| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
2. மிக³ஸாலாஸுத்தவண்ணனா
2. Migasālāsuttavaṇṇanā
44. து³தியே கத²ங் கத²ங் நாமாதி கேன கேன காரணேன. அஞ்ஞெய்யோதி ஆஜானிதப்³போ³. யத்ர ஹி நாமாதி யஸ்மிங் நாம த⁴ம்மே. ஸமஸமக³திகாதி ஸமபா⁴வேனேவ ஸமக³திகா. ப⁴விஸ்ஸந்தீதி ஜாதா. ஸகதா³கா³மிபத்தோ துஸிதங் காயங் உபபன்னோதி ஸகதா³கா³மிபுக்³க³லோ ஹுத்வா துஸிதப⁴வனேயேவ நிப்³ப³த்தோ. கத²ங் கத²ங் நாமாதி கேன கேன நு கோ² காரணேன, கிங் நு கோ² ஜானித்வா தே³ஸிதோ, உதா³ஹு அஜானித்வாதி. தே²ரோ காரணங் அஜானந்தோ ஏவங் கோ² பனேதங் ப⁴கி³னி ப⁴க³வதா ப்³யாகதந்தி ஆஹ.
44. Dutiye kathaṃ kathaṃ nāmāti kena kena kāraṇena. Aññeyyoti ājānitabbo. Yatra hi nāmāti yasmiṃ nāma dhamme. Samasamagatikāti samabhāveneva samagatikā. Bhavissantīti jātā. Sakadāgāmipatto tusitaṃ kāyaṃ upapannoti sakadāgāmipuggalo hutvā tusitabhavaneyeva nibbatto. Kathaṃ kathaṃ nāmāti kena kena nu kho kāraṇena, kiṃ nu kho jānitvā desito, udāhu ajānitvāti. Thero kāraṇaṃ ajānanto evaṃ kho panetaṃ bhagini bhagavatā byākatanti āha.
அம்மகா அம்மகபஞ்ஞாதி இத்தீ² ஹுத்வா இத்தி²ஸஞ்ஞாய ஏவ ஸமன்னாக³தா. கே ச புரிஸபுக்³க³லபரோபரியஞாணேதி எத்த² புரிஸபுக்³க³லபரோபரியஞாணங் வுச்சதி புரிஸபுக்³க³லானங் திக்க²முது³வஸேன இந்த்³ரியபரோபரியஞாணங். தஸ்மா கா ச பா³லா மிக³ஸாலா, கே ச புரிஸபுக்³க³லானங் இந்த்³ரியபரோபரியஞாணே அப்படிஹதவிஸயா ஸம்மாஸம்பு³த்³தா⁴, உப⁴யமேதங் தூ³ரே ஸுவிதூ³ரேதி அயமெத்த² ஸங்கே²போ.
Ammakā ammakapaññāti itthī hutvā itthisaññāya eva samannāgatā. Ke ca purisapuggalaparopariyañāṇeti ettha purisapuggalaparopariyañāṇaṃ vuccati purisapuggalānaṃ tikkhamuduvasena indriyaparopariyañāṇaṃ. Tasmā kā ca bālā migasālā, ke ca purisapuggalānaṃ indriyaparopariyañāṇe appaṭihatavisayā sammāsambuddhā, ubhayametaṃ dūre suvidūreti ayamettha saṅkhepo.
இதா³னி மிக³ஸாலாய அத்தனோ தூ³ரபா⁴வங் த³ஸ்ஸெந்தோ ச²யிமே, ஆனந்தா³திஆதி³மாஹ. ஸோரதோ ஹோதீதி பாபதோ ஸுட்டு² ஓரதோ விரதோ ஹோதி. ஸுரதோதிபி பாடோ². அபி⁴னந்த³ந்தி ஸப்³ரஹ்மசாரீ ஏகத்தவாஸேனாதி தேன ஸத்³தி⁴ங் ஏகதோவாஸேன ஸப்³ரஹ்மசாரீ அபி⁴னந்த³ந்தி துஸ்ஸந்தி. ஏகந்தவாஸேனாதிபி பாடோ², ஸததவாஸேனாதி அத்தோ². ஸவனேனபி அகதங் ஹோதீதி ஸோதப்³ப³யுத்தகங் அஸுதங் ஹோதி. பா³ஹுஸச்சேனபி அகதங் ஹோதீதி எத்த² பா³ஹுஸச்சங் வுச்சதி வீரியங், வீரியேன கத்தப்³ப³யுத்தகங் அகதங் ஹோதீதி அத்தோ². தி³ட்டி²யாபி அப்படிவித்³த⁴ங் ஹோதீதி தி³ட்டி²யா படிவிஜ்ஜி²தப்³ப³ங் அப்படிவித்³த⁴ங் ஹோதி. ஸாமாயிகம்பி விமுத்திங் ந லப⁴தீதி காலானுகாலங் த⁴ம்மஸ்ஸவனங் நிஸ்ஸாய பீதிபாமோஜ்ஜங் ந லப⁴தி. ஹானகா³மீயேவ ஹோதீதி பரிஹானிமேவ க³ச்ச²தி.
Idāni migasālāya attano dūrabhāvaṃ dassento chayime, ānandātiādimāha. Sorato hotīti pāpato suṭṭhu orato virato hoti. Suratotipi pāṭho. Abhinandanti sabrahmacārī ekattavāsenāti tena saddhiṃ ekatovāsena sabrahmacārī abhinandanti tussanti. Ekantavāsenātipi pāṭho, satatavāsenāti attho. Savanenapi akataṃ hotīti sotabbayuttakaṃ asutaṃ hoti. Bāhusaccenapi akataṃ hotīti ettha bāhusaccaṃ vuccati vīriyaṃ, vīriyena kattabbayuttakaṃ akataṃ hotīti attho. Diṭṭhiyāpi appaṭividdhaṃ hotīti diṭṭhiyā paṭivijjhitabbaṃ appaṭividdhaṃ hoti. Sāmāyikampi vimuttiṃ na labhatīti kālānukālaṃ dhammassavanaṃ nissāya pītipāmojjaṃ na labhati. Hānagāmīyeva hotīti parihānimeva gacchati.
பமாணிகாதி புக்³க³லேஸு பமாணக்³கா³ஹகா. பமினந்தீதி பமேதுங் துலேதுங் ஆரப⁴ந்தி. ஏகோ ஹீனோதி ஏகோ கு³ணேஹி ஹீனோ. ஏகோ பணீதோதி ஏகோ கு³ணேஹி பணீதோ. தங் ஹீதி தங் பமாணகரணங்.
Pamāṇikāti puggalesu pamāṇaggāhakā. Paminantīti pametuṃ tuletuṃ ārabhanti. Eko hīnoti eko guṇehi hīno. Eko paṇītoti eko guṇehi paṇīto. Taṃ hīti taṃ pamāṇakaraṇaṃ.
அபி⁴க்கந்ததரோதி ஸுந்த³ரதரோ. பணீததரோதி உத்தமதரோ. த⁴ம்மஸோதோ நிப்³ப³ஹதீதி ஸூரங் ஹுத்வா பவத்தமானவிபஸ்ஸனாஞாணங் நிப்³ப³ஹதி, அரியபூ⁴மிங் ஸம்பாபேதி. தத³ந்தரங் கோ ஜானெய்யாதி தங் அந்தரங் தங் காரணங் அஞ்ஞத்ர ததா²க³தேன கோ ஜானெய்யாதி அத்தோ².
Abhikkantataroti sundarataro. Paṇītataroti uttamataro. Dhammasoto nibbahatīti sūraṃ hutvā pavattamānavipassanāñāṇaṃ nibbahati, ariyabhūmiṃ sampāpeti. Tadantaraṃ ko jāneyyāti taṃ antaraṃ taṃ kāraṇaṃ aññatra tathāgatena ko jāneyyāti attho.
கோத⁴மானோதி கோதோ⁴ ச மானோ ச. லோப⁴த⁴ம்மாதி லோபோ⁴யேவ. வசீஸங்கா²ராதி ஆலாபஸல்லாபவஸேன வசனானேவ. யோ வா பனஸ்ஸ மாதி³ஸோதி யோ வா பன அஞ்ஞோபி மயா ஸதி³ஸோ ஸம்மாஸம்பு³த்³தோ⁴யேவ அஸ்ஸ, ஸோ புக்³க³லேஸு பமாணங் க³ண்ஹெய்யாதி அத்தோ². க²ஞ்ஞதீதி கு³ணக²ணனங் பாபுணாதி. இமே கோ², ஆனந்த³, ச² புக்³க³லாதி த்³வே ஸோரதா, த்³வே அதி⁴க³தகோத⁴மானலோப⁴த⁴ம்மா, த்³வே அதி⁴க³தகோத⁴மானவசீஸங்கா²ராதி இமே ச² புக்³க³லா. க³திந்தி ஞாணக³திங். ஏகங்க³ஹீனாதி ஏகேகேன கு³ணங்கே³ன ஹீனா. பூரணோ ஸீலேன விஸேஸீ அஹோஸி, இஸித³த்தோ பஞ்ஞாய. பூரணஸ்ஸ ஸீலங் இஸித³த்தஸ்ஸ பஞ்ஞாடா²னே டி²தங், இஸித³த்தஸ்ஸ பஞ்ஞா பூரணஸ்ஸ ஸீலட்டா²னே டி²தாதி.
Kodhamānoti kodho ca māno ca. Lobhadhammāti lobhoyeva. Vacīsaṅkhārāti ālāpasallāpavasena vacanāneva. Yo vā panassa mādisoti yo vā pana aññopi mayā sadiso sammāsambuddhoyeva assa, so puggalesu pamāṇaṃ gaṇheyyāti attho. Khaññatīti guṇakhaṇanaṃ pāpuṇāti. Ime kho, ānanda, cha puggalāti dve soratā, dve adhigatakodhamānalobhadhammā, dve adhigatakodhamānavacīsaṅkhārāti ime cha puggalā. Gatinti ñāṇagatiṃ. Ekaṅgahīnāti ekekena guṇaṅgena hīnā. Pūraṇo sīlena visesī ahosi, isidatto paññāya. Pūraṇassa sīlaṃ isidattassa paññāṭhāne ṭhitaṃ, isidattassa paññā pūraṇassa sīlaṭṭhāne ṭhitāti.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. மிக³ஸாலாஸுத்தங் • 2. Migasālāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 2. மிக³ஸாலாஸுத்தவண்ணனா • 2. Migasālāsuttavaṇṇanā
