত্ৰা ৰেদনং ৰিক্খম্ভেত্ৰা অরহত্তং পত্ৰা দহরস্স সঞ্ঞং অদাসি ‘‘গচ্ছাৰুসো, ইদানি রাজানং অম্হে ৰন্দাপেহী’’তি। দহরো গন্ত্ৰা ‘‘ইদানি কির থেরং ৰন্দথা’’তি আহ। রাজা সুসুমারপতিতেন থেরং ৰন্দন্তো ‘‘নাহং অয্যস্স অরহত্তং ৰন্দামি, পুথুজ্জনভূমিযং পন ঠত্ৰা রক্খিতসীলমেৰ ৰন্দামী’’তি আহ। এৰং সীলেন পঞ্ঞং ধোৰতি নাম। সেসং ৰুত্তমেৰ। ছট্ঠাদীসু নত্থি ৰত্তব্বং।
Sīlavā pana paññaṃ dhovati. Yassa (dī. ni. aṭṭha. 1.317) hi puthujjanassa sīlaṃ saṭṭhiasītivassāni akhaṇḍaṃ hoti, so maraṇakālepi sabbakilese ghātetvā sīlena paññaṃ dhovitvā arahattaṃ gaṇhāti kandarasālapariveṇe mahāsaṭṭhivassatthero viya. There kira maraṇamañce nipajjitvā balavavedanāya nitthunante tissamahārājā ‘‘theraṃ passissāmī’’ti gantvā pariveṇadvāre ṭhito taṃ saddaṃ sutvā pucchi ‘‘kassa saddo aya’’nti. Therassa nitthunanasaddoti. ‘‘Pabbajjāya saṭṭhivassena vedanāpariggahamattampi na kataṃ, idāni na taṃ vandissāmī’’ti nivattitvā mahābodhiṃ vandituṃ gato. Tato upaṭṭhākadaharo theraṃ āha ‘‘kiṃ no, bhante, lajjāpetha, saddhopi rājā vippaṭisārī hutvā ‘na vandissāmī’ti gato’’ti. Kasmā, āvusoti? Tumhākaṃ nitthunanasaddaṃ sutvāti. ‘‘Tena hi me okāsaṃ karothā’’ti vatvā vedanaṃ vikkhambhetvā arahattaṃ patvā daharassa saññaṃ adāsi ‘‘gacchāvuso, idāni rājānaṃ amhe vandāpehī’’ti. Daharo gantvā ‘‘idāni kira theraṃ vandathā’’ti āha. Rājā susumārapatitena theraṃ vandanto ‘‘nāhaṃ ayyassa arahattaṃ vandāmi, puthujjanabhūmiyaṃ pana ṭhatvā rakkhitasīlameva vandāmī’’ti āha. Evaṃ sīlena paññaṃ dhovati nāma. Sesaṃ vuttameva. Chaṭṭhādīsu natthi vattabbaṃ.
মিগসালাসুত্তাদিৰণ্ণনা নিট্ঠিতা।
Migasālāsuttādivaṇṇanā niṭṭhitā.
আকঙ্খৰগ্গৰণ্ণনা নিট্ঠিতা।
Ākaṅkhavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya
৫. মিগসালাসুত্তং • 5. Migasālāsuttaṃ
৬. তযোধম্মসুত্তং • 6. Tayodhammasuttaṃ
৭. কাকসুত্তং • 7. Kākasuttaṃ
৮. নিগণ্ঠসুত্তং • 8. Nigaṇṭhasuttaṃ
৯. আঘাতৰত্থুসুত্তং • 9. Āghātavatthusuttaṃ
১০. আঘাতপটিৰিনযসুত্তং • 10. Āghātapaṭivinayasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā)
৫. মিগসালাসুত্তৰণ্ণনা • 5. Migasālāsuttavaṇṇanā
৭. কাকসুত্তৰণ্ণনা • 7. Kākasuttavaṇṇanā
৯. আঘাতৰত্থুসুত্তৰণ্ণনা • 9. Āghātavatthusuttavaṇṇanā
