| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
။ နမော တသ္သ ဘဂဝတော အရဟတော သမ္မာသမ္ဗုဒ္ဓသ္သ။
Namo tassa bhagavato arahato sammāsambuddhassa
ခုဒ္ဒကနိကာယေ
Khuddakanikāye
မိလိန္ဒပဉ္ဟပာဠိ
Milindapañhapāḷi
၁.
1.
မိလိန္ဒော နာမ သော ရာဇာ၊ သာဂလာယံ ပုရုတ္တမေ။
Milindo nāma so rājā, sāgalāyaṃ puruttame;
အာသဇ္ဇ ရာဇာ စိတ္ရကထိံ၊ ဥက္ကာဓာရံ တမောနုဒံ။
Āsajja rājā citrakathiṃ, ukkādhāraṃ tamonudaṃ;
အပုစ္ဆိ နိပုဏေ ပဉ္ဟေ၊ ဌာနာဋ္ဌာနဂတေ ပုထူ။
Apucchi nipuṇe pañhe, ṭhānāṭṭhānagate puthū.
ဟဒယင္ဂမာ ကဏ္ဏသုခာ၊ အဗ္ဘုတာ လောမဟံသနာ။
Hadayaṅgamā kaṇṇasukhā, abbhutā lomahaṃsanā.
အဘိဓမ္မဝိနယောဂာဠ္ဟာ၊ သုတ္တဇာလသမတ္တိတာ။
Abhidhammavinayogāḷhā, suttajālasamattitā;
နာဂသေနကထာ စိတ္ရာ၊ ဩပမ္မေဟိ နယေဟိ စ။
Nāgasenakathā citrā, opammehi nayehi ca.
တတ္ထ ဉာဏံ ပဏိဓာယ၊ ဟာသယိတ္ဝာန မာနသံ။
Tattha ñāṇaṃ paṇidhāya, hāsayitvāna mānasaṃ;
သုဏာထ နိပုဏေ ပဉ္ဟေ၊ ကင္ခာဋ္ဌာနဝိဒာလနေတိ။
Suṇātha nipuṇe pañhe, kaṅkhāṭṭhānavidālaneti.
၂. တံ ယထာနုသူယတေ – အတ္ထိ ယောနကာနံ နာနာပုဋဘေဒနံ သာဂလံ နာမ နဂရံ နဒီပဗ္ဗတသောဘိတံ ရမဏီယဘူမိပ္ပဒေသဘာဂံ အာရာမုယ္ယာနောပဝနတဠာကပောက္ခရဏိသမ္ပန္နံ နဒီပဗ္ဗတဝနရာမဏေယ္ယကံ သုတဝန္တနိမ္မိတံ နိဟတပစ္စတ္ထိကံ 5 ပစ္စာမိတ္တာနုပပီဠိတံ ဝိဝိဓဝိစိတ္ရဒဠ္ဟမဋ္ဋာလကောဋ္ဌကံ ဝရပဝရဂောပုရ 6 တောရဏံ ဂမ္ဘီရပရိခာပဏ္ဍရပာကာရပရိက္ခိတ္တန္တေပုရံ။ သုဝိဘတ္တဝီထိစစ္စရစတုက္ကသိင္ဃာဋကံ သုပ္ပသာရိတာနေကဝိဓဝရဘဏ္ဍပရိပူရိတန္တရာပဏံ ဝိဝိဓဒာနဂ္ဂသတသမုပသောဘိတံ 7 ဟိမဂိရိသိခရသင္ကာသဝရဘဝနသတသဟသ္သပ္ပဋိမဏ္ဍိတံ ဂဇဟယရထပတ္တိသမာကုလံ အဘိရူပနရနာရိဂဏာနုစရိတံ အာကိဏ္ဏဇနမနုသ္သံ ပုထုခတ္တိယဗ္ရာဟ္မဏဝေသ္သသုဒ္ဒံ ဝိဝိဓသမဏဗ္ရာဟ္မဏသဘာဇန 8 သင္ဃဋိတံ ဗဟုဝိဓဝိဇ္ဇာဝန္တ 9 နရစိရ 10 နိသေဝိတံ ကာသိကကောဋုမ္ဗရိကာဒိနာနာဝိဓဝတ္ထာပဏသမ္ပန္နံ သုပ္ပသာရိတရုစိရဗဟုဝိဓပုပ္ဖဂန္ဓာပဏံ ဂန္ဓဂန္ဓိတံ အာသီသနီယဗဟုရတနပရိပူရိတံ ဒိသာမုခသုပ္ပသာရိတာပဏံ သိင္ဂာရဝာဏိဇဂဏာနုစရိတံ ကဟာပဏရဇတသုဝဏ္ဏကံသပတ္ထရပရိပူရံ ပဇ္ဇောတမာနနိဓိနိကေတံ ပဟူတဓနဓညဝိတ္တူပကရဏံ ပရိပုဏ္ဏကောသကောဋ္ဌာဂာရံ ဗဟ္ဝန္နပာနံ ဗဟုဝိဓခဇ္ဇဘောဇ္ဇလေယ္ယပေယ္ယသာယနီယံ ဥတ္တရကုရုသင္ကာသံ သမ္ပန္နသသ္သံ အာဠကမန္ဒာ ဝိယ ဒေဝပုရံ။
2. Taṃ yathānusūyate – atthi yonakānaṃ nānāpuṭabhedanaṃ sāgalaṃ nāma nagaraṃ nadīpabbatasobhitaṃ ramaṇīyabhūmippadesabhāgaṃ ārāmuyyānopavanataḷākapokkharaṇisampannaṃ nadīpabbatavanarāmaṇeyyakaṃ sutavantanimmitaṃ nihatapaccatthikaṃ 11 paccāmittānupapīḷitaṃ vividhavicitradaḷhamaṭṭālakoṭṭhakaṃ varapavaragopura 12 toraṇaṃ gambhīraparikhāpaṇḍarapākāraparikkhittantepuraṃ. Suvibhattavīthicaccaracatukkasiṅghāṭakaṃ suppasāritānekavidhavarabhaṇḍaparipūritantarāpaṇaṃ vividhadānaggasatasamupasobhitaṃ 13 himagirisikharasaṅkāsavarabhavanasatasahassappaṭimaṇḍitaṃ gajahayarathapattisamākulaṃ abhirūpanaranārigaṇānucaritaṃ ākiṇṇajanamanussaṃ puthukhattiyabrāhmaṇavessasuddaṃ vividhasamaṇabrāhmaṇasabhājana 14 saṅghaṭitaṃ bahuvidhavijjāvanta 15 naracira 16 nisevitaṃ kāsikakoṭumbarikādinānāvidhavatthāpaṇasampannaṃ suppasāritarucirabahuvidhapupphagandhāpaṇaṃ gandhagandhitaṃ āsīsanīyabahuratanaparipūritaṃ disāmukhasuppasāritāpaṇaṃ siṅgāravāṇijagaṇānucaritaṃ kahāpaṇarajatasuvaṇṇakaṃsapattharaparipūraṃ pajjotamānanidhiniketaṃ pahūtadhanadhaññavittūpakaraṇaṃ paripuṇṇakosakoṭṭhāgāraṃ bahvannapānaṃ bahuvidhakhajjabhojjaleyyapeyyasāyanīyaṃ uttarakurusaṅkāsaṃ sampannasassaṃ āḷakamandā viya devapuraṃ.
ဧတ္ထ ဌတ္ဝာ တေသံ ပုဗ္ဗကမ္မံ ကထေတဗ္ဗံ, ကထေန္တေန စ ဆဓာ ဝိဘဇိတ္ဝာ ကထေတဗ္ဗံ။ သေယ္ယထီဒံ – ပုဗ္ဗယောဂော မိလိန္ဒပဉ္ဟံ လက္ခဏပဉ္ဟံ မေဏ္ဍကပဉ္ဟံ အနုမာနပဉ္ဟံ ဩပမ္မကထာပဉ္ဟန္တိ။
Ettha ṭhatvā tesaṃ pubbakammaṃ kathetabbaṃ, kathentena ca chadhā vibhajitvā kathetabbaṃ. Seyyathīdaṃ – pubbayogo milindapañhaṃ lakkhaṇapañhaṃ meṇḍakapañhaṃ anumānapañhaṃ opammakathāpañhanti.
တတ္ထ မိလိန္ဒပဉ္ဟော လက္ခဏပဉ္ဟော, ဝိမတိစ္ဆေဒနပဉ္ဟောတိ ဒုဝိဓော။ မေဏ္ဍကပဉ္ဟောပိ မဟာဝဂ္ဂော, ယောဂိကထာပဉ္ဟောတိ ဒုဝိဓော။
Tattha milindapañho lakkhaṇapañho, vimaticchedanapañhoti duvidho. Meṇḍakapañhopi mahāvaggo, yogikathāpañhoti duvidho.
ပုဗ္ဗယောဂောတိ တေသံ ပုဗ္ဗကမ္မံ။
Pubbayogoti tesaṃ pubbakammaṃ.
Footnotes:
