| Library / Tipiṭaka / திபிடக • Tipiṭaka / நெத்திப்பகரண-அட்ட²கதா² • Nettippakaraṇa-aṭṭhakathā |
மிஸ்ஸகஹாரஸம்பாதவண்ணனா
Missakahārasampātavaṇṇanā
அபி செத்த² ஹாரஸம்பாதனித்³தே³ஸோ இமினாபி நயேன வேதி³தப்³போ³ –
Api cettha hārasampātaniddeso imināpi nayena veditabbo –
‘‘மனோபுப்³ப³ங்க³மா த⁴ம்மா, மனோஸெட்டா² மனோமயா;
‘‘Manopubbaṅgamā dhammā, manoseṭṭhā manomayā;
மனஸா சே பஸன்னேன, பா⁴ஸதி வா கரோதி வா;
Manasā ce pasannena, bhāsati vā karoti vā;
ததோ நங் ஸுக²மன்வேதி, சா²யாவ அனபாயினீ’’தி. (த⁴॰ ப॰ 2);
Tato naṃ sukhamanveti, chāyāva anapāyinī’’ti. (dha. pa. 2);
தத்த² கதமோ தே³ஸனாஹாரஸம்பாதோ? மனோபுப்³ப³ங்க³மா த⁴ம்மாதி மனோதி க²ந்த⁴வவத்தா²னேன விஞ்ஞாணக்க²ந்த⁴ங் தே³ஸேதி. ஆயதனவவத்தா²னேன மனாயதனங் , தா⁴துவவத்தா²னேன விஞ்ஞாணதா⁴துங், இந்த்³ரியவவத்தா²னேன மனிந்த்³ரியங். கதமே த⁴ம்மா புப்³ப³ங்க³மா? ச² த⁴ம்மா புப்³ப³ங்க³மா, குஸலானங் குஸலமூலானி, அகுஸலானங் அகுஸலமூலானி, ஸாதி⁴பதிகானங் அதி⁴பதி, ஸப்³ப³சித்துப்பாதா³னங் இந்த்³ரியானி. அபி ச இமஸ்மிங் ஸுத்தே மனோ அதி⁴ப்பேதோ. யதா² ப³லக்³க³ஸ்ஸ ராஜா புப்³ப³ங்க³மோ, ஏவமேவங் த⁴ம்மானங் மனோ புப்³ப³ங்க³மோ. தத்த² திவிதே⁴ன மனோ புப்³ப³ங்க³மோ நெக்க²ம்மச²ந்தே³ன அப்³யாபாத³ச²ந்தே³ன அவிஹிங்ஸாச²ந்தே³ன. தத்த² அலோப⁴ஸ்ஸ நெக்க²ம்மச²ந்தே³ன மனோபுப்³ப³ங்க³மங், அதோ³ஸஸ்ஸ அப்³யாபாத³ச²ந்தே³ன மனோபுப்³ப³ங்க³மங், அமோஹஸ்ஸ அவிஹிங்ஸாச²ந்தே³ன மனோபுப்³ப³ங்க³மங்.
Tattha katamo desanāhārasampāto? Manopubbaṅgamā dhammāti manoti khandhavavatthānena viññāṇakkhandhaṃ deseti. Āyatanavavatthānena manāyatanaṃ , dhātuvavatthānena viññāṇadhātuṃ, indriyavavatthānena manindriyaṃ. Katame dhammā pubbaṅgamā? Cha dhammā pubbaṅgamā, kusalānaṃ kusalamūlāni, akusalānaṃ akusalamūlāni, sādhipatikānaṃ adhipati, sabbacittuppādānaṃ indriyāni. Api ca imasmiṃ sutte mano adhippeto. Yathā balaggassa rājā pubbaṅgamo, evamevaṃ dhammānaṃ mano pubbaṅgamo. Tattha tividhena mano pubbaṅgamo nekkhammachandena abyāpādachandena avihiṃsāchandena. Tattha alobhassa nekkhammachandena manopubbaṅgamaṃ, adosassa abyāpādachandena manopubbaṅgamaṃ, amohassa avihiṃsāchandena manopubbaṅgamaṃ.
மனோஸெட்டா²தி மனோ தேஸங் த⁴ம்மானங் ஸெட்ட²ங் விஸிட்ட²ங் உத்தமங் பவரங் மூலங் பமுக²ங் பாமொக்க²ங், தேன வுச்சதி ‘‘மனோஸெட்டா²’’தி. மனோமயாதி மனேன கதா, மனேன நிம்மிதா, மனேன நிப்³ப³த்தா, மனோ தேஸங் பச்சயோ, தேன வுச்சதி ‘‘மனோமயா’’தி. தே பன த⁴ம்மா ச²ந்த³ஸமுதா³னிதா அனாவிலஸங்கப்பஸமுட்டா²னா ப²ஸ்ஸஸமோதா⁴னா வேத³னாக்க²ந்தோ⁴ ஸஞ்ஞாக்க²ந்தோ⁴ ஸங்கா²ரக்க²ந்தோ⁴. மனஸா சே பஸன்னேனாதி யா ஸத்³தா⁴ ஸத்³த³ஹனா ஓகப்பனா அபி⁴ப்பஸாதோ³. இதி இமினா பஸாதே³ன உபேதோ ஸமுபேதோ உபக³தோ ஸமுபக³தோ ஸம்பன்னோ ஸமன்னாக³தோ, தேன வுச்சதி ‘‘பஸன்னேனா’’தி இத³ங் மனோகம்மங் . பா⁴ஸதி வாதி வசீகம்மங். கரோதி வாதி காயகம்மங். இதி த³ஸகுஸலகம்மபதா² த³ஸ்ஸிதா.
Manoseṭṭhāti mano tesaṃ dhammānaṃ seṭṭhaṃ visiṭṭhaṃ uttamaṃ pavaraṃ mūlaṃ pamukhaṃ pāmokkhaṃ, tena vuccati ‘‘manoseṭṭhā’’ti. Manomayāti manena katā, manena nimmitā, manena nibbattā, mano tesaṃ paccayo, tena vuccati ‘‘manomayā’’ti. Te pana dhammā chandasamudānitā anāvilasaṅkappasamuṭṭhānā phassasamodhānā vedanākkhandho saññākkhandho saṅkhārakkhandho. Manasā ce pasannenāti yā saddhā saddahanā okappanā abhippasādo. Iti iminā pasādena upeto samupeto upagato samupagato sampanno samannāgato, tena vuccati ‘‘pasannenā’’ti idaṃ manokammaṃ . Bhāsati vāti vacīkammaṃ. Karoti vāti kāyakammaṃ. Iti dasakusalakammapathā dassitā.
ததோதி த³ஸவித⁴ஸ்ஸ குஸலகம்மஸ்ஸ கதத்தா உபசிதத்தா. நந்தி யோ ஸோ கதபுஞ்ஞோ கதகுஸலோ கதபீ⁴ருத்தாணோ, தங் புக்³க³லங். ஸுக²ந்தி து³வித⁴ங் ஸுக²ங் காயிகங் சேதஸிகஞ்ச. அன்வேதீதி அனுக³ச்ச²தி.
Tatoti dasavidhassa kusalakammassa katattā upacitattā. Nanti yo so katapuñño katakusalo katabhīruttāṇo, taṃ puggalaṃ. Sukhanti duvidhaṃ sukhaṃ kāyikaṃ cetasikañca. Anvetīti anugacchati.
இத⁴ஸ்ஸு புரிஸோ அப்பஹீனானுஸயோ ஸங்யோஜனியேஸு த⁴ம்மேஸு அஸ்ஸாத³ங் அனுபஸ்ஸதி, ஸோ ஸங்யோஜனியேஸு த⁴ம்மேஸு அஸ்ஸாத³ங் அனுபஸ்ஸந்தோ யதா²தி³ட்ட²ங் யதா²ஸுதங் ஸம்பத்திப⁴வங் பத்தே²தி. இச்சஸ்ஸ அவிஜ்ஜா ச ப⁴வதண்ஹா ச அனுப³த்³தா⁴ ஹொந்தி, ஸோ யதா²தி³ட்ட²ங் யதா²ஸுதங் ஸம்பத்திப⁴வங் பத்தெ²ந்தோ பஸாத³னீயவத்து²ஸ்மிங் சித்தங் பஸாதே³தி ஸத்³த³ஹதி ஓகப்பேதி. ஸோ பஸன்னசித்தோ திவித⁴ங் புஞ்ஞகிரியவத்து²ங் அனுதிட்ட²தி தா³னமயங் ஸீலமயங் பா⁴வனாமயங் காயேன வாசாய மனஸா. ஸோ தஸ்ஸ விபாகங் பச்சனுபோ⁴தி தி³ட்டே²வ த⁴ம்மே உபபஜ்ஜே வா அபராபரே வா பரியாயே. இதி கோ² பனஸ்ஸ அவிஜ்ஜாபச்சயா ஸங்கா²ரா, ஸங்கா²ரபச்சயா விஞ்ஞாணங், விஞ்ஞாணபச்சயா நாமரூபங், நாமரூபபச்சயா ஸளாயதனங், ஸளாயதனபச்சயா ஸுக²வேத³னீயோ ப²ஸ்ஸோ, ப²ஸ்ஸபச்சயா வேத³னாதி ஏவங் ஸந்தங் தங் ஸுக²மன்வேதி. தஸ்ஸேவங் வேத³னாய அபராபரங் பரிவத்தமானாய உப்பஜ்ஜதி தண்ஹா. தண்ஹாபச்சயா உபாதா³னங்…பே॰… ஸமுத³யோ ஹோதீதி.
Idhassu puriso appahīnānusayo saṃyojaniyesu dhammesu assādaṃ anupassati, so saṃyojaniyesu dhammesu assādaṃ anupassanto yathādiṭṭhaṃ yathāsutaṃ sampattibhavaṃ pattheti. Iccassa avijjā ca bhavataṇhā ca anubaddhā honti, so yathādiṭṭhaṃ yathāsutaṃ sampattibhavaṃ patthento pasādanīyavatthusmiṃ cittaṃ pasādeti saddahati okappeti. So pasannacitto tividhaṃ puññakiriyavatthuṃ anutiṭṭhati dānamayaṃ sīlamayaṃ bhāvanāmayaṃ kāyena vācāya manasā. So tassa vipākaṃ paccanubhoti diṭṭheva dhamme upapajje vā aparāpare vā pariyāye. Iti kho panassa avijjāpaccayā saṅkhārā, saṅkhārapaccayā viññāṇaṃ, viññāṇapaccayā nāmarūpaṃ, nāmarūpapaccayā saḷāyatanaṃ, saḷāyatanapaccayā sukhavedanīyo phasso, phassapaccayā vedanāti evaṃ santaṃ taṃ sukhamanveti. Tassevaṃ vedanāya aparāparaṃ parivattamānāya uppajjati taṇhā. Taṇhāpaccayā upādānaṃ…pe… samudayo hotīti.
தத்த² யங் மனோ, யே ச மனோபுப்³ப³ங்க³மா த⁴ம்மா, யஞ்ச ஸுக²ங், இமே வுச்சந்தி பஞ்சக்க²ந்தா⁴, தே து³க்க²ஸச்சங். தேஸங் புரிமகாரணபூ⁴தா அவிஜ்ஜா ப⁴வதண்ஹா ச ஸமுத³யஸச்சங். தேஸங் பரிஞ்ஞாய பஹானாய ப⁴க³வா த⁴ம்மங் தே³ஸேதி, து³க்க²ஸ்ஸ பரிஞ்ஞாய ஸமுத³யஸ்ஸ பஹானாய. யேன பரிஜானாதி, யேன பஜஹதி, அயங் மக்³கோ³. யத்த² ச மக்³கோ³ பவத்ததி, அயங் நிரோதோ⁴. இமானி சத்தாரி ஸச்சானி ஏவங் ஆயதனதா⁴துஇந்த்³ரியமுகே²னாபி நித்³தா⁴ரேதப்³பா³னி. தத்த² ஸமுத³யேன அஸ்ஸாதோ³, து³க்கே²ன ஆதீ³னவோ, மக்³க³னிரோதே⁴ஹி நிஸ்ஸரணங், ஸுக²ஸ்ஸ அன்வயோ ப²லங், மனஸா பஸன்னேன காயவசீஸமீஹா உபாயோ, மனோபுப்³ப³ங்க³மத்தா த⁴ம்மானங் அத்தனோ ஸுக²காமேன பஸன்னேன மனஸா வசீகம்மங் காயகம்மஞ்ச பவத்தேதப்³ப³ந்தி அயங் ப⁴க³வதோ ஆணத்தி. அயங் தே³ஸனாஹாரஸம்பாதோ.
Tattha yaṃ mano, ye ca manopubbaṅgamā dhammā, yañca sukhaṃ, ime vuccanti pañcakkhandhā, te dukkhasaccaṃ. Tesaṃ purimakāraṇabhūtā avijjā bhavataṇhā ca samudayasaccaṃ. Tesaṃ pariññāya pahānāya bhagavā dhammaṃ deseti, dukkhassa pariññāya samudayassa pahānāya. Yena parijānāti, yena pajahati, ayaṃ maggo. Yattha ca maggo pavattati, ayaṃ nirodho. Imāni cattāri saccāni evaṃ āyatanadhātuindriyamukhenāpi niddhāretabbāni. Tattha samudayena assādo, dukkhena ādīnavo, magganirodhehi nissaraṇaṃ, sukhassa anvayo phalaṃ, manasā pasannena kāyavacīsamīhā upāyo, manopubbaṅgamattā dhammānaṃ attano sukhakāmena pasannena manasā vacīkammaṃ kāyakammañca pavattetabbanti ayaṃ bhagavato āṇatti. Ayaṃ desanāhārasampāto.
தத்த² கதமோ விசயஹாரஸம்பாதோ? மனநதோ ஆரம்மணவிஜானநதோ மனோ. மனநலக்க²ணே ஸம்பயுத்தேஸு ஆதி⁴பச்சகரணதோ புப்³ப³ங்க³மோ ஈஹாபா⁴வதோ நிஸ்ஸத்தனிஜ்ஜீவட்டே²ன த⁴ம்மா. கா³மேஸு கா³மணி விய பதா⁴னட்டே²ன மனோ ஸெட்டோ² ஏதேஸந்தி மனோஸெட்டா². ஸஹஜாதாதி³பச்சயபூ⁴தேன மனஸா நிப்³ப³த்தாதி மனோமயா. அகாலுஸ்ஸியதோ, ஆரம்மணஸ்ஸ ஓகப்பனதோ ச பஸன்னேன வசீவிஞ்ஞத்திவிப்பா²ரதோ ததா² ஸாதி³யனதோ ச பா⁴ஸதி. சோபனகாயவிப்பா²ரதோ ததா² ஸாதி³யனதோ ச கரோதி. ததா² பஸுதத்தா அனஞ்ஞத்தா ச ‘‘ததோ’’தி வுத்தங். ஸுக²னதோ ஸாதபா⁴வதோ இட்ட²பா⁴வதோ ச ‘‘ஸுக²’’ந்தி வுத்தங். கதூபசிதத்தா அவிபக்கவிபாகத்தா ச ‘‘அன்வேதீ’’தி வுத்தங். காரணாயத்தவுத்திதோ அஸங்கந்திதோ ச ‘‘சா²யாவ அனபாயினீ’’தி வுத்தங். அயங் அனுபத³விசயதோ விசயஹாரஸம்பாதோ.
Tattha katamo vicayahārasampāto? Mananato ārammaṇavijānanato mano. Mananalakkhaṇe sampayuttesu ādhipaccakaraṇato pubbaṅgamo īhābhāvato nissattanijjīvaṭṭhena dhammā. Gāmesu gāmaṇi viya padhānaṭṭhena mano seṭṭho etesanti manoseṭṭhā. Sahajātādipaccayabhūtena manasā nibbattāti manomayā. Akālussiyato, ārammaṇassa okappanato ca pasannena vacīviññattivipphārato tathā sādiyanato ca bhāsati. Copanakāyavipphārato tathā sādiyanato ca karoti. Tathā pasutattā anaññattā ca ‘‘tato’’ti vuttaṃ. Sukhanato sātabhāvato iṭṭhabhāvato ca ‘‘sukha’’nti vuttaṃ. Katūpacitattā avipakkavipākattā ca ‘‘anvetī’’ti vuttaṃ. Kāraṇāyattavuttito asaṅkantito ca ‘‘chāyāva anapāyinī’’ti vuttaṃ. Ayaṃ anupadavicayato vicayahārasampāto.
தத்த² கதமோ யுத்திஹாரஸம்பாதோ? மனஸ்ஸ த⁴ம்மானங் ஆதி⁴பச்சயோக³தோ புப்³ப³ங்க³மதா யுஜ்ஜதி. ததோ ஏவ தேஸங் மனஸ்ஸ அனுவத்தனதோ த⁴ம்மானங் மனோஸெட்ட²தா யுஜ்ஜதி. ஸஹஜாதாதி³பச்சயவஸேன மனஸா நிப்³ப³த்தத்தா த⁴ம்மானங் மனோமயதா யுஜ்ஜதி. மனஸா பஸன்னேன ஸமுட்டா²னானங் காயவசீகம்மானங் குஸலபா⁴வோ யுஜ்ஜதி. யேன குஸலகம்மங் உபசிதங், தங் சா²யா விய ஸுக²ங் அன்வேதீதி யுஜ்ஜதி. அயங் யுத்திஹாரஸம்பாதோ.
Tattha katamo yuttihārasampāto? Manassa dhammānaṃ ādhipaccayogato pubbaṅgamatā yujjati. Tato eva tesaṃ manassa anuvattanato dhammānaṃ manoseṭṭhatā yujjati. Sahajātādipaccayavasena manasā nibbattattā dhammānaṃ manomayatā yujjati. Manasā pasannena samuṭṭhānānaṃ kāyavacīkammānaṃ kusalabhāvo yujjati. Yena kusalakammaṃ upacitaṃ, taṃ chāyā viya sukhaṃ anvetīti yujjati. Ayaṃ yuttihārasampāto.
தத்த² கதமோ பத³ட்டா²னோ ஹாரஸம்பாதோ? மனோ மனோபவிசாரானங் பத³ட்டா²னங். மனோபுப்³ப³ங்க³மா த⁴ம்மா ஸப்³ப³ஸ்ஸ குஸலபக்க²ஸ்ஸ பத³ட்டா²னங். ‘‘பா⁴ஸதீ’’தி ஸம்மாவாசா, ‘‘கரோதீ’’தி ஸம்மாகம்மந்தோ, தே ஸம்மாஆஜீவஸ்ஸ பத³ட்டா²னங். ஸம்மாஆஜீவோ ஸம்மாவாயாமஸ்ஸ பத³ட்டா²னங். ஸம்மாவாயாமோ ஸம்மாஸதியா பத³ட்டா²னங். ஸம்மாஸதி ஸம்மாஸமாதி⁴ஸ்ஸ பத³ட்டா²னங். ‘‘மனஸா பஸன்னேனா’’தி எத்த² பஸாதோ³ ஸத்³தி⁴ந்த்³ரியங், தங் ஸீலஸ்ஸ பத³ட்டா²னங். ஸீலங் ஸமாதி⁴ஸ்ஸ பத³ட்டா²னங். ஸமாதி⁴ பஞ்ஞாயாதி யாவ விமுத்திஞாணத³ஸ்ஸனா யோஜேதப்³ப³ங். அயங் பத³ட்டா²னஹாரஸம்பாதோ.
Tattha katamo padaṭṭhāno hārasampāto? Mano manopavicārānaṃ padaṭṭhānaṃ. Manopubbaṅgamā dhammā sabbassa kusalapakkhassa padaṭṭhānaṃ. ‘‘Bhāsatī’’ti sammāvācā, ‘‘karotī’’ti sammākammanto, te sammāājīvassa padaṭṭhānaṃ. Sammāājīvo sammāvāyāmassa padaṭṭhānaṃ. Sammāvāyāmo sammāsatiyā padaṭṭhānaṃ. Sammāsati sammāsamādhissa padaṭṭhānaṃ. ‘‘Manasā pasannenā’’ti ettha pasādo saddhindriyaṃ, taṃ sīlassa padaṭṭhānaṃ. Sīlaṃ samādhissa padaṭṭhānaṃ. Samādhi paññāyāti yāva vimuttiñāṇadassanā yojetabbaṃ. Ayaṃ padaṭṭhānahārasampāto.
தத்த² கதமோ லக்க²ணோ ஹாரஸம்பாதோ? ‘‘மனோபுப்³ப³ங்க³மா த⁴ம்மா’’தி மனோபுப்³ப³ங்க³மதாவசனேன த⁴ம்மானங் ச²ந்த³புப்³ப³ங்க³மதாபி வீரியபுப்³ப³ங்க³மதாபி வீமங்ஸாபுப்³ப³ங்க³மதாபி வுத்தா ஹோதி ஆதி⁴பதெய்யலக்க²ணேன ச²ந்தா³தீ³னங் மனஸா ஏகலக்க²ணத்தா. ததா² நேஸங் ஸத்³தா⁴தி³புப்³ப³ங்க³மதாபி வுத்தா ஹோதி இந்த்³ரியலக்க²ணேன ஸத்³தா⁴தீ³னங் மனஸா ஏகலக்க²ணத்தா. ‘‘மனஸா சே பஸன்னேனா’’தி யதா² மனஸ்ஸ பஸாத³ஸமன்னாக³மோ தங்ஸமுட்டா²னானங் காயவசீகம்மானங் அனவஜ்ஜபா⁴வலக்க²ணங். ஏவங் சித்தஸ்ஸ ஸதிஆதி³ஸமன்னாக³மோபி நேஸங் அனவஜ்ஜபா⁴வலக்க²ணங் யோனிஸோமனஸிகாரஸமுட்டா²னபா⁴வேன ஏகலக்க²ணத்தா. ‘‘ஸுக²மன்வேதீ’’தி ஸுகா²னுக³மனவசனேன ஸுக²ஸ்ஸ பச்சயபூ⁴தானங் மனாபியரூபாதீ³னங் அனுக³மோ வுத்தோ ஹோதி தேஸம்பி கம்மபச்சயதாய ஏகலக்க²ணத்தாதி. அயங் லக்க²ணஹாரஸம்பாதோ.
Tattha katamo lakkhaṇo hārasampāto? ‘‘Manopubbaṅgamā dhammā’’ti manopubbaṅgamatāvacanena dhammānaṃ chandapubbaṅgamatāpi vīriyapubbaṅgamatāpi vīmaṃsāpubbaṅgamatāpi vuttā hoti ādhipateyyalakkhaṇena chandādīnaṃ manasā ekalakkhaṇattā. Tathā nesaṃ saddhādipubbaṅgamatāpi vuttā hoti indriyalakkhaṇena saddhādīnaṃ manasā ekalakkhaṇattā. ‘‘Manasā ce pasannenā’’ti yathā manassa pasādasamannāgamo taṃsamuṭṭhānānaṃ kāyavacīkammānaṃ anavajjabhāvalakkhaṇaṃ. Evaṃ cittassa satiādisamannāgamopi nesaṃ anavajjabhāvalakkhaṇaṃ yonisomanasikārasamuṭṭhānabhāvena ekalakkhaṇattā. ‘‘Sukhamanvetī’’ti sukhānugamanavacanena sukhassa paccayabhūtānaṃ manāpiyarūpādīnaṃ anugamo vutto hoti tesampi kammapaccayatāya ekalakkhaṇattāti. Ayaṃ lakkhaṇahārasampāto.
தத்த² கதமோ சதுப்³யூஹோ ஹாரஸம்பாதோ? ‘‘மனோபுப்³ப³ங்க³மா’’திஆதீ³ஸு ‘‘மனோ’’திஆதீ³னங் பதா³னங் நிப்³ப³சனங் நிருத்தங், தங் பத³த்த²னித்³தே³ஸவஸேன வேதி³தப்³ப³ங். பத³த்தோ² ச வுத்தனயேன ஸுவிஞ்ஞெய்யோவ. யே ஸுகே²ன அத்தி²கா, தேஹி பஸன்னேன மனஸா காயவசீமனோகம்மானி பவத்தேதப்³பா³னீதி அயமெத்த² ப⁴க³வதோ அதி⁴ப்பாயோ. புஞ்ஞகிரியாய அஞ்ஞேஸம்பி புப்³ப³ங்க³மா ஹுத்வா தத்த² தேஸங் ஸம்மா உபனேதாரோ இமிஸ்ஸா தே³ஸனாய நிதா³னங். ‘‘ச²த்³வாராதி⁴பதீ ராஜா (த⁴॰ ப॰ அட்ட²॰ 2.181 ஏரகபத்தனாக³ராஜவத்து²), சித்தானுபரிவத்தினோ த⁴ம்மா (த⁴॰ ஸ॰ து³கமாதிகா 62; 1205-1206), சித்தஸ்ஸ ஏகத⁴ம்மஸ்ஸ, ஸப்³பே³வ வஸமன்வகூ³’’தி (ஸங்॰ நி॰ 1.62) ஏவமாதி³ஸமானயனேன இமிஸ்ஸா தே³ஸனாய ஸங்ஸந்த³னா தே³ஸனானுஸந்தி⁴. பதா³னுஸந்தி⁴யோ பன ஸுவிஞ்ஞெய்யாவாதி. அயங் சதுப்³யூஹோ ஹாரஸம்பாதோ.
Tattha katamo catubyūho hārasampāto? ‘‘Manopubbaṅgamā’’tiādīsu ‘‘mano’’tiādīnaṃ padānaṃ nibbacanaṃ niruttaṃ, taṃ padatthaniddesavasena veditabbaṃ. Padattho ca vuttanayena suviññeyyova. Ye sukhena atthikā, tehi pasannena manasā kāyavacīmanokammāni pavattetabbānīti ayamettha bhagavato adhippāyo. Puññakiriyāya aññesampi pubbaṅgamā hutvā tattha tesaṃ sammā upanetāro imissā desanāya nidānaṃ. ‘‘Chadvārādhipatī rājā (dha. pa. aṭṭha. 2.181 erakapattanāgarājavatthu), cittānuparivattino dhammā (dha. sa. dukamātikā 62; 1205-1206), cittassa ekadhammassa, sabbeva vasamanvagū’’ti (saṃ. ni. 1.62) evamādisamānayanena imissā desanāya saṃsandanā desanānusandhi. Padānusandhiyo pana suviññeyyāvāti. Ayaṃ catubyūho hārasampāto.
தத்த² கதமோ ஆவட்டோ ஹாரஸம்பாதோ? ‘‘மனோபுப்³ப³ங்க³மா த⁴ம்மா’’தி தத்த² யானி தீணி குஸலமூலானி, தானி அட்ட²ன்னங் ஸம்மத்தானங் ஹேது. யே ஸம்மத்தா, அயங் அட்ட²ங்கி³கோ மக்³கோ³. யங் மனோஸஹஜனாமரூபங், இத³ங் து³க்க²ங். அஸமுச்சி²ன்னா புரிமனிப்ப²ன்னா அவிஜ்ஜா ப⁴வதண்ஹா, அயங் ஸமுத³யோ. யத்த² தேஸங் பஹானங், அயங் நிரோதோ⁴தி இமானி சத்தாரி ஸச்சானி. அயங் ஆவட்டோ ஹாரஸம்பாதோ.
Tattha katamo āvaṭṭo hārasampāto? ‘‘Manopubbaṅgamā dhammā’’ti tattha yāni tīṇi kusalamūlāni, tāni aṭṭhannaṃ sammattānaṃ hetu. Ye sammattā, ayaṃ aṭṭhaṅgiko maggo. Yaṃ manosahajanāmarūpaṃ, idaṃ dukkhaṃ. Asamucchinnā purimanipphannā avijjā bhavataṇhā, ayaṃ samudayo. Yattha tesaṃ pahānaṃ, ayaṃ nirodhoti imāni cattāri saccāni. Ayaṃ āvaṭṭo hārasampāto.
தத்த² கதமோ விப⁴த்திஹாரஸம்பாதோ? ‘‘மனோபுப்³ப³ங்க³மா த⁴ம்மா, மனஸா சே பஸன்னேன, ததோ நங் ஸுக²மன்வேதீ’’தி நயித³ங் யதா²ருதவஸேன க³ஹேதப்³ப³ங். யோ ஹி ஸமணோ வா ப்³ராஹ்மணோ வா பாணாதிபாதிம்ஹி மிச்சா²தி³ட்டி²கே மிச்சா²படிபன்னே ஸகங் சித்தங் பஸாதே³தி, பஸன்னேன ச சித்தேன அபூ⁴தகு³ணாபி⁴த்த²வனவஸேன பா⁴ஸதி வா நிபச்சகாரங் வாஸ்ஸ யங் கரோதி, ந ததோ நங் ஸுக²மன்வேதி. து³க்க²மேவ பன தங் ததோ சக்கங்வ வஹதோ பத³மன்வேதி. இதி ஹி இத³ங் விப⁴ஜ்ஜப்³யாகரணீயங். யங் மனஸா சே பஸன்னேன பா⁴ஸதி வா கரோதி வா, தஞ்சே வசீகம்மங் காயகம்மஞ்ச ஸுக²வேத³னீயந்தி. தங் கிஸ்ஸ ஹேது? ஸம்மத்தக³தேஹி ஸுக²வேத³னீயங் மிச்சா²க³தேஹி து³க்க²வேத³னீயந்தி. கத²ங் பனாயங் பஸாதோ³ த³ட்ட²ப்³போ³? நாயங் பஸாதோ³, பஸாத³பதிரூபகோ பன மிச்சா²தி⁴மொக்கோ²தி வதா³மி. அயங் விப⁴த்திஹாரஸம்பாதோ.
Tattha katamo vibhattihārasampāto? ‘‘Manopubbaṅgamā dhammā, manasā ce pasannena, tato naṃ sukhamanvetī’’ti nayidaṃ yathārutavasena gahetabbaṃ. Yo hi samaṇo vā brāhmaṇo vā pāṇātipātimhi micchādiṭṭhike micchāpaṭipanne sakaṃ cittaṃ pasādeti, pasannena ca cittena abhūtaguṇābhitthavanavasena bhāsati vā nipaccakāraṃ vāssa yaṃ karoti, na tato naṃ sukhamanveti. Dukkhameva pana taṃ tato cakkaṃva vahato padamanveti. Iti hi idaṃ vibhajjabyākaraṇīyaṃ. Yaṃ manasā ce pasannena bhāsati vā karoti vā, tañce vacīkammaṃ kāyakammañca sukhavedanīyanti. Taṃ kissa hetu? Sammattagatehi sukhavedanīyaṃ micchāgatehi dukkhavedanīyanti. Kathaṃ panāyaṃ pasādo daṭṭhabbo? Nāyaṃ pasādo, pasādapatirūpako pana micchādhimokkhoti vadāmi. Ayaṃ vibhattihārasampāto.
தத்த² கதமோ பரிவத்தனோ ஹாரஸம்பாதோ? மனோபுப்³ப³ங்க³மாதிஆதி³. யங் மனஸா பது³ட்டே²ன பா⁴ஸதி வா கரோதி வா து³க்க²ஸ்ஸானுகா³மீ. இத³ஞ்ஹி ஸுத்தங் ஏதஸ்ஸ உஜுபடிபக்கோ². அயங் பரிவத்தனோ ஹாரஸம்பாதோ.
Tattha katamo parivattano hārasampāto? Manopubbaṅgamātiādi. Yaṃ manasā paduṭṭhena bhāsati vā karoti vā dukkhassānugāmī. Idañhi suttaṃ etassa ujupaṭipakkho. Ayaṃ parivattano hārasampāto.
தத்த² கதமோ வேவசனோ ஹாரஸம்பாதோ? ‘‘மனோபுப்³ப³ங்க³மா’’தி மனோ சித்தங் மனாயதனங் மனிந்த்³ரியங் மனோவிஞ்ஞாணங் மனோவிஞ்ஞாணதா⁴தூதி பரியாயவசனங். புப்³ப³ங்க³மா புரேசாரினோ புரேகா³மினோதி பரியாயவசனங். த⁴ம்மா அத்தா ஸபா⁴வாதி பரியாயவசனங். ஸெட்ட²ங் பதா⁴னங் பவரந்தி பரியாயவசனங். மனோமயா மனோனிப்³ப³த்தா மனோஸம்பூ⁴தாதி பரியாயவசனங். பஸன்னேன ஸத்³த³ஹந்தேன ஓகப்பெந்தேனாதி பரியாயவசனங். ஸுக²ங் ஸாதங் வேத³யிதந்தி பரியாயவசனங். அன்வேதி அனுக³ச்ச²தி அனுப³ந்த⁴தீதி பரியாயவசனங். அயங் வேவசனோ ஹாரஸம்பாதோ.
Tattha katamo vevacano hārasampāto? ‘‘Manopubbaṅgamā’’ti mano cittaṃ manāyatanaṃ manindriyaṃ manoviññāṇaṃ manoviññāṇadhātūti pariyāyavacanaṃ. Pubbaṅgamā purecārino puregāminoti pariyāyavacanaṃ. Dhammā attā sabhāvāti pariyāyavacanaṃ. Seṭṭhaṃ padhānaṃ pavaranti pariyāyavacanaṃ. Manomayā manonibbattā manosambhūtāti pariyāyavacanaṃ. Pasannena saddahantena okappentenāti pariyāyavacanaṃ. Sukhaṃ sātaṃ vedayitanti pariyāyavacanaṃ. Anveti anugacchati anubandhatīti pariyāyavacanaṃ. Ayaṃ vevacano hārasampāto.
தத்த² கதமோ பஞ்ஞத்திஹாரஸம்பாதோ? மனோபுப்³ப³ங்க³மாதி அயங் மனஸோ கிச்சபஞ்ஞத்தி. த⁴ம்மாதி ஸபா⁴வபஞ்ஞத்தி, குஸலகம்மபத²பஞ்ஞத்தி. மனோஸெட்டா²தி பதா⁴னபஞ்ஞத்தி. மனோமயாதி ஸஹஜாதபஞ்ஞத்தி. பஸன்னேனாதி ஸத்³தி⁴ந்த்³ரியேன ஸமன்னாக³தபஞ்ஞத்தி, அஸ்ஸத்³தி⁴யஸ்ஸ படிக்கே²பபஞ்ஞத்தி. பா⁴ஸதி வா கரோதி வாதி ஸம்மாவாசாஸம்மாகம்மந்தானங் நிக்கே²பபஞ்ஞத்தி. ததோ நங் ஸுக²மன்வேதீதி கம்மஸ்ஸ ப²லானுப³ந்த⁴பஞ்ஞத்தி, கம்மஸ்ஸ அவினாஸபஞ்ஞத்தீதி. அயங் பஞ்ஞத்திஹாரஸம்பாதோ.
Tattha katamo paññattihārasampāto? Manopubbaṅgamāti ayaṃ manaso kiccapaññatti. Dhammāti sabhāvapaññatti, kusalakammapathapaññatti. Manoseṭṭhāti padhānapaññatti. Manomayāti sahajātapaññatti. Pasannenāti saddhindriyena samannāgatapaññatti, assaddhiyassa paṭikkhepapaññatti. Bhāsati vā karoti vāti sammāvācāsammākammantānaṃ nikkhepapaññatti. Tato naṃ sukhamanvetīti kammassa phalānubandhapaññatti, kammassa avināsapaññattīti. Ayaṃ paññattihārasampāto.
தத்த² கதமோ ஓதரணோ ஹாரஸம்பாதோ? மனோதி விஞ்ஞாணக்க²ந்தோ⁴. த⁴ம்மாதி வேத³னாஸஞ்ஞாஸங்கா²ரக்க²ந்தா⁴. பா⁴ஸதி வா கரோதி வாதி காயவசீவிஞ்ஞத்தியோ. தாஸங் நிஸ்ஸயா சத்தாரோ மஹாபூ⁴தாதி ரூபக்க²ந்தோ⁴தி அயங் க²ந்தே⁴ஹி ஓதரணோ. மனோதி அபி⁴ஸங்கா²ரவிஞ்ஞாணந்தி மனொக்³க³ஹணேன அவிஜ்ஜாபச்சயா ஸங்கா²ரா க³ஹிதாதி. ஸங்கா²ரபச்சயா விஞ்ஞாணங்…பே॰… ஸமுத³யோ ஹோதீதி அயங் படிச்சஸமுப்பாதே³ன ஓதரணோதி. அயங் ஓதரணோ ஹாரஸம்பாதோ.
Tattha katamo otaraṇo hārasampāto? Manoti viññāṇakkhandho. Dhammāti vedanāsaññāsaṅkhārakkhandhā. Bhāsati vā karoti vāti kāyavacīviññattiyo. Tāsaṃ nissayā cattāro mahābhūtāti rūpakkhandhoti ayaṃ khandhehi otaraṇo. Manoti abhisaṅkhāraviññāṇanti manoggahaṇena avijjāpaccayā saṅkhārā gahitāti. Saṅkhārapaccayā viññāṇaṃ…pe… samudayo hotīti ayaṃ paṭiccasamuppādena otaraṇoti. Ayaṃ otaraṇo hārasampāto.
தத்த² கதமோ ஸோத⁴னோ ஹாரஸம்பாதோ? மனோதி ஆரம்போ⁴ நேவ பத³ஸுத்³தி⁴, ந ஆரம்ப⁴ஸுத்³தி⁴. மனோபுப்³ப³ங்க³மாதி பத³ஸுத்³தி⁴, ந ஆரம்ப⁴ஸுத்³தி⁴. ததா² த⁴ம்மாதி யாவ ஸுக²ந்தி பத³ஸுத்³தி⁴, ந ஆரம்ப⁴ஸுத்³தி⁴. ஸுக²மன்வேதீதி பன பத³ஸுத்³தி⁴ சேவ ஆரம்ப⁴ஸுத்³தி⁴ சாதி. அயங் ஸோத⁴னோ ஹாரஸம்பாதோ.
Tattha katamo sodhano hārasampāto? Manoti ārambho neva padasuddhi, na ārambhasuddhi. Manopubbaṅgamāti padasuddhi, na ārambhasuddhi. Tathā dhammāti yāva sukhanti padasuddhi, na ārambhasuddhi. Sukhamanvetīti pana padasuddhi ceva ārambhasuddhi cāti. Ayaṃ sodhano hārasampāto.
தத்த² கதமோ அதி⁴ட்டா²னோ ஹாரஸம்பாதோ? மனோபுப்³ப³ங்க³மா த⁴ம்மா, மனோஸெட்டா² மனோமயாதி ஏகத்ததா. மனஸா சே பஸன்னேனாதி வேமத்ததா, ததா² மனஸா சே பஸன்னேனாதி ஏகத்ததா. பா⁴ஸதி வா கரோதி வாதி வேமத்ததா, ததா² மனஸா சே பஸன்னேனாதி ஏகத்ததா. ஸோ பஸாதோ³ து³விதோ⁴ அஜ்ஜ²த்தஞ்ச ப்³யாபாத³விக்க²ம்ப⁴னதோ, ப³ஹித்³தா⁴ ச ஓகப்பனதோ. ததா² ஸம்பத்திப⁴வஹேதுபூ⁴தோபி வட்³டி⁴ஹேதுபூ⁴தோவாதி அயங் வேமத்ததா. தயித³ங் ஸுத்தங் த்³வீஹி ஆகாரேஹி அதி⁴ட்டா²தப்³ப³ங் ஹேதுனா ச யோ பஸன்னமானஸோ, விபாகேன ச யோ ஸுக²வேத³னீயோதி. அயங் அதி⁴ட்டா²னோ ஹாரஸம்பாதோ.
Tattha katamo adhiṭṭhāno hārasampāto? Manopubbaṅgamā dhammā, manoseṭṭhā manomayāti ekattatā. Manasā ce pasannenāti vemattatā, tathā manasā ce pasannenāti ekattatā. Bhāsati vā karoti vāti vemattatā, tathā manasā ce pasannenāti ekattatā. So pasādo duvidho ajjhattañca byāpādavikkhambhanato, bahiddhā ca okappanato. Tathā sampattibhavahetubhūtopi vaḍḍhihetubhūtovāti ayaṃ vemattatā. Tayidaṃ suttaṃ dvīhi ākārehi adhiṭṭhātabbaṃ hetunā ca yo pasannamānaso, vipākena ca yo sukhavedanīyoti. Ayaṃ adhiṭṭhāno hārasampāto.
தத்த² கதமோ பரிக்கா²ரோ ஹாரஸம்பாதோ? மனோபுப்³ப³ங்க³மாதி எத்த² மனோதி குஸலவிஞ்ஞாணங். தஸ்ஸ ச ஞாணஸம்பயுத்தஸ்ஸ அலோபோ⁴ அதோ³ஸோ அமோஹோதி தயோ ஸம்பயுத்தா ஹேதூ, ஞாணவிப்பயுத்தஸ்ஸ அலோபோ⁴ அதோ³ஸோதி த்³வே ஸம்பயுத்தா ஹேதூ. ஸப்³பே³ஸங் அவிஸேஸேன யோனிஸோமனஸிகாரோ ஹேது, சத்தாரி ஸம்பத்திசக்கானி பச்சயோ. ததா² ஸத்³த⁴ம்மஸ்ஸவனங், தஸ்ஸ ச தா³னாதி³வஸேன பவத்தமானஸ்ஸ தெ³ய்யத⁴ம்மாத³யோ பச்சயோ. த⁴ம்மாதி செத்த² வேத³னாதீ³னங் இட்டா²ரம்மணாத³யோ. ததா² தயோ விஞ்ஞாணஸ்ஸ, வேத³னாத³யோ பஸாத³ஸ்ஸ, ஸத்³தெ⁴ய்யவத்து²குஸலாபி⁴ஸங்கா²ரோ விபாகஸுக²ஸ்ஸ பச்சயோதி. அயங் பரிக்கா²ரோ ஹாரஸம்பாதோ.
Tattha katamo parikkhāro hārasampāto? Manopubbaṅgamāti ettha manoti kusalaviññāṇaṃ. Tassa ca ñāṇasampayuttassa alobho adoso amohoti tayo sampayuttā hetū, ñāṇavippayuttassa alobho adosoti dve sampayuttā hetū. Sabbesaṃ avisesena yonisomanasikāro hetu, cattāri sampatticakkāni paccayo. Tathā saddhammassavanaṃ, tassa ca dānādivasena pavattamānassa deyyadhammādayo paccayo. Dhammāti cettha vedanādīnaṃ iṭṭhārammaṇādayo. Tathā tayo viññāṇassa, vedanādayo pasādassa, saddheyyavatthukusalābhisaṅkhāro vipākasukhassa paccayoti. Ayaṃ parikkhāro hārasampāto.
தத்த² கதமோ ஸமாரோபனோ ஹாரஸம்பாதோ? மனோபுப்³ப³ங்க³மா த⁴ம்மாதி மனோதி புஞ்ஞசித்தங், தங் திவித⁴ங் – தா³னமயங், ஸீலமயங், பா⁴வனாமயந்தி. தத்த² தா³னமயஸ்ஸ அலோபோ⁴ பத³ட்டா²னங், ஸீலமயஸ்ஸ அதோ³ஸோ பத³ட்டா²னங், பா⁴வனாமயஸ்ஸ அமோஹோ பத³ட்டா²னங். ஸப்³பே³ஸங் அபி⁴ப்பஸாதோ³ பத³ட்டா²னங், ‘‘ஸத்³தா⁴ஜாதோ உபஸங்கமதி, உபஸங்கமந்தோ பயிருபாஸதீ’’தி (ம॰ நி॰ 2.183) ஸுத்தங் வித்தா²ரேதப்³ப³ங். குஸலசித்தங் ஸுக²ஸ்ஸ இட்ட²விபாகஸ்ஸ பத³ட்டா²னங். யோனிஸோமனஸிகாரோ குஸலசித்தஸ்ஸ பத³ட்டா²னங். யோனிஸோ ஹி மனஸி கரொந்தோ குஸலசித்தங் அதி⁴ட்டா²தி குஸலசித்தங் பா⁴வேதி, ஸோ அனுப்பன்னானங் பாபகானங் அகுஸலானங் த⁴ம்மானங் அனுப்பாதா³ய ச²ந்த³ங் ஜனேதி, உப்பன்னானங் குஸலானங் த⁴ம்மானங்…பே॰… பத³ஹதி. தஸ்ஸேவங் சதூஸு ஸம்மப்பதா⁴னேஸு பா⁴வியமானேஸு சத்தாரோ ஸதிபட்டா²னா யாவ அரியோ அட்ட²ங்கி³கோ மக்³கோ³ பா⁴வனாபாரிபூரிங் க³ச்ச²தீதி அயங் பா⁴வனாய ஸமாரோபனா. ஸதி ச பா⁴வனாய பஹானஞ்ச ஸித்³த⁴மேவாதி. அயங் ஸமாரோபனோ ஹாரஸம்பாதோ.
Tattha katamo samāropano hārasampāto? Manopubbaṅgamā dhammāti manoti puññacittaṃ, taṃ tividhaṃ – dānamayaṃ, sīlamayaṃ, bhāvanāmayanti. Tattha dānamayassa alobho padaṭṭhānaṃ, sīlamayassa adoso padaṭṭhānaṃ, bhāvanāmayassa amoho padaṭṭhānaṃ. Sabbesaṃ abhippasādo padaṭṭhānaṃ, ‘‘saddhājāto upasaṅkamati, upasaṅkamanto payirupāsatī’’ti (ma. ni. 2.183) suttaṃ vitthāretabbaṃ. Kusalacittaṃ sukhassa iṭṭhavipākassa padaṭṭhānaṃ. Yonisomanasikāro kusalacittassa padaṭṭhānaṃ. Yoniso hi manasi karonto kusalacittaṃ adhiṭṭhāti kusalacittaṃ bhāveti, so anuppannānaṃ pāpakānaṃ akusalānaṃ dhammānaṃ anuppādāya chandaṃ janeti, uppannānaṃ kusalānaṃ dhammānaṃ…pe… padahati. Tassevaṃ catūsu sammappadhānesu bhāviyamānesu cattāro satipaṭṭhānā yāva ariyo aṭṭhaṅgiko maggo bhāvanāpāripūriṃ gacchatīti ayaṃ bhāvanāya samāropanā. Sati ca bhāvanāya pahānañca siddhamevāti. Ayaṃ samāropano hārasampāto.
ததா² –
Tathā –
‘‘த³த³தோ புஞ்ஞங் பவட்³ட⁴தி, ஸங்யமதோ வேரங் ந சீயதி;
‘‘Dadato puññaṃ pavaḍḍhati, saṃyamato veraṃ na cīyati;
குஸலோ ச ஜஹாதி பாபகங், ராக³தோ³ஸமோஹக்க²யா ஸ நிப்³பு³தோ’’தி. (தீ³॰ நி॰ 2.197; உதா³॰ 75; பேடகோ॰ 16);
Kusalo ca jahāti pāpakaṃ, rāgadosamohakkhayā sa nibbuto’’ti. (dī. ni. 2.197; udā. 75; peṭako. 16);
தத்த² த³த³தோ புஞ்ஞங் பவட்³ட⁴தீதி தா³னமயங் புஞ்ஞகிரியவத்து² வுத்தங். ஸங்யமதோ வேரங் ந சீயதீதி ஸீலமயங் புஞ்ஞகிரியவத்து² வுத்தங். குஸலோ ச ஜஹாதி பாபகந்தி லோப⁴ஸ்ஸ ச தோ³ஸஸ்ஸ ச மோஹஸ்ஸ ச பஹானமாஹ. தேன பா⁴வனாமயங் புஞ்ஞகிரியவத்து² வுத்தங். ராக³தோ³ஸமோஹக்க²யா ஸ நிப்³பு³தோதி அனுபாதா³பரினிப்³பா³னமாஹ.
Tattha dadato puññaṃ pavaḍḍhatīti dānamayaṃ puññakiriyavatthu vuttaṃ. Saṃyamato veraṃ na cīyatīti sīlamayaṃ puññakiriyavatthu vuttaṃ. Kusalo ca jahāti pāpakanti lobhassa ca dosassa ca mohassa ca pahānamāha. Tena bhāvanāmayaṃ puññakiriyavatthu vuttaṃ. Rāgadosamohakkhayā sa nibbutoti anupādāparinibbānamāha.
த³த³தோ புஞ்ஞங் பவட்³ட⁴தீதி அலோபோ⁴ குஸலமூலங். ஸங்யமதோ வேரங் ந சீயதீதி அதோ³ஸோ குஸலமூலங். குஸலோ ச ஜஹாதி பாபகந்தி அமோஹோ குஸலமூலங். ராக³தோ³ஸமோஹக்க²யா ஸ நிப்³பு³தோதி தேஸங் நிஸ்ஸரணங் வுத்தங்.
Dadato puññaṃ pavaḍḍhatīti alobho kusalamūlaṃ. Saṃyamato veraṃ na cīyatīti adoso kusalamūlaṃ. Kusalo ca jahāti pāpakanti amoho kusalamūlaṃ. Rāgadosamohakkhayā sa nibbutoti tesaṃ nissaraṇaṃ vuttaṃ.
த³த³தோ புஞ்ஞங் பவட்³ட⁴தீதி ஸீலக்க²ந்த⁴ஸ்ஸ பத³ட்டா²னங். ஸங்யமதோ வேரங் ந சீயதீதி ஸமாதி⁴க்க²ந்த⁴ஸ்ஸ பத³ட்டா²னங். குஸலோ ச ஜஹாதி பாபகந்தி பஞ்ஞாக்க²ந்த⁴ஸ்ஸ விமுத்திக்க²ந்த⁴ஸ்ஸ பத³ட்டா²னங். தா³னேன ஓளாரிகானங் கிலேஸானங் பஹானங், ஸீலேன மஜ்ஜி²மானங், பஞ்ஞாய ஸுகு²மானங். ராக³தோ³ஸமோஹக்க²யா ஸ நிப்³பு³தோதி கதாவீபூ⁴மிங் த³ஸ்ஸேதி.
Dadato puññaṃ pavaḍḍhatīti sīlakkhandhassa padaṭṭhānaṃ. Saṃyamato veraṃ na cīyatīti samādhikkhandhassa padaṭṭhānaṃ. Kusalo ca jahāti pāpakanti paññākkhandhassa vimuttikkhandhassa padaṭṭhānaṃ. Dānena oḷārikānaṃ kilesānaṃ pahānaṃ, sīlena majjhimānaṃ, paññāya sukhumānaṃ. Rāgadosamohakkhayā sa nibbutoti katāvībhūmiṃ dasseti.
த³த³தோ புஞ்ஞங்…பே॰… ஜஹாதி பாபகந்தி ஸெக்க²பூ⁴மி த³ஸ்ஸிதா. ராக³தோ³ஸமோஹக்க²யா ஸ நிப்³பு³தோதி அக்³க³ப²லங் வுத்தங்.
Dadato puññaṃ…pe… jahāti pāpakanti sekkhabhūmi dassitā. Rāgadosamohakkhayā sa nibbutoti aggaphalaṃ vuttaṃ.
ததா² த³த³தோ புஞ்ஞங்…பே॰… ந சீயதீதி லோகியகுஸலமூலங் வுத்தங். குஸலோ ச ஜஹாதி பாபகந்தி லோகுத்தரகுஸலமூலங் வுத்தங். ராக³தோ³ஸமோஹக்க²யா ஸ நிப்³பு³தோதி லோகுத்தரஸ்ஸ குஸலமூலஸ்ஸ ப²லங் வுத்தங்.
Tathā dadato puññaṃ…pe… na cīyatīti lokiyakusalamūlaṃ vuttaṃ. Kusalo ca jahāti pāpakanti lokuttarakusalamūlaṃ vuttaṃ. Rāgadosamohakkhayā sa nibbutoti lokuttarassa kusalamūlassa phalaṃ vuttaṃ.
த³த³தோ…பே॰… ந சீயதீதி புது²ஜ்ஜனபூ⁴மி த³ஸ்ஸிதா. குஸலோ ச ஜஹாதி பாபகந்தி ஸெக்க²பூ⁴மி த³ஸ்ஸிதா. ராக³தோ³ஸமோஹக்க²யா ஸ நிப்³பு³தோதி அஸெக்க²பூ⁴மி த³ஸ்ஸிதா.
Dadato…pe… na cīyatīti puthujjanabhūmi dassitā. Kusalo ca jahāti pāpakanti sekkhabhūmi dassitā. Rāgadosamohakkhayā sa nibbutoti asekkhabhūmi dassitā.
த³த³தோ …பே॰… ந சீயதீதி ஸக்³க³கா³மினீ படிபதா³ வுத்தா. குஸலோ ச ஜஹாதி பாபகந்தி ஸெக்க²விமுத்தி. ராக³தோ³ஸமோஹக்க²யா ஸ நிப்³பு³தோதி அஸெக்க²விமுத்தி வுத்தா.
Dadato …pe… na cīyatīti saggagāminī paṭipadā vuttā. Kusalo ca jahāti pāpakanti sekkhavimutti. Rāgadosamohakkhayā sa nibbutoti asekkhavimutti vuttā.
த³த³தோ…பே॰… ந சீயதீதி தா³னகத²ங் ஸீலகத²ங் ஸக்³க³கத²ங் லோகியானங் த⁴ம்மானங் தே³ஸனமாஹ. குஸலோ ச ஜஹாதி பாபகந்தி லோகே ஆதீ³னவானுபஸ்ஸனாய ஸத்³தி⁴ங் ஸாமுக்கங்ஸிகங் த⁴ம்மதே³ஸனமாஹ. ராக³தோ³ஸமோஹக்க²யா ஸ நிப்³பு³தோதி தஸ்ஸா தே³ஸனாய ப²லமாஹ.
Dadato…pe… na cīyatīti dānakathaṃ sīlakathaṃ saggakathaṃ lokiyānaṃ dhammānaṃ desanamāha. Kusalo ca jahāti pāpakanti loke ādīnavānupassanāya saddhiṃ sāmukkaṃsikaṃ dhammadesanamāha. Rāgadosamohakkhayā sa nibbutoti tassā desanāya phalamāha.
த³த³தோ புஞ்ஞங் பவட்³ட⁴தீதி த⁴ம்மதா³னங் ஆமிஸதா³னஞ்ச வத³தி. ஸங்யமதோ வேரங் ந சீயதீதி பாணாதிபாதா வேரமணியா ஸத்தானங் அப⁴யதா³னங் வத³தி. ஏவங் ஸப்³பா³னிபி ஸிக்கா²பதா³னி வித்தா²ரேதப்³பா³னி. தேன ச ஸீலஸங்யமேன ஸீலே பதிட்டி²தோ சித்தங் ஸங்யமேதி, தஸ்ஸ ஸமதோ² பாரிபூரிங் க³ச்ச²தி. ஏவங் ஸோ ஸமதே² டி²தோ விபஸ்ஸனாகோஸல்லயோக³தோ குஸலோ ச ஜஹாதி பாபகங் ராக³ங் ஜஹாதி, தோ³ஸங் ஜஹாதி, மோஹங் ஜஹாதி, அரியமக்³கே³ன ஸப்³பே³பி பாபகே அகுஸலே த⁴ம்மே ஜஹாதி. ஏவங் படிபன்னோ ச ராக³தோ³ஸமோஹக்க²யா ஸ நிப்³பு³தோதி ராகா³தீ³னங் பரிக்க²யா த்³வேபி விமுத்தியோ அதி⁴க³ச்ச²தீதி அயங் ஸுத்தனித்³தே³ஸோ.
Dadato puññaṃ pavaḍḍhatīti dhammadānaṃ āmisadānañca vadati. Saṃyamato veraṃ na cīyatīti pāṇātipātā veramaṇiyā sattānaṃ abhayadānaṃ vadati. Evaṃ sabbānipi sikkhāpadāni vitthāretabbāni. Tena ca sīlasaṃyamena sīle patiṭṭhito cittaṃ saṃyameti, tassa samatho pāripūriṃ gacchati. Evaṃ so samathe ṭhito vipassanākosallayogato kusalo ca jahāti pāpakaṃ rāgaṃ jahāti, dosaṃ jahāti, mohaṃ jahāti, ariyamaggena sabbepi pāpake akusale dhamme jahāti. Evaṃ paṭipanno ca rāgadosamohakkhayā sa nibbutoti rāgādīnaṃ parikkhayā dvepi vimuttiyo adhigacchatīti ayaṃ suttaniddeso.
தத்த² கதமோ தே³ஸனாஹாரஸம்பாதோ? இமஸ்மிங் ஸுத்தே கிங் தே³ஸிதங்? த்³வே ஸுக³தியோ தே³வா ச மனுஸ்ஸா ச, தி³ப்³பா³ ச பஞ்ச காமகு³ணா, மானுஸகா ச பஞ்ச காமகு³ணா, தி³ப்³பா³ ச பஞ்சுபாதா³னக்க²ந்தா⁴, மானுஸகா ச பஞ்சுபாதா³னக்க²ந்தா⁴. இத³ங் வுச்சதி து³க்க²ங் அரியஸச்சங். தஸ்ஸ காரணபா⁴வேன புரிமபுரிமனிப்ப²ன்னா தண்ஹா ஸமுத³யோ அரியஸச்சங். தயித³ங் வுச்சதி அஸ்ஸாதோ³ ச ஆதீ³னவோ ச. ஸப்³ப³ஸ்ஸ புரிமேஹி த்³வீஹி பதே³ஹி நித்³தே³ஸோ ‘‘த³த³தோ…பே॰… ந சீயதீ’’தி. குஸலோ ச ஜஹாதி பாபகந்தி மக்³கோ³ வுத்தோ. ராக³தோ³ஸமோஹக்க²யா ஸ நிப்³பு³தோதி த்³வே நிப்³பா³னதா⁴துயோ ஸஉபாதி³ஸேஸா ச அனுபாதி³ஸேஸா ச. இத³ங் நிஸ்ஸரணங். ப²லாதீ³னி பன யதா²ரஹங் வேதி³தப்³பா³னீதி. அயங் தே³ஸனாஹாரஸம்பாதோ.
Tattha katamo desanāhārasampāto? Imasmiṃ sutte kiṃ desitaṃ? Dve sugatiyo devā ca manussā ca, dibbā ca pañca kāmaguṇā, mānusakā ca pañca kāmaguṇā, dibbā ca pañcupādānakkhandhā, mānusakā ca pañcupādānakkhandhā. Idaṃ vuccati dukkhaṃ ariyasaccaṃ. Tassa kāraṇabhāvena purimapurimanipphannā taṇhā samudayo ariyasaccaṃ. Tayidaṃ vuccati assādo ca ādīnavo ca. Sabbassa purimehi dvīhi padehi niddeso ‘‘dadato…pe… na cīyatī’’ti. Kusalo ca jahāti pāpakanti maggo vutto. Rāgadosamohakkhayā sa nibbutoti dve nibbānadhātuyo saupādisesā ca anupādisesā ca. Idaṃ nissaraṇaṃ. Phalādīni pana yathārahaṃ veditabbānīti. Ayaṃ desanāhārasampāto.
விசயோதி ‘‘த³த³தோ புஞ்ஞங் பவட்³ட⁴தீ’’தி இமினா பட²மேன பதே³ன திவித⁴ம்பி தா³னமயங் ஸீலமயங் பா⁴வனாமயங் புஞ்ஞகிரியவத்து² வுத்தங். த³ஸவித⁴ஸ்ஸபி தெ³ய்யத⁴ம்மஸ்ஸ பரிச்சாகோ³ வுத்தோ. ததா² ச²ப்³பி³த⁴ஸ்ஸபி ரூபாதி³ஆரம்மணஸ்ஸ. ‘‘ஸங்யமதோ வேரங் ந சீயதீ’’தி து³தியேன பதே³ன அவேரா அஸபத்தா அப்³யாபாதா³ ச படிபதா³ வுத்தா. ‘‘குஸலோ ச ஜஹாதி பாபக’’ந்தி ததியேன பதே³ன ஞாணுப்பாதோ³ அஞ்ஞாணனிரோதோ⁴ ஸப்³போ³பி அரியோ அட்ட²ங்கி³கோ மக்³கோ³ ஸப்³பே³பி போ³தி⁴பக்கி²யா த⁴ம்மா வுத்தா . ‘‘ராக³தோ³ஸமோஹக்க²யா ஸ நிப்³பு³தோ’’தி ராக³க்க²யேன ராக³விராகா³ சேதோவிமுத்தி, மோஹக்க²யேன அவிஜ்ஜாவிராகா³ பஞ்ஞாவிமுத்தி வுத்தாதி. அயங் விசயோ ஹாரஸம்பாதோ.
Vicayoti ‘‘dadato puññaṃ pavaḍḍhatī’’ti iminā paṭhamena padena tividhampi dānamayaṃ sīlamayaṃ bhāvanāmayaṃ puññakiriyavatthu vuttaṃ. Dasavidhassapi deyyadhammassa pariccāgo vutto. Tathā chabbidhassapi rūpādiārammaṇassa. ‘‘Saṃyamato veraṃ na cīyatī’’ti dutiyena padena averā asapattā abyāpādā ca paṭipadā vuttā. ‘‘Kusalo ca jahāti pāpaka’’nti tatiyena padena ñāṇuppādo aññāṇanirodho sabbopi ariyo aṭṭhaṅgiko maggo sabbepi bodhipakkhiyā dhammā vuttā . ‘‘Rāgadosamohakkhayā sa nibbuto’’ti rāgakkhayena rāgavirāgā cetovimutti, mohakkhayena avijjāvirāgā paññāvimutti vuttāti. Ayaṃ vicayo hārasampāto.
யுத்தீதி தா³னே டி²தோ உப⁴யங் பரிபூரேதி மச்ச²ரியப்பஹானஞ்ச புஞ்ஞாபி⁴ஸந்த³ஞ்சாதி அத்தே²ஸா யுத்தி. ஸீலஸங்யமே டி²தோ உப⁴யங் பரிபூரேதி உபசாரஸமாதி⁴ங் அப்பனாஸமாதி⁴ஞ்சாதி அத்தே²ஸா யுத்தி. பாபகே த⁴ம்மே பஜஹந்தோ து³க்க²ங் பரிஜானாதி, நிரோத⁴ங் ஸச்சி²கரோதி, மக்³க³ங் பா⁴வேதீதி அத்தே²ஸா யுத்தி. ராக³தோ³ஸமோஹேஸு ஸப்³ப³ஸோ பரிக்கீ²ணேஸு அனுபாதி³ஸேஸாய நிப்³பா³னதா⁴துயா பரினிப்³பா³யதீதி அத்தே²ஸா யுத்தீதி. அயங் யுத்திஹாரஸம்பாதோ.
Yuttīti dāne ṭhito ubhayaṃ paripūreti macchariyappahānañca puññābhisandañcāti atthesā yutti. Sīlasaṃyame ṭhito ubhayaṃ paripūreti upacārasamādhiṃ appanāsamādhiñcāti atthesā yutti. Pāpake dhamme pajahanto dukkhaṃ parijānāti, nirodhaṃ sacchikaroti, maggaṃ bhāvetīti atthesā yutti. Rāgadosamohesu sabbaso parikkhīṇesu anupādisesāya nibbānadhātuyā parinibbāyatīti atthesā yuttīti. Ayaṃ yuttihārasampāto.
பத³ட்டா²னந்தி த³த³தோ புஞ்ஞங் பவட்³ட⁴தீதி சாகா³தி⁴ட்டா²னஸ்ஸ பத³ட்டா²னங். ஸங்யமதோ வேரங் ந சீயதீதி ஸச்சாதி⁴ட்டா²னஸ்ஸ பத³ட்டா²னங். குஸலோ ச ஜஹாதி பாபகந்தி பஞ்ஞாதி⁴ட்டா²னஸ்ஸ பத³ட்டா²னங். ராக³தோ³ஸமோஹக்க²யா ஸ நிப்³பு³தோதி உபஸமாதி⁴ட்டா²னஸ்ஸ பத³ட்டா²னந்தி. அயங் பத³ட்டா²னோ ஹாரஸம்பாதோ.
Padaṭṭhānanti dadato puññaṃ pavaḍḍhatīti cāgādhiṭṭhānassa padaṭṭhānaṃ. Saṃyamato veraṃ na cīyatīti saccādhiṭṭhānassa padaṭṭhānaṃ. Kusalo ca jahāti pāpakanti paññādhiṭṭhānassa padaṭṭhānaṃ. Rāgadosamohakkhayā sa nibbutoti upasamādhiṭṭhānassa padaṭṭhānanti. Ayaṃ padaṭṭhāno hārasampāto.
லக்க²ணோதி ‘‘த³த³தோ’’தி ஏதேன பெய்யவஜ்ஜங் அத்த²சரியங் ஸமானத்ததா ச த³ஸ்ஸிதாதி வேதி³தப்³பா³ ஸங்க³ஹவத்து²பா⁴வேன ஏகலக்க²ணத்தா. ‘‘ஸங்யமதோ’’தி ஏதேன க²ந்திமெத்தாஅவிஹிங்ஸாஅனுத்³த³யாத³யோ த³ஸ்ஸிதாதி வேதி³தப்³பா³ வேரானுப்பாத³னலக்க²ணேன ஏகலக்க²ணத்தா. ‘‘வேரங் ந சீயதீ’’தி ஏதேன ஹிரீஒத்தப்பஅப்பிச்ச²தாஸந்துட்டி²தாத³யோ த³ஸ்ஸிதா வேராவட்³ட⁴னேன ஏகலக்க²ணத்தா. ததா² அஹிரீகானொத்தப்பாத³யோ அசேதப்³ப³பா⁴வேன ஏகலக்க²ணத்தா. ‘‘குஸலோ’’தி ஏதேன கோஸல்லதீ³பனேன ஸம்மாஸங்கப்பாத³யோ த³ஸ்ஸிதா மக்³க³ங்கா³தி³பா⁴வேன ஏகலக்க²ணத்தா. ‘‘ஜஹாதி பாபக’’ந்தி ஏதேன பரிஞ்ஞாபி⁴ஸமயாத³யோபி த³ஸ்ஸிதா அபி⁴ஸமயலக்க²ணேன ஏகலக்க²ணத்தா. ‘‘ராக³தோ³ஸமோஹக்க²யா’’தி ஏதேன அவஸிட்ட²கிலேஸாதீ³னம்பி க²யா த³ஸ்ஸிதா கே²பேதப்³ப³பா⁴வேன ஏகலக்க²ணத்தாதி அயங் லக்க²ணோ.
Lakkhaṇoti ‘‘dadato’’ti etena peyyavajjaṃ atthacariyaṃ samānattatā ca dassitāti veditabbā saṅgahavatthubhāvena ekalakkhaṇattā. ‘‘Saṃyamato’’ti etena khantimettāavihiṃsāanuddayādayo dassitāti veditabbā verānuppādanalakkhaṇena ekalakkhaṇattā. ‘‘Veraṃ na cīyatī’’ti etena hirīottappaappicchatāsantuṭṭhitādayo dassitā verāvaḍḍhanena ekalakkhaṇattā. Tathā ahirīkānottappādayo acetabbabhāvena ekalakkhaṇattā. ‘‘Kusalo’’ti etena kosalladīpanena sammāsaṅkappādayo dassitā maggaṅgādibhāvena ekalakkhaṇattā. ‘‘Jahāti pāpaka’’nti etena pariññābhisamayādayopi dassitā abhisamayalakkhaṇena ekalakkhaṇattā. ‘‘Rāgadosamohakkhayā’’ti etena avasiṭṭhakilesādīnampi khayā dassitā khepetabbabhāvena ekalakkhaṇattāti ayaṃ lakkhaṇo.
சதுப்³யூஹோதி த³த³தோதி கா³தா²யங் ப⁴க³வதோ கோ அதி⁴ப்பாயோ? யே மஹாபோ⁴க³தங் பத்த²யிஸ்ஸந்தி, தே தா³னங் த³ஸ்ஸந்தி தா³லித்³தி³யப்பஹானாய. யே அவேரதங் இச்ச²ந்தி, தே பஞ்ச வேரானி பஜஹிஸ்ஸந்தி. யே குஸலத⁴ம்மேஹி ச²ந்த³காமா, தே அட்ட²ங்கி³கங் மக்³க³ங் பா⁴வெஸ்ஸந்தி. யே நிப்³பா³யிதுகாமா, தே ராக³தோ³ஸமோஹங் பஜஹிஸ்ஸந்தீதி அயமெத்த² ப⁴க³வதோ அதி⁴ப்பாயோ. ஏவங் நிப்³ப³சனநிதா³னஸந்த⁴யோ வத்தப்³பா³தி. அயங் சதுப்³யூஹோ.
Catubyūhoti dadatoti gāthāyaṃ bhagavato ko adhippāyo? Ye mahābhogataṃ patthayissanti, te dānaṃ dassanti dāliddiyappahānāya. Ye averataṃ icchanti, te pañca verāni pajahissanti. Ye kusaladhammehi chandakāmā, te aṭṭhaṅgikaṃ maggaṃ bhāvessanti. Ye nibbāyitukāmā, te rāgadosamohaṃ pajahissantīti ayamettha bhagavato adhippāyo. Evaṃ nibbacananidānasandhayo vattabbāti. Ayaṃ catubyūho.
ஆவட்டோதி யஞ்ச அத³த³தோ மச்ச²ரியங், யஞ்ச அஸங்யமதோ வேரங், யஞ்ச அகுஸலஸ்ஸ பாபஸ்ஸ அப்பஹானங், அயங் படிபக்க²னித்³தே³ஸேன ஸமுத³யோ. தஸ்ஸ அலோபே⁴ன ச அதோ³ஸேன ச அமோஹேன ச தா³னாதீ³ஹி பஹானங், இமானி தீணி குஸலமூலானி. தேஸங் பச்சயோ அட்ட² ஸம்மத்தானி, அயங் மக்³கோ³. யோ ராக³தோ³ஸமோஹானங் க²யோ, அயங் நிரோதோ⁴தி. அயங் ஆவட்டோ.
Āvaṭṭoti yañca adadato macchariyaṃ, yañca asaṃyamato veraṃ, yañca akusalassa pāpassa appahānaṃ, ayaṃ paṭipakkhaniddesena samudayo. Tassa alobhena ca adosena ca amohena ca dānādīhi pahānaṃ, imāni tīṇi kusalamūlāni. Tesaṃ paccayo aṭṭha sammattāni, ayaṃ maggo. Yo rāgadosamohānaṃ khayo, ayaṃ nirodhoti. Ayaṃ āvaṭṭo.
விப⁴த்தீதி த³த³தோ புஞ்ஞங் பவட்³ட⁴தீதி ஏகங்ஸேன யோ ப⁴யஹேது தே³தி, ராக³ஹேது தே³தி, ஆமிஸகிஞ்சிக்க²ஹேது தே³தி, ந தஸ்ஸ புஞ்ஞங் வட்³ட⁴தி. யஞ்ச த³ண்ட³தா³னங் ஸத்த²தா³னங் பரவிஹேட²னத்த²ங் அபுஞ்ஞங் அஸ்ஸ பவட்³ட⁴தி. யங் பன குஸலேன சித்தேன அனுகம்பந்தோ வா அபசாயமானோ வா அன்னங் தே³தி, பானங் வத்த²ங் யானங் மாலாக³ந்த⁴விலேபனங் ஸெய்யாவஸத²ங் பதீ³பெய்யங் தே³தி, ஸப்³ப³ஸத்தானங் வா அப⁴யதா³னங் தே³தி, மெத்தசித்தோ ஹிதஜ்ஜா²ஸயோ நிஸ்ஸரணஸஞ்ஞீ த⁴ம்மங் தே³ஸேதி. ஸங்யமதோ வேரங் ந சீயதீதி ஏகங்ஸேன அப⁴யூபரதஸ்ஸ சீயதி, கிங்காரணங்? யங் அஸமத்தோ², ப⁴யூபரதோ தி³ட்ட²த⁴ம்மிகஸ்ஸ பா⁴யதி ‘‘மா மங் ராஜானோ க³ஹெத்வா ஹத்த²ங் வா சி²ந்தெ³ய்யுங்…பே॰… ஜீவந்தம்பி ஸூலே உத்தாஸெய்யு’’ந்தி, தேன ஸங்யமேன அவேரங் சீயதி. யோ பன ஏவங் ஸமானோ வேரங் ந சீயதி. யோ பன ஏவங் ஸமாதி³யதி, பாணாதிபாதஸ்ஸ பாபகோ விபாகோ தி³ட்டே² சேவ த⁴ம்மே அபி⁴ஸம்பராயே ச, ஏவங் ஸப்³ப³ஸ்ஸ அகுஸலஸ்ஸ, ஸோ ததோ ஆரமதி, இமினா ஸங்யமேன வேரங் ந சீயதி. ஸங்யமோ நாம ஸீலங். தங் சதுப்³பி³த⁴ங் சேதனா ஸீலங், சேதஸிகங் ஸீலங், ஸங்வரோ ஸீலங், அவீதிக்கமோ ஸீலந்தி. குஸலோ ச ஜஹாதி பாபகந்தி பாபபஹாயகா ஸத்தத்திங்ஸ போ³தி⁴பக்கி²யா த⁴ம்மா வத்தப்³பா³தி. அயங் விப⁴த்தி.
Vibhattīti dadato puññaṃ pavaḍḍhatīti ekaṃsena yo bhayahetu deti, rāgahetu deti, āmisakiñcikkhahetu deti, na tassa puññaṃ vaḍḍhati. Yañca daṇḍadānaṃ satthadānaṃ paraviheṭhanatthaṃ apuññaṃ assa pavaḍḍhati. Yaṃ pana kusalena cittena anukampanto vā apacāyamāno vā annaṃ deti, pānaṃ vatthaṃ yānaṃ mālāgandhavilepanaṃ seyyāvasathaṃ padīpeyyaṃ deti, sabbasattānaṃ vā abhayadānaṃ deti, mettacitto hitajjhāsayo nissaraṇasaññī dhammaṃ deseti. Saṃyamato veraṃ na cīyatīti ekaṃsena abhayūparatassa cīyati, kiṃkāraṇaṃ? Yaṃ asamattho, bhayūparato diṭṭhadhammikassa bhāyati ‘‘mā maṃ rājāno gahetvā hatthaṃ vā chindeyyuṃ…pe… jīvantampi sūle uttāseyyu’’nti, tena saṃyamena averaṃ cīyati. Yo pana evaṃ samāno veraṃ na cīyati. Yo pana evaṃ samādiyati, pāṇātipātassa pāpako vipāko diṭṭhe ceva dhamme abhisamparāye ca, evaṃ sabbassa akusalassa, so tato āramati, iminā saṃyamena veraṃ na cīyati. Saṃyamo nāma sīlaṃ. Taṃ catubbidhaṃ cetanā sīlaṃ, cetasikaṃ sīlaṃ, saṃvaro sīlaṃ, avītikkamo sīlanti. Kusalo ca jahāti pāpakanti pāpapahāyakā sattattiṃsa bodhipakkhiyā dhammā vattabbāti. Ayaṃ vibhatti.
பரிவத்தனோதி த³த³தோ புஞ்ஞங் பவட்³ட⁴தி, அத³த³தோபி புஞ்ஞங் பவட்³ட⁴தி, ந தா³னமயிகங். ஸங்யமதோ வேரங் ந சீயதி அஸங்யமதோபி வேரங் ந சீயதி, யங் தா³னேன படிஸங்கா²னப³லேன பா⁴வனாப³லேன. குஸலோ ச ஜஹாதி பாபகங், அகுஸலோ பன ந ஜஹாதி. ராக³தோ³ஸமோஹக்க²யா ஸ நிப்³பு³தோ, தேஸங் அபரிக்க²யா நத்தி² நிப்³பு³தீதி. அயங் பரிவத்தனோ.
Parivattanoti dadato puññaṃ pavaḍḍhati, adadatopi puññaṃ pavaḍḍhati, na dānamayikaṃ. Saṃyamato veraṃ na cīyati asaṃyamatopi veraṃ na cīyati, yaṃ dānena paṭisaṅkhānabalena bhāvanābalena. Kusalo ca jahāti pāpakaṃ, akusalo pana na jahāti. Rāgadosamohakkhayā sa nibbuto, tesaṃ aparikkhayā natthi nibbutīti. Ayaṃ parivattano.
வேவசனோதி த³த³தோ புஞ்ஞங் பவட்³ட⁴தி. பரிச்சாக³தோ குஸலங் உபசீயதி. அனுமோத³தோபி புஞ்ஞங் பவட்³ட⁴தி சித்தப்பஸாத³தோபி வெய்யாவச்சகிரியாயபி. ஸங்யமதோதி ஸீலஸங்வரதோ ஸோரச்சதோ. வேரங் ந சீயதீதி பாபங் ந வட்³ட⁴தி, அகுஸலங் ந வட்³ட⁴தி. குஸலோதி பண்டி³தோ நிபுணோ மேதா⁴வீ பரிக்க²கோ. ஜஹாதீதி ஸமுச்சி²ந்த³தி ஸமுக்³கா⁴டேதி. அயங் வேவசனோ.
Vevacanoti dadato puññaṃ pavaḍḍhati. Pariccāgato kusalaṃ upacīyati. Anumodatopi puññaṃ pavaḍḍhati cittappasādatopi veyyāvaccakiriyāyapi. Saṃyamatoti sīlasaṃvarato soraccato. Veraṃ na cīyatīti pāpaṃ na vaḍḍhati, akusalaṃ na vaḍḍhati. Kusaloti paṇḍito nipuṇo medhāvī parikkhako. Jahātīti samucchindati samugghāṭeti. Ayaṃ vevacano.
பஞ்ஞத்தீதி த³த³தோ புஞ்ஞங் பவட்³ட⁴தீதி லோப⁴ஸ்ஸ படினிஸ்ஸக்³க³பஞ்ஞத்தி, அலோப⁴ஸ்ஸ நிக்கே²பபஞ்ஞத்தி. ஸங்யமதோ வேரங் ந சீயதீதி தோ³ஸஸ்ஸ விக்க²ம்ப⁴னபஞ்ஞத்தி, அதோ³ஸஸ்ஸ நிக்கே²பபஞ்ஞத்தி. குஸலோ ச ஜஹாதி பாபகந்தி மோஹஸ்ஸ ஸமுக்³கா⁴தபஞ்ஞத்தி, அமோஹஸ்ஸ பா⁴வனாபஞ்ஞத்தி. ராக³தோ³ஸமோஹஸ்ஸ பஹானபஞ்ஞத்தி, அலோபா⁴தோ³ஸாமோஹஸ்ஸ பா⁴வனாபஞ்ஞத்தி. ராக³தோ³ஸமோஹக்க²யா ஸ நிப்³பு³தோதி கிலேஸானங் படிப்பஸ்ஸத்³தி⁴பஞ்ஞத்தி, நிப்³பா³னஸ்ஸ ஸச்சி²கிரியபஞ்ஞத்தீதி. அயங் பஞ்ஞத்தி.
Paññattīti dadato puññaṃ pavaḍḍhatīti lobhassa paṭinissaggapaññatti, alobhassa nikkhepapaññatti. Saṃyamato veraṃ na cīyatīti dosassa vikkhambhanapaññatti, adosassa nikkhepapaññatti. Kusalo ca jahāti pāpakanti mohassa samugghātapaññatti, amohassa bhāvanāpaññatti. Rāgadosamohassa pahānapaññatti, alobhādosāmohassa bhāvanāpaññatti. Rāgadosamohakkhayā sa nibbutoti kilesānaṃ paṭippassaddhipaññatti, nibbānassa sacchikiriyapaññattīti. Ayaṃ paññatti.
ஓதரணோதி த³த³தோ புஞ்ஞங் பவட்³ட⁴தீதி தா³னங் நாம ஸத்³தா⁴தீ³ஹி இந்த்³ரியேஹி ஹோதீதி அயங் இந்த்³ரியேஹி ஓதரணோ. ஸங்யமதோ வேரங் ந சீயதீதி ஸங்யமோ நாம ஸீலக்க²ந்தோ⁴தி அயங் க²ந்தே⁴ஹி ஓதரணோ. குஸலோ ச ஜஹாதி பாபகந்தி பாபப்பஹானங் நாம தீஹி விமொக்கே²ஹி ஹோதி. தேஸங் உபாயபூ⁴தானி தீணி விமொக்க²முகா²னீதி அயங் விமொக்க²முகே²ஹி ஓதரணோ. ராக³தோ³ஸமோஹக்க²யா ஸ நிப்³பு³தோதி விமுத்திக்க²ந்தோ⁴. ஸோ ச த⁴ம்மதா⁴து த⁴ம்மாயதனஞ்சாதி அயங் தா⁴தூஹி ச ஆயதனேஹி ச ஓதரணோதி. அயங் ஓதரணோ.
Otaraṇoti dadato puññaṃ pavaḍḍhatīti dānaṃ nāma saddhādīhi indriyehi hotīti ayaṃ indriyehi otaraṇo. Saṃyamato veraṃ na cīyatīti saṃyamo nāma sīlakkhandhoti ayaṃ khandhehi otaraṇo. Kusalo ca jahāti pāpakanti pāpappahānaṃ nāma tīhi vimokkhehi hoti. Tesaṃ upāyabhūtāni tīṇi vimokkhamukhānīti ayaṃ vimokkhamukhehi otaraṇo. Rāgadosamohakkhayā sa nibbutoti vimuttikkhandho. So ca dhammadhātu dhammāyatanañcāti ayaṃ dhātūhi ca āyatanehi ca otaraṇoti. Ayaṃ otaraṇo.
ஸோத⁴னோதி த³த³தோதிஆதி³கா பத³ஸுத்³தி⁴, நோ ஆரம்ப⁴ஸுத்³தி⁴. ராக³தோ³ஸமோஹக்க²யா ஸ நிப்³பு³தோதி அயங் பத³ஸுத்³தி⁴ ச ஆரம்ப⁴ஸுத்³தி⁴ சாதி. அயங் ஸோத⁴னோ.
Sodhanoti dadatotiādikā padasuddhi, no ārambhasuddhi. Rāgadosamohakkhayā sa nibbutoti ayaṃ padasuddhi ca ārambhasuddhi cāti. Ayaṃ sodhano.
அதி⁴ட்டா²னோதி த³த³தோதி அயங் ஏகத்ததா, சாகோ³ பரிச்சாகோ³ த⁴ம்மதா³னங் ஆமிஸதா³னங் அப⁴யதா³னங், அட்ட² தா³னானி வித்தா²ரேதப்³பா³னி. அயங் வேமத்ததா. ஸங்யமோதி அயங் ஏகத்ததா. பாதிமொக்க²ஸங்வரோ ஸதிஸங்வரோதி அயங் வேமத்ததா. குஸலோ ச ஜஹாதி பாபகந்தி அயங் ஏகத்ததா. ஸக்காயதி³ட்டி²ங் பஜஹதி விசிகிச்ச²ங் பஜஹதீதிஆதி³கா அயங் வேமத்ததா. ராக³தோ³ஸமோஹக்க²யா ஸ நிப்³பு³தோதி அயங் ஏகத்ததா. ஸஉபாதி³ஸேஸா நிப்³பா³னதா⁴து அனுபாதி³ஸேஸா நிப்³பா³னதா⁴தூதி அயங் வேமத்ததாதி. அயங் அதி⁴ட்டா²னோ.
Adhiṭṭhānoti dadatoti ayaṃ ekattatā, cāgo pariccāgo dhammadānaṃ āmisadānaṃ abhayadānaṃ, aṭṭha dānāni vitthāretabbāni. Ayaṃ vemattatā. Saṃyamoti ayaṃ ekattatā. Pātimokkhasaṃvaro satisaṃvaroti ayaṃ vemattatā. Kusalo ca jahāti pāpakanti ayaṃ ekattatā. Sakkāyadiṭṭhiṃ pajahati vicikicchaṃ pajahatītiādikā ayaṃ vemattatā. Rāgadosamohakkhayā sa nibbutoti ayaṃ ekattatā. Saupādisesā nibbānadhātu anupādisesā nibbānadhātūti ayaṃ vemattatāti. Ayaṃ adhiṭṭhāno.
பரிக்கா²ரோதி தா³னஸ்ஸ பாமோஜ்ஜங் பச்சயோ. அலோபோ⁴ ஹேது, ஸங்யமஸ்ஸ ஹிரொத்தப்பாத³யோ பச்சயோ. யோனிஸோமனஸிகாரோ அதோ³ஸோ ச ஹேது, பாபப்பஹானஸ்ஸ ஸமாதி⁴ யதா²பூ⁴தஞாணத³ஸ்ஸனஞ்ச பச்சயோ. திஸ்ஸோ அனுபஸ்ஸனா ஹேது, நிப்³பு³தியா மக்³க³ஸம்மாதி³ட்டி² ஹேது, ஸம்மாஸங்கப்பாத³யோ பச்சயோதி. அயங் பரிக்கா²ரோ.
Parikkhāroti dānassa pāmojjaṃ paccayo. Alobho hetu, saṃyamassa hirottappādayo paccayo. Yonisomanasikāro adoso ca hetu, pāpappahānassa samādhi yathābhūtañāṇadassanañca paccayo. Tisso anupassanā hetu, nibbutiyā maggasammādiṭṭhi hetu, sammāsaṅkappādayo paccayoti. Ayaṃ parikkhāro.
ஸமாரோபனோ ஹாரஸம்பாதோதி த³த³தோ புஞ்ஞங் பவட்³ட⁴தீதி தா³னமயங் புஞ்ஞகிரியவத்து², தங் ஸீலஸ்ஸ பத³ட்டா²னங். ஸங்யமதோ வேரங் ந சீயதீதி ஸீலமயங் புஞ்ஞகிரியவத்து², தங் ஸமாதி⁴ஸ்ஸ பத³ட்டா²னங். ஸீலேன ஹி ஜா²னேனபி ராகா³தி³கிலேஸா ந சீயந்தி. யேபிஸ்ஸ தப்பச்சயா உப்பஜ்ஜெய்யுங் ஆஸவா விகா⁴தபரிளாஹா, தேபிஸ்ஸ ந ஹொந்தி. குஸலோ ச ஜஹாதி பாபகந்தி பஹானபரிஞ்ஞா, தங் பா⁴வனாமயங் புஞ்ஞகிரியவத்து². ராக³தோ³ஸமோஹக்க²யா ஸ நிப்³பு³தோதி ராக³ஸ்ஸபி க²யா தோ³ஸஸ்ஸபி க²யா மோஹஸ்ஸபி க²யா. தத்த² ராகோ³தி யோ ராகோ³ ஸாராகோ³ சேதஸோ ஸாரஜ்ஜனா லோபோ⁴ லுப்³ப⁴னா லுப்³பி⁴தத்தங் அபி⁴ஜ்ஜா² லோபோ⁴ அகுஸலமூலங். தோ³ஸோதி யோ தோ³ஸோ து³ஸ்ஸனா து³ஸ்ஸிதத்தங் ப்³யாபாதோ³ சேதஸோ ப்³யாபஜ்ஜனா தோ³ஸோ அகுஸலமூலங். மோஹோதி யங் அஞ்ஞாணங் அத³ஸ்ஸனங் அனபி⁴ஸமயோ அஸம்போ³தோ⁴ அப்படிவேதோ⁴ து³ம்மெஜ்ஜ²ங் பா³ல்யங் அஸம்பஜஞ்ஞங் மோஹோ அகுஸலமூலங். இதி இமேஸங் ராகா³தீ³னங் க²யோ நிரோதோ⁴ படினிஸ்ஸக்³கோ³ நிப்³பு³தி நிப்³பா³யனா பரினிப்³பா³னங் ஸஉபாதி³ஸேஸா நிப்³பா³னதா⁴து அனுபாதி³ஸேஸா நிப்³பா³னதா⁴தூதி. அயங் ஸமாரோபனோ ஹாரஸம்பாதோ.
Samāropanohārasampātoti dadato puññaṃ pavaḍḍhatīti dānamayaṃ puññakiriyavatthu, taṃ sīlassa padaṭṭhānaṃ. Saṃyamato veraṃ na cīyatīti sīlamayaṃ puññakiriyavatthu, taṃ samādhissa padaṭṭhānaṃ. Sīlena hi jhānenapi rāgādikilesā na cīyanti. Yepissa tappaccayā uppajjeyyuṃ āsavā vighātapariḷāhā, tepissa na honti. Kusalo ca jahāti pāpakanti pahānapariññā, taṃ bhāvanāmayaṃ puññakiriyavatthu. Rāgadosamohakkhayā sa nibbutoti rāgassapi khayā dosassapi khayā mohassapi khayā. Tattha rāgoti yo rāgo sārāgo cetaso sārajjanā lobho lubbhanā lubbhitattaṃ abhijjhā lobho akusalamūlaṃ. Dosoti yo doso dussanā dussitattaṃ byāpādo cetaso byāpajjanā doso akusalamūlaṃ. Mohoti yaṃ aññāṇaṃ adassanaṃ anabhisamayo asambodho appaṭivedho dummejjhaṃ bālyaṃ asampajaññaṃ moho akusalamūlaṃ. Iti imesaṃ rāgādīnaṃ khayo nirodho paṭinissaggo nibbuti nibbāyanā parinibbānaṃ saupādisesā nibbānadhātu anupādisesā nibbānadhātūti. Ayaṃ samāropano hārasampāto.
மிஸ்ஸகஹாரஸம்பாதவண்ணனா நிட்டி²தா.
Missakahārasampātavaṇṇanā niṭṭhitā.
Related texts:
டீகா • Tīkā / ஸுத்தபிடக (டீகா) • Suttapiṭaka (ṭīkā) / கு²த்³த³கனிகாய (டீகா) • Khuddakanikāya (ṭīkā) / நெத்திப்பகரண-டீகா • Nettippakaraṇa-ṭīkā / மிஸ்ஸகஹாரஸம்பாதவண்ணனா • Missakahārasampātavaṇṇanā
