| Library / Tipiṭaka / তিপিটক • Tipiṭaka / নেত্তিপ্পকরণ-অট্ঠকথা • Nettippakaraṇa-aṭṭhakathā |
মিস্সকহারসম্পাতৰণ্ণনা
Missakahārasampātavaṇṇanā
অপি চেত্থ হারসম্পাতনিদ্দেসো ইমিনাপি নযেন ৰেদিতব্বো –
Api cettha hārasampātaniddeso imināpi nayena veditabbo –
‘‘মনোপুব্বঙ্গমা ধম্মা, মনোসেট্ঠা মনোমযা।
‘‘Manopubbaṅgamā dhammā, manoseṭṭhā manomayā;
মনসা চে পসন্নেন, ভাসতি ৰা করোতি ৰা।
Manasā ce pasannena, bhāsati vā karoti vā;
ততো নং সুখমন্ৰেতি, ছাযাৰ অনপাযিনী’’তি॥ (ধ॰ প॰ ২)।
Tato naṃ sukhamanveti, chāyāva anapāyinī’’ti. (dha. pa. 2);
তত্থ কতমো দেসনাহারসম্পাতো? মনোপুব্বঙ্গমা ধম্মাতি মনোতি খন্ধৰৰত্থানেন ৰিঞ্ঞাণক্খন্ধং দেসেতি। আযতনৰৰত্থানেন মনাযতনং , ধাতুৰৰত্থানেন ৰিঞ্ঞাণধাতুং, ইন্দ্রিযৰৰত্থানেন মনিন্দ্রিযং। কতমে ধম্মা পুব্বঙ্গমা? ছ ধম্মা পুব্বঙ্গমা, কুসলানং কুসলমূলানি, অকুসলানং অকুসলমূলানি, সাধিপতিকানং অধিপতি, সব্বচিত্তুপ্পাদানং ইন্দ্রিযানি। অপি চ ইমস্মিং সুত্তে মনো অধিপ্পেতো। যথা বলগ্গস্স রাজা পুব্বঙ্গমো, এৰমেৰং ধম্মানং মনো পুব্বঙ্গমো। তত্থ তিৰিধেন মনো পুব্বঙ্গমো নেক্খম্মছন্দেন অব্যাপাদছন্দেন অৰিহিংসাছন্দেন। তত্থ অলোভস্স নেক্খম্মছন্দেন মনোপুব্বঙ্গমং, অদোসস্স অব্যাপাদছন্দেন মনোপুব্বঙ্গমং, অমোহস্স অৰিহিংসাছন্দেন মনোপুব্বঙ্গমং।
Tattha katamo desanāhārasampāto? Manopubbaṅgamā dhammāti manoti khandhavavatthānena viññāṇakkhandhaṃ deseti. Āyatanavavatthānena manāyatanaṃ , dhātuvavatthānena viññāṇadhātuṃ, indriyavavatthānena manindriyaṃ. Katame dhammā pubbaṅgamā? Cha dhammā pubbaṅgamā, kusalānaṃ kusalamūlāni, akusalānaṃ akusalamūlāni, sādhipatikānaṃ adhipati, sabbacittuppādānaṃ indriyāni. Api ca imasmiṃ sutte mano adhippeto. Yathā balaggassa rājā pubbaṅgamo, evamevaṃ dhammānaṃ mano pubbaṅgamo. Tattha tividhena mano pubbaṅgamo nekkhammachandena abyāpādachandena avihiṃsāchandena. Tattha alobhassa nekkhammachandena manopubbaṅgamaṃ, adosassa abyāpādachandena manopubbaṅgamaṃ, amohassa avihiṃsāchandena manopubbaṅgamaṃ.
মনোসেট্ঠাতি মনো তেসং ধম্মানং সেট্ঠং ৰিসিট্ঠং উত্তমং পৰরং মূলং পমুখং পামোক্খং, তেন ৰুচ্চতি ‘‘মনোসেট্ঠা’’তি। মনোমযাতি মনেন কতা, মনেন নিম্মিতা, মনেন নিব্বত্তা, মনো তেসং পচ্চযো, তেন ৰুচ্চতি ‘‘মনোমযা’’তি। তে পন ধম্মা ছন্দসমুদানিতা অনাৰিলসঙ্কপ্পসমুট্ঠানা ফস্সসমোধানা ৰেদনাক্খন্ধো সঞ্ঞাক্খন্ধো সঙ্খারক্খন্ধো। মনসা চে পসন্নেনাতি যা সদ্ধা সদ্দহনা ওকপ্পনা অভিপ্পসাদো। ইতি ইমিনা পসাদেন উপেতো সমুপেতো উপগতো সমুপগতো সম্পন্নো সমন্নাগতো, তেন ৰুচ্চতি ‘‘পসন্নেনা’’তি ইদং মনোকম্মং । ভাসতি ৰাতি ৰচীকম্মং। করোতি ৰাতি কাযকম্মং। ইতি দসকুসলকম্মপথা দস্সিতা।
Manoseṭṭhāti mano tesaṃ dhammānaṃ seṭṭhaṃ visiṭṭhaṃ uttamaṃ pavaraṃ mūlaṃ pamukhaṃ pāmokkhaṃ, tena vuccati ‘‘manoseṭṭhā’’ti. Manomayāti manena katā, manena nimmitā, manena nibbattā, mano tesaṃ paccayo, tena vuccati ‘‘manomayā’’ti. Te pana dhammā chandasamudānitā anāvilasaṅkappasamuṭṭhānā phassasamodhānā vedanākkhandho saññākkhandho saṅkhārakkhandho. Manasā ce pasannenāti yā saddhā saddahanā okappanā abhippasādo. Iti iminā pasādena upeto samupeto upagato samupagato sampanno samannāgato, tena vuccati ‘‘pasannenā’’ti idaṃ manokammaṃ . Bhāsati vāti vacīkammaṃ. Karoti vāti kāyakammaṃ. Iti dasakusalakammapathā dassitā.
ততোতি দসৰিধস্স কুসলকম্মস্স কতত্তা উপচিতত্তা। নন্তি যো সো কতপুঞ্ঞো কতকুসলো কতভীরুত্তাণো, তং পুগ্গলং। সুখন্তি দুৰিধং সুখং কাযিকং চেতসিকঞ্চ। অন্ৰেতীতি অনুগচ্ছতি।
Tatoti dasavidhassa kusalakammassa katattā upacitattā. Nanti yo so katapuñño katakusalo katabhīruttāṇo, taṃ puggalaṃ. Sukhanti duvidhaṃ sukhaṃ kāyikaṃ cetasikañca. Anvetīti anugacchati.
ইধস্সু পুরিসো অপ্পহীনানুসযো সংযোজনিযেসু ধম্মেসু অস্সাদং অনুপস্সতি, সো সংযোজনিযেসু ধম্মেসু অস্সাদং অনুপস্সন্তো যথাদিট্ঠং যথাসুতং সম্পত্তিভৰং পত্থেতি। ইচ্চস্স অৰিজ্জা চ ভৰতণ্হা চ অনুবদ্ধা হোন্তি, সো যথাদিট্ঠং যথাসুতং সম্পত্তিভৰং পত্থেন্তো পসাদনীযৰত্থুস্মিং চিত্তং পসাদেতি সদ্দহতি ওকপ্পেতি। সো পসন্নচিত্তো তিৰিধং পুঞ্ঞকিরিযৰত্থুং অনুতিট্ঠতি দানমযং সীলমযং ভাৰনামযং কাযেন ৰাচায মনসা। সো তস্স ৰিপাকং পচ্চনুভোতি দিট্ঠেৰ ধম্মে উপপজ্জে ৰা অপরাপরে ৰা পরিযাযে। ইতি খো পনস্স অৰিজ্জাপচ্চযা সঙ্খারা, সঙ্খারপচ্চযা ৰিঞ্ঞাণং, ৰিঞ্ঞাণপচ্চযা নামরূপং, নামরূপপচ্চযা সল়াযতনং, সল়াযতনপচ্চযা সুখৰেদনীযো ফস্সো, ফস্সপচ্চযা ৰেদনাতি এৰং সন্তং তং সুখমন্ৰেতি। তস্সেৰং ৰেদনায অপরাপরং পরিৰত্তমানায উপ্পজ্জতি তণ্হা। তণ্হাপচ্চযা উপাদানং…পে॰… সমুদযো হোতীতি।
Idhassu puriso appahīnānusayo saṃyojaniyesu dhammesu assādaṃ anupassati, so saṃyojaniyesu dhammesu assādaṃ anupassanto yathādiṭṭhaṃ yathāsutaṃ sampattibhavaṃ pattheti. Iccassa avijjā ca bhavataṇhā ca anubaddhā honti, so yathādiṭṭhaṃ yathāsutaṃ sampattibhavaṃ patthento pasādanīyavatthusmiṃ cittaṃ pasādeti saddahati okappeti. So pasannacitto tividhaṃ puññakiriyavatthuṃ anutiṭṭhati dānamayaṃ sīlamayaṃ bhāvanāmayaṃ kāyena vācāya manasā. So tassa vipākaṃ paccanubhoti diṭṭheva dhamme upapajje vā aparāpare vā pariyāye. Iti kho panassa avijjāpaccayā saṅkhārā, saṅkhārapaccayā viññāṇaṃ, viññāṇapaccayā nāmarūpaṃ, nāmarūpapaccayā saḷāyatanaṃ, saḷāyatanapaccayā sukhavedanīyo phasso, phassapaccayā vedanāti evaṃ santaṃ taṃ sukhamanveti. Tassevaṃ vedanāya aparāparaṃ parivattamānāya uppajjati taṇhā. Taṇhāpaccayā upādānaṃ…pe… samudayo hotīti.
তত্থ যং মনো, যে চ মনোপুব্বঙ্গমা ধম্মা, যঞ্চ সুখং, ইমে ৰুচ্চন্তি পঞ্চক্খন্ধা, তে দুক্খসচ্চং। তেসং পুরিমকারণভূতা অৰিজ্জা ভৰতণ্হা চ সমুদযসচ্চং। তেসং পরিঞ্ঞায পহানায ভগৰা ধম্মং দেসেতি, দুক্খস্স পরিঞ্ঞায সমুদযস্স পহানায। যেন পরিজানাতি, যেন পজহতি, অযং মগ্গো। যত্থ চ মগ্গো পৰত্ততি, অযং নিরোধো। ইমানি চত্তারি সচ্চানি এৰং আযতনধাতুইন্দ্রিযমুখেনাপি নিদ্ধারেতব্বানি। তত্থ সমুদযেন অস্সাদো, দুক্খেন আদীনৰো, মগ্গনিরোধেহি নিস্সরণং, সুখস্স অন্ৰযো ফলং, মনসা পসন্নেন কাযৰচীসমীহা উপাযো, মনোপুব্বঙ্গমত্তা ধম্মানং অত্তনো সুখকামেন পসন্নেন মনসা ৰচীকম্মং কাযকম্মঞ্চ পৰত্তেতব্বন্তি অযং ভগৰতো আণত্তি। অযং দেসনাহারসম্পাতো।
Tattha yaṃ mano, ye ca manopubbaṅgamā dhammā, yañca sukhaṃ, ime vuccanti pañcakkhandhā, te dukkhasaccaṃ. Tesaṃ purimakāraṇabhūtā avijjā bhavataṇhā ca samudayasaccaṃ. Tesaṃ pariññāya pahānāya bhagavā dhammaṃ deseti, dukkhassa pariññāya samudayassa pahānāya. Yena parijānāti, yena pajahati, ayaṃ maggo. Yattha ca maggo pavattati, ayaṃ nirodho. Imāni cattāri saccāni evaṃ āyatanadhātuindriyamukhenāpi niddhāretabbāni. Tattha samudayena assādo, dukkhena ādīnavo, magganirodhehi nissaraṇaṃ, sukhassa anvayo phalaṃ, manasā pasannena kāyavacīsamīhā upāyo, manopubbaṅgamattā dhammānaṃ attano sukhakāmena pasannena manasā vacīkammaṃ kāyakammañca pavattetabbanti ayaṃ bhagavato āṇatti. Ayaṃ desanāhārasampāto.
তত্থ কতমো ৰিচযহারসম্পাতো? মননতো আরম্মণৰিজাননতো মনো। মননলক্খণে সম্পযুত্তেসু আধিপচ্চকরণতো পুব্বঙ্গমো ঈহাভাৰতো নিস্সত্তনিজ্জীৰট্ঠেন ধম্মা। গামেসু গামণি ৰিয পধানট্ঠেন মনো সেট্ঠো এতেসন্তি মনোসেট্ঠা। সহজাতাদিপচ্চযভূতেন মনসা নিব্বত্তাতি মনোমযা। অকালুস্সিযতো, আরম্মণস্স ওকপ্পনতো চ পসন্নেন ৰচীৰিঞ্ঞত্তিৰিপ্ফারতো তথা সাদিযনতো চ ভাসতি। চোপনকাযৰিপ্ফারতো তথা সাদিযনতো চ করোতি। তথা পসুতত্তা অনঞ্ঞত্তা চ ‘‘ততো’’তি ৰুত্তং। সুখনতো সাতভাৰতো ইট্ঠভাৰতো চ ‘‘সুখ’’ন্তি ৰুত্তং। কতূপচিতত্তা অৰিপক্কৰিপাকত্তা চ ‘‘অন্ৰেতী’’তি ৰুত্তং। কারণাযত্তৰুত্তিতো অসঙ্কন্তিতো চ ‘‘ছাযাৰ অনপাযিনী’’তি ৰুত্তং। অযং অনুপদৰিচযতো ৰিচযহারসম্পাতো।
Tattha katamo vicayahārasampāto? Mananato ārammaṇavijānanato mano. Mananalakkhaṇe sampayuttesu ādhipaccakaraṇato pubbaṅgamo īhābhāvato nissattanijjīvaṭṭhena dhammā. Gāmesu gāmaṇi viya padhānaṭṭhena mano seṭṭho etesanti manoseṭṭhā. Sahajātādipaccayabhūtena manasā nibbattāti manomayā. Akālussiyato, ārammaṇassa okappanato ca pasannena vacīviññattivipphārato tathā sādiyanato ca bhāsati. Copanakāyavipphārato tathā sādiyanato ca karoti. Tathā pasutattā anaññattā ca ‘‘tato’’ti vuttaṃ. Sukhanato sātabhāvato iṭṭhabhāvato ca ‘‘sukha’’nti vuttaṃ. Katūpacitattā avipakkavipākattā ca ‘‘anvetī’’ti vuttaṃ. Kāraṇāyattavuttito asaṅkantito ca ‘‘chāyāva anapāyinī’’ti vuttaṃ. Ayaṃ anupadavicayato vicayahārasampāto.
তত্থ কতমো যুত্তিহারসম্পাতো? মনস্স ধম্মানং আধিপচ্চযোগতো পুব্বঙ্গমতা যুজ্জতি। ততো এৰ তেসং মনস্স অনুৰত্তনতো ধম্মানং মনোসেট্ঠতা যুজ্জতি। সহজাতাদিপচ্চযৰসেন মনসা নিব্বত্তত্তা ধম্মানং মনোমযতা যুজ্জতি। মনসা পসন্নেন সমুট্ঠানানং কাযৰচীকম্মানং কুসলভাৰো যুজ্জতি। যেন কুসলকম্মং উপচিতং, তং ছাযা ৰিয সুখং অন্ৰেতীতি যুজ্জতি। অযং যুত্তিহারসম্পাতো।
Tattha katamo yuttihārasampāto? Manassa dhammānaṃ ādhipaccayogato pubbaṅgamatā yujjati. Tato eva tesaṃ manassa anuvattanato dhammānaṃ manoseṭṭhatā yujjati. Sahajātādipaccayavasena manasā nibbattattā dhammānaṃ manomayatā yujjati. Manasā pasannena samuṭṭhānānaṃ kāyavacīkammānaṃ kusalabhāvo yujjati. Yena kusalakammaṃ upacitaṃ, taṃ chāyā viya sukhaṃ anvetīti yujjati. Ayaṃ yuttihārasampāto.
তত্থ কতমো পদট্ঠানো হারসম্পাতো? মনো মনোপৰিচারানং পদট্ঠানং। মনোপুব্বঙ্গমা ধম্মা সব্বস্স কুসলপক্খস্স পদট্ঠানং। ‘‘ভাসতী’’তি সম্মাৰাচা, ‘‘করোতী’’তি সম্মাকম্মন্তো, তে সম্মাআজীৰস্স পদট্ঠানং। সম্মাআজীৰো সম্মাৰাযামস্স পদট্ঠানং। সম্মাৰাযামো সম্মাসতিযা পদট্ঠানং। সম্মাসতি সম্মাসমাধিস্স পদট্ঠানং। ‘‘মনসা পসন্নেনা’’তি এত্থ পসাদো সদ্ধিন্দ্রিযং, তং সীলস্স পদট্ঠানং। সীলং সমাধিস্স পদট্ঠানং। সমাধি পঞ্ঞাযাতি যাৰ ৰিমুত্তিঞাণদস্সনা যোজেতব্বং। অযং পদট্ঠানহারসম্পাতো।
Tattha katamo padaṭṭhāno hārasampāto? Mano manopavicārānaṃ padaṭṭhānaṃ. Manopubbaṅgamā dhammā sabbassa kusalapakkhassa padaṭṭhānaṃ. ‘‘Bhāsatī’’ti sammāvācā, ‘‘karotī’’ti sammākammanto, te sammāājīvassa padaṭṭhānaṃ. Sammāājīvo sammāvāyāmassa padaṭṭhānaṃ. Sammāvāyāmo sammāsatiyā padaṭṭhānaṃ. Sammāsati sammāsamādhissa padaṭṭhānaṃ. ‘‘Manasā pasannenā’’ti ettha pasādo saddhindriyaṃ, taṃ sīlassa padaṭṭhānaṃ. Sīlaṃ samādhissa padaṭṭhānaṃ. Samādhi paññāyāti yāva vimuttiñāṇadassanā yojetabbaṃ. Ayaṃ padaṭṭhānahārasampāto.
তত্থ কতমো লক্খণো হারসম্পাতো? ‘‘মনোপুব্বঙ্গমা ধম্মা’’তি মনোপুব্বঙ্গমতাৰচনেন ধম্মানং ছন্দপুব্বঙ্গমতাপি ৰীরিযপুব্বঙ্গমতাপি ৰীমংসাপুব্বঙ্গমতাপি ৰুত্তা হোতি আধিপতেয্যলক্খণেন ছন্দাদীনং মনসা একলক্খণত্তা। তথা নেসং সদ্ধাদিপুব্বঙ্গমতাপি ৰুত্তা হোতি ইন্দ্রিযলক্খণেন সদ্ধাদীনং মনসা একলক্খণত্তা। ‘‘মনসা চে পসন্নেনা’’তি যথা মনস্স পসাদসমন্নাগমো তংসমুট্ঠানানং কাযৰচীকম্মানং অনৰজ্জভাৰলক্খণং। এৰং চিত্তস্স সতিআদিসমন্নাগমোপি নেসং অনৰজ্জভাৰলক্খণং যোনিসোমনসিকারসমুট্ঠানভাৰেন একলক্খণত্তা। ‘‘সুখমন্ৰেতী’’তি সুখানুগমনৰচনেন সুখস্স পচ্চযভূতানং মনাপিযরূপাদীনং অনুগমো ৰুত্তো হোতি তেসম্পি কম্মপচ্চযতায একলক্খণত্তাতি। অযং লক্খণহারসম্পাতো।
Tattha katamo lakkhaṇo hārasampāto? ‘‘Manopubbaṅgamā dhammā’’ti manopubbaṅgamatāvacanena dhammānaṃ chandapubbaṅgamatāpi vīriyapubbaṅgamatāpi vīmaṃsāpubbaṅgamatāpi vuttā hoti ādhipateyyalakkhaṇena chandādīnaṃ manasā ekalakkhaṇattā. Tathā nesaṃ saddhādipubbaṅgamatāpi vuttā hoti indriyalakkhaṇena saddhādīnaṃ manasā ekalakkhaṇattā. ‘‘Manasā ce pasannenā’’ti yathā manassa pasādasamannāgamo taṃsamuṭṭhānānaṃ kāyavacīkammānaṃ anavajjabhāvalakkhaṇaṃ. Evaṃ cittassa satiādisamannāgamopi nesaṃ anavajjabhāvalakkhaṇaṃ yonisomanasikārasamuṭṭhānabhāvena ekalakkhaṇattā. ‘‘Sukhamanvetī’’ti sukhānugamanavacanena sukhassa paccayabhūtānaṃ manāpiyarūpādīnaṃ anugamo vutto hoti tesampi kammapaccayatāya ekalakkhaṇattāti. Ayaṃ lakkhaṇahārasampāto.
তত্থ কতমো চতুব্যূহো হারসম্পাতো? ‘‘মনোপুব্বঙ্গমা’’তিআদীসু ‘‘মনো’’তিআদীনং পদানং নিব্বচনং নিরুত্তং, তং পদত্থনিদ্দেসৰসেন ৰেদিতব্বং। পদত্থো চ ৰুত্তনযেন সুৰিঞ্ঞেয্যোৰ। যে সুখেন অত্থিকা, তেহি পসন্নেন মনসা কাযৰচীমনোকম্মানি পৰত্তেতব্বানীতি অযমেত্থ ভগৰতো অধিপ্পাযো। পুঞ্ঞকিরিযায অঞ্ঞেসম্পি পুব্বঙ্গমা হুত্ৰা তত্থ তেসং সম্মা উপনেতারো ইমিস্সা দেসনায নিদানং। ‘‘ছদ্ৰারাধিপতী রাজা (ধ॰ প॰ অট্ঠ॰ ২.১৮১ এরকপত্তনাগরাজৰত্থু), চিত্তানুপরিৰত্তিনো ধম্মা (ধ॰ স॰ দুকমাতিকা ৬২; ১২০৫-১২০৬), চিত্তস্স একধম্মস্স, সব্বেৰ ৰসমন্ৰগূ’’তি (সং॰ নি॰ ১.৬২) এৰমাদিসমানযনেন ইমিস্সা দেসনায সংসন্দনা দেসনানুসন্ধি। পদানুসন্ধিযো পন সুৰিঞ্ঞেয্যাৰাতি। অযং চতুব্যূহো হারসম্পাতো।
Tattha katamo catubyūho hārasampāto? ‘‘Manopubbaṅgamā’’tiādīsu ‘‘mano’’tiādīnaṃ padānaṃ nibbacanaṃ niruttaṃ, taṃ padatthaniddesavasena veditabbaṃ. Padattho ca vuttanayena suviññeyyova. Ye sukhena atthikā, tehi pasannena manasā kāyavacīmanokammāni pavattetabbānīti ayamettha bhagavato adhippāyo. Puññakiriyāya aññesampi pubbaṅgamā hutvā tattha tesaṃ sammā upanetāro imissā desanāya nidānaṃ. ‘‘Chadvārādhipatī rājā (dha. pa. aṭṭha. 2.181 erakapattanāgarājavatthu), cittānuparivattino dhammā (dha. sa. dukamātikā 62; 1205-1206), cittassa ekadhammassa, sabbeva vasamanvagū’’ti (saṃ. ni. 1.62) evamādisamānayanena imissā desanāya saṃsandanā desanānusandhi. Padānusandhiyo pana suviññeyyāvāti. Ayaṃ catubyūho hārasampāto.
তত্থ কতমো আৰট্টো হারসম্পাতো? ‘‘মনোপুব্বঙ্গমা ধম্মা’’তি তত্থ যানি তীণি কুসলমূলানি, তানি অট্ঠন্নং সম্মত্তানং হেতু। যে সম্মত্তা, অযং অট্ঠঙ্গিকো মগ্গো। যং মনোসহজনামরূপং, ইদং দুক্খং। অসমুচ্ছিন্না পুরিমনিপ্ফন্না অৰিজ্জা ভৰতণ্হা, অযং সমুদযো। যত্থ তেসং পহানং, অযং নিরোধোতি ইমানি চত্তারি সচ্চানি। অযং আৰট্টো হারসম্পাতো।
Tattha katamo āvaṭṭo hārasampāto? ‘‘Manopubbaṅgamā dhammā’’ti tattha yāni tīṇi kusalamūlāni, tāni aṭṭhannaṃ sammattānaṃ hetu. Ye sammattā, ayaṃ aṭṭhaṅgiko maggo. Yaṃ manosahajanāmarūpaṃ, idaṃ dukkhaṃ. Asamucchinnā purimanipphannā avijjā bhavataṇhā, ayaṃ samudayo. Yattha tesaṃ pahānaṃ, ayaṃ nirodhoti imāni cattāri saccāni. Ayaṃ āvaṭṭo hārasampāto.
তত্থ কতমো ৰিভত্তিহারসম্পাতো? ‘‘মনোপুব্বঙ্গমা ধম্মা, মনসা চে পসন্নেন, ততো নং সুখমন্ৰেতী’’তি নযিদং যথারুতৰসেন গহেতব্বং। যো হি সমণো ৰা ব্রাহ্মণো ৰা পাণাতিপাতিম্হি মিচ্ছাদিট্ঠিকে মিচ্ছাপটিপন্নে সকং চিত্তং পসাদেতি, পসন্নেন চ চিত্তেন অভূতগুণাভিত্থৰনৰসেন ভাসতি ৰা নিপচ্চকারং ৰাস্স যং করোতি, ন ততো নং সুখমন্ৰেতি। দুক্খমেৰ পন তং ততো চক্কংৰ ৰহতো পদমন্ৰেতি। ইতি হি ইদং ৰিভজ্জব্যাকরণীযং। যং মনসা চে পসন্নেন ভাসতি ৰা করোতি ৰা, তঞ্চে ৰচীকম্মং কাযকম্মঞ্চ সুখৰেদনীযন্তি। তং কিস্স হেতু? সম্মত্তগতেহি সুখৰেদনীযং মিচ্ছাগতেহি দুক্খৰেদনীযন্তি। কথং পনাযং পসাদো দট্ঠব্বো? নাযং পসাদো, পসাদপতিরূপকো পন মিচ্ছাধিমোক্খোতি ৰদামি। অযং ৰিভত্তিহারসম্পাতো।
Tattha katamo vibhattihārasampāto? ‘‘Manopubbaṅgamā dhammā, manasā ce pasannena, tato naṃ sukhamanvetī’’ti nayidaṃ yathārutavasena gahetabbaṃ. Yo hi samaṇo vā brāhmaṇo vā pāṇātipātimhi micchādiṭṭhike micchāpaṭipanne sakaṃ cittaṃ pasādeti, pasannena ca cittena abhūtaguṇābhitthavanavasena bhāsati vā nipaccakāraṃ vāssa yaṃ karoti, na tato naṃ sukhamanveti. Dukkhameva pana taṃ tato cakkaṃva vahato padamanveti. Iti hi idaṃ vibhajjabyākaraṇīyaṃ. Yaṃ manasā ce pasannena bhāsati vā karoti vā, tañce vacīkammaṃ kāyakammañca sukhavedanīyanti. Taṃ kissa hetu? Sammattagatehi sukhavedanīyaṃ micchāgatehi dukkhavedanīyanti. Kathaṃ panāyaṃ pasādo daṭṭhabbo? Nāyaṃ pasādo, pasādapatirūpako pana micchādhimokkhoti vadāmi. Ayaṃ vibhattihārasampāto.
তত্থ কতমো পরিৰত্তনো হারসম্পাতো? মনোপুব্বঙ্গমাতিআদি। যং মনসা পদুট্ঠেন ভাসতি ৰা করোতি ৰা দুক্খস্সানুগামী। ইদঞ্হি সুত্তং এতস্স উজুপটিপক্খো। অযং পরিৰত্তনো হারসম্পাতো।
Tattha katamo parivattano hārasampāto? Manopubbaṅgamātiādi. Yaṃ manasā paduṭṭhena bhāsati vā karoti vā dukkhassānugāmī. Idañhi suttaṃ etassa ujupaṭipakkho. Ayaṃ parivattano hārasampāto.
তত্থ কতমো ৰেৰচনো হারসম্পাতো? ‘‘মনোপুব্বঙ্গমা’’তি মনো চিত্তং মনাযতনং মনিন্দ্রিযং মনোৰিঞ্ঞাণং মনোৰিঞ্ঞাণধাতূতি পরিযাযৰচনং। পুব্বঙ্গমা পুরেচারিনো পুরেগামিনোতি পরিযাযৰচনং। ধম্মা অত্তা সভাৰাতি পরিযাযৰচনং। সেট্ঠং পধানং পৰরন্তি পরিযাযৰচনং। মনোমযা মনোনিব্বত্তা মনোসম্ভূতাতি পরিযাযৰচনং। পসন্নেন সদ্দহন্তেন ওকপ্পেন্তেনাতি পরিযাযৰচনং। সুখং সাতং ৰেদযিতন্তি পরিযাযৰচনং। অন্ৰেতি অনুগচ্ছতি অনুবন্ধতীতি পরিযাযৰচনং। অযং ৰেৰচনো হারসম্পাতো।
Tattha katamo vevacano hārasampāto? ‘‘Manopubbaṅgamā’’ti mano cittaṃ manāyatanaṃ manindriyaṃ manoviññāṇaṃ manoviññāṇadhātūti pariyāyavacanaṃ. Pubbaṅgamā purecārino puregāminoti pariyāyavacanaṃ. Dhammā attā sabhāvāti pariyāyavacanaṃ. Seṭṭhaṃ padhānaṃ pavaranti pariyāyavacanaṃ. Manomayā manonibbattā manosambhūtāti pariyāyavacanaṃ. Pasannena saddahantena okappentenāti pariyāyavacanaṃ. Sukhaṃ sātaṃ vedayitanti pariyāyavacanaṃ. Anveti anugacchati anubandhatīti pariyāyavacanaṃ. Ayaṃ vevacano hārasampāto.
তত্থ কতমো পঞ্ঞত্তিহারসম্পাতো? মনোপুব্বঙ্গমাতি অযং মনসো কিচ্চপঞ্ঞত্তি। ধম্মাতি সভাৰপঞ্ঞত্তি, কুসলকম্মপথপঞ্ঞত্তি। মনোসেট্ঠাতি পধানপঞ্ঞত্তি। মনোমযাতি সহজাতপঞ্ঞত্তি। পসন্নেনাতি সদ্ধিন্দ্রিযেন সমন্নাগতপঞ্ঞত্তি, অস্সদ্ধিযস্স পটিক্খেপপঞ্ঞত্তি। ভাসতি ৰা করোতি ৰাতি সম্মাৰাচাসম্মাকম্মন্তানং নিক্খেপপঞ্ঞত্তি। ততো নং সুখমন্ৰেতীতি কম্মস্স ফলানুবন্ধপঞ্ঞত্তি, কম্মস্স অৰিনাসপঞ্ঞত্তীতি। অযং পঞ্ঞত্তিহারসম্পাতো।
Tattha katamo paññattihārasampāto? Manopubbaṅgamāti ayaṃ manaso kiccapaññatti. Dhammāti sabhāvapaññatti, kusalakammapathapaññatti. Manoseṭṭhāti padhānapaññatti. Manomayāti sahajātapaññatti. Pasannenāti saddhindriyena samannāgatapaññatti, assaddhiyassa paṭikkhepapaññatti. Bhāsati vā karoti vāti sammāvācāsammākammantānaṃ nikkhepapaññatti. Tato naṃ sukhamanvetīti kammassa phalānubandhapaññatti, kammassa avināsapaññattīti. Ayaṃ paññattihārasampāto.
তত্থ কতমো ওতরণো হারসম্পাতো? মনোতি ৰিঞ্ঞাণক্খন্ধো। ধম্মাতি ৰেদনাসঞ্ঞাসঙ্খারক্খন্ধা। ভাসতি ৰা করোতি ৰাতি কাযৰচীৰিঞ্ঞত্তিযো। তাসং নিস্সযা চত্তারো মহাভূতাতি রূপক্খন্ধোতি অযং খন্ধেহি ওতরণো। মনোতি অভিসঙ্খারৰিঞ্ঞাণন্তি মনোগ্গহণেন অৰিজ্জাপচ্চযা সঙ্খারা গহিতাতি। সঙ্খারপচ্চযা ৰিঞ্ঞাণং…পে॰… সমুদযো হোতীতি অযং পটিচ্চসমুপ্পাদেন ওতরণোতি। অযং ওতরণো হারসম্পাতো।
Tattha katamo otaraṇo hārasampāto? Manoti viññāṇakkhandho. Dhammāti vedanāsaññāsaṅkhārakkhandhā. Bhāsati vā karoti vāti kāyavacīviññattiyo. Tāsaṃ nissayā cattāro mahābhūtāti rūpakkhandhoti ayaṃ khandhehi otaraṇo. Manoti abhisaṅkhāraviññāṇanti manoggahaṇena avijjāpaccayā saṅkhārā gahitāti. Saṅkhārapaccayā viññāṇaṃ…pe… samudayo hotīti ayaṃ paṭiccasamuppādena otaraṇoti. Ayaṃ otaraṇo hārasampāto.
তত্থ কতমো সোধনো হারসম্পাতো? মনোতি আরম্ভো নেৰ পদসুদ্ধি, ন আরম্ভসুদ্ধি। মনোপুব্বঙ্গমাতি পদসুদ্ধি, ন আরম্ভসুদ্ধি। তথা ধম্মাতি যাৰ সুখন্তি পদসুদ্ধি, ন আরম্ভসুদ্ধি। সুখমন্ৰেতীতি পন পদসুদ্ধি চেৰ আরম্ভসুদ্ধি চাতি। অযং সোধনো হারসম্পাতো।
Tattha katamo sodhano hārasampāto? Manoti ārambho neva padasuddhi, na ārambhasuddhi. Manopubbaṅgamāti padasuddhi, na ārambhasuddhi. Tathā dhammāti yāva sukhanti padasuddhi, na ārambhasuddhi. Sukhamanvetīti pana padasuddhi ceva ārambhasuddhi cāti. Ayaṃ sodhano hārasampāto.
তত্থ কতমো অধিট্ঠানো হারসম্পাতো? মনোপুব্বঙ্গমা ধম্মা, মনোসেট্ঠা মনোমযাতি একত্ততা। মনসা চে পসন্নেনাতি ৰেমত্ততা, তথা মনসা চে পসন্নেনাতি একত্ততা। ভাসতি ৰা করোতি ৰাতি ৰেমত্ততা, তথা মনসা চে পসন্নেনাতি একত্ততা। সো পসাদো দুৰিধো অজ্ঝত্তঞ্চ ব্যাপাদৰিক্খম্ভনতো, বহিদ্ধা চ ওকপ্পনতো। তথা সম্পত্তিভৰহেতুভূতোপি ৰড্ঢিহেতুভূতোৰাতি অযং ৰেমত্ততা। তযিদং সুত্তং দ্ৰীহি আকারেহি অধিট্ঠাতব্বং হেতুনা চ যো পসন্নমানসো, ৰিপাকেন চ যো সুখৰেদনীযোতি। অযং অধিট্ঠানো হারসম্পাতো।
Tattha katamo adhiṭṭhāno hārasampāto? Manopubbaṅgamā dhammā, manoseṭṭhā manomayāti ekattatā. Manasā ce pasannenāti vemattatā, tathā manasā ce pasannenāti ekattatā. Bhāsati vā karoti vāti vemattatā, tathā manasā ce pasannenāti ekattatā. So pasādo duvidho ajjhattañca byāpādavikkhambhanato, bahiddhā ca okappanato. Tathā sampattibhavahetubhūtopi vaḍḍhihetubhūtovāti ayaṃ vemattatā. Tayidaṃ suttaṃ dvīhi ākārehi adhiṭṭhātabbaṃ hetunā ca yo pasannamānaso, vipākena ca yo sukhavedanīyoti. Ayaṃ adhiṭṭhāno hārasampāto.
তত্থ কতমো পরিক্খারো হারসম্পাতো? মনোপুব্বঙ্গমাতি এত্থ মনোতি কুসলৰিঞ্ঞাণং। তস্স চ ঞাণসম্পযুত্তস্স অলোভো অদোসো অমোহোতি তযো সম্পযুত্তা হেতূ, ঞাণৰিপ্পযুত্তস্স অলোভো অদোসোতি দ্ৰে সম্পযুত্তা হেতূ। সব্বেসং অৰিসেসেন যোনিসোমনসিকারো হেতু, চত্তারি সম্পত্তিচক্কানি পচ্চযো। তথা সদ্ধম্মস্সৰনং, তস্স চ দানাদিৰসেন পৰত্তমানস্স দেয্যধম্মাদযো পচ্চযো। ধম্মাতি চেত্থ ৰেদনাদীনং ইট্ঠারম্মণাদযো। তথা তযো ৰিঞ্ঞাণস্স, ৰেদনাদযো পসাদস্স, সদ্ধেয্যৰত্থুকুসলাভিসঙ্খারো ৰিপাকসুখস্স পচ্চযোতি। অযং পরিক্খারো হারসম্পাতো।
Tattha katamo parikkhāro hārasampāto? Manopubbaṅgamāti ettha manoti kusalaviññāṇaṃ. Tassa ca ñāṇasampayuttassa alobho adoso amohoti tayo sampayuttā hetū, ñāṇavippayuttassa alobho adosoti dve sampayuttā hetū. Sabbesaṃ avisesena yonisomanasikāro hetu, cattāri sampatticakkāni paccayo. Tathā saddhammassavanaṃ, tassa ca dānādivasena pavattamānassa deyyadhammādayo paccayo. Dhammāti cettha vedanādīnaṃ iṭṭhārammaṇādayo. Tathā tayo viññāṇassa, vedanādayo pasādassa, saddheyyavatthukusalābhisaṅkhāro vipākasukhassa paccayoti. Ayaṃ parikkhāro hārasampāto.
তত্থ কতমো সমারোপনো হারসম্পাতো? মনোপুব্বঙ্গমা ধম্মাতি মনোতি পুঞ্ঞচিত্তং, তং তিৰিধং – দানমযং, সীলমযং, ভাৰনামযন্তি। তত্থ দানমযস্স অলোভো পদট্ঠানং, সীলমযস্স অদোসো পদট্ঠানং, ভাৰনামযস্স অমোহো পদট্ঠানং। সব্বেসং অভিপ্পসাদো পদট্ঠানং, ‘‘সদ্ধাজাতো উপসঙ্কমতি, উপসঙ্কমন্তো পযিরুপাসতী’’তি (ম॰ নি॰ ২.১৮৩) সুত্তং ৰিত্থারেতব্বং। কুসলচিত্তং সুখস্স ইট্ঠৰিপাকস্স পদট্ঠানং। যোনিসোমনসিকারো কুসলচিত্তস্স পদট্ঠানং। যোনিসো হি মনসি করোন্তো কুসলচিত্তং অধিট্ঠাতি কুসলচিত্তং ভাৰেতি, সো অনুপ্পন্নানং পাপকানং অকুসলানং ধম্মানং অনুপ্পাদায ছন্দং জনেতি, উপ্পন্নানং কুসলানং ধম্মানং…পে॰… পদহতি। তস্সেৰং চতূসু সম্মপ্পধানেসু ভাৰিযমানেসু চত্তারো সতিপট্ঠানা যাৰ অরিযো অট্ঠঙ্গিকো মগ্গো ভাৰনাপারিপূরিং গচ্ছতীতি অযং ভাৰনায সমারোপনা। সতি চ ভাৰনায পহানঞ্চ সিদ্ধমেৰাতি। অযং সমারোপনো হারসম্পাতো।
Tattha katamo samāropano hārasampāto? Manopubbaṅgamā dhammāti manoti puññacittaṃ, taṃ tividhaṃ – dānamayaṃ, sīlamayaṃ, bhāvanāmayanti. Tattha dānamayassa alobho padaṭṭhānaṃ, sīlamayassa adoso padaṭṭhānaṃ, bhāvanāmayassa amoho padaṭṭhānaṃ. Sabbesaṃ abhippasādo padaṭṭhānaṃ, ‘‘saddhājāto upasaṅkamati, upasaṅkamanto payirupāsatī’’ti (ma. ni. 2.183) suttaṃ vitthāretabbaṃ. Kusalacittaṃ sukhassa iṭṭhavipākassa padaṭṭhānaṃ. Yonisomanasikāro kusalacittassa padaṭṭhānaṃ. Yoniso hi manasi karonto kusalacittaṃ adhiṭṭhāti kusalacittaṃ bhāveti, so anuppannānaṃ pāpakānaṃ akusalānaṃ dhammānaṃ anuppādāya chandaṃ janeti, uppannānaṃ kusalānaṃ dhammānaṃ…pe… padahati. Tassevaṃ catūsu sammappadhānesu bhāviyamānesu cattāro satipaṭṭhānā yāva ariyo aṭṭhaṅgiko maggo bhāvanāpāripūriṃ gacchatīti ayaṃ bhāvanāya samāropanā. Sati ca bhāvanāya pahānañca siddhamevāti. Ayaṃ samāropano hārasampāto.
তথা –
Tathā –
‘‘দদতো পুঞ্ঞং পৰড্ঢতি, সংযমতো ৰেরং ন চীযতি।
‘‘Dadato puññaṃ pavaḍḍhati, saṃyamato veraṃ na cīyati;
কুসলো চ জহাতি পাপকং, রাগদোসমোহক্খযা স নিব্বুতো’’তি॥ (দী॰ নি॰ ২.১৯৭; উদা॰ ৭৫; পেটকো॰ ১৬)।
Kusalo ca jahāti pāpakaṃ, rāgadosamohakkhayā sa nibbuto’’ti. (dī. ni. 2.197; udā. 75; peṭako. 16);
তত্থ দদতো পুঞ্ঞং পৰড্ঢতীতি দানমযং পুঞ্ঞকিরিযৰত্থু ৰুত্তং। সংযমতো ৰেরং ন চীযতীতি সীলমযং পুঞ্ঞকিরিযৰত্থু ৰুত্তং। কুসলো চ জহাতি পাপকন্তি লোভস্স চ দোসস্স চ মোহস্স চ পহানমাহ। তেন ভাৰনামযং পুঞ্ঞকিরিযৰত্থু ৰুত্তং। রাগদোসমোহক্খযা স নিব্বুতোতি অনুপাদাপরিনিব্বানমাহ।
Tattha dadato puññaṃ pavaḍḍhatīti dānamayaṃ puññakiriyavatthu vuttaṃ. Saṃyamato veraṃ na cīyatīti sīlamayaṃ puññakiriyavatthu vuttaṃ. Kusalo ca jahāti pāpakanti lobhassa ca dosassa ca mohassa ca pahānamāha. Tena bhāvanāmayaṃ puññakiriyavatthu vuttaṃ. Rāgadosamohakkhayā sa nibbutoti anupādāparinibbānamāha.
দদতো পুঞ্ঞং পৰড্ঢতীতি অলোভো কুসলমূলং। সংযমতো ৰেরং ন চীযতীতি অদোসো কুসলমূলং। কুসলো চ জহাতি পাপকন্তি অমোহো কুসলমূলং। রাগদোসমোহক্খযা স নিব্বুতোতি তেসং নিস্সরণং ৰুত্তং।
Dadato puññaṃ pavaḍḍhatīti alobho kusalamūlaṃ. Saṃyamato veraṃ na cīyatīti adoso kusalamūlaṃ. Kusalo ca jahāti pāpakanti amoho kusalamūlaṃ. Rāgadosamohakkhayā sa nibbutoti tesaṃ nissaraṇaṃ vuttaṃ.
দদতো পুঞ্ঞং পৰড্ঢতীতি সীলক্খন্ধস্স পদট্ঠানং। সংযমতো ৰেরং ন চীযতীতি সমাধিক্খন্ধস্স পদট্ঠানং। কুসলো চ জহাতি পাপকন্তি পঞ্ঞাক্খন্ধস্স ৰিমুত্তিক্খন্ধস্স পদট্ঠানং। দানেন ওল়ারিকানং কিলেসানং পহানং, সীলেন মজ্ঝিমানং, পঞ্ঞায সুখুমানং। রাগদোসমোহক্খযা স নিব্বুতোতি কতাৰীভূমিং দস্সেতি।
Dadato puññaṃ pavaḍḍhatīti sīlakkhandhassa padaṭṭhānaṃ. Saṃyamato veraṃ na cīyatīti samādhikkhandhassa padaṭṭhānaṃ. Kusalo ca jahāti pāpakanti paññākkhandhassa vimuttikkhandhassa padaṭṭhānaṃ. Dānena oḷārikānaṃ kilesānaṃ pahānaṃ, sīlena majjhimānaṃ, paññāya sukhumānaṃ. Rāgadosamohakkhayā sa nibbutoti katāvībhūmiṃ dasseti.
দদতো পুঞ্ঞং…পে॰… জহাতি পাপকন্তি সেক্খভূমি দস্সিতা। রাগদোসমোহক্খযা স নিব্বুতোতি অগ্গফলং ৰুত্তং।
Dadato puññaṃ…pe… jahāti pāpakanti sekkhabhūmi dassitā. Rāgadosamohakkhayā sa nibbutoti aggaphalaṃ vuttaṃ.
তথা দদতো পুঞ্ঞং…পে॰… ন চীযতীতি লোকিযকুসলমূলং ৰুত্তং। কুসলো চ জহাতি পাপকন্তি লোকুত্তরকুসলমূলং ৰুত্তং। রাগদোসমোহক্খযা স নিব্বুতোতি লোকুত্তরস্স কুসলমূলস্স ফলং ৰুত্তং।
Tathā dadato puññaṃ…pe… na cīyatīti lokiyakusalamūlaṃ vuttaṃ. Kusalo ca jahāti pāpakanti lokuttarakusalamūlaṃ vuttaṃ. Rāgadosamohakkhayā sa nibbutoti lokuttarassa kusalamūlassa phalaṃ vuttaṃ.
দদতো…পে॰… ন চীযতীতি পুথুজ্জনভূমি দস্সিতা। কুসলো চ জহাতি পাপকন্তি সেক্খভূমি দস্সিতা। রাগদোসমোহক্খযা স নিব্বুতোতি অসেক্খভূমি দস্সিতা।
Dadato…pe… na cīyatīti puthujjanabhūmi dassitā. Kusalo ca jahāti pāpakanti sekkhabhūmi dassitā. Rāgadosamohakkhayā sa nibbutoti asekkhabhūmi dassitā.
দদতো …পে॰… ন চীযতীতি সগ্গগামিনী পটিপদা ৰুত্তা। কুসলো চ জহাতি পাপকন্তি সেক্খৰিমুত্তি। রাগদোসমোহক্খযা স নিব্বুতোতি অসেক্খৰিমুত্তি ৰুত্তা।
Dadato …pe… na cīyatīti saggagāminī paṭipadā vuttā. Kusalo ca jahāti pāpakanti sekkhavimutti. Rāgadosamohakkhayā sa nibbutoti asekkhavimutti vuttā.
দদতো…পে॰… ন চীযতীতি দানকথং সীলকথং সগ্গকথং লোকিযানং ধম্মানং দেসনমাহ। কুসলো চ জহাতি পাপকন্তি লোকে আদীনৰানুপস্সনায সদ্ধিং সামুক্কংসিকং ধম্মদেসনমাহ। রাগদোসমোহক্খযা স নিব্বুতোতি তস্সা দেসনায ফলমাহ।
Dadato…pe… na cīyatīti dānakathaṃ sīlakathaṃ saggakathaṃ lokiyānaṃ dhammānaṃ desanamāha. Kusalo ca jahāti pāpakanti loke ādīnavānupassanāya saddhiṃ sāmukkaṃsikaṃ dhammadesanamāha. Rāgadosamohakkhayā sa nibbutoti tassā desanāya phalamāha.
দদতো পুঞ্ঞং পৰড্ঢতীতি ধম্মদানং আমিসদানঞ্চ ৰদতি। সংযমতো ৰেরং ন চীযতীতি পাণাতিপাতা ৰেরমণিযা সত্তানং অভযদানং ৰদতি। এৰং সব্বানিপি সিক্খাপদানি ৰিত্থারেতব্বানি। তেন চ সীলসংযমেন সীলে পতিট্ঠিতো চিত্তং সংযমেতি, তস্স সমথো পারিপূরিং গচ্ছতি। এৰং সো সমথে ঠিতো ৰিপস্সনাকোসল্লযোগতো কুসলো চ জহাতি পাপকং রাগং জহাতি, দোসং জহাতি, মোহং জহাতি, অরিযমগ্গেন সব্বেপি পাপকে অকুসলে ধম্মে জহাতি। এৰং পটিপন্নো চ রাগদোসমোহক্খযা স নিব্বুতোতি রাগাদীনং পরিক্খযা দ্ৰেপি ৰিমুত্তিযো অধিগচ্ছতীতি অযং সুত্তনিদ্দেসো।
Dadato puññaṃ pavaḍḍhatīti dhammadānaṃ āmisadānañca vadati. Saṃyamato veraṃ na cīyatīti pāṇātipātā veramaṇiyā sattānaṃ abhayadānaṃ vadati. Evaṃ sabbānipi sikkhāpadāni vitthāretabbāni. Tena ca sīlasaṃyamena sīle patiṭṭhito cittaṃ saṃyameti, tassa samatho pāripūriṃ gacchati. Evaṃ so samathe ṭhito vipassanākosallayogato kusalo ca jahāti pāpakaṃ rāgaṃ jahāti, dosaṃ jahāti, mohaṃ jahāti, ariyamaggena sabbepi pāpake akusale dhamme jahāti. Evaṃ paṭipanno ca rāgadosamohakkhayā sa nibbutoti rāgādīnaṃ parikkhayā dvepi vimuttiyo adhigacchatīti ayaṃ suttaniddeso.
তত্থ কতমো দেসনাহারসম্পাতো? ইমস্মিং সুত্তে কিং দেসিতং? দ্ৰে সুগতিযো দেৰা চ মনুস্সা চ, দিব্বা চ পঞ্চ কামগুণা, মানুসকা চ পঞ্চ কামগুণা, দিব্বা চ পঞ্চুপাদানক্খন্ধা, মানুসকা চ পঞ্চুপাদানক্খন্ধা। ইদং ৰুচ্চতি দুক্খং অরিযসচ্চং। তস্স কারণভাৰেন পুরিমপুরিমনিপ্ফন্না তণ্হা সমুদযো অরিযসচ্চং। তযিদং ৰুচ্চতি অস্সাদো চ আদীনৰো চ। সব্বস্স পুরিমেহি দ্ৰীহি পদেহি নিদ্দেসো ‘‘দদতো…পে॰… ন চীযতী’’তি। কুসলো চ জহাতি পাপকন্তি মগ্গো ৰুত্তো। রাগদোসমোহক্খযা স নিব্বুতোতি দ্ৰে নিব্বানধাতুযো সউপাদিসেসা চ অনুপাদিসেসা চ। ইদং নিস্সরণং। ফলাদীনি পন যথারহং ৰেদিতব্বানীতি। অযং দেসনাহারসম্পাতো।
Tattha katamo desanāhārasampāto? Imasmiṃ sutte kiṃ desitaṃ? Dve sugatiyo devā ca manussā ca, dibbā ca pañca kāmaguṇā, mānusakā ca pañca kāmaguṇā, dibbā ca pañcupādānakkhandhā, mānusakā ca pañcupādānakkhandhā. Idaṃ vuccati dukkhaṃ ariyasaccaṃ. Tassa kāraṇabhāvena purimapurimanipphannā taṇhā samudayo ariyasaccaṃ. Tayidaṃ vuccati assādo ca ādīnavo ca. Sabbassa purimehi dvīhi padehi niddeso ‘‘dadato…pe… na cīyatī’’ti. Kusalo ca jahāti pāpakanti maggo vutto. Rāgadosamohakkhayā sa nibbutoti dve nibbānadhātuyo saupādisesā ca anupādisesā ca. Idaṃ nissaraṇaṃ. Phalādīni pana yathārahaṃ veditabbānīti. Ayaṃ desanāhārasampāto.
ৰিচযোতি ‘‘দদতো পুঞ্ঞং পৰড্ঢতী’’তি ইমিনা পঠমেন পদেন তিৰিধম্পি দানমযং সীলমযং ভাৰনামযং পুঞ্ঞকিরিযৰত্থু ৰুত্তং। দসৰিধস্সপি দেয্যধম্মস্স পরিচ্চাগো ৰুত্তো। তথা ছব্বিধস্সপি রূপাদিআরম্মণস্স। ‘‘সংযমতো ৰেরং ন চীযতী’’তি দুতিযেন পদেন অৰেরা অসপত্তা অব্যাপাদা চ পটিপদা ৰুত্তা। ‘‘কুসলো চ জহাতি পাপক’’ন্তি ততিযেন পদেন ঞাণুপ্পাদো অঞ্ঞাণনিরোধো সব্বোপি অরিযো অট্ঠঙ্গিকো মগ্গো সব্বেপি বোধিপক্খিযা ধম্মা ৰুত্তা । ‘‘রাগদোসমোহক্খযা স নিব্বুতো’’তি রাগক্খযেন রাগৰিরাগা চেতোৰিমুত্তি, মোহক্খযেন অৰিজ্জাৰিরাগা পঞ্ঞাৰিমুত্তি ৰুত্তাতি। অযং ৰিচযো হারসম্পাতো।
Vicayoti ‘‘dadato puññaṃ pavaḍḍhatī’’ti iminā paṭhamena padena tividhampi dānamayaṃ sīlamayaṃ bhāvanāmayaṃ puññakiriyavatthu vuttaṃ. Dasavidhassapi deyyadhammassa pariccāgo vutto. Tathā chabbidhassapi rūpādiārammaṇassa. ‘‘Saṃyamato veraṃ na cīyatī’’ti dutiyena padena averā asapattā abyāpādā ca paṭipadā vuttā. ‘‘Kusalo ca jahāti pāpaka’’nti tatiyena padena ñāṇuppādo aññāṇanirodho sabbopi ariyo aṭṭhaṅgiko maggo sabbepi bodhipakkhiyā dhammā vuttā . ‘‘Rāgadosamohakkhayā sa nibbuto’’ti rāgakkhayena rāgavirāgā cetovimutti, mohakkhayena avijjāvirāgā paññāvimutti vuttāti. Ayaṃ vicayo hārasampāto.
যুত্তীতি দানে ঠিতো উভযং পরিপূরেতি মচ্ছরিযপ্পহানঞ্চ পুঞ্ঞাভিসন্দঞ্চাতি অত্থেসা যুত্তি। সীলসংযমে ঠিতো উভযং পরিপূরেতি উপচারসমাধিং অপ্পনাসমাধিঞ্চাতি অত্থেসা যুত্তি। পাপকে ধম্মে পজহন্তো দুক্খং পরিজানাতি, নিরোধং সচ্ছিকরোতি, মগ্গং ভাৰেতীতি অত্থেসা যুত্তি। রাগদোসমোহেসু সব্বসো পরিক্খীণেসু অনুপাদিসেসায নিব্বানধাতুযা পরিনিব্বাযতীতি অত্থেসা যুত্তীতি। অযং যুত্তিহারসম্পাতো।
Yuttīti dāne ṭhito ubhayaṃ paripūreti macchariyappahānañca puññābhisandañcāti atthesā yutti. Sīlasaṃyame ṭhito ubhayaṃ paripūreti upacārasamādhiṃ appanāsamādhiñcāti atthesā yutti. Pāpake dhamme pajahanto dukkhaṃ parijānāti, nirodhaṃ sacchikaroti, maggaṃ bhāvetīti atthesā yutti. Rāgadosamohesu sabbaso parikkhīṇesu anupādisesāya nibbānadhātuyā parinibbāyatīti atthesā yuttīti. Ayaṃ yuttihārasampāto.
পদট্ঠানন্তি দদতো পুঞ্ঞং পৰড্ঢতীতি চাগাধিট্ঠানস্স পদট্ঠানং। সংযমতো ৰেরং ন চীযতীতি সচ্চাধিট্ঠানস্স পদট্ঠানং। কুসলো চ জহাতি পাপকন্তি পঞ্ঞাধিট্ঠানস্স পদট্ঠানং। রাগদোসমোহক্খযা স নিব্বুতোতি উপসমাধিট্ঠানস্স পদট্ঠানন্তি। অযং পদট্ঠানো হারসম্পাতো।
Padaṭṭhānanti dadato puññaṃ pavaḍḍhatīti cāgādhiṭṭhānassa padaṭṭhānaṃ. Saṃyamato veraṃ na cīyatīti saccādhiṭṭhānassa padaṭṭhānaṃ. Kusalo ca jahāti pāpakanti paññādhiṭṭhānassa padaṭṭhānaṃ. Rāgadosamohakkhayā sa nibbutoti upasamādhiṭṭhānassa padaṭṭhānanti. Ayaṃ padaṭṭhāno hārasampāto.
লক্খণোতি ‘‘দদতো’’তি এতেন পেয্যৰজ্জং অত্থচরিযং সমানত্ততা চ দস্সিতাতি ৰেদিতব্বা সঙ্গহৰত্থুভাৰেন একলক্খণত্তা। ‘‘সংযমতো’’তি এতেন খন্তিমেত্তাঅৰিহিংসাঅনুদ্দযাদযো দস্সিতাতি ৰেদিতব্বা ৰেরানুপ্পাদনলক্খণেন একলক্খণত্তা। ‘‘ৰেরং ন চীযতী’’তি এতেন হিরীওত্তপ্পঅপ্পিচ্ছতাসন্তুট্ঠিতাদযো দস্সিতা ৰেরাৰড্ঢনেন একলক্খণত্তা। তথা অহিরীকানোত্তপ্পাদযো অচেতব্বভাৰেন একলক্খণত্তা। ‘‘কুসলো’’তি এতেন কোসল্লদীপনেন সম্মাসঙ্কপ্পাদযো দস্সিতা মগ্গঙ্গাদিভাৰেন একলক্খণত্তা। ‘‘জহাতি পাপক’’ন্তি এতেন পরিঞ্ঞাভিসমযাদযোপি দস্সিতা অভিসমযলক্খণেন একলক্খণত্তা। ‘‘রাগদোসমোহক্খযা’’তি এতেন অৰসিট্ঠকিলেসাদীনম্পি খযা দস্সিতা খেপেতব্বভাৰেন একলক্খণত্তাতি অযং লক্খণো।
Lakkhaṇoti ‘‘dadato’’ti etena peyyavajjaṃ atthacariyaṃ samānattatā ca dassitāti veditabbā saṅgahavatthubhāvena ekalakkhaṇattā. ‘‘Saṃyamato’’ti etena khantimettāavihiṃsāanuddayādayo dassitāti veditabbā verānuppādanalakkhaṇena ekalakkhaṇattā. ‘‘Veraṃ na cīyatī’’ti etena hirīottappaappicchatāsantuṭṭhitādayo dassitā verāvaḍḍhanena ekalakkhaṇattā. Tathā ahirīkānottappādayo acetabbabhāvena ekalakkhaṇattā. ‘‘Kusalo’’ti etena kosalladīpanena sammāsaṅkappādayo dassitā maggaṅgādibhāvena ekalakkhaṇattā. ‘‘Jahāti pāpaka’’nti etena pariññābhisamayādayopi dassitā abhisamayalakkhaṇena ekalakkhaṇattā. ‘‘Rāgadosamohakkhayā’’ti etena avasiṭṭhakilesādīnampi khayā dassitā khepetabbabhāvena ekalakkhaṇattāti ayaṃ lakkhaṇo.
চতুব্যূহোতি দদতোতি গাথাযং ভগৰতো কো অধিপ্পাযো? যে মহাভোগতং পত্থযিস্সন্তি, তে দানং দস্সন্তি দালিদ্দিযপ্পহানায। যে অৰেরতং ইচ্ছন্তি, তে পঞ্চ ৰেরানি পজহিস্সন্তি। যে কুসলধম্মেহি ছন্দকামা, তে অট্ঠঙ্গিকং মগ্গং ভাৰেস্সন্তি। যে নিব্বাযিতুকামা, তে রাগদোসমোহং পজহিস্সন্তীতি অযমেত্থ ভগৰতো অধিপ্পাযো। এৰং নিব্বচননিদানসন্ধযো ৰত্তব্বাতি। অযং চতুব্যূহো।
Catubyūhoti dadatoti gāthāyaṃ bhagavato ko adhippāyo? Ye mahābhogataṃ patthayissanti, te dānaṃ dassanti dāliddiyappahānāya. Ye averataṃ icchanti, te pañca verāni pajahissanti. Ye kusaladhammehi chandakāmā, te aṭṭhaṅgikaṃ maggaṃ bhāvessanti. Ye nibbāyitukāmā, te rāgadosamohaṃ pajahissantīti ayamettha bhagavato adhippāyo. Evaṃ nibbacananidānasandhayo vattabbāti. Ayaṃ catubyūho.
আৰট্টোতি যঞ্চ অদদতো মচ্ছরিযং, যঞ্চ অসংযমতো ৰেরং, যঞ্চ অকুসলস্স পাপস্স অপ্পহানং, অযং পটিপক্খনিদ্দেসেন সমুদযো। তস্স অলোভেন চ অদোসেন চ অমোহেন চ দানাদীহি পহানং, ইমানি তীণি কুসলমূলানি। তেসং পচ্চযো অট্ঠ সম্মত্তানি, অযং মগ্গো। যো রাগদোসমোহানং খযো, অযং নিরোধোতি। অযং আৰট্টো।
Āvaṭṭoti yañca adadato macchariyaṃ, yañca asaṃyamato veraṃ, yañca akusalassa pāpassa appahānaṃ, ayaṃ paṭipakkhaniddesena samudayo. Tassa alobhena ca adosena ca amohena ca dānādīhi pahānaṃ, imāni tīṇi kusalamūlāni. Tesaṃ paccayo aṭṭha sammattāni, ayaṃ maggo. Yo rāgadosamohānaṃ khayo, ayaṃ nirodhoti. Ayaṃ āvaṭṭo.
ৰিভত্তীতি দদতো পুঞ্ঞং পৰড্ঢতীতি একংসেন যো ভযহেতু দেতি, রাগহেতু দেতি, আমিসকিঞ্চিক্খহেতু দেতি, ন তস্স পুঞ্ঞং ৰড্ঢতি। যঞ্চ দণ্ডদানং সত্থদানং পরৰিহেঠনত্থং অপুঞ্ঞং অস্স পৰড্ঢতি। যং পন কুসলেন চিত্তেন অনুকম্পন্তো ৰা অপচাযমানো ৰা অন্নং দেতি, পানং ৰত্থং যানং মালাগন্ধৰিলেপনং সেয্যাৰসথং পদীপেয্যং দেতি, সব্বসত্তানং ৰা অভযদানং দেতি, মেত্তচিত্তো হিতজ্ঝাসযো নিস্সরণসঞ্ঞী ধম্মং দেসেতি। সংযমতো ৰেরং ন চীযতীতি একংসেন অভযূপরতস্স চীযতি, কিংকারণং? যং অসমত্থো, ভযূপরতো দিট্ঠধম্মিকস্স ভাযতি ‘‘মা মং রাজানো গহেত্ৰা হত্থং ৰা ছিন্দেয্যুং…পে॰… জীৰন্তম্পি সূলে উত্তাসেয্যু’’ন্তি, তেন সংযমেন অৰেরং চীযতি। যো পন এৰং সমানো ৰেরং ন চীযতি। যো পন এৰং সমাদিযতি, পাণাতিপাতস্স পাপকো ৰিপাকো দিট্ঠে চেৰ ধম্মে অভিসম্পরাযে চ, এৰং সব্বস্স অকুসলস্স, সো ততো আরমতি, ইমিনা সংযমেন ৰেরং ন চীযতি। সংযমো নাম সীলং। তং চতুব্বিধং চেতনা সীলং, চেতসিকং সীলং, সংৰরো সীলং, অৰীতিক্কমো সীলন্তি। কুসলো চ জহাতি পাপকন্তি পাপপহাযকা সত্তত্তিংস বোধিপক্খিযা ধম্মা ৰত্তব্বাতি। অযং ৰিভত্তি।
Vibhattīti dadato puññaṃ pavaḍḍhatīti ekaṃsena yo bhayahetu deti, rāgahetu deti, āmisakiñcikkhahetu deti, na tassa puññaṃ vaḍḍhati. Yañca daṇḍadānaṃ satthadānaṃ paraviheṭhanatthaṃ apuññaṃ assa pavaḍḍhati. Yaṃ pana kusalena cittena anukampanto vā apacāyamāno vā annaṃ deti, pānaṃ vatthaṃ yānaṃ mālāgandhavilepanaṃ seyyāvasathaṃ padīpeyyaṃ deti, sabbasattānaṃ vā abhayadānaṃ deti, mettacitto hitajjhāsayo nissaraṇasaññī dhammaṃ deseti. Saṃyamato veraṃ na cīyatīti ekaṃsena abhayūparatassa cīyati, kiṃkāraṇaṃ? Yaṃ asamattho, bhayūparato diṭṭhadhammikassa bhāyati ‘‘mā maṃ rājāno gahetvā hatthaṃ vā chindeyyuṃ…pe… jīvantampi sūle uttāseyyu’’nti, tena saṃyamena averaṃ cīyati. Yo pana evaṃ samāno veraṃ na cīyati. Yo pana evaṃ samādiyati, pāṇātipātassa pāpako vipāko diṭṭhe ceva dhamme abhisamparāye ca, evaṃ sabbassa akusalassa, so tato āramati, iminā saṃyamena veraṃ na cīyati. Saṃyamo nāma sīlaṃ. Taṃ catubbidhaṃ cetanā sīlaṃ, cetasikaṃ sīlaṃ, saṃvaro sīlaṃ, avītikkamo sīlanti. Kusalo ca jahāti pāpakanti pāpapahāyakā sattattiṃsa bodhipakkhiyā dhammā vattabbāti. Ayaṃ vibhatti.
পরিৰত্তনোতি দদতো পুঞ্ঞং পৰড্ঢতি, অদদতোপি পুঞ্ঞং পৰড্ঢতি, ন দানমযিকং। সংযমতো ৰেরং ন চীযতি অসংযমতোপি ৰেরং ন চীযতি, যং দানেন পটিসঙ্খানবলেন ভাৰনাবলেন। কুসলো চ জহাতি পাপকং, অকুসলো পন ন জহাতি। রাগদোসমোহক্খযা স নিব্বুতো, তেসং অপরিক্খযা নত্থি নিব্বুতীতি। অযং পরিৰত্তনো।
Parivattanoti dadato puññaṃ pavaḍḍhati, adadatopi puññaṃ pavaḍḍhati, na dānamayikaṃ. Saṃyamato veraṃ na cīyati asaṃyamatopi veraṃ na cīyati, yaṃ dānena paṭisaṅkhānabalena bhāvanābalena. Kusalo ca jahāti pāpakaṃ, akusalo pana na jahāti. Rāgadosamohakkhayā sa nibbuto, tesaṃ aparikkhayā natthi nibbutīti. Ayaṃ parivattano.
ৰেৰচনোতি দদতো পুঞ্ঞং পৰড্ঢতি। পরিচ্চাগতো কুসলং উপচীযতি। অনুমোদতোপি পুঞ্ঞং পৰড্ঢতি চিত্তপ্পসাদতোপি ৰেয্যাৰচ্চকিরিযাযপি। সংযমতোতি সীলসংৰরতো সোরচ্চতো। ৰেরং ন চীযতীতি পাপং ন ৰড্ঢতি, অকুসলং ন ৰড্ঢতি। কুসলোতি পণ্ডিতো নিপুণো মেধাৰী পরিক্খকো। জহাতীতি সমুচ্ছিন্দতি সমুগ্ঘাটেতি। অযং ৰেৰচনো।
Vevacanoti dadato puññaṃ pavaḍḍhati. Pariccāgato kusalaṃ upacīyati. Anumodatopi puññaṃ pavaḍḍhati cittappasādatopi veyyāvaccakiriyāyapi. Saṃyamatoti sīlasaṃvarato soraccato. Veraṃ na cīyatīti pāpaṃ na vaḍḍhati, akusalaṃ na vaḍḍhati. Kusaloti paṇḍito nipuṇo medhāvī parikkhako. Jahātīti samucchindati samugghāṭeti. Ayaṃ vevacano.
পঞ্ঞত্তীতি দদতো পুঞ্ঞং পৰড্ঢতীতি লোভস্স পটিনিস্সগ্গপঞ্ঞত্তি, অলোভস্স নিক্খেপপঞ্ঞত্তি। সংযমতো ৰেরং ন চীযতীতি দোসস্স ৰিক্খম্ভনপঞ্ঞত্তি, অদোসস্স নিক্খেপপঞ্ঞত্তি। কুসলো চ জহাতি পাপকন্তি মোহস্স সমুগ্ঘাতপঞ্ঞত্তি, অমোহস্স ভাৰনাপঞ্ঞত্তি। রাগদোসমোহস্স পহানপঞ্ঞত্তি, অলোভাদোসামোহস্স ভাৰনাপঞ্ঞত্তি। রাগদোসমোহক্খযা স নিব্বুতোতি কিলেসানং পটিপ্পস্সদ্ধিপঞ্ঞত্তি, নিব্বানস্স সচ্ছিকিরিযপঞ্ঞত্তীতি। অযং পঞ্ঞত্তি।
Paññattīti dadato puññaṃ pavaḍḍhatīti lobhassa paṭinissaggapaññatti, alobhassa nikkhepapaññatti. Saṃyamato veraṃ na cīyatīti dosassa vikkhambhanapaññatti, adosassa nikkhepapaññatti. Kusalo ca jahāti pāpakanti mohassa samugghātapaññatti, amohassa bhāvanāpaññatti. Rāgadosamohassa pahānapaññatti, alobhādosāmohassa bhāvanāpaññatti. Rāgadosamohakkhayā sa nibbutoti kilesānaṃ paṭippassaddhipaññatti, nibbānassa sacchikiriyapaññattīti. Ayaṃ paññatti.
ওতরণোতি দদতো পুঞ্ঞং পৰড্ঢতীতি দানং নাম সদ্ধাদীহি ইন্দ্রিযেহি হোতীতি অযং ইন্দ্রিযেহি ওতরণো। সংযমতো ৰেরং ন চীযতীতি সংযমো নাম সীলক্খন্ধোতি অযং খন্ধেহি ওতরণো। কুসলো চ জহাতি পাপকন্তি পাপপ্পহানং নাম তীহি ৰিমোক্খেহি হোতি। তেসং উপাযভূতানি তীণি ৰিমোক্খমুখানীতি অযং ৰিমোক্খমুখেহি ওতরণো। রাগদোসমোহক্খযা স নিব্বুতোতি ৰিমুত্তিক্খন্ধো। সো চ ধম্মধাতু ধম্মাযতনঞ্চাতি অযং ধাতূহি চ আযতনেহি চ ওতরণোতি। অযং ওতরণো।
Otaraṇoti dadato puññaṃ pavaḍḍhatīti dānaṃ nāma saddhādīhi indriyehi hotīti ayaṃ indriyehi otaraṇo. Saṃyamato veraṃ na cīyatīti saṃyamo nāma sīlakkhandhoti ayaṃ khandhehi otaraṇo. Kusalo ca jahāti pāpakanti pāpappahānaṃ nāma tīhi vimokkhehi hoti. Tesaṃ upāyabhūtāni tīṇi vimokkhamukhānīti ayaṃ vimokkhamukhehi otaraṇo. Rāgadosamohakkhayā sa nibbutoti vimuttikkhandho. So ca dhammadhātu dhammāyatanañcāti ayaṃ dhātūhi ca āyatanehi ca otaraṇoti. Ayaṃ otaraṇo.
সোধনোতি দদতোতিআদিকা পদসুদ্ধি, নো আরম্ভসুদ্ধি। রাগদোসমোহক্খযা স নিব্বুতোতি অযং পদসুদ্ধি চ আরম্ভসুদ্ধি চাতি। অযং সোধনো।
Sodhanoti dadatotiādikā padasuddhi, no ārambhasuddhi. Rāgadosamohakkhayā sa nibbutoti ayaṃ padasuddhi ca ārambhasuddhi cāti. Ayaṃ sodhano.
অধিট্ঠানোতি দদতোতি অযং একত্ততা, চাগো পরিচ্চাগো ধম্মদানং আমিসদানং অভযদানং, অট্ঠ দানানি ৰিত্থারেতব্বানি। অযং ৰেমত্ততা। সংযমোতি অযং একত্ততা। পাতিমোক্খসংৰরো সতিসংৰরোতি অযং ৰেমত্ততা। কুসলো চ জহাতি পাপকন্তি অযং একত্ততা। সক্কাযদিট্ঠিং পজহতি ৰিচিকিচ্ছং পজহতীতিআদিকা অযং ৰেমত্ততা। রাগদোসমোহক্খযা স নিব্বুতোতি অযং একত্ততা। সউপাদিসেসা নিব্বানধাতু অনুপাদিসেসা নিব্বানধাতূতি অযং ৰেমত্ততাতি। অযং অধিট্ঠানো।
Adhiṭṭhānoti dadatoti ayaṃ ekattatā, cāgo pariccāgo dhammadānaṃ āmisadānaṃ abhayadānaṃ, aṭṭha dānāni vitthāretabbāni. Ayaṃ vemattatā. Saṃyamoti ayaṃ ekattatā. Pātimokkhasaṃvaro satisaṃvaroti ayaṃ vemattatā. Kusalo ca jahāti pāpakanti ayaṃ ekattatā. Sakkāyadiṭṭhiṃ pajahati vicikicchaṃ pajahatītiādikā ayaṃ vemattatā. Rāgadosamohakkhayā sa nibbutoti ayaṃ ekattatā. Saupādisesā nibbānadhātu anupādisesā nibbānadhātūti ayaṃ vemattatāti. Ayaṃ adhiṭṭhāno.
পরিক্খারোতি দানস্স পামোজ্জং পচ্চযো। অলোভো হেতু, সংযমস্স হিরোত্তপ্পাদযো পচ্চযো। যোনিসোমনসিকারো অদোসো চ হেতু, পাপপ্পহানস্স সমাধি যথাভূতঞাণদস্সনঞ্চ পচ্চযো। তিস্সো অনুপস্সনা হেতু, নিব্বুতিযা মগ্গসম্মাদিট্ঠি হেতু, সম্মাসঙ্কপ্পাদযো পচ্চযোতি। অযং পরিক্খারো।
Parikkhāroti dānassa pāmojjaṃ paccayo. Alobho hetu, saṃyamassa hirottappādayo paccayo. Yonisomanasikāro adoso ca hetu, pāpappahānassa samādhi yathābhūtañāṇadassanañca paccayo. Tisso anupassanā hetu, nibbutiyā maggasammādiṭṭhi hetu, sammāsaṅkappādayo paccayoti. Ayaṃ parikkhāro.
সমারোপনো হারসম্পাতোতি দদতো পুঞ্ঞং পৰড্ঢতীতি দানমযং পুঞ্ঞকিরিযৰত্থু, তং সীলস্স পদট্ঠানং। সংযমতো ৰেরং ন চীযতীতি সীলমযং পুঞ্ঞকিরিযৰত্থু, তং সমাধিস্স পদট্ঠানং। সীলেন হি ঝানেনপি রাগাদিকিলেসা ন চীযন্তি। যেপিস্স তপ্পচ্চযা উপ্পজ্জেয্যুং আসৰা ৰিঘাতপরিল়াহা, তেপিস্স ন হোন্তি। কুসলো চ জহাতি পাপকন্তি পহানপরিঞ্ঞা, তং ভাৰনামযং পুঞ্ঞকিরিযৰত্থু। রাগদোসমোহক্খযা স নিব্বুতোতি রাগস্সপি খযা দোসস্সপি খযা মোহস্সপি খযা। তত্থ রাগোতি যো রাগো সারাগো চেতসো সারজ্জনা লোভো লুব্ভনা লুব্ভিতত্তং অভিজ্ঝা লোভো অকুসলমূলং। দোসোতি যো দোসো দুস্সনা দুস্সিতত্তং ব্যাপাদো চেতসো ব্যাপজ্জনা দোসো অকুসলমূলং। মোহোতি যং অঞ্ঞাণং অদস্সনং অনভিসমযো অসম্বোধো অপ্পটিৰেধো দুম্মেজ্ঝং বাল্যং অসম্পজঞ্ঞং মোহো অকুসলমূলং। ইতি ইমেসং রাগাদীনং খযো নিরোধো পটিনিস্সগ্গো নিব্বুতি নিব্বাযনা পরিনিব্বানং সউপাদিসেসা নিব্বানধাতু অনুপাদিসেসা নিব্বানধাতূতি। অযং সমারোপনো হারসম্পাতো।
Samāropanohārasampātoti dadato puññaṃ pavaḍḍhatīti dānamayaṃ puññakiriyavatthu, taṃ sīlassa padaṭṭhānaṃ. Saṃyamato veraṃ na cīyatīti sīlamayaṃ puññakiriyavatthu, taṃ samādhissa padaṭṭhānaṃ. Sīlena hi jhānenapi rāgādikilesā na cīyanti. Yepissa tappaccayā uppajjeyyuṃ āsavā vighātapariḷāhā, tepissa na honti. Kusalo ca jahāti pāpakanti pahānapariññā, taṃ bhāvanāmayaṃ puññakiriyavatthu. Rāgadosamohakkhayā sa nibbutoti rāgassapi khayā dosassapi khayā mohassapi khayā. Tattha rāgoti yo rāgo sārāgo cetaso sārajjanā lobho lubbhanā lubbhitattaṃ abhijjhā lobho akusalamūlaṃ. Dosoti yo doso dussanā dussitattaṃ byāpādo cetaso byāpajjanā doso akusalamūlaṃ. Mohoti yaṃ aññāṇaṃ adassanaṃ anabhisamayo asambodho appaṭivedho dummejjhaṃ bālyaṃ asampajaññaṃ moho akusalamūlaṃ. Iti imesaṃ rāgādīnaṃ khayo nirodho paṭinissaggo nibbuti nibbāyanā parinibbānaṃ saupādisesā nibbānadhātu anupādisesā nibbānadhātūti. Ayaṃ samāropano hārasampāto.
মিস্সকহারসম্পাতৰণ্ণনা নিট্ঠিতা।
Missakahārasampātavaṇṇanā niṭṭhitā.
Related texts:
টীকা • Tīkā / সুত্তপিটক (টীকা) • Suttapiṭaka (ṭīkā) / খুদ্দকনিকায (টীকা) • Khuddakanikāya (ṭīkā) / নেত্তিপ্পকরণ-টীকা • Nettippakaraṇa-ṭīkā / মিস্সকহারসম্পাতৰণ্ণনা • Missakahārasampātavaṇṇanā
