| Library / Tipiṭaka / တိပိဋက • Tipiṭaka / အင္ဂုတ္တရနိကာယ (ဋီကာ) • Aṅguttaranikāya (ṭīkā) |
၂. မိဂသာလာသုတ္တဝဏ္ဏနာ
2. Migasālāsuttavaṇṇanā
၄၄. ဒုတိယေ သမသမဂတိယာတိ က-ကာရသ္သ ယ-ကာရဝသေန နိဒ္ဒေသောတိ အာဟ ‘‘သမဘာဝေနေဝ သမဂတိကာ’’တိ။ ဘဝိသ္သန္တီတိ အတီတတ္ထေ အနာဂတဝစနံ ကတန္တိ အာဟ ‘‘ဘဝိသ္သန္တီတိ ဇာတာ’’တိ။ ပုရာဏသ္သ ဟိ ဣသိဒတ္တသ္သ စ သမဂတိကံ သန္ဓာယ သာ ဧဝမာဟ။
44. Dutiye samasamagatiyāti ka-kārassa ya-kāravasena niddesoti āha ‘‘samabhāveneva samagatikā’’ti. Bhavissantīti atītatthe anāgatavacanaṃ katanti āha ‘‘bhavissantīti jātā’’ti. Purāṇassa hi isidattassa ca samagatikaṃ sandhāya sā evamāha.
အမ္မကာတိ မာတုဂာမော။ ဥပစာရဝစနဉ္ဟေတံ။ ဣတ္ထီသု ယဒိဒံ အမ္မကာ မာတုဂာမော ဇနနီ ဇနိကာတိ။ တေနာဟ ‘‘ဣတ္ထီ ဟုတ္ဝာ ဣတ္ထိသညာယ ဧဝ သမန္နာဂတာ’’တိ။
Ammakāti mātugāmo. Upacāravacanañhetaṃ. Itthīsu yadidaṃ ammakā mātugāmo jananī janikāti. Tenāha ‘‘itthī hutvā itthisaññāya eva samannāgatā’’ti.
ဒိဋ္ဌိယာ ပဋိဝိဇ္ဈိတဗ္ဗံ အပ္ပဋိဝိဒ္ဓံ ဟောတီတိ အတ္ထတော ကာရဏတော စ ပညာယ ပဋိဝိဇ္ဈိတဗ္ဗံ အပ္ပဋိဝိဒ္ဓံ ဟောတိ, နိဇ္ဇဋံ နိဂ္ဂုမ္ဗံ ကတ္ဝာ ယာထာဝတော အဝိဒိတံ ဟောတိ။ သမယေ သမယေ ကိလေသေဟိ ဝိမုစ္စနကံ ပီတိပာမောဇ္ဇံ ဣဓ သာမာယိကံ မ-ကာရေ အကာရသ္သ ဒီဃံ ကတ္ဝာ။ တေနာဟ – ‘‘သာမာယိကမ္ပိ ဝိမုတ္တိံ န လဘတီတိ ကာလာနုကာလံ ဓမ္မသ္သဝနံ နိသ္သာယ ပီတိပာမောဇ္ဇံ န လဘတီ’’တိ။ ပမိဏန္တီတိ ဧတ္ထ အာရမ္ဘတ္ထော ပ-သဒ္ဒောတိ အာဟ ‘‘တုလေတုံ အာရဘန္တီ’’တိ။ ပဏီတောတိ ဝိသိဋ္ဌော။
Diṭṭhiyā paṭivijjhitabbaṃ appaṭividdhaṃ hotīti atthato kāraṇato ca paññāya paṭivijjhitabbaṃ appaṭividdhaṃ hoti, nijjaṭaṃ niggumbaṃ katvā yāthāvato aviditaṃ hoti. Samaye samaye kilesehi vimuccanakaṃ pītipāmojjaṃ idha sāmāyikaṃ ma-kāre akārassa dīghaṃ katvā. Tenāha – ‘‘sāmāyikampi vimuttiṃ na labhatīti kālānukālaṃ dhammassavanaṃ nissāya pītipāmojjaṃ na labhatī’’ti. Pamiṇantīti ettha ārambhattho pa-saddoti āha ‘‘tuletuṃ ārabhantī’’ti. Paṇītoti visiṭṭho.
တဒန္တရန္တိ ဝစနဝိပလ္လာသေန ဥပယောဂတ္ထေ သာမိဝစနံ ကတန္တိ အာဟ ‘‘တံ အန္တရံ တံ ကာရဏ’’န္တိ ။ လောဘသ္သ အပရာပရုပ္ပတ္တိယာ ဗဟုဝစနဝသေန ‘‘လောဘဓမ္မာ’’တိ ဝုတ္တာ။ သီလေန ဝိသေသီ အဟောသိ မေထုနဓမ္မဝိရတိယာ သမန္နာဂတတ္တာ။
Tadantaranti vacanavipallāsena upayogatthe sāmivacanaṃ katanti āha ‘‘taṃ antaraṃ taṃ kāraṇa’’nti . Lobhassa aparāparuppattiyā bahuvacanavasena ‘‘lobhadhammā’’ti vuttā. Sīlena visesī ahosi methunadhammaviratiyā samannāgatattā.
မိဂသာလာသုတ္တဝဏ္ဏနာ နိဋ္ဌိတာ။
Migasālāsuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၂. မိဂသာလာသုတ္တံ • 2. Migasālāsuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၂. မိဂသာလာသုတ္တဝဏ္ဏနာ • 2. Migasālāsuttavaṇṇanā
