| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
೫-೧೦. ಮಿಗಸಾಲಾಸುತ್ತಾದಿವಣ್ಣನಾ
5-10. Migasālāsuttādivaṇṇanā
೭೫-೮೦. ಪಞ್ಚಮೇ ಇಮಸ್ಸ ಹಿ ಪುಗ್ಗಲಸ್ಸ ಸೀಲವಿರಹಿತಸ್ಸ ಪಞ್ಞಾ ಸೀಲಂ ಪರಿಧೋವತೀತಿ ಅಖಣ್ಡಾದಿಭಾವಾಪಾದನೇನ ಸೀಲಂ ಆದಿಮಜ್ಝಪರಿಯೋಸಾನೇಸು ಪಞ್ಞಾಯ ಸುವಿಸೋಧಿತಂ ಕರೋತಿ। ಯಸ್ಸ ಹಿ ಅಬ್ಭನ್ತರೇ ಸೀಲಸಂವರೋ ನತ್ಥಿ, ಉಗ್ಘಟಿತಞ್ಞುತಾಯ ಪನ ಚಾತುಪ್ಪದಿಕಗಾಥಾಪರಿಯೋಸಾನೇ ಪಞ್ಞಾಯ ಸೀಲಂ ಧೋವಿತ್ವಾ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪಾಪುಣಾತಿ, ಅಯಂ ಪಞ್ಞಾಯ ಸೀಲಂ ಧೋವತಿ ನಾಮ ಸೇಯ್ಯಥಾಪಿ ಸನ್ತತಿಮಹಾಮತ್ತೋ।
75-80. Pañcame imassa hi puggalassa sīlavirahitassa paññā sīlaṃ paridhovatīti akhaṇḍādibhāvāpādanena sīlaṃ ādimajjhapariyosānesu paññāya suvisodhitaṃ karoti. Yassa hi abbhantare sīlasaṃvaro natthi, ugghaṭitaññutāya pana cātuppadikagāthāpariyosāne paññāya sīlaṃ dhovitvā saha paṭisambhidāhi arahattaṃ pāpuṇāti, ayaṃ paññāya sīlaṃ dhovati nāma seyyathāpi santatimahāmatto.
ಸೀಲವಾ ಪನ ಪಞ್ಞಂ ಧೋವತಿ। ಯಸ್ಸ (ದೀ॰ ನಿ॰ ಅಟ್ಠ॰ ೧.೩೧೭) ಹಿ ಪುಥುಜ್ಜನಸ್ಸ ಸೀಲಂ ಸಟ್ಠಿಅಸೀತಿವಸ್ಸಾನಿ ಅಖಣ್ಡಂ ಹೋತಿ, ಸೋ ಮರಣಕಾಲೇಪಿ ಸಬ್ಬಕಿಲೇಸೇ ಘಾತೇತ್ವಾ ಸೀಲೇನ ಪಞ್ಞಂ ಧೋವಿತ್ವಾ ಅರಹತ್ತಂ ಗಣ್ಹಾತಿ ಕನ್ದರಸಾಲಪರಿವೇಣೇ ಮಹಾಸಟ್ಠಿವಸ್ಸತ್ಥೇರೋ ವಿಯ। ಥೇರೇ ಕಿರ ಮರಣಮಞ್ಚೇ ನಿಪಜ್ಜಿತ್ವಾ ಬಲವವೇದನಾಯ ನಿತ್ಥುನನ್ತೇ ತಿಸ್ಸಮಹಾರಾಜಾ ‘‘ಥೇರಂ ಪಸ್ಸಿಸ್ಸಾಮೀ’’ತಿ ಗನ್ತ್ವಾ ಪರಿವೇಣದ್ವಾರೇ ಠಿತೋ ತಂ ಸದ್ದಂ ಸುತ್ವಾ ಪುಚ್ಛಿ ‘‘ಕಸ್ಸ ಸದ್ದೋ ಅಯ’’ನ್ತಿ। ಥೇರಸ್ಸ ನಿತ್ಥುನನಸದ್ದೋತಿ। ‘‘ಪಬ್ಬಜ್ಜಾಯ ಸಟ್ಠಿವಸ್ಸೇನ ವೇದನಾಪರಿಗ್ಗಹಮತ್ತಮ್ಪಿ ನ ಕತಂ, ಇದಾನಿ ನ ತಂ ವನ್ದಿಸ್ಸಾಮೀ’’ತಿ ನಿವತ್ತಿತ್ವಾ ಮಹಾಬೋಧಿಂ ವನ್ದಿತುಂ ಗತೋ। ತತೋ ಉಪಟ್ಠಾಕದಹರೋ ಥೇರಂ ಆಹ ‘‘ಕಿಂ ನೋ, ಭನ್ತೇ, ಲಜ್ಜಾಪೇಥ, ಸದ್ಧೋಪಿ ರಾಜಾ ವಿಪ್ಪಟಿಸಾರೀ ಹುತ್ವಾ ‘ನ ವನ್ದಿಸ್ಸಾಮೀ’ತಿ ಗತೋ’’ತಿ। ಕಸ್ಮಾ, ಆವುಸೋತಿ? ತುಮ್ಹಾಕಂ ನಿತ್ಥುನನಸದ್ದಂ ಸುತ್ವಾತಿ। ‘‘ತೇನ ಹಿ ಮೇ ಓಕಾಸಂ ಕರೋಥಾ’’ತಿ ವತ್ವಾ ವೇದನಂ ವಿಕ್ಖಮ್ಭೇತ್ವಾ ಅರಹತ್ತಂ ಪತ್ವಾ ದಹರಸ್ಸ ಸಞ್ಞಂ ಅದಾಸಿ ‘‘ಗಚ್ಛಾವುಸೋ, ಇದಾನಿ ರಾಜಾನಂ ಅಮ್ಹೇ ವನ್ದಾಪೇಹೀ’’ತಿ। ದಹರೋ ಗನ್ತ್ವಾ ‘‘ಇದಾನಿ ಕಿರ ಥೇರಂ ವನ್ದಥಾ’’ತಿ ಆಹ। ರಾಜಾ ಸುಸುಮಾರಪತಿತೇನ ಥೇರಂ ವನ್ದನ್ತೋ ‘‘ನಾಹಂ ಅಯ್ಯಸ್ಸ ಅರಹತ್ತಂ ವನ್ದಾಮಿ, ಪುಥುಜ್ಜನಭೂಮಿಯಂ ಪನ ಠತ್ವಾ ರಕ್ಖಿತಸೀಲಮೇವ ವನ್ದಾಮೀ’’ತಿ ಆಹ। ಏವಂ ಸೀಲೇನ ಪಞ್ಞಂ ಧೋವತಿ ನಾಮ। ಸೇಸಂ ವುತ್ತಮೇವ। ಛಟ್ಠಾದೀಸು ನತ್ಥಿ ವತ್ತಬ್ಬಂ।
Sīlavā pana paññaṃ dhovati. Yassa (dī. ni. aṭṭha. 1.317) hi puthujjanassa sīlaṃ saṭṭhiasītivassāni akhaṇḍaṃ hoti, so maraṇakālepi sabbakilese ghātetvā sīlena paññaṃ dhovitvā arahattaṃ gaṇhāti kandarasālapariveṇe mahāsaṭṭhivassatthero viya. There kira maraṇamañce nipajjitvā balavavedanāya nitthunante tissamahārājā ‘‘theraṃ passissāmī’’ti gantvā pariveṇadvāre ṭhito taṃ saddaṃ sutvā pucchi ‘‘kassa saddo aya’’nti. Therassa nitthunanasaddoti. ‘‘Pabbajjāya saṭṭhivassena vedanāpariggahamattampi na kataṃ, idāni na taṃ vandissāmī’’ti nivattitvā mahābodhiṃ vandituṃ gato. Tato upaṭṭhākadaharo theraṃ āha ‘‘kiṃ no, bhante, lajjāpetha, saddhopi rājā vippaṭisārī hutvā ‘na vandissāmī’ti gato’’ti. Kasmā, āvusoti? Tumhākaṃ nitthunanasaddaṃ sutvāti. ‘‘Tena hi me okāsaṃ karothā’’ti vatvā vedanaṃ vikkhambhetvā arahattaṃ patvā daharassa saññaṃ adāsi ‘‘gacchāvuso, idāni rājānaṃ amhe vandāpehī’’ti. Daharo gantvā ‘‘idāni kira theraṃ vandathā’’ti āha. Rājā susumārapatitena theraṃ vandanto ‘‘nāhaṃ ayyassa arahattaṃ vandāmi, puthujjanabhūmiyaṃ pana ṭhatvā rakkhitasīlameva vandāmī’’ti āha. Evaṃ sīlena paññaṃ dhovati nāma. Sesaṃ vuttameva. Chaṭṭhādīsu natthi vattabbaṃ.
ಮಿಗಸಾಲಾಸುತ್ತಾದಿವಣ್ಣನಾ ನಿಟ್ಠಿತಾ।
Migasālāsuttādivaṇṇanā niṭṭhitā.
ಆಕಙ್ಖವಗ್ಗವಣ್ಣನಾ ನಿಟ್ಠಿತಾ।
Ākaṅkhavaggavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya
೫. ಮಿಗಸಾಲಾಸುತ್ತಂ • 5. Migasālāsuttaṃ
೬. ತಯೋಧಮ್ಮಸುತ್ತಂ • 6. Tayodhammasuttaṃ
೭. ಕಾಕಸುತ್ತಂ • 7. Kākasuttaṃ
೮. ನಿಗಣ್ಠಸುತ್ತಂ • 8. Nigaṇṭhasuttaṃ
೯. ಆಘಾತವತ್ಥುಸುತ್ತಂ • 9. Āghātavatthusuttaṃ
೧೦. ಆಘಾತಪಟಿವಿನಯಸುತ್ತಂ • 10. Āghātapaṭivinayasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā)
೫. ಮಿಗಸಾಲಾಸುತ್ತವಣ್ಣನಾ • 5. Migasālāsuttavaṇṇanā
೭. ಕಾಕಸುತ್ತವಣ್ಣನಾ • 7. Kākasuttavaṇṇanā
೯. ಆಘಾತವತ್ಥುಸುತ್ತವಣ್ಣನಾ • 9. Āghātavatthusuttavaṇṇanā
