| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[114] 4. மிதசிந்தீஜாதகவண்ணனா
[114] 4. Mitacintījātakavaṇṇanā
ப³ஹுசிந்தீ அப்பசிந்தீதி இத³ங் ஸத்தா² ஜேதவனே விஹரந்தோ த்³வே மஹல்லகத்தே²ரே ஆரப்³ப⁴ கதே²ஸி. தே கிர ஜனபதே³ ஏகஸ்மிங் அரஞ்ஞாவாஸே வஸ்ஸங் வஸித்வா ‘‘ஸத்து² த³ஸ்ஸனத்தா²ய க³ச்சி²ஸ்ஸாமா’’தி பாதெ²ய்யங் ஸஜ்ஜெத்வா ‘‘அஜ்ஜ க³ச்சா²ம, ஸ்வே க³ச்சா²மா’’தி மாஸங் அதிக்காமெத்வா புன பாதெ²ய்யங் ஸஜ்ஜெத்வா ததே²வ மாஸங், புன மாஸந்தி ஏவங் அத்தனோ குஸீதபா⁴வேன சேவ நிவாஸட்டா²னே ச அபெக்கா²ய தயோ மாஸே அதிக்காமெத்வா ததோ நிக்க²ம்ம ஜேதவனங் க³ந்த்வா ஸபா⁴க³ட்டா²னே பத்தசீவரங் படிஸாமெத்வா ஸத்தா²ரங் பஸ்ஸிங்ஸு. அத² நே பி⁴க்கூ² புச்சி²ங்ஸு ‘‘சிரங் வோ, ஆவுஸோ, பு³த்³து⁴பட்டா²னங் அகரொந்தானங், கஸ்மா ஏவங் சிராயித்தா²’’தி? தே தமத்த²ங் ஆரோசேஸுங். அத² நேஸங் ஸோ ஆலஸியகுஸீதபா⁴வோ பி⁴க்கு²ஸங்கே⁴ பாகடோ ஜாதோ. த⁴ம்மஸபா⁴யம்பி தேஸங் பி⁴க்கூ²னமேவ ஆலஸியபா⁴வங் நிஸ்ஸாய கத²ங் ஸமுட்டா²பேஸுங். ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே தே பக்கோஸாபெத்வா ‘‘ஸச்சங் கிர தும்ஹே, பி⁴க்க²வே, அலஸா குஸீதா’’தி புச்சி²த்வா ‘‘ஸச்சங், ப⁴ந்தே’’தி வுத்தே ‘‘ந, பி⁴க்க²வே, இதா³னேவேதே அலஸா, புப்³பே³பி அலஸா சேவ நிவாஸட்டா²னே ச ஸாலயா ஸாபெக்கா²’’தி வத்வா அதீதங் ஆஹரி.
Bahucintī appacintīti idaṃ satthā jetavane viharanto dve mahallakatthere ārabbha kathesi. Te kira janapade ekasmiṃ araññāvāse vassaṃ vasitvā ‘‘satthu dassanatthāya gacchissāmā’’ti pātheyyaṃ sajjetvā ‘‘ajja gacchāma, sve gacchāmā’’ti māsaṃ atikkāmetvā puna pātheyyaṃ sajjetvā tatheva māsaṃ, puna māsanti evaṃ attano kusītabhāvena ceva nivāsaṭṭhāne ca apekkhāya tayo māse atikkāmetvā tato nikkhamma jetavanaṃ gantvā sabhāgaṭṭhāne pattacīvaraṃ paṭisāmetvā satthāraṃ passiṃsu. Atha ne bhikkhū pucchiṃsu ‘‘ciraṃ vo, āvuso, buddhupaṭṭhānaṃ akarontānaṃ, kasmā evaṃ cirāyitthā’’ti? Te tamatthaṃ ārocesuṃ. Atha nesaṃ so ālasiyakusītabhāvo bhikkhusaṅghe pākaṭo jāto. Dhammasabhāyampi tesaṃ bhikkhūnameva ālasiyabhāvaṃ nissāya kathaṃ samuṭṭhāpesuṃ. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte te pakkosāpetvā ‘‘saccaṃ kira tumhe, bhikkhave, alasā kusītā’’ti pucchitvā ‘‘saccaṃ, bhante’’ti vutte ‘‘na, bhikkhave, idānevete alasā, pubbepi alasā ceva nivāsaṭṭhāne ca sālayā sāpekkhā’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே பா³ராணஸினதி³யங் தயோ மச்சா² அஹேஸுங், ப³ஹுசிந்தீ, அப்பசிந்தீ, மிதசிந்தீதி தேஸங் நாமானி. தே அரஞ்ஞதோ மனுஸ்ஸபத²ங் ஆக³மிங்ஸு. தத்த² மிதசிந்தீ இதரே த்³வே ஏவமாஹ ‘‘அயங் மனுஸ்ஸபதோ² நாம ஸாஸங்கோ ஸப்படிப⁴யோ, கேவட்டா நானப்பகாரானி ஜாலகுமினாதீ³னி கி²பித்வா மச்சே² க³ண்ஹந்தி, மயங் அரஞ்ஞமேவ க³ச்சா²மா’’தி. இதரே த்³வே ஜனா அலஸதாய சேவ ஆமிஸகி³த்³த⁴தாய ச ‘‘அஜ்ஜ க³ச்சா²ம, ஸ்வே க³ச்சா²மா’’தி தயோ மாஸே அதிக்காமேஸுங். அத² கேவட்டா நதி³யங் ஜாலங் கி²பிங்ஸு. ப³ஹுசிந்தீ ச அப்பசிந்தீ ச கோ³சரங் க³ண்ஹந்தா புரதோ க³ச்ச²ந்தி. தே அத்தனோ அந்த⁴பா³லதாய ஜாலக³ந்த⁴ங் அஸல்லக்கெ²த்வா ஜாலகுச்சி²மேவ பவிஸிங்ஸு. மிதசிந்தீ பச்ச²தோ ஆக³ச்ச²ந்தோ ஜாலக³ந்த⁴ங் ஸல்லக்கெ²த்வா தேஸஞ்ச ஜாலகுச்சி²ங் பவிட்ட²பா⁴வங் ஞத்வா ‘‘இமேஸங் குஸீதானங் அந்த⁴பா³லானங் ஜீவிததா³னங் த³ஸ்ஸாமீ’’தி சிந்தெத்வா ப³ஹிபஸ்ஸேன ஜாலகுச்சி²ட்டா²னங் க³ந்த்வா ஜாலகுச்சி²ங் பா²லெத்வா நிக்க²ந்தஸதி³ஸோ ஹுத்வா உத³கங் ஆலுளெந்தோ ஜாலஸ்ஸ புரதோ பதித்வா புன ஜாலகுச்சி²ங் பவிஸித்வா பச்சி²மபா⁴கே³ன பா²லெத்வா நிக்க²ந்தஸதி³ஸோ உத³கங் ஆலுளெந்தோ பச்சி²மபா⁴கே³ பதி. கேவட்டா ‘‘மச்சா² ஜாலங் பா²லெத்வா க³தா’’தி மஞ்ஞமானா ஜாலகோடியங் க³ஹெத்வா உக்கி²பிங்ஸு. தே த்³வேபி மச்சா² ஜாலதோ முச்சித்வா உத³கே பதிங்ஸு. இதி தேஹி மிதசிந்திங் நிஸ்ஸாய ஜீவிதங் லத்³த⁴ங்.
Atīte bārāṇasiyaṃ brahmadatte rajjaṃ kārente bārāṇasinadiyaṃ tayo macchā ahesuṃ, bahucintī, appacintī, mitacintīti tesaṃ nāmāni. Te araññato manussapathaṃ āgamiṃsu. Tattha mitacintī itare dve evamāha ‘‘ayaṃ manussapatho nāma sāsaṅko sappaṭibhayo, kevaṭṭā nānappakārāni jālakuminādīni khipitvā macche gaṇhanti, mayaṃ araññameva gacchāmā’’ti. Itare dve janā alasatāya ceva āmisagiddhatāya ca ‘‘ajja gacchāma, sve gacchāmā’’ti tayo māse atikkāmesuṃ. Atha kevaṭṭā nadiyaṃ jālaṃ khipiṃsu. Bahucintī ca appacintī ca gocaraṃ gaṇhantā purato gacchanti. Te attano andhabālatāya jālagandhaṃ asallakkhetvā jālakucchimeva pavisiṃsu. Mitacintī pacchato āgacchanto jālagandhaṃ sallakkhetvā tesañca jālakucchiṃ paviṭṭhabhāvaṃ ñatvā ‘‘imesaṃ kusītānaṃ andhabālānaṃ jīvitadānaṃ dassāmī’’ti cintetvā bahipassena jālakucchiṭṭhānaṃ gantvā jālakucchiṃ phāletvā nikkhantasadiso hutvā udakaṃ āluḷento jālassa purato patitvā puna jālakucchiṃ pavisitvā pacchimabhāgena phāletvā nikkhantasadiso udakaṃ āluḷento pacchimabhāge pati. Kevaṭṭā ‘‘macchā jālaṃ phāletvā gatā’’ti maññamānā jālakoṭiyaṃ gahetvā ukkhipiṃsu. Te dvepi macchā jālato muccitvā udake patiṃsu. Iti tehi mitacintiṃ nissāya jīvitaṃ laddhaṃ.
ஸத்தா² இமங் அதீதங் ஆஹரித்வா அபி⁴ஸம்பு³த்³தோ⁴ ஹுத்வா இமங் கா³த²மாஹ –
Satthā imaṃ atītaṃ āharitvā abhisambuddho hutvā imaṃ gāthamāha –
114.
114.
‘‘ப³ஹுசிந்தீ அப்பசிந்தீ, உபோ⁴ ஜாலே அப³ஜ்ஜ²ரே;
‘‘Bahucintī appacintī, ubho jāle abajjhare;
மிதசிந்தீ பமோசேஸி, உபோ⁴ தத்த² ஸமாக³தா’’தி.
Mitacintī pamocesi, ubho tattha samāgatā’’ti.
தத்த² ப³ஹுசிந்தீதி ப³ஹுசிந்தனதாய விதக்கப³ஹுலதாய ஏவங்லத்³த⁴னாமோ. இதரேஸுபி த்³வீஸு அயமேவ நயோ. உபோ⁴ தத்த² ஸமாக³தாதி மிதசிந்திங் நிஸ்ஸாய லத்³த⁴ஜீவிதா தத்த² உத³கே புன உபோ⁴பி ஜனா மிதசிந்தினா ஸத்³தி⁴ங் ஸமாக³தாதி அத்தோ².
Tattha bahucintīti bahucintanatāya vitakkabahulatāya evaṃladdhanāmo. Itaresupi dvīsu ayameva nayo. Ubho tattha samāgatāti mitacintiṃ nissāya laddhajīvitā tattha udake puna ubhopi janā mitacintinā saddhiṃ samāgatāti attho.
ஏவங் ஸத்தா² இமங் த⁴ம்மதே³ஸனங் ஆஹரித்வா ஸச்சானி பகாஸெத்வா ஜாதகங் ஸமோதா⁴னேஸி, ஸச்சபரியோஸானே மஹல்லகா பி⁴க்கூ² ஸோதாபத்திப²லே பதிட்ட²ஹிங்ஸு. ததா³ ப³ஹுசிந்தீ ச அப்பசிந்தீ ச இமே த்³வே அஹேஸுங், மிதசிந்தீ பன அஹமேவ அஹோஸிந்தி.
Evaṃ satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne mahallakā bhikkhū sotāpattiphale patiṭṭhahiṃsu. Tadā bahucintī ca appacintī ca ime dve ahesuṃ, mitacintī pana ahameva ahosinti.
மிதசிந்தீஜாதகவண்ணனா சதுத்தா².
Mitacintījātakavaṇṇanā catutthā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 114. மிதசிந்திஜாதகங் • 114. Mitacintijātakaṃ
