| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༢. མིགསཱལཱསུཏྟཝཎྞནཱ
2. Migasālāsuttavaṇṇanā
༤༤. དུཏིཡེ སམསམགཏིཡཱཏི ཀ-ཀཱརསྶ ཡ-ཀཱརཝསེན ནིདྡེསོཏི ཨཱཧ ‘‘སམབྷཱཝེནེཝ སམགཏིཀཱ’’ཏི། བྷཝིསྶནྟཱིཏི ཨཏཱིཏཏྠེ ཨནཱགཏཝཙནཾ ཀཏནྟི ཨཱཧ ‘‘བྷཝིསྶནྟཱིཏི ཛཱཏཱ’’ཏི། པུརཱཎསྶ ཧི ཨིསིདཏྟསྶ ཙ སམགཏིཀཾ སནྡྷཱཡ སཱ ཨེཝམཱཧ།
44. Dutiye samasamagatiyāti ka-kārassa ya-kāravasena niddesoti āha ‘‘samabhāveneva samagatikā’’ti. Bhavissantīti atītatthe anāgatavacanaṃ katanti āha ‘‘bhavissantīti jātā’’ti. Purāṇassa hi isidattassa ca samagatikaṃ sandhāya sā evamāha.
ཨམྨཀཱཏི མཱཏུགཱམོ། ཨུཔཙཱརཝཙནཉྷེཏཾ། ཨིཏྠཱིསུ ཡདིདཾ ཨམྨཀཱ མཱཏུགཱམོ ཛནནཱི ཛནིཀཱཏི། ཏེནཱཧ ‘‘ཨིཏྠཱི ཧུཏྭཱ ཨིཏྠིསཉྙཱཡ ཨེཝ སམནྣཱགཏཱ’’ཏི།
Ammakāti mātugāmo. Upacāravacanañhetaṃ. Itthīsu yadidaṃ ammakā mātugāmo jananī janikāti. Tenāha ‘‘itthī hutvā itthisaññāya eva samannāgatā’’ti.
དིཊྛིཡཱ པཊིཝིཛ྄ཛྷིཏབྦཾ ཨཔྤཊིཝིདྡྷཾ ཧོཏཱིཏི ཨཏྠཏོ ཀཱརཎཏོ ཙ པཉྙཱཡ པཊིཝིཛ྄ཛྷིཏབྦཾ ཨཔྤཊིཝིདྡྷཾ ཧོཏི, ནིཛྫཊཾ ནིགྒུམྦཾ ཀཏྭཱ ཡཱཐཱཝཏོ ཨཝིདིཏཾ ཧོཏི། སམཡེ སམཡེ ཀིལེསེཧི ཝིམུཙྩནཀཾ པཱིཏིཔཱམོཛྫཾ ཨིདྷ སཱམཱཡིཀཾ མ-ཀཱརེ ཨཀཱརསྶ དཱིགྷཾ ཀཏྭཱ། ཏེནཱཧ – ‘‘སཱམཱཡིཀམྤི ཝིམུཏྟིཾ ན ལབྷཏཱིཏི ཀཱལཱནུཀཱལཾ དྷམྨསྶཝནཾ ནིསྶཱཡ པཱིཏིཔཱམོཛྫཾ ན ལབྷཏཱི’’ཏི། པམིཎནྟཱིཏི ཨེཏྠ ཨཱརམྦྷཏྠོ པ-སདྡོཏི ཨཱཧ ‘‘ཏུལེཏུཾ ཨཱརབྷནྟཱི’’ཏི། པཎཱིཏོཏི ཝིསིཊྛོ།
Diṭṭhiyā paṭivijjhitabbaṃ appaṭividdhaṃ hotīti atthato kāraṇato ca paññāya paṭivijjhitabbaṃ appaṭividdhaṃ hoti, nijjaṭaṃ niggumbaṃ katvā yāthāvato aviditaṃ hoti. Samaye samaye kilesehi vimuccanakaṃ pītipāmojjaṃ idha sāmāyikaṃ ma-kāre akārassa dīghaṃ katvā. Tenāha – ‘‘sāmāyikampi vimuttiṃ na labhatīti kālānukālaṃ dhammassavanaṃ nissāya pītipāmojjaṃ na labhatī’’ti. Pamiṇantīti ettha ārambhattho pa-saddoti āha ‘‘tuletuṃ ārabhantī’’ti. Paṇītoti visiṭṭho.
ཏདནྟརནྟི ཝཙནཝིཔལླཱསེན ཨུཔཡོགཏྠེ སཱམིཝཙནཾ ཀཏནྟི ཨཱཧ ‘‘ཏཾ ཨནྟརཾ ཏཾ ཀཱརཎ’’ནྟི ། ལོབྷསྶ ཨཔརཱཔརུཔྤཏྟིཡཱ བཧུཝཙནཝསེན ‘‘ལོབྷདྷམྨཱ’’ཏི ཝུཏྟཱ། སཱིལེན ཝིསེསཱི ཨཧོསི མེཐུནདྷམྨཝིརཏིཡཱ སམནྣཱགཏཏྟཱ།
Tadantaranti vacanavipallāsena upayogatthe sāmivacanaṃ katanti āha ‘‘taṃ antaraṃ taṃ kāraṇa’’nti . Lobhassa aparāparuppattiyā bahuvacanavasena ‘‘lobhadhammā’’ti vuttā. Sīlena visesī ahosi methunadhammaviratiyā samannāgatattā.
མིགསཱལཱསུཏྟཝཎྞནཱ ནིཊྛིཏཱ།
Migasālāsuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༢. མིགསཱལཱསུཏྟཾ • 2. Migasālāsuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༢. མིགསཱལཱསུཏྟཝཎྞནཱ • 2. Migasālāsuttavaṇṇanā
