| Library / Tipiṭaka / തിപിടക • Tipiṭaka / മിലിന്ദപഞ്ഹപാളി • Milindapañhapāḷi |
നമോ തസ്സ ഭഗവതോ അരഹതോ സമ്മാസമ്ബുദ്ധസ്സ
Namo tassa bhagavato arahato sammāsambuddhassa
ഖുദ്ദകനികായേ
Khuddakanikāye
മിലിന്ദപഞ്ഹപാളി
Milindapañhapāḷi
൧.
1.
മിലിന്ദോ നാമ സോ രാജാ, സാഗലായം പുരുത്തമേ;
Milindo nāma so rājā, sāgalāyaṃ puruttame;
ആസജ്ജ രാജാ ചിത്രകഥിം, ഉക്കാധാരം തമോനുദം;
Āsajja rājā citrakathiṃ, ukkādhāraṃ tamonudaṃ;
അപുച്ഛി നിപുണേ പഞ്ഹേ, ഠാനാട്ഠാനഗതേ പുഥൂ.
Apucchi nipuṇe pañhe, ṭhānāṭṭhānagate puthū.
ഹദയങ്ഗമാ കണ്ണസുഖാ, അബ്ഭുതാ ലോമഹംസനാ.
Hadayaṅgamā kaṇṇasukhā, abbhutā lomahaṃsanā.
അഭിധമ്മവിനയോഗാള്ഹാ, സുത്തജാലസമത്തിതാ;
Abhidhammavinayogāḷhā, suttajālasamattitā;
നാഗസേനകഥാ ചിത്രാ, ഓപമ്മേഹി നയേഹി ച.
Nāgasenakathā citrā, opammehi nayehi ca.
തത്ഥ ഞാണം പണിധായ, ഹാസയിത്വാന മാനസം;
Tattha ñāṇaṃ paṇidhāya, hāsayitvāna mānasaṃ;
സുണാഥ നിപുണേ പഞ്ഹേ, കങ്ഖാട്ഠാനവിദാലനേതി.
Suṇātha nipuṇe pañhe, kaṅkhāṭṭhānavidālaneti.
൨. തം യഥാനുസൂയതേ – അത്ഥി യോനകാനം നാനാപുടഭേദനം സാഗലം നാമ നഗരം നദീപബ്ബതസോഭിതം രമണീയഭൂമിപ്പദേസഭാഗം ആരാമുയ്യാനോപവനതളാകപോക്ഖരണിസമ്പന്നം നദീപബ്ബതവനരാമണേയ്യകം സുതവന്തനിമ്മിതം നിഹതപച്ചത്ഥികം 5 പച്ചാമിത്താനുപപീളിതം വിവിധവിചിത്രദള്ഹമട്ടാലകോട്ഠകം വരപവരഗോപുര 6 തോരണം ഗമ്ഭീരപരിഖാപണ്ഡരപാകാരപരിക്ഖിത്തന്തേപുരം. സുവിഭത്തവീഥിചച്ചരചതുക്കസിങ്ഘാടകം സുപ്പസാരിതാനേകവിധവരഭണ്ഡപരിപൂരിതന്തരാപണം വിവിധദാനഗ്ഗസതസമുപസോഭിതം 7 ഹിമഗിരിസിഖരസങ്കാസവരഭവനസതസഹസ്സപ്പടിമണ്ഡിതം ഗജഹയരഥപത്തിസമാകുലം അഭിരൂപനരനാരിഗണാനുചരിതം ആകിണ്ണജനമനുസ്സം പുഥുഖത്തിയബ്രാഹ്മണവേസ്സസുദ്ദം വിവിധസമണബ്രാഹ്മണസഭാജന 8 സങ്ഘടിതം ബഹുവിധവിജ്ജാവന്ത 9 നരചിര 10 നിസേവിതം കാസികകോടുമ്ബരികാദിനാനാവിധവത്ഥാപണസമ്പന്നം സുപ്പസാരിതരുചിരബഹുവിധപുപ്ഫഗന്ധാപണം ഗന്ധഗന്ധിതം ആസീസനീയബഹുരതനപരിപൂരിതം ദിസാമുഖസുപ്പസാരിതാപണം സിങ്ഗാരവാണിജഗണാനുചരിതം കഹാപണരജതസുവണ്ണകംസപത്ഥരപരിപൂരം പജ്ജോതമാനനിധിനികേതം പഹൂതധനധഞ്ഞവിത്തൂപകരണം പരിപുണ്ണകോസകോട്ഠാഗാരം ബഹ്വന്നപാനം ബഹുവിധഖജ്ജഭോജ്ജലേയ്യപേയ്യസായനീയം ഉത്തരകുരുസങ്കാസം സമ്പന്നസസ്സം ആളകമന്ദാ വിയ ദേവപുരം.
2. Taṃ yathānusūyate – atthi yonakānaṃ nānāpuṭabhedanaṃ sāgalaṃ nāma nagaraṃ nadīpabbatasobhitaṃ ramaṇīyabhūmippadesabhāgaṃ ārāmuyyānopavanataḷākapokkharaṇisampannaṃ nadīpabbatavanarāmaṇeyyakaṃ sutavantanimmitaṃ nihatapaccatthikaṃ 11 paccāmittānupapīḷitaṃ vividhavicitradaḷhamaṭṭālakoṭṭhakaṃ varapavaragopura 12 toraṇaṃ gambhīraparikhāpaṇḍarapākāraparikkhittantepuraṃ. Suvibhattavīthicaccaracatukkasiṅghāṭakaṃ suppasāritānekavidhavarabhaṇḍaparipūritantarāpaṇaṃ vividhadānaggasatasamupasobhitaṃ 13 himagirisikharasaṅkāsavarabhavanasatasahassappaṭimaṇḍitaṃ gajahayarathapattisamākulaṃ abhirūpanaranārigaṇānucaritaṃ ākiṇṇajanamanussaṃ puthukhattiyabrāhmaṇavessasuddaṃ vividhasamaṇabrāhmaṇasabhājana 14 saṅghaṭitaṃ bahuvidhavijjāvanta 15 naracira 16 nisevitaṃ kāsikakoṭumbarikādinānāvidhavatthāpaṇasampannaṃ suppasāritarucirabahuvidhapupphagandhāpaṇaṃ gandhagandhitaṃ āsīsanīyabahuratanaparipūritaṃ disāmukhasuppasāritāpaṇaṃ siṅgāravāṇijagaṇānucaritaṃ kahāpaṇarajatasuvaṇṇakaṃsapattharaparipūraṃ pajjotamānanidhiniketaṃ pahūtadhanadhaññavittūpakaraṇaṃ paripuṇṇakosakoṭṭhāgāraṃ bahvannapānaṃ bahuvidhakhajjabhojjaleyyapeyyasāyanīyaṃ uttarakurusaṅkāsaṃ sampannasassaṃ āḷakamandā viya devapuraṃ.
ഏത്ഥ ഠത്വാ തേസം പുബ്ബകമ്മം കഥേതബ്ബം, കഥേന്തേന ച ഛധാ വിഭജിത്വാ കഥേതബ്ബം. സേയ്യഥീദം – പുബ്ബയോഗോ മിലിന്ദപഞ്ഹം ലക്ഖണപഞ്ഹം മേണ്ഡകപഞ്ഹം അനുമാനപഞ്ഹം ഓപമ്മകഥാപഞ്ഹന്തി.
Ettha ṭhatvā tesaṃ pubbakammaṃ kathetabbaṃ, kathentena ca chadhā vibhajitvā kathetabbaṃ. Seyyathīdaṃ – pubbayogo milindapañhaṃ lakkhaṇapañhaṃ meṇḍakapañhaṃ anumānapañhaṃ opammakathāpañhanti.
തത്ഥ മിലിന്ദപഞ്ഹോ ലക്ഖണപഞ്ഹോ, വിമതിച്ഛേദനപഞ്ഹോതി ദുവിധോ. മേണ്ഡകപഞ്ഹോപി മഹാവഗ്ഗോ, യോഗികഥാപഞ്ഹോതി ദുവിധോ.
Tattha milindapañho lakkhaṇapañho, vimaticchedanapañhoti duvidho. Meṇḍakapañhopi mahāvaggo, yogikathāpañhoti duvidho.
പുബ്ബയോഗോതി തേസം പുബ്ബകമ്മം.
Pubbayogoti tesaṃ pubbakammaṃ.
Footnotes:
