| Library / Tipiṭaka / ติปิฎก • Tipiṭaka / องฺคุตฺตรนิกาย (ฎีกา) • Aṅguttaranikāya (ṭīkā) |
๒. มิคสาลาสุตฺตวณฺณนา
2. Migasālāsuttavaṇṇanā
๔๔. ทุติเย สมสมคติยาติ ก-การสฺส ย-การวเสน นิเทฺทโสติ อาห ‘‘สมภาเวเนว สมคติกา’’ติฯ ภวิสฺสนฺตีติ อตีตเตฺถ อนาคตวจนํ กตนฺติ อาห ‘‘ภวิสฺสนฺตีติ ชาตา’’ติฯ ปุราณสฺส หิ อิสิทตฺตสฺส จ สมคติกํ สนฺธาย สา เอวมาหฯ
44. Dutiye samasamagatiyāti ka-kārassa ya-kāravasena niddesoti āha ‘‘samabhāveneva samagatikā’’ti. Bhavissantīti atītatthe anāgatavacanaṃ katanti āha ‘‘bhavissantīti jātā’’ti. Purāṇassa hi isidattassa ca samagatikaṃ sandhāya sā evamāha.
อมฺมกาติ มาตุคาโมฯ อุปจารวจนเญฺหตํฯ อิตฺถีสุ ยทิทํ อมฺมกา มาตุคาโม ชนนี ชนิกาติฯ เตนาห ‘‘อิตฺถี หุตฺวา อิตฺถิสญฺญาย เอว สมนฺนาคตา’’ติฯ
Ammakāti mātugāmo. Upacāravacanañhetaṃ. Itthīsu yadidaṃ ammakā mātugāmo jananī janikāti. Tenāha ‘‘itthī hutvā itthisaññāya eva samannāgatā’’ti.
ทิฎฺฐิยา ปฎิวิชฺฌิตพฺพํ อปฺปฎิวิทฺธํ โหตีติ อตฺถโต การณโต จ ปญฺญาย ปฎิวิชฺฌิตพฺพํ อปฺปฎิวิทฺธํ โหติ, นิชฺชฎํ นิคฺคุมฺพํ กตฺวา ยาถาวโต อวิทิตํ โหติฯ สมเย สมเย กิเลเสหิ วิมุจฺจนกํ ปีติปาโมชฺชํ อิธ สามายิกํ ม-กาเร อการสฺส ทีฆํ กตฺวาฯ เตนาห – ‘‘สามายิกมฺปิ วิมุตฺติํ น ลภตีติ กาลานุกาลํ ธมฺมสฺสวนํ นิสฺสาย ปีติปาโมชฺชํ น ลภตี’’ติฯ ปมิณนฺตีติ เอตฺถ อารมฺภโตฺถ ป-สโทฺทติ อาห ‘‘ตุเลตุํ อารภนฺตี’’ติฯ ปณีโตติ วิสิโฎฺฐฯ
Diṭṭhiyā paṭivijjhitabbaṃ appaṭividdhaṃ hotīti atthato kāraṇato ca paññāya paṭivijjhitabbaṃ appaṭividdhaṃ hoti, nijjaṭaṃ niggumbaṃ katvā yāthāvato aviditaṃ hoti. Samaye samaye kilesehi vimuccanakaṃ pītipāmojjaṃ idha sāmāyikaṃ ma-kāre akārassa dīghaṃ katvā. Tenāha – ‘‘sāmāyikampi vimuttiṃ na labhatīti kālānukālaṃ dhammassavanaṃ nissāya pītipāmojjaṃ na labhatī’’ti. Pamiṇantīti ettha ārambhattho pa-saddoti āha ‘‘tuletuṃ ārabhantī’’ti. Paṇītoti visiṭṭho.
ตทนฺตรนฺติ วจนวิปลฺลาเสน อุปโยคเตฺถ สามิวจนํ กตนฺติ อาห ‘‘ตํ อนฺตรํ ตํ การณ’’นฺติ ฯ โลภสฺส อปราปรุปฺปตฺติยา พหุวจนวเสน ‘‘โลภธมฺมา’’ติ วุตฺตาฯ สีเลน วิเสสี อโหสิ เมถุนธมฺมวิรติยา สมนฺนาคตตฺตาฯ
Tadantaranti vacanavipallāsena upayogatthe sāmivacanaṃ katanti āha ‘‘taṃ antaraṃ taṃ kāraṇa’’nti . Lobhassa aparāparuppattiyā bahuvacanavasena ‘‘lobhadhammā’’ti vuttā. Sīlena visesī ahosi methunadhammaviratiyā samannāgatattā.
มิคสาลาสุตฺตวณฺณนา นิฎฺฐิตาฯ
Migasālāsuttavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๒. มิคสาลาสุตฺตํ • 2. Migasālāsuttaṃ
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) / ๒. มิคสาลาสุตฺตวณฺณนา • 2. Migasālāsuttavaṇṇanā
