| Library / Tipiṭaka / д̇ибидага • Tipiṭaka / милинд̣̇абан̃хабаал̣и • Milindapañhapāḷi |
милинд̣̇абан̃хабужчаависаж̇ж̇анаа
Milindapañhapucchāvisajjanā
т̇зро ааха ‘‘ж̇аанааси ко, махаарааж̇а, самбад̇и гаа взлаа’’д̇и? ‘‘аама, бханд̇з, ж̇аанаами ‘самбад̇и батамо яаамо ад̇игганд̇о, маж̇жхимо яаамо бавад̇д̇ад̇и, уггаа бад̣̇ийбийяанд̇и, жад̇д̇аари бадаагаани аан̣ад̇д̇аани г̇амиссанд̇и бхан̣д̣ад̇о рааж̇ад̣̇зяяааний’’’д̇и.
Thero āha ‘‘jānāsi kho, mahārāja, sampati kā velā’’ti? ‘‘Āma, bhante, jānāmi ‘sampati paṭhamo yāmo atikkanto, majjhimo yāmo pavattati, ukkā padīpīyanti, cattāri paṭākāni āṇattāni gamissanti bhaṇḍato rājadeyyānī’’’ti.
яонагаа звамаахам̣су ‘‘галлоси, махаарааж̇а, бан̣д̣ид̇о т̇зро’’д̇и. ‘‘аама, бхан̣з, бан̣д̣ид̇о т̇зро, зд̣̇исо аажарияо бхавзяяа маад̣̇исо жа анд̇зваасий, нажирассзва бан̣д̣ид̇о д̇хаммам̣ ааж̇аанзяяаа’’д̇и. д̇асса бан̃хавзяяаагаран̣зна д̇удто рааж̇аа т̇зрам̣ нааг̇асзнам̣ сад̇асахассаг̇гханагзна гамб̣алзна ажчаад̣̇зд̇ваа ‘‘бханд̇з нааг̇асзна, аж̇ж̇ад̇аг̇г̇з д̇з адтасад̇ам̣ бхад̇д̇ам̣ бан̃н̃абзми, яам̣ гин̃жи анд̇збурз габбияам̣, д̇зна жа баваарзмий’’д̇и ааха. алам̣ махаарааж̇а ж̇ийваамий’’д̇и. ‘‘ж̇аанаами, бханд̇з нааг̇асзна, ж̇ийваси, аби жа ад̇д̇аанан̃жа рагка, маман̃жа рагкаахий’’д̇и. ‘‘гат̇ам̣ ад̇д̇аанам̣ рагкаси, ‘нааг̇асзно милинд̣̇ам̣ рааж̇аанам̣ басаад̣̇зд̇и, на жа гин̃жи алабхий’д̇и бараабаваад̣̇о 1 ааг̇ажчзяяаад̇и, звам̣ ад̇д̇аанам̣ рагка. гат̇ам̣ мамам̣ рагкаси, ‘милинд̣̇о рааж̇аа басанно басаннаагаарам̣ на гарод̇ий’д̇и бараабаваад̣̇о ааг̇ажчзяяаад̇и, звам̣ мамам̣ рагкаахий’’д̇и. ‘‘д̇ат̇аа ход̇у, махаарааж̇аа’’д̇и. ‘‘сзяяат̇ааби, бханд̇з, сийхо миг̇арааж̇аа суван̣н̣абан̃ж̇арз багкид̇д̇оби б̣ахимуко язва ход̇и, звамзва ко ахам̣, бханд̇з, гин̃жааби аг̇аарам̣ аж̇жхаавасаами б̣ахимуко язва бана ажчаами. сажз ахам̣, бханд̇з, аг̇аарасмаа анааг̇аарияам̣ баб̣б̣аж̇зяяам̣, на жирам̣ ж̇ийвзяяам̣, б̣ахуу мз бажжад̇т̇игаа’’д̇и.
Yonakā evamāhaṃsu ‘‘kallosi, mahārāja, paṇḍito thero’’ti. ‘‘Āma, bhaṇe, paṇḍito thero, ediso ācariyo bhaveyya mādiso ca antevāsī, nacirasseva paṇḍito dhammaṃ ājāneyyā’’ti. Tassa pañhaveyyākaraṇena tuṭṭho rājā theraṃ nāgasenaṃ satasahassagghanakena kambalena acchādetvā ‘‘bhante nāgasena, ajjatagge te aṭṭhasataṃ bhattaṃ paññapemi, yaṃ kiñci antepure kappiyaṃ, tena ca pavāremī’’ti āha. Alaṃ mahārāja jīvāmī’’ti. ‘‘Jānāmi, bhante nāgasena, jīvasi, api ca attānañca rakkha, mamañca rakkhāhī’’ti. ‘‘Kathaṃ attānaṃ rakkhasi, ‘nāgaseno milindaṃ rājānaṃ pasādeti, na ca kiñci alabhī’ti parāpavādo 2 āgaccheyyāti, evaṃ attānaṃ rakkha. Kathaṃ mamaṃ rakkhasi, ‘milindo rājā pasanno pasannākāraṃ na karotī’ti parāpavādo āgaccheyyāti, evaṃ mamaṃ rakkhāhī’’ti. ‘‘Tathā hotu, mahārājā’’ti. ‘‘Seyyathāpi, bhante, sīho migarājā suvaṇṇapañjare pakkhittopi bahimukho yeva hoti, evameva kho ahaṃ, bhante, kiñcāpi agāraṃ ajjhāvasāmi bahimukho yeva pana acchāmi. Sace ahaṃ, bhante, agārasmā anāgāriyaṃ pabbajeyyaṃ, na ciraṃ jīveyyaṃ, bahū me paccatthikā’’ti.
ат̇а ко ааяасмаа нааг̇асзно милинд̣̇асса ран̃н̃о бан̃хам̣ висаж̇ж̇зд̇ваа удтааяаасанаа сан̇гхаараамам̣ аг̇амааси. ажирабагганд̇з жа ааяасманд̇з нааг̇асзнз милинд̣̇асса ран̃н̃о зд̇ад̣̇ахоси ‘‘гим̣ маяаа бужчид̇ам̣, гим̣ бхад̣̇анд̇зна нааг̇асзнзна висаж̇ж̇ид̇а’’нд̇и? ат̇а ко милинд̣̇асса ран̃н̃о зд̇ад̣̇ахоси ‘‘саб̣б̣ам̣ маяаа субужчид̇ам̣, саб̣б̣ам̣ бхад̣̇анд̇зна нааг̇асзнзна сувисаж̇ж̇ид̇а’’нд̇и. ааяасмад̇оби нааг̇асзнасса сан̇гхаараамаг̇ад̇асса зд̇ад̣̇ахоси ‘‘гим̣ милинд̣̇зна ран̃н̃аа бужчид̇ам̣, гим̣ маяаа висаж̇ж̇ид̇а’’нд̇и. ат̇а ко ааяасмад̇о нааг̇асзнасса зд̇ад̣̇ахоси ‘‘саб̣б̣ам̣ милинд̣̇зна ран̃н̃аа субужчид̇ам̣, саб̣б̣ам̣ маяаа сувисаж̇ж̇ид̇а’’нд̇и.
Atha kho āyasmā nāgaseno milindassa rañño pañhaṃ visajjetvā uṭṭhāyāsanā saṅghārāmaṃ agamāsi. Acirapakkante ca āyasmante nāgasene milindassa rañño etadahosi ‘‘kiṃ mayā pucchitaṃ, kiṃ bhadantena nāgasenena visajjita’’nti? Atha kho milindassa rañño etadahosi ‘‘sabbaṃ mayā supucchitaṃ, sabbaṃ bhadantena nāgasenena suvisajjita’’nti. Āyasmatopi nāgasenassa saṅghārāmagatassa etadahosi ‘‘kiṃ milindena raññā pucchitaṃ, kiṃ mayā visajjita’’nti. Atha kho āyasmato nāgasenassa etadahosi ‘‘sabbaṃ milindena raññā supucchitaṃ, sabbaṃ mayā suvisajjita’’nti.
ат̇а ко ааяасмаа нааг̇асзно д̇ассаа рад̇д̇ияаа ажжаязна буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа язна милинд̣̇асса ран̃н̃о нивзсанам̣ д̇знубасан̇гами, убасан̇гамид̇ваа бан̃н̃ад̇д̇з аасанз нисийд̣̇и. ат̇а ко милинд̣̇о рааж̇аа ааяасманд̇ам̣ нааг̇асзнам̣ абхиваад̣̇зд̇ваа згаманд̇ам̣ нисийд̣̇и, згаманд̇ам̣ нисинно ко милинд̣̇о рааж̇аа ааяасманд̇ам̣ нааг̇асзнам̣ зд̇ад̣̇авожа –
Atha kho āyasmā nāgaseno tassā rattiyā accayena pubbaṇhasamayaṃ nivāsetvā pattacīvaramādāya yena milindassa rañño nivesanaṃ tenupasaṅkami, upasaṅkamitvā paññatte āsane nisīdi. Atha kho milindo rājā āyasmantaṃ nāgasenaṃ abhivādetvā ekamantaṃ nisīdi, ekamantaṃ nisinno kho milindo rājā āyasmantaṃ nāgasenaṃ etadavoca –
‘‘маа ко бхад̣̇анд̇асса звам̣ ахоси ‘нааг̇асзно маяаа бан̃хам̣ бужчид̇о’д̇и д̇знзва соманассзна д̇ам̣ рад̇д̇аавасзсам̣ вийд̇инаамзсийд̇и на д̇з звам̣ д̣̇адтаб̣б̣ам̣. д̇асса маяхам̣, бханд̇з, д̇ам̣ рад̇д̇аавасзсам̣ зд̇ад̣̇ахоси ‘гим̣ маяаа бужчид̇ам̣, гим̣ бхад̣̇анд̇зна висаж̇ж̇ид̇а’нд̇и, ‘саб̣б̣ам̣ маяаа субужчид̇ам̣, саб̣б̣ам̣ бхад̣̇анд̇зна сувисаж̇ж̇ид̇а’’’нд̇и.
‘‘Mā kho bhadantassa evaṃ ahosi ‘nāgaseno mayā pañhaṃ pucchito’ti teneva somanassena taṃ rattāvasesaṃ vītināmesīti na te evaṃ daṭṭhabbaṃ. Tassa mayhaṃ, bhante, taṃ rattāvasesaṃ etadahosi ‘kiṃ mayā pucchitaṃ, kiṃ bhadantena visajjita’nti, ‘sabbaṃ mayā supucchitaṃ, sabbaṃ bhadantena suvisajjita’’’nti.
т̇зроби звамааха – ‘‘маа ко махаарааж̇асса звам̣ ахоси ‘милинд̣̇асса ран̃н̃о маяаа бан̃хо висаж̇ж̇ид̇о’д̇и д̇знзва соманассзна д̇ам̣ рад̇д̇аавасзсам̣ вийд̇инаамзсийд̇и на д̇з звам̣ д̣̇адтаб̣б̣ам̣. д̇асса маяхам̣, махаарааж̇а, д̇ам̣ рад̇д̇аавасзсам̣ зд̇ад̣̇ахоси ‘гим̣ милинд̣̇зна ран̃н̃аа бужчид̇ам̣, гим̣ маяаа висаж̇ж̇ид̇а’нд̇и, ‘саб̣б̣ам̣ милинд̣̇зна ран̃н̃аа субужчид̇ам̣, саб̣б̣ам̣ маяаа сувисаж̇ж̇ид̇а’’’нд̇и ид̇иха д̇з махаанааг̇аа ан̃н̃аман̃н̃асса субхаасид̇ам̣ саманумод̣̇им̣сууд̇и.
Theropi evamāha – ‘‘mā kho mahārājassa evaṃ ahosi ‘milindassa rañño mayā pañho visajjito’ti teneva somanassena taṃ rattāvasesaṃ vītināmesīti na te evaṃ daṭṭhabbaṃ. Tassa mayhaṃ, mahārāja, taṃ rattāvasesaṃ etadahosi ‘kiṃ milindena raññā pucchitaṃ, kiṃ mayā visajjita’nti, ‘sabbaṃ milindena raññā supucchitaṃ, sabbaṃ mayā suvisajjita’’’nti itiha te mahānāgā aññamaññassa subhāsitaṃ samanumodiṃsūti.
милинд̣̇абан̃хабужчаависаж̇ж̇анаа нидтид̇аа.
Milindapañhapucchāvisajjanā niṭṭhitā.
Footnotes:
