| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
2. மிக³ஸாலாஸுத்தவண்ணனா
2. Migasālāsuttavaṇṇanā
44. து³தியே ஸமஸமக³தியாதி க-காரஸ்ஸ ய-காரவஸேன நித்³தே³ஸோதி ஆஹ ‘‘ஸமபா⁴வேனேவ ஸமக³திகா’’தி. ப⁴விஸ்ஸந்தீதி அதீதத்தே² அனாக³தவசனங் கதந்தி ஆஹ ‘‘ப⁴விஸ்ஸந்தீதி ஜாதா’’தி. புராணஸ்ஸ ஹி இஸித³த்தஸ்ஸ ச ஸமக³திகங் ஸந்தா⁴ய ஸா ஏவமாஹ.
44. Dutiye samasamagatiyāti ka-kārassa ya-kāravasena niddesoti āha ‘‘samabhāveneva samagatikā’’ti. Bhavissantīti atītatthe anāgatavacanaṃ katanti āha ‘‘bhavissantīti jātā’’ti. Purāṇassa hi isidattassa ca samagatikaṃ sandhāya sā evamāha.
அம்மகாதி மாதுகா³மோ. உபசாரவசனஞ்ஹேதங். இத்தீ²ஸு யதி³த³ங் அம்மகா மாதுகா³மோ ஜனநீ ஜனிகாதி. தேனாஹ ‘‘இத்தீ² ஹுத்வா இத்தி²ஸஞ்ஞாய ஏவ ஸமன்னாக³தா’’தி.
Ammakāti mātugāmo. Upacāravacanañhetaṃ. Itthīsu yadidaṃ ammakā mātugāmo jananī janikāti. Tenāha ‘‘itthī hutvā itthisaññāya eva samannāgatā’’ti.
தி³ட்டி²யா படிவிஜ்ஜி²தப்³ப³ங் அப்படிவித்³த⁴ங் ஹோதீதி அத்த²தோ காரணதோ ச பஞ்ஞாய படிவிஜ்ஜி²தப்³ப³ங் அப்படிவித்³த⁴ங் ஹோதி, நிஜ்ஜடங் நிக்³கு³ம்ப³ங் கத்வா யாதா²வதோ அவிதி³தங் ஹோதி. ஸமயே ஸமயே கிலேஸேஹி விமுச்சனகங் பீதிபாமோஜ்ஜங் இத⁴ ஸாமாயிகங் ம-காரே அகாரஸ்ஸ தீ³க⁴ங் கத்வா. தேனாஹ – ‘‘ஸாமாயிகம்பி விமுத்திங் ந லப⁴தீதி காலானுகாலங் த⁴ம்மஸ்ஸவனங் நிஸ்ஸாய பீதிபாமோஜ்ஜங் ந லப⁴தீ’’தி. பமிணந்தீதி எத்த² ஆரம்ப⁴த்தோ² ப-ஸத்³தோ³தி ஆஹ ‘‘துலேதுங் ஆரப⁴ந்தீ’’தி. பணீதோதி விஸிட்டோ².
Diṭṭhiyā paṭivijjhitabbaṃ appaṭividdhaṃ hotīti atthato kāraṇato ca paññāya paṭivijjhitabbaṃ appaṭividdhaṃ hoti, nijjaṭaṃ niggumbaṃ katvā yāthāvato aviditaṃ hoti. Samaye samaye kilesehi vimuccanakaṃ pītipāmojjaṃ idha sāmāyikaṃ ma-kāre akārassa dīghaṃ katvā. Tenāha – ‘‘sāmāyikampi vimuttiṃ na labhatīti kālānukālaṃ dhammassavanaṃ nissāya pītipāmojjaṃ na labhatī’’ti. Pamiṇantīti ettha ārambhattho pa-saddoti āha ‘‘tuletuṃ ārabhantī’’ti. Paṇītoti visiṭṭho.
தத³ந்தரந்தி வசனவிபல்லாஸேன உபயோக³த்தே² ஸாமிவசனங் கதந்தி ஆஹ ‘‘தங் அந்தரங் தங் காரண’’ந்தி . லோப⁴ஸ்ஸ அபராபருப்பத்தியா ப³ஹுவசனவஸேன ‘‘லோப⁴த⁴ம்மா’’தி வுத்தா. ஸீலேன விஸேஸீ அஹோஸி மேது²னத⁴ம்மவிரதியா ஸமன்னாக³தத்தா.
Tadantaranti vacanavipallāsena upayogatthe sāmivacanaṃ katanti āha ‘‘taṃ antaraṃ taṃ kāraṇa’’nti . Lobhassa aparāparuppattiyā bahuvacanavasena ‘‘lobhadhammā’’ti vuttā. Sīlena visesī ahosi methunadhammaviratiyā samannāgatattā.
மிக³ஸாலாஸுத்தவண்ணனா நிட்டி²தா.
Migasālāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 2. மிக³ஸாலாஸுத்தங் • 2. Migasālāsuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 2. மிக³ஸாலாஸுத்தவண்ணனா • 2. Migasālāsuttavaṇṇanā
