| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
மிலிந்த³பஞ்ஹபுச்சா²விஸஜ்ஜனா
Milindapañhapucchāvisajjanā
தே²ரோ ஆஹ ‘‘ஜானாஸி கோ², மஹாராஜ, ஸம்பதி கா வேலா’’தி? ‘‘ஆம, ப⁴ந்தே, ஜானாமி ‘ஸம்பதி பட²மோ யாமோ அதிக்கந்தோ, மஜ்ஜி²மோ யாமோ பவத்ததி, உக்கா பதீ³பீயந்தி, சத்தாரி படாகானி ஆணத்தானி க³மிஸ்ஸந்தி ப⁴ண்ட³தோ ராஜதெ³ய்யானீ’’’தி.
Thero āha ‘‘jānāsi kho, mahārāja, sampati kā velā’’ti? ‘‘Āma, bhante, jānāmi ‘sampati paṭhamo yāmo atikkanto, majjhimo yāmo pavattati, ukkā padīpīyanti, cattāri paṭākāni āṇattāni gamissanti bhaṇḍato rājadeyyānī’’’ti.
யோனகா ஏவமாஹங்ஸு ‘‘கல்லோஸி, மஹாராஜ, பண்டி³தோ தே²ரோ’’தி. ‘‘ஆம, ப⁴ணே, பண்டி³தோ தே²ரோ, ஏதி³ஸோ ஆசரியோ ப⁴வெய்ய மாதி³ஸோ ச அந்தேவாஸீ, நசிரஸ்ஸேவ பண்டி³தோ த⁴ம்மங் ஆஜானெய்யா’’தி. தஸ்ஸ பஞ்ஹவெய்யாகரணேன துட்டோ² ராஜா தே²ரங் நாக³ஸேனங் ஸதஸஹஸ்ஸக்³க⁴னகேன கம்ப³லேன அச்சா²தெ³த்வா ‘‘ப⁴ந்தே நாக³ஸேன, அஜ்ஜதக்³கே³ தே அட்ட²ஸதங் ப⁴த்தங் பஞ்ஞபேமி, யங் கிஞ்சி அந்தேபுரே கப்பியங், தேன ச பவாரேமீ’’தி ஆஹ. அலங் மஹாராஜ ஜீவாமீ’’தி. ‘‘ஜானாமி, ப⁴ந்தே நாக³ஸேன, ஜீவஸி, அபி ச அத்தானஞ்ச ரக்க², மமஞ்ச ரக்கா²ஹீ’’தி. ‘‘கத²ங் அத்தானங் ரக்க²ஸி, ‘நாக³ஸேனோ மிலிந்த³ங் ராஜானங் பஸாதே³தி, ந ச கிஞ்சி அலபீ⁴’தி பராபவாதோ³ 1 ஆக³ச்செ²ய்யாதி, ஏவங் அத்தானங் ரக்க². கத²ங் மமங் ரக்க²ஸி, ‘மிலிந்தோ³ ராஜா பஸன்னோ பஸன்னாகாரங் ந கரோதீ’தி பராபவாதோ³ ஆக³ச்செ²ய்யாதி, ஏவங் மமங் ரக்கா²ஹீ’’தி. ‘‘ததா² ஹோது, மஹாராஜா’’தி. ‘‘ஸெய்யதா²பி, ப⁴ந்தே, ஸீஹோ மிக³ராஜா ஸுவண்ணபஞ்ஜரே பக்கி²த்தோபி ப³ஹிமுகோ² யேவ ஹோதி, ஏவமேவ கோ² அஹங், ப⁴ந்தே, கிஞ்சாபி அகா³ரங் அஜ்ஜா²வஸாமி ப³ஹிமுகோ² யேவ பன அச்சா²மி. ஸசே அஹங், ப⁴ந்தே, அகா³ரஸ்மா அனாகா³ரியங் பப்³ப³ஜெய்யங், ந சிரங் ஜீவெய்யங், ப³ஹூ மே பச்சத்தி²கா’’தி.
Yonakā evamāhaṃsu ‘‘kallosi, mahārāja, paṇḍito thero’’ti. ‘‘Āma, bhaṇe, paṇḍito thero, ediso ācariyo bhaveyya mādiso ca antevāsī, nacirasseva paṇḍito dhammaṃ ājāneyyā’’ti. Tassa pañhaveyyākaraṇena tuṭṭho rājā theraṃ nāgasenaṃ satasahassagghanakena kambalena acchādetvā ‘‘bhante nāgasena, ajjatagge te aṭṭhasataṃ bhattaṃ paññapemi, yaṃ kiñci antepure kappiyaṃ, tena ca pavāremī’’ti āha. Alaṃ mahārāja jīvāmī’’ti. ‘‘Jānāmi, bhante nāgasena, jīvasi, api ca attānañca rakkha, mamañca rakkhāhī’’ti. ‘‘Kathaṃ attānaṃ rakkhasi, ‘nāgaseno milindaṃ rājānaṃ pasādeti, na ca kiñci alabhī’ti parāpavādo 2 āgaccheyyāti, evaṃ attānaṃ rakkha. Kathaṃ mamaṃ rakkhasi, ‘milindo rājā pasanno pasannākāraṃ na karotī’ti parāpavādo āgaccheyyāti, evaṃ mamaṃ rakkhāhī’’ti. ‘‘Tathā hotu, mahārājā’’ti. ‘‘Seyyathāpi, bhante, sīho migarājā suvaṇṇapañjare pakkhittopi bahimukho yeva hoti, evameva kho ahaṃ, bhante, kiñcāpi agāraṃ ajjhāvasāmi bahimukho yeva pana acchāmi. Sace ahaṃ, bhante, agārasmā anāgāriyaṃ pabbajeyyaṃ, na ciraṃ jīveyyaṃ, bahū me paccatthikā’’ti.
அத² கோ² ஆயஸ்மா நாக³ஸேனோ மிலிந்த³ஸ்ஸ ரஞ்ஞோ பஞ்ஹங் விஸஜ்ஜெத்வா உட்டா²யாஸனா ஸங்கா⁴ராமங் அக³மாஸி. அசிரபக்கந்தே ச ஆயஸ்மந்தே நாக³ஸேனே மிலிந்த³ஸ்ஸ ரஞ்ஞோ ஏதத³ஹோஸி ‘‘கிங் மயா புச்சி²தங், கிங் ப⁴த³ந்தேன நாக³ஸேனேன விஸஜ்ஜித’’ந்தி? அத² கோ² மிலிந்த³ஸ்ஸ ரஞ்ஞோ ஏதத³ஹோஸி ‘‘ஸப்³ப³ங் மயா ஸுபுச்சி²தங், ஸப்³ப³ங் ப⁴த³ந்தேன நாக³ஸேனேன ஸுவிஸஜ்ஜித’’ந்தி. ஆயஸ்மதோபி நாக³ஸேனஸ்ஸ ஸங்கா⁴ராமக³தஸ்ஸ ஏதத³ஹோஸி ‘‘கிங் மிலிந்தே³ன ரஞ்ஞா புச்சி²தங், கிங் மயா விஸஜ்ஜித’’ந்தி. அத² கோ² ஆயஸ்மதோ நாக³ஸேனஸ்ஸ ஏதத³ஹோஸி ‘‘ஸப்³ப³ங் மிலிந்தே³ன ரஞ்ஞா ஸுபுச்சி²தங், ஸப்³ப³ங் மயா ஸுவிஸஜ்ஜித’’ந்தி.
Atha kho āyasmā nāgaseno milindassa rañño pañhaṃ visajjetvā uṭṭhāyāsanā saṅghārāmaṃ agamāsi. Acirapakkante ca āyasmante nāgasene milindassa rañño etadahosi ‘‘kiṃ mayā pucchitaṃ, kiṃ bhadantena nāgasenena visajjita’’nti? Atha kho milindassa rañño etadahosi ‘‘sabbaṃ mayā supucchitaṃ, sabbaṃ bhadantena nāgasenena suvisajjita’’nti. Āyasmatopi nāgasenassa saṅghārāmagatassa etadahosi ‘‘kiṃ milindena raññā pucchitaṃ, kiṃ mayā visajjita’’nti. Atha kho āyasmato nāgasenassa etadahosi ‘‘sabbaṃ milindena raññā supucchitaṃ, sabbaṃ mayā suvisajjita’’nti.
அத² கோ² ஆயஸ்மா நாக³ஸேனோ தஸ்ஸா ரத்தியா அச்சயேன புப்³ப³ண்ஹஸமயங் நிவாஸெத்வா பத்தசீவரமாதா³ய யேன மிலிந்த³ஸ்ஸ ரஞ்ஞோ நிவேஸனங் தேனுபஸங்கமி, உபஸங்கமித்வா பஞ்ஞத்தே ஆஸனே நிஸீதி³. அத² கோ² மிலிந்தோ³ ராஜா ஆயஸ்மந்தங் நாக³ஸேனங் அபி⁴வாதெ³த்வா ஏகமந்தங் நிஸீதி³, ஏகமந்தங் நிஸின்னோ கோ² மிலிந்தோ³ ராஜா ஆயஸ்மந்தங் நாக³ஸேனங் ஏதத³வோச –
Atha kho āyasmā nāgaseno tassā rattiyā accayena pubbaṇhasamayaṃ nivāsetvā pattacīvaramādāya yena milindassa rañño nivesanaṃ tenupasaṅkami, upasaṅkamitvā paññatte āsane nisīdi. Atha kho milindo rājā āyasmantaṃ nāgasenaṃ abhivādetvā ekamantaṃ nisīdi, ekamantaṃ nisinno kho milindo rājā āyasmantaṃ nāgasenaṃ etadavoca –
‘‘மா கோ² ப⁴த³ந்தஸ்ஸ ஏவங் அஹோஸி ‘நாக³ஸேனோ மயா பஞ்ஹங் புச்சி²தோ’தி தேனேவ ஸோமனஸ்ஸேன தங் ரத்தாவஸேஸங் வீதினாமேஸீதி ந தே ஏவங் த³ட்ட²ப்³ப³ங். தஸ்ஸ மய்ஹங், ப⁴ந்தே, தங் ரத்தாவஸேஸங் ஏதத³ஹோஸி ‘கிங் மயா புச்சி²தங், கிங் ப⁴த³ந்தேன விஸஜ்ஜித’ந்தி, ‘ஸப்³ப³ங் மயா ஸுபுச்சி²தங், ஸப்³ப³ங் ப⁴த³ந்தேன ஸுவிஸஜ்ஜித’’’ந்தி.
‘‘Mā kho bhadantassa evaṃ ahosi ‘nāgaseno mayā pañhaṃ pucchito’ti teneva somanassena taṃ rattāvasesaṃ vītināmesīti na te evaṃ daṭṭhabbaṃ. Tassa mayhaṃ, bhante, taṃ rattāvasesaṃ etadahosi ‘kiṃ mayā pucchitaṃ, kiṃ bhadantena visajjita’nti, ‘sabbaṃ mayā supucchitaṃ, sabbaṃ bhadantena suvisajjita’’’nti.
தே²ரோபி ஏவமாஹ – ‘‘மா கோ² மஹாராஜஸ்ஸ ஏவங் அஹோஸி ‘மிலிந்த³ஸ்ஸ ரஞ்ஞோ மயா பஞ்ஹோ விஸஜ்ஜிதோ’தி தேனேவ ஸோமனஸ்ஸேன தங் ரத்தாவஸேஸங் வீதினாமேஸீதி ந தே ஏவங் த³ட்ட²ப்³ப³ங். தஸ்ஸ மய்ஹங், மஹாராஜ, தங் ரத்தாவஸேஸங் ஏதத³ஹோஸி ‘கிங் மிலிந்தே³ன ரஞ்ஞா புச்சி²தங், கிங் மயா விஸஜ்ஜித’ந்தி, ‘ஸப்³ப³ங் மிலிந்தே³ன ரஞ்ஞா ஸுபுச்சி²தங், ஸப்³ப³ங் மயா ஸுவிஸஜ்ஜித’’’ந்தி இதிஹ தே மஹானாகா³ அஞ்ஞமஞ்ஞஸ்ஸ ஸுபா⁴ஸிதங் ஸமனுமோதி³ங்ஸூதி.
Theropi evamāha – ‘‘mā kho mahārājassa evaṃ ahosi ‘milindassa rañño mayā pañho visajjito’ti teneva somanassena taṃ rattāvasesaṃ vītināmesīti na te evaṃ daṭṭhabbaṃ. Tassa mayhaṃ, mahārāja, taṃ rattāvasesaṃ etadahosi ‘kiṃ milindena raññā pucchitaṃ, kiṃ mayā visajjita’nti, ‘sabbaṃ milindena raññā supucchitaṃ, sabbaṃ mayā suvisajjita’’’nti itiha te mahānāgā aññamaññassa subhāsitaṃ samanumodiṃsūti.
மிலிந்த³பஞ்ஹபுச்சா²விஸஜ்ஜனா நிட்டி²தா.
Milindapañhapucchāvisajjanā niṭṭhitā.
Footnotes:
