| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
2. මිගසාලාසුත්‌තං
2. Migasālāsuttaṃ
44. අථ ඛො ආයස්‌මා ආනන්‌දො පුබ්‌බණ්‌හසමයං නිවාසෙත්‌වා පත්‌තචීවරමාදාය යෙන මිගසාලාය උපාසිකාය නිවෙසනං තෙනුපසඞ්‌කමි; උපසඞ්‌කමිත්‌වා පඤ්‌ඤත්‌තෙ ආසනෙ නිසීදි. අථ ඛො මිගසාලා 1 උපාසිකා යෙනායස්‌මා ආනන්‌දො තෙනුපසඞ්‌කමි; උපසඞ්‌කමිත්‌වා ආයස්‌මන්‌තං ආනන්‌දං අභිවාදෙත්‌වා එකමන්‌තං නිසීදි. එකමන්‌තං නිසින්‌නා ඛො මිගසාලා උපාසිකා ආයස්‌මන්‌තං ආනන්‌දං එතදවොච –
44. Atha kho āyasmā ānando pubbaṇhasamayaṃ nivāsetvā pattacīvaramādāya yena migasālāya upāsikāya nivesanaṃ tenupasaṅkami; upasaṅkamitvā paññatte āsane nisīdi. Atha kho migasālā 2 upāsikā yenāyasmā ānando tenupasaṅkami; upasaṅkamitvā āyasmantaṃ ānandaṃ abhivādetvā ekamantaṃ nisīdi. Ekamantaṃ nisinnā kho migasālā upāsikā āyasmantaṃ ānandaṃ etadavoca –
‘‘කථං කථං නාමායං, භන්‌තෙ ආනන්‌ද, භගවතා ධම්‌මො දෙසිතො අඤ්‌ඤෙය්‍යො, යත්‍ර හි නාම බ්‍රහ්‌මචාරී ච අබ්‍රහ්‌මචාරී ච උභො සමසමගතිකා භවිස්‌සන්‌ති අභිසම්‌පරායං ? පිතා මෙ, භන්‌තෙ, පුරාණො බ්‍රහ්‌මචාරී අහොසි ආරාචාරී විරතො මෙථුනා ගාමධම්‌මා. සො කාලඞ්‌කතො භගවතා බ්‍යාකතො සකදාගාමිසත්‌තො 3 තුසිතං කායං උපපන්‌නොති. පෙත්‌තෙය්‍යොපි 4 මෙ, භන්‌තෙ, ඉසිදත්‌තො අබ්‍රහ්‌මචාරී අහොසි සදාරසන්‌තුට්‌ඨො. සොපි කාලඞ්‌කතො භගවතා බ්‍යාකතො සකදාගාමිපත්‌තො තුසිතං කායං උපපන්‌නොති. කථං කථං නාමායං, භන්‌තෙ ආනන්‌ද, භගවතා ධම්‌මො දෙසිතො අඤ්‌ඤෙය්‍යො, යත්‍ර හි නාම බ්‍රහ්‌මචාරී ච අබ්‍රහ්‌මචාරී ච උභො සමසමගතිකා භවිස්‌සන්‌ති අභිසම්‌පරාය’’න්‌ති? ‘‘එවං ඛො පනෙතං, භගිනි, භගවතා බ්‍යාකත’’න්‌ති.
‘‘Kathaṃ kathaṃ nāmāyaṃ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāyaṃ ? Pitā me, bhante, purāṇo brahmacārī ahosi ārācārī virato methunā gāmadhammā. So kālaṅkato bhagavatā byākato sakadāgāmisatto 5 tusitaṃ kāyaṃ upapannoti. Petteyyopi 6 me, bhante, isidatto abrahmacārī ahosi sadārasantuṭṭho. Sopi kālaṅkato bhagavatā byākato sakadāgāmipatto tusitaṃ kāyaṃ upapannoti. Kathaṃ kathaṃ nāmāyaṃ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāya’’nti? ‘‘Evaṃ kho panetaṃ, bhagini, bhagavatā byākata’’nti.
අථ ඛො ආයස්‌මා ආනන්‌දො මිගසාලාය උපාසිකාය නිවෙසනෙ පිණ්‌ඩපාතං ගහෙත්‌වා උට්‌ඨායාසනා පක්‌කාමි. අථ ඛො ආයස්‌මා ආනන්‌දො පච්‌ඡාභත්‌තං පිණ්‌ඩපාතපටික්‌කන්‌තො යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං නිසීදි. එකමන්‌තං නිසින්‌නො ඛො ආයස්‌මා ආනන්‌දො භගවන්‌තං එතදවොච –
Atha kho āyasmā ānando migasālāya upāsikāya nivesane piṇḍapātaṃ gahetvā uṭṭhāyāsanā pakkāmi. Atha kho āyasmā ānando pacchābhattaṃ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando bhagavantaṃ etadavoca –
‘‘ඉධාහං, භන්‌තෙ, පුබ්‌බණ්‌හසමයං නිවාසෙත්‌වා පත්‌තචීවරමාදාය යෙන මිගසාලාය උපාසිකාය නිවෙසනං තෙනුපසඞ්‌කමිං; උපසඞ්‌කමිත්‌වා පඤ්‌ඤත්‌තෙ ආසනෙ නිසීදිං. අථ ඛො, භන්‌තෙ, මිගසාලා උපාසිකා යෙනාහං තෙනුපසඞ්‌කමි; උපසඞ්‌කමිත්‌වා මං අභිවාදෙත්‌වා එකමන්‌තං නිසීදි. එකමන්‌තං නිසින්‌නා ඛො, භන්‌තෙ, මිගසාලා උපාසිකා මං එතදවොච – ‘කථං කථං නාමායං, භන්‌තෙ ආනන්‌ද, භගවතා ධම්‌මො දෙසිතො අඤ්‌ඤෙය්‍යො, යත්‍ර හි නාම බ්‍රහ්‌මචාරී ච අබ්‍රහ්‌මචාරී ච උභො සමසමගතිකා භවිස්‌සන්‌ති අභිසම්‌පරායං. පිතා මෙ, භන්‌තෙ, පුරාණො බ්‍රහ්‌මචාරී අහොසි ආරාචාරී විරතො මෙථුනා ගාමධම්‌මා. සො කාලඞ්‌කතො භගවතා බ්‍යාකතො සකදාගාමිපත්‌තො තුසිතං කායං උපපන්‌නොති. පෙත්‌තෙය්‍යොපි මෙ, භන්‌තෙ, ඉසිදත්‌තො අබ්‍රහ්‌මචාරී අහොසි සදාරසන්‌තුට්‌ඨො. සොපි කාලඞ්‌කතො භගවතා බ්‍යාකතො සකදාගාමිපත්‌තො තුසිතං කායං උපපන්‌නොති. කථං කථං නාමායං, භන්‌තෙ ආනන්‌ද, භගවතා ධම්‌මො දෙසිතො අඤ්‌ඤෙය්‍යො, යත්‍ර හි නාම බ්‍රහ්‌මචාරී ච අබ්‍රහ්‌මචාරී ච උභො සමසමගතිකා භවිස්‌සන්‌ති අභිසම්‌පරාය’න්‌ති? එවං වුත්‌තෙ අහං, භන්‌තෙ, මිගසාලං උපාසිකං එතදවොචං – ‘එවං ඛො පනෙතං, භගිනි, භගවතා බ්‍යාකත’’’න්‌ති.
‘‘Idhāhaṃ, bhante, pubbaṇhasamayaṃ nivāsetvā pattacīvaramādāya yena migasālāya upāsikāya nivesanaṃ tenupasaṅkamiṃ; upasaṅkamitvā paññatte āsane nisīdiṃ. Atha kho, bhante, migasālā upāsikā yenāhaṃ tenupasaṅkami; upasaṅkamitvā maṃ abhivādetvā ekamantaṃ nisīdi. Ekamantaṃ nisinnā kho, bhante, migasālā upāsikā maṃ etadavoca – ‘kathaṃ kathaṃ nāmāyaṃ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāyaṃ. Pitā me, bhante, purāṇo brahmacārī ahosi ārācārī virato methunā gāmadhammā. So kālaṅkato bhagavatā byākato sakadāgāmipatto tusitaṃ kāyaṃ upapannoti. Petteyyopi me, bhante, isidatto abrahmacārī ahosi sadārasantuṭṭho. Sopi kālaṅkato bhagavatā byākato sakadāgāmipatto tusitaṃ kāyaṃ upapannoti. Kathaṃ kathaṃ nāmāyaṃ, bhante ānanda, bhagavatā dhammo desito aññeyyo, yatra hi nāma brahmacārī ca abrahmacārī ca ubho samasamagatikā bhavissanti abhisamparāya’nti? Evaṃ vutte ahaṃ, bhante, migasālaṃ upāsikaṃ etadavocaṃ – ‘evaṃ kho panetaṃ, bhagini, bhagavatā byākata’’’nti.
‘‘කා චානන්‌ද, මිගසාලා උපාසිකා බාලා අබ්‍යත්‌තා අම්‌මකා අම්‌මකසඤ්‌ඤා 7, කෙ ච පුරිසපුග්‌ගලපරොපරියඤාණෙ? ඡයිමෙ, ආනන්‌ද, පුග්‌ගලා සන්‌තො සංවිජ්‌ජමානා ලොකස්‌මිං.
‘‘Kā cānanda, migasālā upāsikā bālā abyattā ammakā ammakasaññā 8, ke ca purisapuggalaparopariyañāṇe? Chayime, ānanda, puggalā santo saṃvijjamānā lokasmiṃ.
‘‘කතමෙ ඡ? ඉධානන්‌ද, එකච්‌චො පුග්‌ගලො සොරතො හොති සුඛසංවාසො, අභිනන්‌දන්‌ති සබ්‍රහ්‌මචාරී එකත්‌තවාසෙන. තස්‌ස සවනෙනපි අකතං හොති, බාහුසච්‌චෙනපි අකතං හොති, දිට්‌ඨියාපි අප්‌පටිවිද්‌ධං හොති, සාමායිකම්‌පි විමුත්‌තිං න ලභති. සො කායස්‌ස භෙදා පරං මරණා හානාය පරෙති නො විසෙසාය, හානගාමීයෙව හොති නො විසෙසගාමී.
‘‘Katame cha? Idhānanda, ekacco puggalo sorato hoti sukhasaṃvāso, abhinandanti sabrahmacārī ekattavāsena. Tassa savanenapi akataṃ hoti, bāhusaccenapi akataṃ hoti, diṭṭhiyāpi appaṭividdhaṃ hoti, sāmāyikampi vimuttiṃ na labhati. So kāyassa bhedā paraṃ maraṇā hānāya pareti no visesāya, hānagāmīyeva hoti no visesagāmī.
‘‘ඉධ පනානන්‌ද, එකච්‌චො පුග්‌ගලො සොරතො හොති සුඛසංවාසො, අභිනන්‌දන්‌ති සබ්‍රහ්‌මචාරී එකත්‌තවාසෙන. තස්‌ස සවනෙනපි කතං හොති, බාහුසච්‌චෙනපි කතං හොති, දිට්‌ඨියාපි පටිවිද්‌ධං හොති, සාමායිකම්‌පි විමුත්‌තිං ලභති. සො කායස්‌ස භෙදා පරං මරණා විසෙසාය පරෙති නො හානාය, විසෙසගාමීයෙව හොති නො හානගාමී.
‘‘Idha panānanda, ekacco puggalo sorato hoti sukhasaṃvāso, abhinandanti sabrahmacārī ekattavāsena. Tassa savanenapi kataṃ hoti, bāhusaccenapi kataṃ hoti, diṭṭhiyāpi paṭividdhaṃ hoti, sāmāyikampi vimuttiṃ labhati. So kāyassa bhedā paraṃ maraṇā visesāya pareti no hānāya, visesagāmīyeva hoti no hānagāmī.
‘‘තත්‍රානන්‌ද, පමාණිකා පමිණන්‌ති – ‘ඉමස්‌සපි තෙව ධම්‌මා අපරස්‌සපි තෙව ධම්‌මා, කස්‌මා තෙසං එකො හීනො එකො පණීතො’ති! තඤ්‌හි තෙසං, ආනන්‌ද, හොති දීඝරත්‌තං අහිතාය දුක්‌ඛාය.
‘‘Tatrānanda, pamāṇikā pamiṇanti – ‘imassapi teva dhammā aparassapi teva dhammā, kasmā tesaṃ eko hīno eko paṇīto’ti! Tañhi tesaṃ, ānanda, hoti dīgharattaṃ ahitāya dukkhāya.
‘‘තත්‍රානන්‌ද , ය්‌වායං පුග්‌ගලො සොරතො හොති සුඛසංවාසො, අභිනන්‌දන්‌ති සබ්‍රහ්‌මචාරී එකත්‌තවාසෙන, තස්‌ස සවනෙනපි කතං හොති, බාහුසච්‌චෙනපි කතං හොති, දිට්‌ඨියාපි පටිවිද්‌ධං හොති, සාමායිකම්‌පි විමුත්‌තිං ලභති. අයං , ආනන්‌ද , පුග්‌ගලො අමුනා පුරිමෙන පුග්‌ගලෙන අභික්‌කන්‌තතරො ච පණීතතරො ච. තං කිස්‌ස හෙතු? ඉමං හානන්‌ද, පුග්‌ගලං ධම්‌මසොතො නිබ්‌බහති, තදන්‌තරං කො ජානෙය්‍ය අඤ්‌ඤත්‍ර තථාගතෙන! තස්‌මාතිහානන්‌ද, මා පුග්‌ගලෙසු පමාණිකා අහුවත්‌ථ; මා පුග්‌ගලෙසු පමාණං ගණ්‌හිත්‌ථ. ඛඤ්‌ඤති හානන්‌ද, පුග්‌ගලෙසු පමාණං ගණ්‌හන්‌තො. අහං වා, ආනන්‌ද, පුග්‌ගලෙසු පමාණං ගණ්‌හෙය්‍යං, යො වා පනස්‌ස මාදිසො.
‘‘Tatrānanda , yvāyaṃ puggalo sorato hoti sukhasaṃvāso, abhinandanti sabrahmacārī ekattavāsena, tassa savanenapi kataṃ hoti, bāhusaccenapi kataṃ hoti, diṭṭhiyāpi paṭividdhaṃ hoti, sāmāyikampi vimuttiṃ labhati. Ayaṃ , ānanda , puggalo amunā purimena puggalena abhikkantataro ca paṇītataro ca. Taṃ kissa hetu? Imaṃ hānanda, puggalaṃ dhammasoto nibbahati, tadantaraṃ ko jāneyya aññatra tathāgatena! Tasmātihānanda, mā puggalesu pamāṇikā ahuvattha; mā puggalesu pamāṇaṃ gaṇhittha. Khaññati hānanda, puggalesu pamāṇaṃ gaṇhanto. Ahaṃ vā, ānanda, puggalesu pamāṇaṃ gaṇheyyaṃ, yo vā panassa mādiso.
‘‘ඉධ පනානන්‌ද, එකච්‌චස්‌ස පුග්‌ගලස්‌ස කොධමානො අධිගතො 9 හොති, සමයෙන සමයඤ්‌චස්‌ස ලොභධම්‌මා උප්‌පජ්‌ජන්‌ති. තස්‌ස සවනෙනපි අකතං හොති, බාහුසච්‌චෙනපි අකතං හොති, දිට්‌ඨියාපි අප්‌පටිවිද්‌ධං හොති, සාමායිකම්‌පි විමුත්‌තිං න ලභති. සො කායස්‌ස භෙදා පරං මරණා හානාය පරෙති නො විසෙසාය, හානගාමීයෙව හොති නො විසෙසගාමී.
‘‘Idha panānanda, ekaccassa puggalassa kodhamāno adhigato 10 hoti, samayena samayañcassa lobhadhammā uppajjanti. Tassa savanenapi akataṃ hoti, bāhusaccenapi akataṃ hoti, diṭṭhiyāpi appaṭividdhaṃ hoti, sāmāyikampi vimuttiṃ na labhati. So kāyassa bhedā paraṃ maraṇā hānāya pareti no visesāya, hānagāmīyeva hoti no visesagāmī.
‘‘ඉධ පනානන්‌ද, එකච්‌චස්‌ස පුග්‌ගලස්‌ස කොධමානො අධිගතො හොති, සමයෙන සමයඤ්‌චස්‌ස ලොභධම්‌මා උප්‌පජ්‌ජන්‌ති. තස්‌ස සවනෙනපි කතං හොති…පෙ.… නො හානගාමී.
‘‘Idha panānanda, ekaccassa puggalassa kodhamāno adhigato hoti, samayena samayañcassa lobhadhammā uppajjanti. Tassa savanenapi kataṃ hoti…pe… no hānagāmī.
‘‘තත්‍රානන්‌ද , පමාණිකා පමිණන්‌ති…පෙ.… යො වා පනස්‌ස මාදිසො.
‘‘Tatrānanda , pamāṇikā pamiṇanti…pe… yo vā panassa mādiso.
‘‘ඉධ, පනානන්‌ද, එකච්‌චස්‌ස පුග්‌ගලස්‌ස කොධමානො අධිගතො හොති, සමයෙන සමයඤ්‌චස්‌ස වචීසඞ්‌ඛාරා උප්‌පජ්‌ජන්‌ති. තස්‌ස සවනෙනපි අකතං හොති…පෙ.… සාමායිකම්‌පි විමුත්‌තිං න ලභති. සො කායස්‌ස භෙදා පරං මරණා හානාය පරෙති නො විසෙසාය, හානගාමීයෙව හොති නො විසෙසගාමී.
‘‘Idha, panānanda, ekaccassa puggalassa kodhamāno adhigato hoti, samayena samayañcassa vacīsaṅkhārā uppajjanti. Tassa savanenapi akataṃ hoti…pe… sāmāyikampi vimuttiṃ na labhati. So kāyassa bhedā paraṃ maraṇā hānāya pareti no visesāya, hānagāmīyeva hoti no visesagāmī.
‘‘ඉධ පනානන්‌ද, එකච්‌චස්‌ස පුග්‌ගලස්‌ස කොධමානො අධිගතො හොති, සමයෙන සමයඤ්‌චස්‌ස වචීසඞ්‌ඛාරා උප්‌පජ්‌ජන්‌ති. තස්‌ස සවනෙනපි කතං හොති, බාහුසච්‌චෙනපි කතං හොති, දිට්‌ඨියාපි පටිවිද්‌ධං හොති, සාමායිකම්‌පි විමුත්‌තිං ලභති. සො කායස්‌ස භෙදා පරං මරණා විසෙසාය පරෙති නො හානාය, විසෙසගාමීයෙව හොති නො හානගාමී.
‘‘Idha panānanda, ekaccassa puggalassa kodhamāno adhigato hoti, samayena samayañcassa vacīsaṅkhārā uppajjanti. Tassa savanenapi kataṃ hoti, bāhusaccenapi kataṃ hoti, diṭṭhiyāpi paṭividdhaṃ hoti, sāmāyikampi vimuttiṃ labhati. So kāyassa bhedā paraṃ maraṇā visesāya pareti no hānāya, visesagāmīyeva hoti no hānagāmī.
‘‘තත්‍රානන්‌ද , පමාණිකා පමිණන්‌ති – ‘ඉමස්‌සපි තෙව ධම්‌මා, අපරස්‌සපි තෙව ධම්‌මා. කස්‌මා තෙසං එකො හීනො, එකො පණීතො’ති? තඤ්‌හි තෙසං, ආනන්‌ද, හොති දීඝරත්‌තං අහිතාය දුක්‌ඛාය.
‘‘Tatrānanda , pamāṇikā pamiṇanti – ‘imassapi teva dhammā, aparassapi teva dhammā. Kasmā tesaṃ eko hīno, eko paṇīto’ti? Tañhi tesaṃ, ānanda, hoti dīgharattaṃ ahitāya dukkhāya.
‘‘තත්‍රානන්‌ද, යස්‌ස පුග්‌ගලස්‌ස කොධමානො අධිගතො හොති, සමයෙන සමයඤ්‌චස්‌ස වචීසඞ්‌ඛාරා උප්‌පජ්‌ජන්‌ති, තස්‌ස සවනෙනපි කතං හොති, බාහුසච්‌චෙනපි කතං හොති, දිට්‌ඨියාපි පටිවිද්‌ධං හොති, සාමායිකම්‌පි විමුත්‌තිං ලභති. අයං, ආනන්‌ද, පුග්‌ගලො අමුනා පුරිමෙන පුග්‌ගලෙන අභික්‌කන්‌තතරො ච පණීතතරො ච. තං කිස්‌ස හෙතු? ඉමං හානන්‌ද, පුග්‌ගලං ධම්‌මසොතො නිබ්‌බහති. තදන්‌තරං කො ජානෙය්‍ය අඤ්‌ඤත්‍ර තථාගතෙන! තස්‌මාතිහානන්‌ද, මා පුග්‌ගලෙසු පමාණිකා අහුවත්‌ථ; මා පුග්‌ගලෙසු පමාණං ගණ්‌හිත්‌ථ. ඛඤ්‌ඤති හානන්‌ද, පුග්‌ගලෙසු පමාණං ගණ්‌හන්‌තො. අහං වා, ආනන්‌ද, පුග්‌ගලෙසු පමාණං ගණ්‌හෙය්‍යං, යො වා පනස්‌ස මාදිසො.
‘‘Tatrānanda, yassa puggalassa kodhamāno adhigato hoti, samayena samayañcassa vacīsaṅkhārā uppajjanti, tassa savanenapi kataṃ hoti, bāhusaccenapi kataṃ hoti, diṭṭhiyāpi paṭividdhaṃ hoti, sāmāyikampi vimuttiṃ labhati. Ayaṃ, ānanda, puggalo amunā purimena puggalena abhikkantataro ca paṇītataro ca. Taṃ kissa hetu? Imaṃ hānanda, puggalaṃ dhammasoto nibbahati. Tadantaraṃ ko jāneyya aññatra tathāgatena! Tasmātihānanda, mā puggalesu pamāṇikā ahuvattha; mā puggalesu pamāṇaṃ gaṇhittha. Khaññati hānanda, puggalesu pamāṇaṃ gaṇhanto. Ahaṃ vā, ānanda, puggalesu pamāṇaṃ gaṇheyyaṃ, yo vā panassa mādiso.
‘‘කා චානන්‌ද, මිගසාලා උපාසිකා බාලා අබ්‍යත්‌තා අම්‌මකා අම්‌මකසඤ්‌ඤා, කෙ ච පුරිසපුග්‌ගලපරොපරියඤාණෙ! ඉමෙ ඛො, ආනන්‌ද, ඡ පුග්‌ගලා සන්‌තො සංවිජ්‌ජමානා ලොකස්‌මිං.
‘‘Kā cānanda, migasālā upāsikā bālā abyattā ammakā ammakasaññā, ke ca purisapuggalaparopariyañāṇe! Ime kho, ānanda, cha puggalā santo saṃvijjamānā lokasmiṃ.
‘‘යථාරූපෙන, ආනන්‌ද, සීලෙන පුරාණො සමන්‌නාගතො අහොසි, තථාරූපෙන සීලෙන ඉසිදත්‌තො සමන්‌නාගතො අභවිස්‌ස. නයිධ පුරාණො ඉසිදත්‌තස්‌ස ගතිම්‌පි අඤ්‌ඤස්‌ස. යථාරූපාය ච, ආනන්‌ද, පඤ්‌ඤාය ඉසිදත්‌තො සමන්‌නාගතො අහොසි, තථාරූපාය පඤ්‌ඤාය පුරාණො සමන්‌නාගතො අභවිස්‌ස. නයිධ ඉසිදත්‌තො පුරාණස්‌ස ගතිම්‌පි අඤ්‌ඤස්‌ස. ඉති ඛො, ආනන්‌ද, ඉමෙ පුග්‌ගලා උභො එකඞ්‌ගහීනා’’ති. දුතියං.
‘‘Yathārūpena, ānanda, sīlena purāṇo samannāgato ahosi, tathārūpena sīlena isidatto samannāgato abhavissa. Nayidha purāṇo isidattassa gatimpi aññassa. Yathārūpāya ca, ānanda, paññāya isidatto samannāgato ahosi, tathārūpāya paññāya purāṇo samannāgato abhavissa. Nayidha isidatto purāṇassa gatimpi aññassa. Iti kho, ānanda, ime puggalā ubho ekaṅgahīnā’’ti. Dutiyaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 2. මිගසාලාසුත්‌තවණ්‌ණනා • 2. Migasālāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 2. මිගසාලාසුත්‌තවණ්‌ණනා • 2. Migasālāsuttavaṇṇanā
