| Library / Tipiṭaka / তিপিটক • Tipiṭaka / অঙ্গুত্তরনিকায • Aṅguttaranikāya |
২. মিগসালাসুত্তং
2. Migasālāsuttaṃ
৪৪. অথ খো আযস্মা আনন্দো পুব্বণ্হসমযং নিৰাসেত্ৰা পত্তচীৰরমাদায যেন মিগসালায উপাসিকায নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। অথ খো মিগসালা 1 উপাসিকা যেনাযস্মা আনন্দো তেনুপসঙ্কমি; উপসঙ্কমিত্ৰা আযস্মন্তং আনন্দং অভিৰাদেত্ৰা একমন্তং নিসীদি। একমন্তং নিসিন্না খো মিগসালা উপাসিকা আযস্মন্তং আনন্দং এতদৰোচ –
44. Atha kho āyasmā ānando pubbaṇhasamayaṃ nivāsetvā pattacīvaramādāya yena migasālāya upāsikāya nivesanaṃ tenupasaṅkami; upasaṅkamitvā paññatte āsane nisīdi. Atha kho migasālā 2 upāsikā yenāyasmā ānando tenupasaṅkami; upasaṅkamitvā āyasmantaṃ ānandaṃ abhivādetvā ekamantaṃ nisīdi. Ekamantaṃ nisinnā kho migasālā upāsikā āyasmantaṃ ānandaṃ etadavoca –
‘‘কথং কথং নামাযং, ভন্তে আনন্দ, ভগৰতা ধম্মো দেসিতো অঞ্ঞেয্যো, যত্র হি নাম ব্রহ্মচারী চ অব্রহ্মচারী চ উভো সমসমগতিকা ভৰিস্সন্তি অভিসম্পরাযং ? পিতা মে, ভন্তে, পুরাণো ব্রহ্মচারী অহোসি আরাচারী ৰিরতো মেথুনা গামধম্মা। সো কালঙ্কতো ভগৰতা ব্যাকতো সকদাগামিসত্তো 3 তুসিতং কাযং উপপন্নোতি। পেত্তেয্যোপি 4 মে, ভন্তে, ইসিদত্তো অব্রহ্মচারী অহোসি সদারসন্তুট্ঠো। সোপি কালঙ্কতো ভগৰতা ব্যাকতো সকদাগামিপত্তো তুসিতং কাযং উপপন্নোতি। কথং কথং নামাযং, ভন্তে আনন্দ, ভগৰতা ধম্মো দেসিতো অঞ্ঞেয্যো, যত্র হি নাম ব্রহ্মচারী চ অব্রহ্মচারী চ উভো সমসমগতিকা ভৰিস্সন্তি অভিসম্পরায’’ন্তি? ‘‘এৰং খো পনেতং, ভগিনি, ভগৰতা ব্যাকত’’ন্তি।
‘‘Kathaṃ kathaṃ nāmāyaṃ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāyaṃ ? Pitā me, bhante, purāṇo brahmacārī ahosi ārācārī virato methunā gāmadhammā. So kālaṅkato bhagavatā byākato sakadāgāmisatto 5 tusitaṃ kāyaṃ upapannoti. Petteyyopi 6 me, bhante, isidatto abrahmacārī ahosi sadārasantuṭṭho. Sopi kālaṅkato bhagavatā byākato sakadāgāmipatto tusitaṃ kāyaṃ upapannoti. Kathaṃ kathaṃ nāmāyaṃ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāya’’nti? ‘‘Evaṃ kho panetaṃ, bhagini, bhagavatā byākata’’nti.
অথ খো আযস্মা আনন্দো মিগসালায উপাসিকায নিৰেসনে পিণ্ডপাতং গহেত্ৰা উট্ঠাযাসনা পক্কামি। অথ খো আযস্মা আনন্দো পচ্ছাভত্তং পিণ্ডপাতপটিক্কন্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা আনন্দো ভগৰন্তং এতদৰোচ –
Atha kho āyasmā ānando migasālāya upāsikāya nivesane piṇḍapātaṃ gahetvā uṭṭhāyāsanā pakkāmi. Atha kho āyasmā ānando pacchābhattaṃ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –
‘‘ইধাহং, ভন্তে, পুব্বণ্হসমযং নিৰাসেত্ৰা পত্তচীৰরমাদায যেন মিগসালায উপাসিকায নিৰেসনং তেনুপসঙ্কমিং; উপসঙ্কমিত্ৰা পঞ্ঞত্তে আসনে নিসীদিং। অথ খো, ভন্তে, মিগসালা উপাসিকা যেনাহং তেনুপসঙ্কমি; উপসঙ্কমিত্ৰা মং অভিৰাদেত্ৰা একমন্তং নিসীদি। একমন্তং নিসিন্না খো, ভন্তে, মিগসালা উপাসিকা মং এতদৰোচ – ‘কথং কথং নামাযং, ভন্তে আনন্দ, ভগৰতা ধম্মো দেসিতো অঞ্ঞেয্যো, যত্র হি নাম ব্রহ্মচারী চ অব্রহ্মচারী চ উভো সমসমগতিকা ভৰিস্সন্তি অভিসম্পরাযং। পিতা মে, ভন্তে, পুরাণো ব্রহ্মচারী অহোসি আরাচারী ৰিরতো মেথুনা গামধম্মা। সো কালঙ্কতো ভগৰতা ব্যাকতো সকদাগামিপত্তো তুসিতং কাযং উপপন্নোতি। পেত্তেয্যোপি মে, ভন্তে, ইসিদত্তো অব্রহ্মচারী অহোসি সদারসন্তুট্ঠো। সোপি কালঙ্কতো ভগৰতা ব্যাকতো সকদাগামিপত্তো তুসিতং কাযং উপপন্নোতি। কথং কথং নামাযং, ভন্তে আনন্দ, ভগৰতা ধম্মো দেসিতো অঞ্ঞেয্যো, যত্র হি নাম ব্রহ্মচারী চ অব্রহ্মচারী চ উভো সমসমগতিকা ভৰিস্সন্তি অভিসম্পরায’ন্তি? এৰং ৰুত্তে অহং, ভন্তে, মিগসালং উপাসিকং এতদৰোচং – ‘এৰং খো পনেতং, ভগিনি, ভগৰতা ব্যাকত’’’ন্তি।
‘‘Idhāhaṃ, bhante, pubbaṇhasamayaṃ nivāsetvā pattacīvaramādāya yena migasālāya upāsikāya nivesanaṃ tenupasaṅkamiṃ; upasaṅkamitvā paññatte āsane nisīdiṃ. Atha kho, bhante, migasālā upāsikā yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinnā kho, bhante, migasālā upāsikā maṃ etadavoca – ‘kathaṃ kathaṃ nāmāyaṃ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāyaṃ. Pitā me, bhante, purāṇo brahmacārī ahosi ārācārī virato methunā gāmadhammā. So kālaṅkato bhagavatā byākato sakadāgāmipatto tusitaṃ kāyaṃ upapannoti. Petteyyopi me, bhante, isidatto abrahmacārī ahosi sadārasantuṭṭho. Sopi kālaṅkato bhagavatā byākato sakadāgāmipatto tusitaṃ kāyaṃ upapannoti. Kathaṃ kathaṃ nāmāyaṃ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāya’nti? Evaṃ vutte ahaṃ, bhante, migasālaṃ upāsikaṃ etadavocaṃ – ‘evaṃ kho panetaṃ, bhagini, bhagavatā byākata’’’nti.
‘‘কা চানন্দ, মিগসালা উপাসিকা বালা অব্যত্তা অম্মকা অম্মকসঞ্ঞা 7, কে চ পুরিসপুগ্গলপরোপরিযঞাণে? ছযিমে, আনন্দ, পুগ্গলা সন্তো সংৰিজ্জমানা লোকস্মিং।
‘‘Kā cānanda, migasālā upāsikā bālā abyattā ammakā ammakasaññā 8, ke ca purisapuggalaparopariyañāṇe? Chayime, ānanda, puggalā santo saṃvijjamānā lokasmiṃ.
‘‘কতমে ছ? ইধানন্দ, একচ্চো পুগ্গলো সোরতো হোতি সুখসংৰাসো, অভিনন্দন্তি সব্রহ্মচারী একত্তৰাসেন। তস্স সৰনেনপি অকতং হোতি, বাহুসচ্চেনপি অকতং হোতি, দিট্ঠিযাপি অপ্পটিৰিদ্ধং হোতি, সামাযিকম্পি ৰিমুত্তিং ন লভতি। সো কাযস্স ভেদা পরং মরণা হানায পরেতি নো ৰিসেসায, হানগামীযেৰ হোতি নো ৰিসেসগামী।
‘‘Katame cha? Idhānanda, ekacco puggalo sorato hoti sukhasaṃvāso, abhinandanti sabrahmacārī ekattavāsena. Tassa savanenapi akataṃ hoti, bāhusaccenapi akataṃ hoti, diṭṭhiyāpi appaṭividdhaṃ hoti, sāmāyikampi vimuttiṃ na labhati. So kāyassa bhedā paraṃ maraṇā hānāya pareti no visesāya, hānagāmīyeva hoti no visesagāmī.
‘‘ইধ পনানন্দ, একচ্চো পুগ্গলো সোরতো হোতি সুখসংৰাসো, অভিনন্দন্তি সব্রহ্মচারী একত্তৰাসেন। তস্স সৰনেনপি কতং হোতি, বাহুসচ্চেনপি কতং হোতি, দিট্ঠিযাপি পটিৰিদ্ধং হোতি, সামাযিকম্পি ৰিমুত্তিং লভতি। সো কাযস্স ভেদা পরং মরণা ৰিসেসায পরেতি নো হানায, ৰিসেসগামীযেৰ হোতি নো হানগামী।
‘‘Idha panānanda, ekacco puggalo sorato hoti sukhasaṃvāso, abhinandanti sabrahmacārī ekattavāsena. Tassa savanenapi kataṃ hoti, bāhusaccenapi kataṃ hoti, diṭṭhiyāpi paṭividdhaṃ hoti, sāmāyikampi vimuttiṃ labhati. So kāyassa bhedā paraṃ maraṇā visesāya pareti no hānāya, visesagāmīyeva hoti no hānagāmī.
‘‘তত্রানন্দ, পমাণিকা পমিণন্তি – ‘ইমস্সপি তেৰ ধম্মা অপরস্সপি তেৰ ধম্মা, কস্মা তেসং একো হীনো একো পণীতো’তি! তঞ্হি তেসং, আনন্দ, হোতি দীঘরত্তং অহিতায দুক্খায।
‘‘Tatrānanda, pamāṇikā pamiṇanti – ‘imassapi teva dhammā aparassapi teva dhammā, kasmā tesaṃ eko hīno eko paṇīto’ti! Tañhi tesaṃ, ānanda, hoti dīgharattaṃ ahitāya dukkhāya.
‘‘তত্রানন্দ , য্ৰাযং পুগ্গলো সোরতো হোতি সুখসংৰাসো, অভিনন্দন্তি সব্রহ্মচারী একত্তৰাসেন, তস্স সৰনেনপি কতং হোতি, বাহুসচ্চেনপি কতং হোতি, দিট্ঠিযাপি পটিৰিদ্ধং হোতি, সামাযিকম্পি ৰিমুত্তিং লভতি। অযং , আনন্দ , পুগ্গলো অমুনা পুরিমেন পুগ্গলেন অভিক্কন্ততরো চ পণীততরো চ। তং কিস্স হেতু? ইমং হানন্দ, পুগ্গলং ধম্মসোতো নিব্বহতি, তদন্তরং কো জানেয্য অঞ্ঞত্র তথাগতেন! তস্মাতিহানন্দ, মা পুগ্গলেসু পমাণিকা অহুৰত্থ; মা পুগ্গলেসু পমাণং গণ্হিত্থ। খঞ্ঞতি হানন্দ, পুগ্গলেসু পমাণং গণ্হন্তো। অহং ৰা, আনন্দ, পুগ্গলেসু পমাণং গণ্হেয্যং, যো ৰা পনস্স মাদিসো।
‘‘Tatrānanda , yvāyaṃ puggalo sorato hoti sukhasaṃvāso, abhinandanti sabrahmacārī ekattavāsena, tassa savanenapi kataṃ hoti, bāhusaccenapi kataṃ hoti, diṭṭhiyāpi paṭividdhaṃ hoti, sāmāyikampi vimuttiṃ labhati. Ayaṃ , ānanda , puggalo amunā purimena puggalena abhikkantataro ca paṇītataro ca. Taṃ kissa hetu? Imaṃ hānanda, puggalaṃ dhammasoto nibbahati, tadantaraṃ ko jāneyya aññatra tathāgatena! Tasmātihānanda, mā puggalesu pamāṇikā ahuvattha; mā puggalesu pamāṇaṃ gaṇhittha. Khaññati hānanda, puggalesu pamāṇaṃ gaṇhanto. Ahaṃ vā, ānanda, puggalesu pamāṇaṃ gaṇheyyaṃ, yo vā panassa mādiso.
‘‘ইধ পনানন্দ, একচ্চস্স পুগ্গলস্স কোধমানো অধিগতো 9 হোতি, সমযেন সমযঞ্চস্স লোভধম্মা উপ্পজ্জন্তি। তস্স সৰনেনপি অকতং হোতি, বাহুসচ্চেনপি অকতং হোতি, দিট্ঠিযাপি অপ্পটিৰিদ্ধং হোতি, সামাযিকম্পি ৰিমুত্তিং ন লভতি। সো কাযস্স ভেদা পরং মরণা হানায পরেতি নো ৰিসেসায, হানগামীযেৰ হোতি নো ৰিসেসগামী।
‘‘Idha panānanda, ekaccassa puggalassa kodhamāno adhigato 10 hoti, samayena samayañcassa lobhadhammā uppajjanti. Tassa savanenapi akataṃ hoti, bāhusaccenapi akataṃ hoti, diṭṭhiyāpi appaṭividdhaṃ hoti, sāmāyikampi vimuttiṃ na labhati. So kāyassa bhedā paraṃ maraṇā hānāya pareti no visesāya, hānagāmīyeva hoti no visesagāmī.
‘‘ইধ পনানন্দ, একচ্চস্স পুগ্গলস্স কোধমানো অধিগতো হোতি, সমযেন সমযঞ্চস্স লোভধম্মা উপ্পজ্জন্তি। তস্স সৰনেনপি কতং হোতি…পে॰… নো হানগামী।
‘‘Idha panānanda, ekaccassa puggalassa kodhamāno adhigato hoti, samayena samayañcassa lobhadhammā uppajjanti. Tassa savanenapi kataṃ hoti…pe… no hānagāmī.
‘‘তত্রানন্দ , পমাণিকা পমিণন্তি…পে॰… যো ৰা পনস্স মাদিসো।
‘‘Tatrānanda , pamāṇikā pamiṇanti…pe… yo vā panassa mādiso.
‘‘ইধ, পনানন্দ, একচ্চস্স পুগ্গলস্স কোধমানো অধিগতো হোতি, সমযেন সমযঞ্চস্স ৰচীসঙ্খারা উপ্পজ্জন্তি। তস্স সৰনেনপি অকতং হোতি…পে॰… সামাযিকম্পি ৰিমুত্তিং ন লভতি। সো কাযস্স ভেদা পরং মরণা হানায পরেতি নো ৰিসেসায, হানগামীযেৰ হোতি নো ৰিসেসগামী।
‘‘Idha, panānanda, ekaccassa puggalassa kodhamāno adhigato hoti, samayena samayañcassa vacīsaṅkhārā uppajjanti. Tassa savanenapi akataṃ hoti…pe… sāmāyikampi vimuttiṃ na labhati. So kāyassa bhedā paraṃ maraṇā hānāya pareti no visesāya, hānagāmīyeva hoti no visesagāmī.
‘‘ইধ পনানন্দ, একচ্চস্স পুগ্গলস্স কোধমানো অধিগতো হোতি, সমযেন সমযঞ্চস্স ৰচীসঙ্খারা উপ্পজ্জন্তি। তস্স সৰনেনপি কতং হোতি, বাহুসচ্চেনপি কতং হোতি, দিট্ঠিযাপি পটিৰিদ্ধং হোতি, সামাযিকম্পি ৰিমুত্তিং লভতি। সো কাযস্স ভেদা পরং মরণা ৰিসেসায পরেতি নো হানায, ৰিসেসগামীযেৰ হোতি নো হানগামী।
‘‘Idha panānanda, ekaccassa puggalassa kodhamāno adhigato hoti, samayena samayañcassa vacīsaṅkhārā uppajjanti. Tassa savanenapi kataṃ hoti, bāhusaccenapi kataṃ hoti, diṭṭhiyāpi paṭividdhaṃ hoti, sāmāyikampi vimuttiṃ labhati. So kāyassa bhedā paraṃ maraṇā visesāya pareti no hānāya, visesagāmīyeva hoti no hānagāmī.
‘‘তত্রানন্দ , পমাণিকা পমিণন্তি – ‘ইমস্সপি তেৰ ধম্মা, অপরস্সপি তেৰ ধম্মা। কস্মা তেসং একো হীনো, একো পণীতো’তি? তঞ্হি তেসং, আনন্দ, হোতি দীঘরত্তং অহিতায দুক্খায।
‘‘Tatrānanda , pamāṇikā pamiṇanti – ‘imassapi teva dhammā, aparassapi teva dhammā. Kasmā tesaṃ eko hīno, eko paṇīto’ti? Tañhi tesaṃ, ānanda, hoti dīgharattaṃ ahitāya dukkhāya.
‘‘তত্রানন্দ, যস্স পুগ্গলস্স কোধমানো অধিগতো হোতি, সমযেন সমযঞ্চস্স ৰচীসঙ্খারা উপ্পজ্জন্তি, তস্স সৰনেনপি কতং হোতি, বাহুসচ্চেনপি কতং হোতি, দিট্ঠিযাপি পটিৰিদ্ধং হোতি, সামাযিকম্পি ৰিমুত্তিং লভতি। অযং, আনন্দ, পুগ্গলো অমুনা পুরিমেন পুগ্গলেন অভিক্কন্ততরো চ পণীততরো চ। তং কিস্স হেতু? ইমং হানন্দ, পুগ্গলং ধম্মসোতো নিব্বহতি। তদন্তরং কো জানেয্য অঞ্ঞত্র তথাগতেন! তস্মাতিহানন্দ, মা পুগ্গলেসু পমাণিকা অহুৰত্থ; মা পুগ্গলেসু পমাণং গণ্হিত্থ। খঞ্ঞতি হানন্দ, পুগ্গলেসু পমাণং গণ্হন্তো। অহং ৰা, আনন্দ, পুগ্গলেসু পমাণং গণ্হেয্যং, যো ৰা পনস্স মাদিসো।
‘‘Tatrānanda, yassa puggalassa kodhamāno adhigato hoti, samayena samayañcassa vacīsaṅkhārā uppajjanti, tassa savanenapi kataṃ hoti, bāhusaccenapi kataṃ hoti, diṭṭhiyāpi paṭividdhaṃ hoti, sāmāyikampi vimuttiṃ labhati. Ayaṃ, ānanda, puggalo amunā purimena puggalena abhikkantataro ca paṇītataro ca. Taṃ kissa hetu? Imaṃ hānanda, puggalaṃ dhammasoto nibbahati. Tadantaraṃ ko jāneyya aññatra tathāgatena! Tasmātihānanda, mā puggalesu pamāṇikā ahuvattha; mā puggalesu pamāṇaṃ gaṇhittha. Khaññati hānanda, puggalesu pamāṇaṃ gaṇhanto. Ahaṃ vā, ānanda, puggalesu pamāṇaṃ gaṇheyyaṃ, yo vā panassa mādiso.
‘‘কা চানন্দ, মিগসালা উপাসিকা বালা অব্যত্তা অম্মকা অম্মকসঞ্ঞা, কে চ পুরিসপুগ্গলপরোপরিযঞাণে! ইমে খো, আনন্দ, ছ পুগ্গলা সন্তো সংৰিজ্জমানা লোকস্মিং।
‘‘Kā cānanda, migasālā upāsikā bālā abyattā ammakā ammakasaññā, ke ca purisapuggalaparopariyañāṇe! Ime kho, ānanda, cha puggalā santo saṃvijjamānā lokasmiṃ.
‘‘যথারূপেন, আনন্দ, সীলেন পুরাণো সমন্নাগতো অহোসি, তথারূপেন সীলেন ইসিদত্তো সমন্নাগতো অভৰিস্স। নযিধ পুরাণো ইসিদত্তস্স গতিম্পি অঞ্ঞস্স। যথারূপায চ, আনন্দ, পঞ্ঞায ইসিদত্তো সমন্নাগতো অহোসি, তথারূপায পঞ্ঞায পুরাণো সমন্নাগতো অভৰিস্স। নযিধ ইসিদত্তো পুরাণস্স গতিম্পি অঞ্ঞস্স। ইতি খো, আনন্দ, ইমে পুগ্গলা উভো একঙ্গহীনা’’তি। দুতিযং।
‘‘Yathārūpena, ānanda, sīlena purāṇo samannāgato ahosi, tathārūpena sīlena isidatto samannāgato abhavissa. Nayidha purāṇo isidattassa gatimpi aññassa. Yathārūpāya ca, ānanda, paññāya isidatto samannāgato ahosi, tathārūpāya paññāya purāṇo samannāgato abhavissa. Nayidha isidatto purāṇassa gatimpi aññassa. Iti kho, ānanda, ime puggalā ubho ekaṅgahīnā’’ti. Dutiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. মিগসালাসুত্তৰণ্ণনা • 2. Migasālāsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২. মিগসালাসুত্তৰণ্ণনা • 2. Migasālāsuttavaṇṇanā
