| Library / Tipiṭaka / তিপিটক • Tipiṭaka / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) |
২. মিগসালাসুত্তৰণ্ণনা
2. Migasālāsuttavaṇṇanā
৪৪. দুতিযে কথং কথং নামাতি কেন কেন কারণেন। অঞ্ঞেয্যোতি আজানিতব্বো। যত্র হি নামাতি যস্মিং নাম ধম্মে। সমসমগতিকাতি সমভাৰেনেৰ সমগতিকা। ভৰিস্সন্তীতি জাতা। সকদাগামিপত্তো তুসিতং কাযং উপপন্নোতি সকদাগামিপুগ্গলো হুত্ৰা তুসিতভৰনেযেৰ নিব্বত্তো। কথং কথং নামাতি কেন কেন নু খো কারণেন, কিং নু খো জানিত্ৰা দেসিতো, উদাহু অজানিত্ৰাতি। থেরো কারণং অজানন্তো এৰং খো পনেতং ভগিনি ভগৰতা ব্যাকতন্তি আহ।
44. Dutiye kathaṃ kathaṃ nāmāti kena kena kāraṇena. Aññeyyoti ājānitabbo. Yatra hi nāmāti yasmiṃ nāma dhamme. Samasamagatikāti samabhāveneva samagatikā. Bhavissantīti jātā. Sakadāgāmipatto tusitaṃ kāyaṃ upapannoti sakadāgāmipuggalo hutvā tusitabhavaneyeva nibbatto. Kathaṃ kathaṃ nāmāti kena kena nu kho kāraṇena, kiṃ nu kho jānitvā desito, udāhu ajānitvāti. Thero kāraṇaṃ ajānanto evaṃ kho panetaṃ bhagini bhagavatā byākatanti āha.
অম্মকা অম্মকপঞ্ঞাতি ইত্থী হুত্ৰা ইত্থিসঞ্ঞায এৰ সমন্নাগতা। কে চ পুরিসপুগ্গলপরোপরিযঞাণেতি এত্থ পুরিসপুগ্গলপরোপরিযঞাণং ৰুচ্চতি পুরিসপুগ্গলানং তিক্খমুদুৰসেন ইন্দ্রিযপরোপরিযঞাণং। তস্মা কা চ বালা মিগসালা, কে চ পুরিসপুগ্গলানং ইন্দ্রিযপরোপরিযঞাণে অপ্পটিহতৰিসযা সম্মাসম্বুদ্ধা, উভযমেতং দূরে সুৰিদূরেতি অযমেত্থ সঙ্খেপো।
Ammakā ammakapaññāti itthī hutvā itthisaññāya eva samannāgatā. Ke ca purisapuggalaparopariyañāṇeti ettha purisapuggalaparopariyañāṇaṃ vuccati purisapuggalānaṃ tikkhamuduvasena indriyaparopariyañāṇaṃ. Tasmā kā ca bālā migasālā, ke ca purisapuggalānaṃ indriyaparopariyañāṇe appaṭihatavisayā sammāsambuddhā, ubhayametaṃ dūre suvidūreti ayamettha saṅkhepo.
ইদানি মিগসালায অত্তনো দূরভাৰং দস্সেন্তো ছযিমে, আনন্দাতিআদিমাহ। সোরতো হোতীতি পাপতো সুট্ঠু ওরতো ৰিরতো হোতি। সুরতোতিপি পাঠো। অভিনন্দন্তি সব্রহ্মচারী একত্তৰাসেনাতি তেন সদ্ধিং একতোৰাসেন সব্রহ্মচারী অভিনন্দন্তি তুস্সন্তি। একন্তৰাসেনাতিপি পাঠো, সততৰাসেনাতি অত্থো। সৰনেনপি অকতং হোতীতি সোতব্বযুত্তকং অসুতং হোতি। বাহুসচ্চেনপি অকতং হোতীতি এত্থ বাহুসচ্চং ৰুচ্চতি ৰীরিযং, ৰীরিযেন কত্তব্বযুত্তকং অকতং হোতীতি অত্থো। দিট্ঠিযাপি অপ্পটিৰিদ্ধং হোতীতি দিট্ঠিযা পটিৰিজ্ঝিতব্বং অপ্পটিৰিদ্ধং হোতি। সামাযিকম্পি ৰিমুত্তিং ন লভতীতি কালানুকালং ধম্মস্সৰনং নিস্সায পীতিপামোজ্জং ন লভতি। হানগামীযেৰ হোতীতি পরিহানিমেৰ গচ্ছতি।
Idāni migasālāya attano dūrabhāvaṃ dassento chayime, ānandātiādimāha. Sorato hotīti pāpato suṭṭhu orato virato hoti. Suratotipi pāṭho. Abhinandanti sabrahmacārī ekattavāsenāti tena saddhiṃ ekatovāsena sabrahmacārī abhinandanti tussanti. Ekantavāsenātipi pāṭho, satatavāsenāti attho. Savanenapi akataṃ hotīti sotabbayuttakaṃ asutaṃ hoti. Bāhusaccenapi akataṃ hotīti ettha bāhusaccaṃ vuccati vīriyaṃ, vīriyena kattabbayuttakaṃ akataṃ hotīti attho. Diṭṭhiyāpi appaṭividdhaṃ hotīti diṭṭhiyā paṭivijjhitabbaṃ appaṭividdhaṃ hoti. Sāmāyikampi vimuttiṃ na labhatīti kālānukālaṃ dhammassavanaṃ nissāya pītipāmojjaṃ na labhati. Hānagāmīyeva hotīti parihānimeva gacchati.
পমাণিকাতি পুগ্গলেসু পমাণগ্গাহকা। পমিনন্তীতি পমেতুং তুলেতুং আরভন্তি। একো হীনোতি একো গুণেহি হীনো। একো পণীতোতি একো গুণেহি পণীতো। তং হীতি তং পমাণকরণং।
Pamāṇikāti puggalesu pamāṇaggāhakā. Paminantīti pametuṃ tuletuṃ ārabhanti. Eko hīnoti eko guṇehi hīno. Eko paṇītoti eko guṇehi paṇīto. Taṃ hīti taṃ pamāṇakaraṇaṃ.
অভিক্কন্ততরোতি সুন্দরতরো। পণীততরোতি উত্তমতরো। ধম্মসোতো নিব্বহতীতি সূরং হুত্ৰা পৰত্তমানৰিপস্সনাঞাণং নিব্বহতি, অরিযভূমিং সম্পাপেতি। তদন্তরং কো জানেয্যাতি তং অন্তরং তং কারণং অঞ্ঞত্র তথাগতেন কো জানেয্যাতি অত্থো।
Abhikkantataroti sundarataro. Paṇītataroti uttamataro. Dhammasoto nibbahatīti sūraṃ hutvā pavattamānavipassanāñāṇaṃ nibbahati, ariyabhūmiṃ sampāpeti. Tadantaraṃ ko jāneyyāti taṃ antaraṃ taṃ kāraṇaṃ aññatra tathāgatena ko jāneyyāti attho.
কোধমানোতি কোধো চ মানো চ। লোভধম্মাতি লোভোযেৰ। ৰচীসঙ্খারাতি আলাপসল্লাপৰসেন ৰচনানেৰ। যো ৰা পনস্স মাদিসোতি যো ৰা পন অঞ্ঞোপি মযা সদিসো সম্মাসম্বুদ্ধোযেৰ অস্স, সো পুগ্গলেসু পমাণং গণ্হেয্যাতি অত্থো। খঞ্ঞতীতি গুণখণনং পাপুণাতি। ইমে খো, আনন্দ, ছ পুগ্গলাতি দ্ৰে সোরতা, দ্ৰে অধিগতকোধমানলোভধম্মা, দ্ৰে অধিগতকোধমানৰচীসঙ্খারাতি ইমে ছ পুগ্গলা। গতিন্তি ঞাণগতিং। একঙ্গহীনাতি একেকেন গুণঙ্গেন হীনা। পূরণো সীলেন ৰিসেসী অহোসি, ইসিদত্তো পঞ্ঞায। পূরণস্স সীলং ইসিদত্তস্স পঞ্ঞাঠানে ঠিতং, ইসিদত্তস্স পঞ্ঞা পূরণস্স সীলট্ঠানে ঠিতাতি।
Kodhamānoti kodho ca māno ca. Lobhadhammāti lobhoyeva. Vacīsaṅkhārāti ālāpasallāpavasena vacanāneva. Yo vā panassa mādisoti yo vā pana aññopi mayā sadiso sammāsambuddhoyeva assa, so puggalesu pamāṇaṃ gaṇheyyāti attho. Khaññatīti guṇakhaṇanaṃ pāpuṇāti. Ime kho, ānanda, cha puggalāti dve soratā, dve adhigatakodhamānalobhadhammā, dve adhigatakodhamānavacīsaṅkhārāti ime cha puggalā. Gatinti ñāṇagatiṃ. Ekaṅgahīnāti ekekena guṇaṅgena hīnā. Pūraṇo sīlena visesī ahosi, isidatto paññāya. Pūraṇassa sīlaṃ isidattassa paññāṭhāne ṭhitaṃ, isidattassa paññā pūraṇassa sīlaṭṭhāne ṭhitāti.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ২. মিগসালাসুত্তং • 2. Migasālāsuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / অঙ্গুত্তরনিকায (টীকা) • Aṅguttaranikāya (ṭīkā) / ২. মিগসালাসুত্তৰণ্ণনা • 2. Migasālāsuttavaṇṇanā
