| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
২. মিগসালাসুত্তৰণ্ণনা
2. Migasālāsuttavaṇṇanā
৪৪. দুতিযে সমসমগতিযাতি ক-কারস্স য-কারৰসেন নিদ্দেসোতি আহ ‘‘সমভাৰেনেৰ সমগতিকা’’তি। ভৰিস্সন্তীতি অতীতত্থে অনাগতৰচনং কতন্তি আহ ‘‘ভৰিস্সন্তীতি জাতা’’তি। পুরাণস্স হি ইসিদত্তস্স চ সমগতিকং সন্ধায সা এৰমাহ।
44. Dutiye samasamagatiyāti ka-kārassa ya-kāravasena niddesoti āha ‘‘samabhāveneva samagatikā’’ti. Bhavissantīti atītatthe anāgatavacanaṃ katanti āha ‘‘bhavissantīti jātā’’ti. Purāṇassa hi isidattassa ca samagatikaṃ sandhāya sā evamāha.
অম্মকাতি মাতুগামো। উপচারৰচনঞ্হেতং। ইত্থীসু যদিদং অম্মকা মাতুগামো জননী জনিকাতি। তেনাহ ‘‘ইত্থী হুত্ৰা ইত্থিসঞ্ঞায এৰ সমন্নাগতা’’তি।
Ammakāti mātugāmo. Upacāravacanañhetaṃ. Itthīsu yadidaṃ ammakā mātugāmo jananī janikāti. Tenāha ‘‘itthī hutvā itthisaññāya eva samannāgatā’’ti.
দিট্ঠিযা পটিৰিজ্ঝিতব্বং অপ্পটিৰিদ্ধং হোতীতি অত্থতো কারণতো চ পঞ্ঞায পটিৰিজ্ঝিতব্বং অপ্পটিৰিদ্ধং হোতি, নিজ্জটং নিগ্গুম্বং কত্ৰা যাথাৰতো অৰিদিতং হোতি। সমযে সমযে কিলেসেহি ৰিমুচ্চনকং পীতিপামোজ্জং ইধ সামাযিকং ম-কারে অকারস্স দীঘং কত্ৰা। তেনাহ – ‘‘সামাযিকম্পি ৰিমুত্তিং ন লভতীতি কালানুকালং ধম্মস্সৰনং নিস্সায পীতিপামোজ্জং ন লভতী’’তি। পমিণন্তীতি এত্থ আরম্ভত্থো প-সদ্দোতি আহ ‘‘তুলেতুং আরভন্তী’’তি। পণীতোতি ৰিসিট্ঠো।
Diṭṭhiyā paṭivijjhitabbaṃ appaṭividdhaṃ hotīti atthato kāraṇato ca paññāya paṭivijjhitabbaṃ appaṭividdhaṃ hoti, nijjaṭaṃ niggumbaṃ katvā yāthāvato aviditaṃ hoti. Samaye samaye kilesehi vimuccanakaṃ pītipāmojjaṃ idha sāmāyikaṃ ma-kāre akārassa dīghaṃ katvā. Tenāha – ‘‘sāmāyikampi vimuttiṃ na labhatīti kālānukālaṃ dhammassavanaṃ nissāya pītipāmojjaṃ na labhatī’’ti. Pamiṇantīti ettha ārambhattho pa-saddoti āha ‘‘tuletuṃ ārabhantī’’ti. Paṇītoti visiṭṭho.
তদন্তরন্তি ৰচনৰিপল্লাসেন উপযোগত্থে সামিৰচনং কতন্তি আহ ‘‘তং অন্তরং তং কারণ’’ন্তি । লোভস্স অপরাপরুপ্পত্তিযা বহুৰচনৰসেন ‘‘লোভধম্মা’’তি ৰুত্তা। সীলেন ৰিসেসী অহোসি মেথুনধম্মৰিরতিযা সমন্নাগতত্তা।
Tadantaranti vacanavipallāsena upayogatthe sāmivacanaṃ katanti āha ‘‘taṃ antaraṃ taṃ kāraṇa’’nti . Lobhassa aparāparuppattiyā bahuvacanavasena ‘‘lobhadhammā’’ti vuttā. Sīlena visesī ahosi methunadhammaviratiyā samannāgatattā.
মিগসালাসুত্তৰণ্ণনা নিট্ঠিতা।
Migasālāsuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ২. মিগসালাসুত্তং • 2. Migasālāsuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ২. মিগসালাসুত্তৰণ্ণনা • 2. Migasālāsuttavaṇṇanā
