| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. மீள்ஹகஸுத்தங்
5. Mīḷhakasuttaṃ
161. ஸாவத்தி²யங் விஹரதி…பே॰… ‘‘தா³ருணோ, பி⁴க்க²வே, லாப⁴ஸக்காரஸிலோகோ…பே॰… அதி⁴க³மாய. ஸெய்யதா²பி, பி⁴க்க²வே, மீள்ஹகா கூ³தா²தீ³ கூ³த²பூரா புண்ணா கூ³த²ஸ்ஸ. புரதோ சஸ்ஸ மஹாகூ³த²புஞ்ஜோ. ஸா தேன அஞ்ஞா மீள்ஹகா அதிமஞ்ஞெய்ய – ‘அஹம்ஹி கூ³தா²தீ³ கூ³த²பூரா புண்ணா கூ³த²ஸ்ஸ, புரதோ ச ம்யாயங் மஹாகூ³த²புஞ்ஜோ’தி. ஏவமேவ கோ², பி⁴க்க²வே, இதே⁴கச்சோ பி⁴க்கு² லாப⁴ஸக்காரஸிலோகேன அபி⁴பூ⁴தோ பரியாதி³ண்ணசித்தோ புப்³ப³ண்ஹஸமயங் நிவாஸெத்வா பத்தசீவரமாதா³ய கா³மங் வா நிக³மங் வா பிண்டா³ய பவிஸதி. ஸோ தத்த² பு⁴த்தாவீ ச ஹோதி யாவத³த்தோ², நிமந்திதோ ச ஸ்வாதனாய, பிண்ட³பாதோ சஸ்ஸ பூரோ. ஸோ ஆராமங் க³ந்த்வா பி⁴க்கு²க³ணஸ்ஸ மஜ்ஜே² விகத்த²தி – ‘பு⁴த்தாவீ சம்ஹி யாவத³த்தோ², நிமந்திதோ சம்ஹி ஸ்வாதனாய, பிண்ட³பாதோ ச ம்யாயங் பூரோ, லாபீ⁴ சம்ஹி சீவர-பிண்ட³பாத-ஸேனாஸன-கி³லானப்பச்சய-பே⁴ஸஜ்ஜபரிக்கா²ரானங், இமே பனஞ்ஞே பி⁴க்கூ² அப்பபுஞ்ஞா அப்பேஸக்கா² ந லாபி⁴னோ சீவர-பிண்ட³பாதஸேனாஸன-கி³லானப்பச்சய-பே⁴ஸஜ்ஜ-பரிக்கா²ரான’ந்தி. ஸோ தேன லாப⁴ஸக்காரஸிலோகேன அபி⁴பூ⁴தோ பரியாதி³ண்ணசித்தோ அஞ்ஞே பேஸலே பி⁴க்கூ² அதிமஞ்ஞதி. தஞ்ஹி தஸ்ஸ, பி⁴க்க²வே , மோக⁴புரிஸஸ்ஸ ஹோதி தீ³க⁴ரத்தங் அஹிதாய து³க்கா²ய. ஏவங் தா³ருணோ கோ², பி⁴க்க²வே, லாப⁴ஸக்காரஸிலோகோ…பே॰… ஏவஞ்ஹி வோ பி⁴க்க²வே, ஸிக்கி²தப்³ப³’’ந்தி. பஞ்சமங்.
161. Sāvatthiyaṃ viharati…pe… ‘‘dāruṇo, bhikkhave, lābhasakkārasiloko…pe… adhigamāya. Seyyathāpi, bhikkhave, mīḷhakā gūthādī gūthapūrā puṇṇā gūthassa. Purato cassa mahāgūthapuñjo. Sā tena aññā mīḷhakā atimaññeyya – ‘ahamhi gūthādī gūthapūrā puṇṇā gūthassa, purato ca myāyaṃ mahāgūthapuñjo’ti. Evameva kho, bhikkhave, idhekacco bhikkhu lābhasakkārasilokena abhibhūto pariyādiṇṇacitto pubbaṇhasamayaṃ nivāsetvā pattacīvaramādāya gāmaṃ vā nigamaṃ vā piṇḍāya pavisati. So tattha bhuttāvī ca hoti yāvadattho, nimantito ca svātanāya, piṇḍapāto cassa pūro. So ārāmaṃ gantvā bhikkhugaṇassa majjhe vikatthati – ‘bhuttāvī camhi yāvadattho, nimantito camhi svātanāya, piṇḍapāto ca myāyaṃ pūro, lābhī camhi cīvara-piṇḍapāta-senāsana-gilānappaccaya-bhesajjaparikkhārānaṃ, ime panaññe bhikkhū appapuññā appesakkhā na lābhino cīvara-piṇḍapātasenāsana-gilānappaccaya-bhesajja-parikkhārāna’nti. So tena lābhasakkārasilokena abhibhūto pariyādiṇṇacitto aññe pesale bhikkhū atimaññati. Tañhi tassa, bhikkhave , moghapurisassa hoti dīgharattaṃ ahitāya dukkhāya. Evaṃ dāruṇo kho, bhikkhave, lābhasakkārasiloko…pe… evañhi vo bhikkhave, sikkhitabba’’nti. Pañcamaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. மீள்ஹகஸுத்தவண்ணனா • 5. Mīḷhakasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. மீள்ஹகஸுத்தவண்ணனா • 5. Mīḷhakasuttavaṇṇanā
