| Library / Tipiṭaka / д̇ибидага • Tipiṭaka / т̇зрийг̇аат̇аа-адтагат̇аа • Therīgāthā-aṭṭhakathā |
7. мид̇д̇аат̇зрийг̇аат̇ааван̣н̣анаа
7. Mittātherīgāthāvaṇṇanā
жаад̇уд̣̇д̣̇асим̣ бан̃жад̣̇асинд̇иаад̣̇игаа абарааяа мид̇д̇ааяа т̇зрияаа г̇аат̇аа. аяамби буримаб̣уд̣̇д̇хзсу гад̇аад̇хигаараа д̇ад̇т̇а д̇ад̇т̇а бхавз виваддуубаниссаяам̣ гусалам̣ убажинанд̇ий вибассисса бхаг̇авад̇о гаалз кад̇д̇ияагулз ниб̣б̣ад̇д̇ид̇ваа вин̃н̃уд̇ам̣ бад̇ваа б̣анд̇хумасса ран̃н̃о анд̇збуригаа худ̇ваа вибассисса бхаг̇авад̇о саавигам̣ згам̣ кийн̣аасавад̇т̇зрим̣ д̣̇исваа басаннамаанасаа худ̇ваа д̇ассаа хад̇т̇ад̇о бад̇д̇ам̣ г̇ахзд̇ваа бан̣ийд̇асса каад̣̇анийяабхож̇анийяасса буурзд̇ваа махаг̇гхзна саадагаяуг̇зна сад̣̇д̇хим̣ ад̣̇ааси. саа д̇зна бун̃н̃агаммзна д̣̇звамануссзсу сам̣саранд̇ий имасмим̣ б̣уд̣̇д̇хуббаад̣̇з габилавад̇т̇усмим̣ сагяарааж̇агулз ниб̣б̣ад̇д̇ид̇ваа вин̃н̃уд̇ам̣ бад̇ваа сад̇т̇у санд̇игз д̇хаммам̣ суд̇ваа бадилад̣̇д̇хасад̣̇д̇хаа убаасигаа ахоси. саа абарабхааг̇з махаабаж̇аабад̇иг̇од̇амияаа санд̇игз баб̣б̣аж̇ид̇ваа гад̇абуб̣б̣агижжаа вибассанааяа гаммам̣ гаронд̇ий на жирассзва саха бадисамбхид̣̇аахи арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зрий 2.1.46-59) –
Cātuddasiṃ pañcadasintiādikā aparāya mittāya theriyā gāthā. Ayampi purimabuddhesu katādhikārā tattha tattha bhave vivaṭṭūpanissayaṃ kusalaṃ upacinantī vipassissa bhagavato kāle khattiyakule nibbattitvā viññutaṃ patvā bandhumassa rañño antepurikā hutvā vipassissa bhagavato sāvikaṃ ekaṃ khīṇāsavattheriṃ disvā pasannamānasā hutvā tassā hatthato pattaṃ gahetvā paṇītassa khādanīyabhojanīyassa pūretvā mahagghena sāṭakayugena saddhiṃ adāsi. Sā tena puññakammena devamanussesu saṃsarantī imasmiṃ buddhuppāde kapilavatthusmiṃ sakyarājakule nibbattitvā viññutaṃ patvā satthu santike dhammaṃ sutvā paṭiladdhasaddhā upāsikā ahosi. Sā aparabhāge mahāpajāpatigotamiyā santike pabbajitvā katapubbakiccā vipassanāya kammaṃ karontī na cirasseva saha paṭisambhidāhi arahattaṃ pāpuṇi. Tena vuttaṃ apadāne (apa. therī 2.1.46-59) –
‘‘наг̇арз б̣анд̇хумад̇ияаа, б̣анд̇хумаа наама кад̇д̇ияо;
‘‘Nagare bandhumatiyā, bandhumā nāma khattiyo;
д̇асса ран̃н̃о ахум̣ бхарияаа, згаж̇жхам̣ жаараяаамахам̣.
Tassa rañño ahuṃ bhariyā, ekajjhaṃ cārayāmahaṃ.
‘‘рахог̇ад̇аа нисийд̣̇ид̇ваа, звам̣ жинд̇зсахам̣ д̇ад̣̇аа;
‘‘Rahogatā nisīditvā, evaṃ cintesahaṃ tadā;
аад̣̇ааяа г̇аманийяан̃хи, гусалам̣ над̇т̇и мз гад̇ам̣.
Ādāya gamanīyañhi, kusalaṃ natthi me kataṃ.
‘‘махаабхид̇аабам̣ гадугам̣, гхораруубам̣ суд̣̇аарун̣ам̣;
‘‘Mahābhitāpaṃ kaṭukaṃ, ghorarūpaṃ sudāruṇaṃ;
нираяам̣ нууна г̇ажчаами, зд̇т̇а мз над̇т̇и сам̣саяо.
Nirayaṃ nūna gacchāmi, ettha me natthi saṃsayo.
‘‘рааж̇аанам̣ убасан̇гамма, ид̣̇ам̣ важанамаб̣равим̣;
‘‘Rājānaṃ upasaṅkamma, idaṃ vacanamabraviṃ;
згам̣ мз саман̣ам̣ д̣̇зхи, бхож̇аяиссаами кад̇д̇ияа.
Ekaṃ me samaṇaṃ dehi, bhojayissāmi khattiya.
‘‘ад̣̇ааси мз махаарааж̇аа, саман̣ам̣ бхаавид̇инд̣̇рияам̣;
‘‘Adāsi me mahārājā, samaṇaṃ bhāvitindriyaṃ;
д̇асса бад̇д̇ам̣ г̇ахзд̇ваана, бараманнзна буураяим̣.
Tassa pattaṃ gahetvāna, paramannena pūrayiṃ.
‘‘буураяид̇ваа бараманнам̣, г̇анд̇хаалзбам̣ агаасахам̣;
‘‘Pūrayitvā paramannaṃ, gandhālepaṃ akāsahaṃ;
ж̇аалзна бид̣̇ахид̇ваана, вад̇т̇аяуг̇зна чаад̣̇аяим̣.
Jālena pidahitvāna, vatthayugena chādayiṃ.
‘‘аарамман̣ам̣ мамам̣ зд̇ам̣, сараами яааваж̇ийвид̇ам̣;
‘‘Ārammaṇaṃ mamaṃ etaṃ, sarāmi yāvajīvitaṃ;
д̇ад̇т̇а жид̇д̇ам̣ басаад̣̇зд̇ваа, д̇аавад̇им̣самаг̇ажчахам̣.
Tattha cittaṃ pasādetvā, tāvatiṃsamagacchahaṃ.
‘‘д̇им̣саанам̣ д̣̇зварааж̇уунам̣, махзсид̇д̇амагаараяим̣;
‘‘Tiṃsānaṃ devarājūnaṃ, mahesittamakārayiṃ;
манасаа бад̇т̇ид̇ам̣ маяхам̣, ниб̣б̣ад̇д̇ад̇и яат̇ижчид̇ам̣.
Manasā patthitaṃ mayhaṃ, nibbattati yathicchitaṃ.
‘‘вийсаанам̣ жаггавад̇д̇ийнам̣, махзсид̇д̇амагаараяим̣;
‘‘Vīsānaṃ cakkavattīnaṃ, mahesittamakārayiṃ;
ожид̇ад̇д̇аава худ̇ваана, сам̣сараами бхавзсвахам̣.
Ocitattāva hutvāna, saṃsarāmi bhavesvahaṃ.
‘‘саб̣б̣аб̣анд̇ханамуд̇д̇аахам̣ , абзд̇аа мз убаад̣̇игаа;
‘‘Sabbabandhanamuttāhaṃ , apetā me upādikā;
саб̣б̣аасавабаригкийн̣аа, над̇т̇и д̣̇аани бунаб̣бхаво.
Sabbāsavaparikkhīṇā, natthi dāni punabbhavo.
‘‘зганавуд̇ид̇о габбз, яам̣ д̣̇аанамад̣̇ад̣̇им̣ д̇ад̣̇аа;
‘‘Ekanavutito kappe, yaṃ dānamadadiṃ tadā;
д̣̇уг̇г̇ад̇им̣ наабхиж̇аанаами, бин̣д̣абаад̇ассид̣̇ам̣ палам̣.
Duggatiṃ nābhijānāmi, piṇḍapātassidaṃ phalaṃ.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и. (аба. т̇зрий 2.1.46-59);
‘‘Kilesā jhāpitā mayhaṃ…pe… kataṃ buddhassa sāsana’’nti. (apa. therī 2.1.46-59);
арахад̇д̇ам̣ бана бад̇ваа ад̇д̇ано бадибад̇д̇им̣ бажжавзгкид̇ваа бийд̇исоманассаж̇аад̇аа уд̣̇аанавасзна –
Arahattaṃ pana patvā attano paṭipattiṃ paccavekkhitvā pītisomanassajātā udānavasena –
31.
31.
‘‘жаад̇уд̣̇д̣̇асим̣ бан̃жад̣̇асим̣, яаа жа багкасса адтамий;
‘‘Cātuddasiṃ pañcadasiṃ, yā ca pakkhassa aṭṭhamī;
баадихаарияабагкан̃жа, адтан̇г̇асусамааг̇ад̇ам̣.
Pāṭihāriyapakkhañca, aṭṭhaṅgasusamāgataṃ.
32.
32.
‘‘убосат̇ам̣ убааг̇ажчим̣, д̣̇звагааяаабхинанд̣̇иний;
‘‘Uposathaṃ upāgacchiṃ, devakāyābhinandinī;
сааж̇ж̇а згзна бхад̇д̇зна, мун̣д̣аа сан̇гхаадибааруд̇аа;
Sājja ekena bhattena, muṇḍā saṅghāṭipārutā;
д̣̇звагааяам̣ на бад̇т̇зхам̣, винзяяа хад̣̇аяз д̣̇ара’’нд̇и. – имаа д̣̇вз г̇аат̇аа абхааси;
Devakāyaṃ na patthehaṃ, vineyya hadaye dara’’nti. – imā dve gāthā abhāsi;
д̇ад̇т̇а жаад̇уд̣̇д̣̇асим̣ бан̃жад̣̇асинд̇и жад̇уд̣̇д̣̇асаннам̣ бууран̣ий жаад̇уд̣̇д̣̇асий, бан̃жад̣̇асаннам̣ бууран̣ий бан̃жад̣̇асий, д̇ам̣ жаад̇уд̣̇д̣̇асим̣ бан̃жад̣̇асин̃жа, багкассаад̇и самб̣анд̇хо. ажжанд̇асам̣яог̇з жзд̇ам̣ убаяог̇аважанам̣. яаа жа багкасса адтамий, д̇ан̃жаад̇и яож̇анаа. баадихаарияабагкан̃жаад̇и барихаран̣агабагкан̃жа жаад̇уд̣̇д̣̇асийбан̃жад̣̇асийадтамийнам̣ яат̇ааггамам̣ аад̣̇ид̇о анд̇ад̇о ваа бавзсаниг̇г̇амавасзна убосат̇асийласса барихарид̇аб̣б̣абагкан̃жа д̇зрасийбаадибад̣̇асад̇д̇амийнавамийсу жаад̇и ад̇т̇о. адтан̇г̇асусамааг̇ад̇анд̇и баан̣аад̇ибаад̇аа взраман̣иаад̣̇ийхи адтахи ан̇г̇зхи судту саманнааг̇ад̇ам̣. убосат̇ам̣ убааг̇ажчинд̇и убаваасам̣ убаг̇амим̣, убавасинд̇и ад̇т̇о. яам̣ санд̇хааяа вуд̇д̇ам̣ –
Tattha cātuddasiṃ pañcadasinti catuddasannaṃ pūraṇī cātuddasī, pañcadasannaṃ pūraṇī pañcadasī, taṃ cātuddasiṃ pañcadasiñca, pakkhassāti sambandho. Accantasaṃyoge cetaṃ upayogavacanaṃ. Yā ca pakkhassa aṭṭhamī, tañcāti yojanā. Pāṭihāriyapakkhañcāti pariharaṇakapakkhañca cātuddasīpañcadasīaṭṭhamīnaṃ yathākkamaṃ ādito antato vā pavesaniggamavasena uposathasīlassa pariharitabbapakkhañca terasīpāṭipadasattamīnavamīsu cāti attho. Aṭṭhaṅgasusamāgatanti pāṇātipātā veramaṇiādīhi aṭṭhahi aṅgehi suṭṭhu samannāgataṃ. Uposathaṃ upāgacchinti upavāsaṃ upagamiṃ, upavasinti attho. Yaṃ sandhāya vuttaṃ –
‘‘баан̣ам̣ на ханз на жаад̣̇иннамаад̣̇ияз, мусаа на бхаасз на жа маж̇ж̇або сияаа;
‘‘Pāṇaṃ na hane na cādinnamādiye, musā na bhāse na ca majjapo siyā;
аб̣рахмажарияаа вирамзяяа мзт̇унаа, рад̇д̇им̣ на бхун̃ж̇зяяа вигаалабхож̇анам̣.
Abrahmacariyā virameyya methunā, rattiṃ na bhuñjeyya vikālabhojanaṃ.
‘‘маалам̣ на д̇хаарз на жа г̇анд̇хамаажарз, ман̃жз чамааяам̣ ва саязт̇а сант̇ад̇з;
‘‘Mālaṃ na dhāre na ca gandhamācare, mañce chamāyaṃ va sayetha santhate;
зд̇ан̃хи адтан̇г̇игамаахубосат̇ам̣, б̣уд̣̇д̇хзна д̣̇угканд̇аг̇унаа багаасид̇а’’нд̇и. (су. ни. 402-403);
Etañhi aṭṭhaṅgikamāhuposathaṃ, buddhena dukkhantagunā pakāsita’’nti. (su. ni. 402-403);
д̣̇звагааяаабхинанд̣̇инийд̇и д̇ад̇руубабад̇д̇иааган̇каавасзна жаад̇умахаарааж̇игаад̣̇им̣ д̣̇звагааяам̣ абхибад̇т̇знд̇ий убосат̇ам̣ убааг̇ажчинд̇и яож̇анаа. сааж̇ж̇а згзна бхад̇д̇знаад̇и саа ахам̣ аж̇ж̇а имасмим̣язва д̣̇ивасз згзна бхад̇д̇абхож̇анагкан̣зна. мун̣д̣аа сан̇гхаадибааруд̇аад̇и мун̣д̣ид̇агзсаа сан̇гхаадибааруд̇асарийраа жа худ̇ваа баб̣б̣аж̇ид̇аад̇и ад̇т̇о. д̣̇звагааяам̣ на бад̇т̇зханд̇и аг̇г̇амаг̇г̇асса ад̇хиг̇ад̇ад̇д̇аа ган̃жи д̣̇званигааяам̣ ахам̣ на бад̇т̇аяз. д̇знзвааха – ‘‘винзяяа хад̣̇аяз д̣̇ара’’нд̇и, жид̇д̇аг̇ад̇ам̣ гилзсад̣̇арат̇ам̣ самужчзд̣̇авасзна винзд̇ваад̇и ад̇т̇о. ид̣̇амзва жассаа ан̃н̃ааб̣яаагаран̣ам̣ ахоси.
Devakāyābhinandinīti tatrūpapattiākaṅkhāvasena cātumahārājikādiṃ devakāyaṃ abhipatthentī uposathaṃ upāgacchinti yojanā. Sājja ekenabhattenāti sā ahaṃ ajja imasmiṃyeva divase ekena bhattabhojanakkhaṇena. Muṇḍā saṅghāṭipārutāti muṇḍitakesā saṅghāṭipārutasarīrā ca hutvā pabbajitāti attho. Devakāyaṃ na patthehanti aggamaggassa adhigatattā kañci devanikāyaṃ ahaṃ na patthaye. Tenevāha – ‘‘vineyya hadaye dara’’nti, cittagataṃ kilesadarathaṃ samucchedavasena vinetvāti attho. Idameva cassā aññābyākaraṇaṃ ahosi.
мид̇д̇аат̇зрийг̇аат̇ааван̣н̣анаа нидтид̇аа.
Mittātherīgāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зрийг̇аат̇аабаал̣и • Therīgāthāpāḷi / 7. мид̇д̇аат̇зрийг̇аат̇аа • 7. Mittātherīgāthā
