| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ
Namo tassa bhagavato arahato sammāsambuddhassa
கு²த்³த³கனிகாயே
Khuddakanikāye
மிலிந்த³பஞ்ஹபாளி
Milindapañhapāḷi
1.
1.
மிலிந்தோ³ நாம ஸோ ராஜா, ஸாக³லாயங் புருத்தமே;
Milindo nāma so rājā, sāgalāyaṃ puruttame;
ஆஸஜ்ஜ ராஜா சித்ரகதி²ங், உக்காதா⁴ரங் தமோனுத³ங்;
Āsajja rājā citrakathiṃ, ukkādhāraṃ tamonudaṃ;
அபுச்சி² நிபுணே பஞ்ஹே, டா²னாட்டா²னக³தே புதூ².
Apucchi nipuṇe pañhe, ṭhānāṭṭhānagate puthū.
ஹத³யங்க³மா கண்ணஸுகா², அப்³பு⁴தா லோமஹங்ஸனா.
Hadayaṅgamā kaṇṇasukhā, abbhutā lomahaṃsanā.
அபி⁴த⁴ம்மவினயோகா³ள்ஹா, ஸுத்தஜாலஸமத்திதா;
Abhidhammavinayogāḷhā, suttajālasamattitā;
நாக³ஸேனகதா² சித்ரா, ஓபம்மேஹி நயேஹி ச.
Nāgasenakathā citrā, opammehi nayehi ca.
தத்த² ஞாணங் பணிதா⁴ய, ஹாஸயித்வான மானஸங்;
Tattha ñāṇaṃ paṇidhāya, hāsayitvāna mānasaṃ;
ஸுணாத² நிபுணே பஞ்ஹே, கங்கா²ட்டா²னவிதா³லனேதி.
Suṇātha nipuṇe pañhe, kaṅkhāṭṭhānavidālaneti.
2. தங் யதா²னுஸூயதே – அத்தி² யோனகானங் நானாபுடபே⁴த³னங் ஸாக³லங் நாம நக³ரங் நதீ³பப்³ப³தஸோபி⁴தங் ரமணீயபூ⁴மிப்பதே³ஸபா⁴க³ங் ஆராமுய்யானோபவனதளாகபொக்க²ரணிஸம்பன்னங் நதீ³பப்³ப³தவனராமணெய்யகங் ஸுதவந்தனிம்மிதங் நிஹதபச்சத்தி²கங் 5 பச்சாமித்தானுபபீளிதங் விவித⁴விசித்ரத³ள்ஹமட்டாலகொட்ட²கங் வரபவரகோ³புர 6 தோரணங் க³ம்பீ⁴ரபரிகா²பண்ட³ரபாகாரபரிக்கி²த்தந்தேபுரங். ஸுவிப⁴த்தவீதி²சச்சரசதுக்கஸிங்கா⁴டகங் ஸுப்பஸாரிதானேகவித⁴வரப⁴ண்ட³பரிபூரிதந்தராபணங் விவித⁴தா³னக்³க³ஸதஸமுபஸோபி⁴தங் 7 ஹிமகி³ரிஸிக²ரஸங்காஸவரப⁴வனஸதஸஹஸ்ஸப்படிமண்டி³தங் க³ஜஹயரத²பத்திஸமாகுலங் அபி⁴ரூபனரனாரிக³ணானுசரிதங் ஆகிண்ணஜனமனுஸ்ஸங் புது²க²த்தியப்³ராஹ்மணவெஸ்ஸஸுத்³த³ங் விவித⁴ஸமணப்³ராஹ்மணஸபா⁴ஜன 8 ஸங்க⁴டிதங் ப³ஹுவித⁴விஜ்ஜாவந்த 9 நரசிர 10 நிஸேவிதங் காஸிககோடும்ப³ரிகாதி³னானாவித⁴வத்தா²பணஸம்பன்னங் ஸுப்பஸாரிதருசிரப³ஹுவித⁴புப்ப²க³ந்தா⁴பணங் க³ந்த⁴க³ந்தி⁴தங் ஆஸீஸனீயப³ஹுரதனபரிபூரிதங் தி³ஸாமுக²ஸுப்பஸாரிதாபணங் ஸிங்கா³ரவாணிஜக³ணானுசரிதங் கஹாபணரஜதஸுவண்ணகங்ஸபத்த²ரபரிபூரங் பஜ்ஜோதமானநிதி⁴னிகேதங் பஹூதத⁴னத⁴ஞ்ஞவித்தூபகரணங் பரிபுண்ணகோஸகொட்டா²கா³ரங் ப³ஹ்வன்னபானங் ப³ஹுவித⁴க²ஜ்ஜபோ⁴ஜ்ஜலெய்யபெய்யஸாயனீயங் உத்தரகுருஸங்காஸங் ஸம்பன்னஸஸ்ஸங் ஆளகமந்தா³ விய தே³வபுரங்.
2. Taṃ yathānusūyate – atthi yonakānaṃ nānāpuṭabhedanaṃ sāgalaṃ nāma nagaraṃ nadīpabbatasobhitaṃ ramaṇīyabhūmippadesabhāgaṃ ārāmuyyānopavanataḷākapokkharaṇisampannaṃ nadīpabbatavanarāmaṇeyyakaṃ sutavantanimmitaṃ nihatapaccatthikaṃ 11 paccāmittānupapīḷitaṃ vividhavicitradaḷhamaṭṭālakoṭṭhakaṃ varapavaragopura 12 toraṇaṃ gambhīraparikhāpaṇḍarapākāraparikkhittantepuraṃ. Suvibhattavīthicaccaracatukkasiṅghāṭakaṃ suppasāritānekavidhavarabhaṇḍaparipūritantarāpaṇaṃ vividhadānaggasatasamupasobhitaṃ 13 himagirisikharasaṅkāsavarabhavanasatasahassappaṭimaṇḍitaṃ gajahayarathapattisamākulaṃ abhirūpanaranārigaṇānucaritaṃ ākiṇṇajanamanussaṃ puthukhattiyabrāhmaṇavessasuddaṃ vividhasamaṇabrāhmaṇasabhājana 14 saṅghaṭitaṃ bahuvidhavijjāvanta 15 naracira 16 nisevitaṃ kāsikakoṭumbarikādinānāvidhavatthāpaṇasampannaṃ suppasāritarucirabahuvidhapupphagandhāpaṇaṃ gandhagandhitaṃ āsīsanīyabahuratanaparipūritaṃ disāmukhasuppasāritāpaṇaṃ siṅgāravāṇijagaṇānucaritaṃ kahāpaṇarajatasuvaṇṇakaṃsapattharaparipūraṃ pajjotamānanidhiniketaṃ pahūtadhanadhaññavittūpakaraṇaṃ paripuṇṇakosakoṭṭhāgāraṃ bahvannapānaṃ bahuvidhakhajjabhojjaleyyapeyyasāyanīyaṃ uttarakurusaṅkāsaṃ sampannasassaṃ āḷakamandā viya devapuraṃ.
எத்த² ட²த்வா தேஸங் புப்³ப³கம்மங் கதே²தப்³ப³ங், கதெ²ந்தேன ச ச²தா⁴ விப⁴ஜித்வா கதே²தப்³ப³ங். ஸெய்யதீ²த³ங் – புப்³ப³யோகோ³ மிலிந்த³பஞ்ஹங் லக்க²ணபஞ்ஹங் மெண்ட³கபஞ்ஹங் அனுமானபஞ்ஹங் ஓபம்மகதா²பஞ்ஹந்தி.
Ettha ṭhatvā tesaṃ pubbakammaṃ kathetabbaṃ, kathentena ca chadhā vibhajitvā kathetabbaṃ. Seyyathīdaṃ – pubbayogo milindapañhaṃ lakkhaṇapañhaṃ meṇḍakapañhaṃ anumānapañhaṃ opammakathāpañhanti.
தத்த² மிலிந்த³பஞ்ஹோ லக்க²ணபஞ்ஹோ, விமதிச்சே²த³னபஞ்ஹோதி து³விதோ⁴. மெண்ட³கபஞ்ஹோபி மஹாவக்³கோ³, யோகி³கதா²பஞ்ஹோதி து³விதோ⁴.
Tattha milindapañho lakkhaṇapañho, vimaticchedanapañhoti duvidho. Meṇḍakapañhopi mahāvaggo, yogikathāpañhoti duvidho.
புப்³ப³யோகோ³தி தேஸங் புப்³ப³கம்மங்.
Pubbayogoti tesaṃ pubbakammaṃ.
Footnotes:
