| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) |
೨. ಮಿಗಸಾಲಾಸುತ್ತವಣ್ಣನಾ
2. Migasālāsuttavaṇṇanā
೪೪. ದುತಿಯೇ ಸಮಸಮಗತಿಯಾತಿ ಕ-ಕಾರಸ್ಸ ಯ-ಕಾರವಸೇನ ನಿದ್ದೇಸೋತಿ ಆಹ ‘‘ಸಮಭಾವೇನೇವ ಸಮಗತಿಕಾ’’ತಿ। ಭವಿಸ್ಸನ್ತೀತಿ ಅತೀತತ್ಥೇ ಅನಾಗತವಚನಂ ಕತನ್ತಿ ಆಹ ‘‘ಭವಿಸ್ಸನ್ತೀತಿ ಜಾತಾ’’ತಿ। ಪುರಾಣಸ್ಸ ಹಿ ಇಸಿದತ್ತಸ್ಸ ಚ ಸಮಗತಿಕಂ ಸನ್ಧಾಯ ಸಾ ಏವಮಾಹ।
44. Dutiye samasamagatiyāti ka-kārassa ya-kāravasena niddesoti āha ‘‘samabhāveneva samagatikā’’ti. Bhavissantīti atītatthe anāgatavacanaṃ katanti āha ‘‘bhavissantīti jātā’’ti. Purāṇassa hi isidattassa ca samagatikaṃ sandhāya sā evamāha.
ಅಮ್ಮಕಾತಿ ಮಾತುಗಾಮೋ। ಉಪಚಾರವಚನಞ್ಹೇತಂ। ಇತ್ಥೀಸು ಯದಿದಂ ಅಮ್ಮಕಾ ಮಾತುಗಾಮೋ ಜನನೀ ಜನಿಕಾತಿ। ತೇನಾಹ ‘‘ಇತ್ಥೀ ಹುತ್ವಾ ಇತ್ಥಿಸಞ್ಞಾಯ ಏವ ಸಮನ್ನಾಗತಾ’’ತಿ।
Ammakāti mātugāmo. Upacāravacanañhetaṃ. Itthīsu yadidaṃ ammakā mātugāmo jananī janikāti. Tenāha ‘‘itthī hutvā itthisaññāya eva samannāgatā’’ti.
ದಿಟ್ಠಿಯಾ ಪಟಿವಿಜ್ಝಿತಬ್ಬಂ ಅಪ್ಪಟಿವಿದ್ಧಂ ಹೋತೀತಿ ಅತ್ಥತೋ ಕಾರಣತೋ ಚ ಪಞ್ಞಾಯ ಪಟಿವಿಜ್ಝಿತಬ್ಬಂ ಅಪ್ಪಟಿವಿದ್ಧಂ ಹೋತಿ, ನಿಜ್ಜಟಂ ನಿಗ್ಗುಮ್ಬಂ ಕತ್ವಾ ಯಾಥಾವತೋ ಅವಿದಿತಂ ಹೋತಿ। ಸಮಯೇ ಸಮಯೇ ಕಿಲೇಸೇಹಿ ವಿಮುಚ್ಚನಕಂ ಪೀತಿಪಾಮೋಜ್ಜಂ ಇಧ ಸಾಮಾಯಿಕಂ ಮ-ಕಾರೇ ಅಕಾರಸ್ಸ ದೀಘಂ ಕತ್ವಾ। ತೇನಾಹ – ‘‘ಸಾಮಾಯಿಕಮ್ಪಿ ವಿಮುತ್ತಿಂ ನ ಲಭತೀತಿ ಕಾಲಾನುಕಾಲಂ ಧಮ್ಮಸ್ಸವನಂ ನಿಸ್ಸಾಯ ಪೀತಿಪಾಮೋಜ್ಜಂ ನ ಲಭತೀ’’ತಿ। ಪಮಿಣನ್ತೀತಿ ಏತ್ಥ ಆರಮ್ಭತ್ಥೋ ಪ-ಸದ್ದೋತಿ ಆಹ ‘‘ತುಲೇತುಂ ಆರಭನ್ತೀ’’ತಿ। ಪಣೀತೋತಿ ವಿಸಿಟ್ಠೋ।
Diṭṭhiyā paṭivijjhitabbaṃ appaṭividdhaṃ hotīti atthato kāraṇato ca paññāya paṭivijjhitabbaṃ appaṭividdhaṃ hoti, nijjaṭaṃ niggumbaṃ katvā yāthāvato aviditaṃ hoti. Samaye samaye kilesehi vimuccanakaṃ pītipāmojjaṃ idha sāmāyikaṃ ma-kāre akārassa dīghaṃ katvā. Tenāha – ‘‘sāmāyikampi vimuttiṃ na labhatīti kālānukālaṃ dhammassavanaṃ nissāya pītipāmojjaṃ na labhatī’’ti. Pamiṇantīti ettha ārambhattho pa-saddoti āha ‘‘tuletuṃ ārabhantī’’ti. Paṇītoti visiṭṭho.
ತದನ್ತರನ್ತಿ ವಚನವಿಪಲ್ಲಾಸೇನ ಉಪಯೋಗತ್ಥೇ ಸಾಮಿವಚನಂ ಕತನ್ತಿ ಆಹ ‘‘ತಂ ಅನ್ತರಂ ತಂ ಕಾರಣ’’ನ್ತಿ । ಲೋಭಸ್ಸ ಅಪರಾಪರುಪ್ಪತ್ತಿಯಾ ಬಹುವಚನವಸೇನ ‘‘ಲೋಭಧಮ್ಮಾ’’ತಿ ವುತ್ತಾ। ಸೀಲೇನ ವಿಸೇಸೀ ಅಹೋಸಿ ಮೇಥುನಧಮ್ಮವಿರತಿಯಾ ಸಮನ್ನಾಗತತ್ತಾ।
Tadantaranti vacanavipallāsena upayogatthe sāmivacanaṃ katanti āha ‘‘taṃ antaraṃ taṃ kāraṇa’’nti . Lobhassa aparāparuppattiyā bahuvacanavasena ‘‘lobhadhammā’’ti vuttā. Sīlena visesī ahosi methunadhammaviratiyā samannāgatattā.
ಮಿಗಸಾಲಾಸುತ್ತವಣ್ಣನಾ ನಿಟ್ಠಿತಾ।
Migasālāsuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೨. ಮಿಗಸಾಲಾಸುತ್ತಂ • 2. Migasālāsuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) / ೨. ಮಿಗಸಾಲಾಸುತ್ತವಣ್ಣನಾ • 2. Migasālāsuttavaṇṇanā
