| Library / Tipiṭaka / តិបិដក • Tipiṭaka / អង្គុត្តរនិកាយ (ដីកា) • Aṅguttaranikāya (ṭīkā) |
២. មិគសាលាសុត្តវណ្ណនា
2. Migasālāsuttavaṇṇanā
៤៤. ទុតិយេ សមសមគតិយាតិ ក-ការស្ស យ-ការវសេន និទ្ទេសោតិ អាហ ‘‘សមភាវេនេវ សមគតិកា’’តិ។ ភវិស្សន្តីតិ អតីតត្ថេ អនាគតវចនំ កតន្តិ អាហ ‘‘ភវិស្សន្តីតិ ជាតា’’តិ។ បុរាណស្ស ហិ ឥសិទត្តស្ស ច សមគតិកំ សន្ធាយ សា ឯវមាហ។
44. Dutiye samasamagatiyāti ka-kārassa ya-kāravasena niddesoti āha ‘‘samabhāveneva samagatikā’’ti. Bhavissantīti atītatthe anāgatavacanaṃ katanti āha ‘‘bhavissantīti jātā’’ti. Purāṇassa hi isidattassa ca samagatikaṃ sandhāya sā evamāha.
អម្មកាតិ មាតុគាមោ។ ឧបចារវចនញ្ហេតំ។ ឥត្ថីសុ យទិទំ អម្មកា មាតុគាមោ ជននី ជនិកាតិ។ តេនាហ ‘‘ឥត្ថី ហុត្វា ឥត្ថិសញ្ញាយ ឯវ សមន្នាគតា’’តិ។
Ammakāti mātugāmo. Upacāravacanañhetaṃ. Itthīsu yadidaṃ ammakā mātugāmo jananī janikāti. Tenāha ‘‘itthī hutvā itthisaññāya eva samannāgatā’’ti.
ទិដ្ឋិយា បដិវិជ្ឈិតព្ពំ អប្បដិវិទ្ធំ ហោតីតិ អត្ថតោ ការណតោ ច បញ្ញាយ បដិវិជ្ឈិតព្ពំ អប្បដិវិទ្ធំ ហោតិ, និជ្ជដំ និគ្គុម្ពំ កត្វា យាថាវតោ អវិទិតំ ហោតិ។ សមយេ សមយេ កិលេសេហិ វិមុច្ចនកំ បីតិបាមោជ្ជំ ឥធ សាមាយិកំ ម-ការេ អការស្ស ទីឃំ កត្វា។ តេនាហ – ‘‘សាមាយិកម្បិ វិមុត្តិំ ន លភតីតិ កាលានុកាលំ ធម្មស្សវនំ និស្សាយ បីតិបាមោជ្ជំ ន លភតី’’តិ។ បមិណន្តីតិ ឯត្ថ អារម្ភត្ថោ ប-សទ្ទោតិ អាហ ‘‘តុលេតុំ អារភន្តី’’តិ។ បណីតោតិ វិសិដ្ឋោ។
Diṭṭhiyā paṭivijjhitabbaṃ appaṭividdhaṃ hotīti atthato kāraṇato ca paññāya paṭivijjhitabbaṃ appaṭividdhaṃ hoti, nijjaṭaṃ niggumbaṃ katvā yāthāvato aviditaṃ hoti. Samaye samaye kilesehi vimuccanakaṃ pītipāmojjaṃ idha sāmāyikaṃ ma-kāre akārassa dīghaṃ katvā. Tenāha – ‘‘sāmāyikampi vimuttiṃ na labhatīti kālānukālaṃ dhammassavanaṃ nissāya pītipāmojjaṃ na labhatī’’ti. Pamiṇantīti ettha ārambhattho pa-saddoti āha ‘‘tuletuṃ ārabhantī’’ti. Paṇītoti visiṭṭho.
តទន្តរន្តិ វចនវិបល្លាសេន ឧបយោគត្ថេ សាមិវចនំ កតន្តិ អាហ ‘‘តំ អន្តរំ តំ ការណ’’ន្តិ ។ លោភស្ស អបរាបរុប្បត្តិយា ពហុវចនវសេន ‘‘លោភធម្មា’’តិ វុត្តា។ សីលេន វិសេសី អហោសិ មេថុនធម្មវិរតិយា សមន្នាគតត្តា។
Tadantaranti vacanavipallāsena upayogatthe sāmivacanaṃ katanti āha ‘‘taṃ antaraṃ taṃ kāraṇa’’nti . Lobhassa aparāparuppattiyā bahuvacanavasena ‘‘lobhadhammā’’ti vuttā. Sīlena visesī ahosi methunadhammaviratiyā samannāgatattā.
មិគសាលាសុត្តវណ្ណនា និដ្ឋិតា។
Migasālāsuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / អង្គុត្តរនិកាយ • Aṅguttaranikāya / ២. មិគសាលាសុត្តំ • 2. Migasālāsuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / អង្គុត្តរនិកាយ (អដ្ឋកថា) • Aṅguttaranikāya (aṭṭhakathā) / ២. មិគសាលាសុត្តវណ្ណនា • 2. Migasālāsuttavaṇṇanā
