| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༎ ནམོ ཏསྶ བྷགཝཏོ ཨརཧཏོ སམྨཱསམྦུདྡྷསྶ༎
Namo tassa bhagavato arahato sammāsambuddhassa
ཁུདྡཀནིཀཱཡེ
Khuddakanikāye
མིལིནྡཔཉྷཔཱལི༹
Milindapañhapāḷi
༡.
1.
མིལིནྡོ ནཱམ སོ རཱཛཱ, སཱགལཱཡཾ པུརུཏྟམེ།
Milindo nāma so rājā, sāgalāyaṃ puruttame;
ཨཱསཛྫ རཱཛཱ ཙིཏྲཀཐིཾ, ཨུཀྐཱདྷཱརཾ ཏམོནུདཾ།
Āsajja rājā citrakathiṃ, ukkādhāraṃ tamonudaṃ;
ཨཔུཙྪི ནིཔུཎེ པཉྷེ, ཋཱནཱཊྛཱནགཏེ པུཐཱུ༎
Apucchi nipuṇe pañhe, ṭhānāṭṭhānagate puthū.
ཧདཡངྒམཱ ཀཎྞསུཁཱ, ཨབྦྷུཏཱ ལོམཧཾསནཱ༎
Hadayaṅgamā kaṇṇasukhā, abbhutā lomahaṃsanā.
ཨབྷིདྷམྨཝིནཡོགཱལ༹ྷཱ, སུཏྟཛཱལསམཏྟིཏཱ།
Abhidhammavinayogāḷhā, suttajālasamattitā;
ནཱགསེནཀཐཱ ཙིཏྲཱ, ཨོཔམྨེཧི ནཡེཧི ཙ༎
Nāgasenakathā citrā, opammehi nayehi ca.
ཏཏྠ ཉཱཎཾ པཎིདྷཱཡ, ཧཱསཡིཏྭཱན མཱནསཾ།
Tattha ñāṇaṃ paṇidhāya, hāsayitvāna mānasaṃ;
སུཎཱཐ ནིཔུཎེ པཉྷེ, ཀངྑཱཊྛཱནཝིདཱལནེཏི༎
Suṇātha nipuṇe pañhe, kaṅkhāṭṭhānavidālaneti.
༢. ཏཾ ཡཐཱནུསཱུཡཏེ – ཨཏྠི ཡོནཀཱནཾ ནཱནཱཔུཊབྷེདནཾ སཱགལཾ ནཱམ ནགརཾ ནདཱིཔབྦཏསོབྷིཏཾ རམཎཱིཡབྷཱུམིཔྤདེསབྷཱགཾ ཨཱརཱམུཡྻཱནོཔཝནཏལཱ༹ཀཔོཀྑརཎིསམྤནྣཾ ནདཱིཔབྦཏཝནརཱམཎེཡྻཀཾ སུཏཝནྟནིམྨིཏཾ ནིཧཏཔཙྩཏྠིཀཾ 5 པཙྩཱམིཏྟཱནུཔཔཱིལི༹ཏཾ ཝིཝིདྷཝིཙིཏྲདལ༹ྷམཊྚཱལཀོཊྛཀཾ ཝརཔཝརགོཔུར 6 ཏོརཎཾ གམྦྷཱིརཔརིཁཱཔཎྜརཔཱཀཱརཔརིཀྑིཏྟནྟེཔུརཾ། སུཝིབྷཏྟཝཱིཐིཙཙྩརཙཏུཀྐསིངྒྷཱཊཀཾ སུཔྤསཱརིཏཱནེཀཝིདྷཝརབྷཎྜཔརིཔཱུརིཏནྟརཱཔཎཾ ཝིཝིདྷདཱནགྒསཏསམུཔསོབྷིཏཾ 7 ཧིམགིརིསིཁརསངྐཱསཝརབྷཝནསཏསཧསྶཔྤཊིམཎྜིཏཾ གཛཧཡརཐཔཏྟིསམཱཀུལཾ ཨབྷིརཱུཔནརནཱརིགཎཱནུཙརིཏཾ ཨཱཀིཎྞཛནམནུསྶཾ པུཐུཁཏྟིཡབྲཱཧྨཎཝེསྶསུདྡཾ ཝིཝིདྷསམཎབྲཱཧྨཎསབྷཱཛན 8 སངྒྷཊིཏཾ བཧུཝིདྷཝིཛྫཱཝནྟ 9 ནརཙིར 10 ནིསེཝིཏཾ ཀཱསིཀཀོཊུམྦརིཀཱདིནཱནཱཝིདྷཝཏྠཱཔཎསམྤནྣཾ སུཔྤསཱརིཏརུཙིརབཧུཝིདྷཔུཔྥགནྡྷཱཔཎཾ གནྡྷགནྡྷིཏཾ ཨཱསཱིསནཱིཡབཧུརཏནཔརིཔཱུརིཏཾ དིསཱམུཁསུཔྤསཱརིཏཱཔཎཾ སིངྒཱརཝཱཎིཛགཎཱནུཙརིཏཾ ཀཧཱཔཎརཛཏསུཝཎྞཀཾསཔཏྠརཔརིཔཱུརཾ པཛྫོཏམཱནནིདྷིནིཀེཏཾ པཧཱུཏདྷནདྷཉྙཝིཏྟཱུཔཀརཎཾ པརིཔུཎྞཀོསཀོཊྛཱགཱརཾ བཧྭནྣཔཱནཾ བཧུཝིདྷཁཛྫབྷོཛྫལེཡྻཔེཡྻསཱཡནཱིཡཾ ཨུཏྟརཀུརུསངྐཱསཾ སམྤནྣསསྶཾ ཨཱལ༹ཀམནྡཱ ཝིཡ དེཝཔུརཾ།
2. Taṃ yathānusūyate – atthi yonakānaṃ nānāpuṭabhedanaṃ sāgalaṃ nāma nagaraṃ nadīpabbatasobhitaṃ ramaṇīyabhūmippadesabhāgaṃ ārāmuyyānopavanataḷākapokkharaṇisampannaṃ nadīpabbatavanarāmaṇeyyakaṃ sutavantanimmitaṃ nihatapaccatthikaṃ 11 paccāmittānupapīḷitaṃ vividhavicitradaḷhamaṭṭālakoṭṭhakaṃ varapavaragopura 12 toraṇaṃ gambhīraparikhāpaṇḍarapākāraparikkhittantepuraṃ. Suvibhattavīthicaccaracatukkasiṅghāṭakaṃ suppasāritānekavidhavarabhaṇḍaparipūritantarāpaṇaṃ vividhadānaggasatasamupasobhitaṃ 13 himagirisikharasaṅkāsavarabhavanasatasahassappaṭimaṇḍitaṃ gajahayarathapattisamākulaṃ abhirūpanaranārigaṇānucaritaṃ ākiṇṇajanamanussaṃ puthukhattiyabrāhmaṇavessasuddaṃ vividhasamaṇabrāhmaṇasabhājana 14 saṅghaṭitaṃ bahuvidhavijjāvanta 15 naracira 16 nisevitaṃ kāsikakoṭumbarikādinānāvidhavatthāpaṇasampannaṃ suppasāritarucirabahuvidhapupphagandhāpaṇaṃ gandhagandhitaṃ āsīsanīyabahuratanaparipūritaṃ disāmukhasuppasāritāpaṇaṃ siṅgāravāṇijagaṇānucaritaṃ kahāpaṇarajatasuvaṇṇakaṃsapattharaparipūraṃ pajjotamānanidhiniketaṃ pahūtadhanadhaññavittūpakaraṇaṃ paripuṇṇakosakoṭṭhāgāraṃ bahvannapānaṃ bahuvidhakhajjabhojjaleyyapeyyasāyanīyaṃ uttarakurusaṅkāsaṃ sampannasassaṃ āḷakamandā viya devapuraṃ.
ཨེཏྠ ཋཏྭཱ ཏེསཾ པུབྦཀམྨཾ ཀཐེཏབྦཾ, ཀཐེནྟེན ཙ ཚདྷཱ ཝིབྷཛིཏྭཱ ཀཐེཏབྦཾ། སེཡྻཐཱིདཾ – པུབྦཡོགོ མིལིནྡཔཉྷཾ ལཀྑཎཔཉྷཾ མེཎྜཀཔཉྷཾ ཨནུམཱནཔཉྷཾ ཨོཔམྨཀཐཱཔཉྷནྟི།
Ettha ṭhatvā tesaṃ pubbakammaṃ kathetabbaṃ, kathentena ca chadhā vibhajitvā kathetabbaṃ. Seyyathīdaṃ – pubbayogo milindapañhaṃ lakkhaṇapañhaṃ meṇḍakapañhaṃ anumānapañhaṃ opammakathāpañhanti.
ཏཏྠ མིལིནྡཔཉྷོ ལཀྑཎཔཉྷོ, ཝིམཏིཙྪེདནཔཉྷོཏི དུཝིདྷོ། མེཎྜཀཔཉྷོཔི མཧཱཝགྒོ, ཡོགིཀཐཱཔཉྷོཏི དུཝིདྷོ།
Tattha milindapañho lakkhaṇapañho, vimaticchedanapañhoti duvidho. Meṇḍakapañhopi mahāvaggo, yogikathāpañhoti duvidho.
པུབྦཡོགོཏི ཏེསཾ པུབྦཀམྨཾ།
Pubbayogoti tesaṃ pubbakammaṃ.
Footnotes:
