| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. মীল়্হকসুত্তং
5. Mīḷhakasuttaṃ
১৬১. সাৰত্থিযং ৰিহরতি…পে॰… ‘‘দারুণো, ভিক্খৰে, লাভসক্কারসিলোকো…পে॰… অধিগমায। সেয্যথাপি, ভিক্খৰে, মীল়্হকা গূথাদী গূথপূরা পুণ্ণা গূথস্স। পুরতো চস্স মহাগূথপুঞ্জো। সা তেন অঞ্ঞা মীল়্হকা অতিমঞ্ঞেয্য – ‘অহম্হি গূথাদী গূথপূরা পুণ্ণা গূথস্স, পুরতো চ ম্যাযং মহাগূথপুঞ্জো’তি। এৰমেৰ খো, ভিক্খৰে, ইধেকচ্চো ভিক্খু লাভসক্কারসিলোকেন অভিভূতো পরিযাদিণ্ণচিত্তো পুব্বণ্হসমযং নিৰাসেত্ৰা পত্তচীৰরমাদায গামং ৰা নিগমং ৰা পিণ্ডায পৰিসতি। সো তত্থ ভুত্তাৰী চ হোতি যাৰদত্থো, নিমন্তিতো চ স্ৰাতনায, পিণ্ডপাতো চস্স পূরো। সো আরামং গন্ত্ৰা ভিক্খুগণস্স মজ্ঝে ৰিকত্থতি – ‘ভুত্তাৰী চম্হি যাৰদত্থো, নিমন্তিতো চম্হি স্ৰাতনায, পিণ্ডপাতো চ ম্যাযং পূরো, লাভী চম্হি চীৰর-পিণ্ডপাত-সেনাসন-গিলানপ্পচ্চয-ভেসজ্জপরিক্খারানং, ইমে পনঞ্ঞে ভিক্খূ অপ্পপুঞ্ঞা অপ্পেসক্খা ন লাভিনো চীৰর-পিণ্ডপাতসেনাসন-গিলানপ্পচ্চয-ভেসজ্জ-পরিক্খারান’ন্তি। সো তেন লাভসক্কারসিলোকেন অভিভূতো পরিযাদিণ্ণচিত্তো অঞ্ঞে পেসলে ভিক্খূ অতিমঞ্ঞতি। তঞ্হি তস্স, ভিক্খৰে , মোঘপুরিসস্স হোতি দীঘরত্তং অহিতায দুক্খায। এৰং দারুণো খো, ভিক্খৰে, লাভসক্কারসিলোকো…পে॰… এৰঞ্হি ৰো ভিক্খৰে, সিক্খিতব্ব’’ন্তি। পঞ্চমং।
161. Sāvatthiyaṃ viharati…pe… ‘‘dāruṇo, bhikkhave, lābhasakkārasiloko…pe… adhigamāya. Seyyathāpi, bhikkhave, mīḷhakā gūthādī gūthapūrā puṇṇā gūthassa. Purato cassa mahāgūthapuñjo. Sā tena aññā mīḷhakā atimaññeyya – ‘ahamhi gūthādī gūthapūrā puṇṇā gūthassa, purato ca myāyaṃ mahāgūthapuñjo’ti. Evameva kho, bhikkhave, idhekacco bhikkhu lābhasakkārasilokena abhibhūto pariyādiṇṇacitto pubbaṇhasamayaṃ nivāsetvā pattacīvaramādāya gāmaṃ vā nigamaṃ vā piṇḍāya pavisati. So tattha bhuttāvī ca hoti yāvadattho, nimantito ca svātanāya, piṇḍapāto cassa pūro. So ārāmaṃ gantvā bhikkhugaṇassa majjhe vikatthati – ‘bhuttāvī camhi yāvadattho, nimantito camhi svātanāya, piṇḍapāto ca myāyaṃ pūro, lābhī camhi cīvara-piṇḍapāta-senāsana-gilānappaccaya-bhesajjaparikkhārānaṃ, ime panaññe bhikkhū appapuññā appesakkhā na lābhino cīvara-piṇḍapātasenāsana-gilānappaccaya-bhesajja-parikkhārāna’nti. So tena lābhasakkārasilokena abhibhūto pariyādiṇṇacitto aññe pesale bhikkhū atimaññati. Tañhi tassa, bhikkhave , moghapurisassa hoti dīgharattaṃ ahitāya dukkhāya. Evaṃ dāruṇo kho, bhikkhave, lābhasakkārasiloko…pe… evañhi vo bhikkhave, sikkhitabba’’nti. Pañcamaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৫. মীল়্হকসুত্তৰণ্ণনা • 5. Mīḷhakasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৫. মীল়্হকসুত্তৰণ্ণনা • 5. Mīḷhakasuttavaṇṇanā
