| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
མིལིནྡཔཉྷཔུཙྪཱཝིསཛྫནཱ
Milindapañhapucchāvisajjanā
ཐེརོ ཨཱཧ ‘‘ཛཱནཱསི ཁོ, མཧཱརཱཛ, སམྤཏི ཀཱ ཝེལཱ’’ཏི? ‘‘ཨཱམ, བྷནྟེ, ཛཱནཱམི ‘སམྤཏི པཋམོ ཡཱམོ ཨཏིཀྐནྟོ, མཛ྄ཛྷིམོ ཡཱམོ པཝཏྟཏི, ཨུཀྐཱ པདཱིཔཱིཡནྟི, ཙཏྟཱརི པཊཱཀཱནི ཨཱཎཏྟཱནི གམིསྶནྟི བྷཎྜཏོ རཱཛདེཡྻཱནཱི’’’ཏི།
Thero āha ‘‘jānāsi kho, mahārāja, sampati kā velā’’ti? ‘‘Āma, bhante, jānāmi ‘sampati paṭhamo yāmo atikkanto, majjhimo yāmo pavattati, ukkā padīpīyanti, cattāri paṭākāni āṇattāni gamissanti bhaṇḍato rājadeyyānī’’’ti.
ཡོནཀཱ ཨེཝམཱཧཾསུ ‘‘ཀལློསི, མཧཱརཱཛ, པཎྜིཏོ ཐེརོ’’ཏི། ‘‘ཨཱམ, བྷཎེ, པཎྜིཏོ ཐེརོ, ཨེདིསོ ཨཱཙརིཡོ བྷཝེཡྻ མཱདིསོ ཙ ཨནྟེཝཱསཱི, ནཙིརསྶེཝ པཎྜིཏོ དྷམྨཾ ཨཱཛཱནེཡྻཱ’’ཏི། ཏསྶ པཉྷཝེཡྻཱཀརཎེན ཏུཊྛོ རཱཛཱ ཐེརཾ ནཱགསེནཾ སཏསཧསྶགྒྷནཀེན ཀམྦལེན ཨཙྪཱདེཏྭཱ ‘‘བྷནྟེ ནཱགསེན, ཨཛྫཏགྒེ ཏེ ཨཊྛསཏཾ བྷཏྟཾ པཉྙཔེམི, ཡཾ ཀིཉྩི ཨནྟེཔུརེ ཀཔྤིཡཾ, ཏེན ཙ པཝཱརེམཱི’’ཏི ཨཱཧ། ཨལཾ མཧཱརཱཛ ཛཱིཝཱམཱི’’ཏི། ‘‘ཛཱནཱམི, བྷནྟེ ནཱགསེན, ཛཱིཝསི, ཨཔི ཙ ཨཏྟཱནཉྩ རཀྑ, མམཉྩ རཀྑཱཧཱི’’ཏི། ‘‘ཀཐཾ ཨཏྟཱནཾ རཀྑསི, ‘ནཱགསེནོ མིལིནྡཾ རཱཛཱནཾ པསཱདེཏི, ན ཙ ཀིཉྩི ཨལབྷཱི’ཏི པརཱཔཝཱདོ 1 ཨཱགཙྪེཡྻཱཏི, ཨེཝཾ ཨཏྟཱནཾ རཀྑ། ཀཐཾ མམཾ རཀྑསི, ‘མིལིནྡོ རཱཛཱ པསནྣོ པསནྣཱཀཱརཾ ན ཀརོཏཱི’ཏི པརཱཔཝཱདོ ཨཱགཙྪེཡྻཱཏི, ཨེཝཾ མམཾ རཀྑཱཧཱི’’ཏི། ‘‘ཏཐཱ ཧོཏུ, མཧཱརཱཛཱ’’ཏི། ‘‘སེཡྻཐཱཔི, བྷནྟེ, སཱིཧོ མིགརཱཛཱ སུཝཎྞཔཉྫརེ པཀྑིཏྟོཔི བཧིམུཁོ ཡེཝ ཧོཏི, ཨེཝམེཝ ཁོ ཨཧཾ, བྷནྟེ, ཀིཉྩཱཔི ཨགཱརཾ ཨཛ྄ཛྷཱཝསཱམི བཧིམུཁོ ཡེཝ པན ཨཙྪཱམི། སཙེ ཨཧཾ, བྷནྟེ, ཨགཱརསྨཱ ཨནཱགཱརིཡཾ པབྦཛེཡྻཾ, ན ཙིརཾ ཛཱིཝེཡྻཾ, བཧཱུ མེ པཙྩཏྠིཀཱ’’ཏི།
Yonakā evamāhaṃsu ‘‘kallosi, mahārāja, paṇḍito thero’’ti. ‘‘Āma, bhaṇe, paṇḍito thero, ediso ācariyo bhaveyya mādiso ca antevāsī, nacirasseva paṇḍito dhammaṃ ājāneyyā’’ti. Tassa pañhaveyyākaraṇena tuṭṭho rājā theraṃ nāgasenaṃ satasahassagghanakena kambalena acchādetvā ‘‘bhante nāgasena, ajjatagge te aṭṭhasataṃ bhattaṃ paññapemi, yaṃ kiñci antepure kappiyaṃ, tena ca pavāremī’’ti āha. Alaṃ mahārāja jīvāmī’’ti. ‘‘Jānāmi, bhante nāgasena, jīvasi, api ca attānañca rakkha, mamañca rakkhāhī’’ti. ‘‘Kathaṃ attānaṃ rakkhasi, ‘nāgaseno milindaṃ rājānaṃ pasādeti, na ca kiñci alabhī’ti parāpavādo 2 āgaccheyyāti, evaṃ attānaṃ rakkha. Kathaṃ mamaṃ rakkhasi, ‘milindo rājā pasanno pasannākāraṃ na karotī’ti parāpavādo āgaccheyyāti, evaṃ mamaṃ rakkhāhī’’ti. ‘‘Tathā hotu, mahārājā’’ti. ‘‘Seyyathāpi, bhante, sīho migarājā suvaṇṇapañjare pakkhittopi bahimukho yeva hoti, evameva kho ahaṃ, bhante, kiñcāpi agāraṃ ajjhāvasāmi bahimukho yeva pana acchāmi. Sace ahaṃ, bhante, agārasmā anāgāriyaṃ pabbajeyyaṃ, na ciraṃ jīveyyaṃ, bahū me paccatthikā’’ti.
ཨཐ ཁོ ཨཱཡསྨཱ ནཱགསེནོ མིལིནྡསྶ རཉྙོ པཉྷཾ ཝིསཛྫེཏྭཱ ཨུཊྛཱཡཱསནཱ སངྒྷཱརཱམཾ ཨགམཱསི། ཨཙིརཔཀྐནྟེ ཙ ཨཱཡསྨནྟེ ནཱགསེནེ མིལིནྡསྶ རཉྙོ ཨེཏདཧོསི ‘‘ཀིཾ མཡཱ པུཙྪིཏཾ, ཀིཾ བྷདནྟེན ནཱགསེནེན ཝིསཛྫིཏ’’ནྟི? ཨཐ ཁོ མིལིནྡསྶ རཉྙོ ཨེཏདཧོསི ‘‘སབྦཾ མཡཱ སུཔུཙྪིཏཾ, སབྦཾ བྷདནྟེན ནཱགསེནེན སུཝིསཛྫིཏ’’ནྟི། ཨཱཡསྨཏོཔི ནཱགསེནསྶ སངྒྷཱརཱམགཏསྶ ཨེཏདཧོསི ‘‘ཀིཾ མིལིནྡེན རཉྙཱ པུཙྪིཏཾ, ཀིཾ མཡཱ ཝིསཛྫིཏ’’ནྟི། ཨཐ ཁོ ཨཱཡསྨཏོ ནཱགསེནསྶ ཨེཏདཧོསི ‘‘སབྦཾ མིལིནྡེན རཉྙཱ སུཔུཙྪིཏཾ, སབྦཾ མཡཱ སུཝིསཛྫིཏ’’ནྟི།
Atha kho āyasmā nāgaseno milindassa rañño pañhaṃ visajjetvā uṭṭhāyāsanā saṅghārāmaṃ agamāsi. Acirapakkante ca āyasmante nāgasene milindassa rañño etadahosi ‘‘kiṃ mayā pucchitaṃ, kiṃ bhadantena nāgasenena visajjita’’nti? Atha kho milindassa rañño etadahosi ‘‘sabbaṃ mayā supucchitaṃ, sabbaṃ bhadantena nāgasenena suvisajjita’’nti. Āyasmatopi nāgasenassa saṅghārāmagatassa etadahosi ‘‘kiṃ milindena raññā pucchitaṃ, kiṃ mayā visajjita’’nti. Atha kho āyasmato nāgasenassa etadahosi ‘‘sabbaṃ milindena raññā supucchitaṃ, sabbaṃ mayā suvisajjita’’nti.
ཨཐ ཁོ ཨཱཡསྨཱ ནཱགསེནོ ཏསྶཱ རཏྟིཡཱ ཨཙྩཡེན པུབྦཎྷསམཡཾ ནིཝཱསེཏྭཱ པཏྟཙཱིཝརམཱདཱཡ ཡེན མིལིནྡསྶ རཉྙོ ནིཝེསནཾ ཏེནུཔསངྐམི, ཨུཔསངྐམིཏྭཱ པཉྙཏྟེ ཨཱསནེ ནིསཱིདི། ཨཐ ཁོ མིལིནྡོ རཱཛཱ ཨཱཡསྨནྟཾ ནཱགསེནཾ ཨབྷིཝཱདེཏྭཱ ཨེཀམནྟཾ ནིསཱིདི, ཨེཀམནྟཾ ནིསིནྣོ ཁོ མིལིནྡོ རཱཛཱ ཨཱཡསྨནྟཾ ནཱགསེནཾ ཨེཏདཝོཙ –
Atha kho āyasmā nāgaseno tassā rattiyā accayena pubbaṇhasamayaṃ nivāsetvā pattacīvaramādāya yena milindassa rañño nivesanaṃ tenupasaṅkami, upasaṅkamitvā paññatte āsane nisīdi. Atha kho milindo rājā āyasmantaṃ nāgasenaṃ abhivādetvā ekamantaṃ nisīdi, ekamantaṃ nisinno kho milindo rājā āyasmantaṃ nāgasenaṃ etadavoca –
‘‘མཱ ཁོ བྷདནྟསྶ ཨེཝཾ ཨཧོསི ‘ནཱགསེནོ མཡཱ པཉྷཾ པུཙྪིཏོ’ཏི ཏེནེཝ སོམནསྶེན ཏཾ རཏྟཱཝསེསཾ ཝཱིཏིནཱམེསཱིཏི ན ཏེ ཨེཝཾ དཊྛབྦཾ། ཏསྶ མཡ྄ཧཾ, བྷནྟེ, ཏཾ རཏྟཱཝསེསཾ ཨེཏདཧོསི ‘ཀིཾ མཡཱ པུཙྪིཏཾ, ཀིཾ བྷདནྟེན ཝིསཛྫིཏ’ནྟི, ‘སབྦཾ མཡཱ སུཔུཙྪིཏཾ, སབྦཾ བྷདནྟེན སུཝིསཛྫིཏ’’’ནྟི།
‘‘Mā kho bhadantassa evaṃ ahosi ‘nāgaseno mayā pañhaṃ pucchito’ti teneva somanassena taṃ rattāvasesaṃ vītināmesīti na te evaṃ daṭṭhabbaṃ. Tassa mayhaṃ, bhante, taṃ rattāvasesaṃ etadahosi ‘kiṃ mayā pucchitaṃ, kiṃ bhadantena visajjita’nti, ‘sabbaṃ mayā supucchitaṃ, sabbaṃ bhadantena suvisajjita’’’nti.
ཐེརོཔི ཨེཝམཱཧ – ‘‘མཱ ཁོ མཧཱརཱཛསྶ ཨེཝཾ ཨཧོསི ‘མིལིནྡསྶ རཉྙོ མཡཱ པཉྷོ ཝིསཛྫིཏོ’ཏི ཏེནེཝ སོམནསྶེན ཏཾ རཏྟཱཝསེསཾ ཝཱིཏིནཱམེསཱིཏི ན ཏེ ཨེཝཾ དཊྛབྦཾ། ཏསྶ མཡ྄ཧཾ, མཧཱརཱཛ, ཏཾ རཏྟཱཝསེསཾ ཨེཏདཧོསི ‘ཀིཾ མིལིནྡེན རཉྙཱ པུཙྪིཏཾ, ཀིཾ མཡཱ ཝིསཛྫིཏ’ནྟི, ‘སབྦཾ མིལིནྡེན རཉྙཱ སུཔུཙྪིཏཾ, སབྦཾ མཡཱ སུཝིསཛྫིཏ’’’ནྟི ཨིཏིཧ ཏེ མཧཱནཱགཱ ཨཉྙམཉྙསྶ སུབྷཱསིཏཾ སམནུམོདིཾསཱུཏི།
Theropi evamāha – ‘‘mā kho mahārājassa evaṃ ahosi ‘milindassa rañño mayā pañho visajjito’ti teneva somanassena taṃ rattāvasesaṃ vītināmesīti na te evaṃ daṭṭhabbaṃ. Tassa mayhaṃ, mahārāja, taṃ rattāvasesaṃ etadahosi ‘kiṃ milindena raññā pucchitaṃ, kiṃ mayā visajjita’nti, ‘sabbaṃ milindena raññā supucchitaṃ, sabbaṃ mayā suvisajjita’’’nti itiha te mahānāgā aññamaññassa subhāsitaṃ samanumodiṃsūti.
མིལིནྡཔཉྷཔུཙྪཱཝིསཛྫནཱ ནིཊྛིཏཱ།
Milindapañhapucchāvisajjanā niṭṭhitā.
Footnotes:
