| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[82] 2. மித்தவிந்த³கஜாதகவண்ணனா
[82] 2. Mittavindakajātakavaṇṇanā
அதிக்கம்ம ரமணகந்தி இத³ங் ஸத்தா² ஜேதவனே விஹரந்தோ ஏகங் து³ப்³ப³சபி⁴க்கு²ங் ஆரப்³ப⁴ கதே²ஸி. இமஸ்ஸ பன ஜாதகஸ்ஸ கஸ்ஸபஸம்மாஸம்பு³த்³த⁴காலிகங் வத்து², தங் த³ஸகனிபாதே மஹாமித்தவிந்த³கஜாதகே (ஜா॰ 1.1.82; 1.5.100 ஆத³யோ) ஆவி ப⁴விஸ்ஸதி. ததா³ பன போ³தி⁴ஸத்தோ இமங் கா³த²மாஹ –
Atikkammaramaṇakanti idaṃ satthā jetavane viharanto ekaṃ dubbacabhikkhuṃ ārabbha kathesi. Imassa pana jātakassa kassapasammāsambuddhakālikaṃ vatthu, taṃ dasakanipāte mahāmittavindakajātake (jā. 1.1.82; 1.5.100 ādayo) āvi bhavissati. Tadā pana bodhisatto imaṃ gāthamāha –
82.
82.
‘‘அதிக்கம்ம ரமணகங், ஸதா³மத்தஞ்ச தூ³ப⁴கங்;
‘‘Atikkamma ramaṇakaṃ, sadāmattañca dūbhakaṃ;
ஸ்வாஸி பாஸாணமாஸீனோ, யஸ்மா ஜீவங் ந மொக்க²ஸீ’’தி.
Svāsi pāsāṇamāsīno, yasmā jīvaṃ na mokkhasī’’ti.
தத்த² ரமணகந்தி தஸ்மிங் காலே ப²லிகஸ்ஸ நாமங், ப²லிகபாஸாத³ஞ்ச அதிக்கந்தோஸீதி தீ³பேதி. ஸதா³மத்தஞ்சாதி ரஜதஸ்ஸ நாமங், ரஜதபாஸாத³ஞ்ச அதிக்கந்தோஸீதி தீ³பேதி. தூ³ப⁴கந்தி மணினோ நாமங், மணிபாஸாத³ஞ்ச அதிக்கந்தோஸீதி தீ³பேதி. ஸ்வாஸீதி ஸோ அஸி த்வங். பாஸாணமாஸீனோதி கு²ரசக்கங் நாம பாஸாணமயங் வா ஹோதி ரஜதமயங் வா மணிமயங் வா, தங் பன பாஸாணமயமேவ. ஸோ ச தேன ஆஸீனோ அதினிவிட்டோ² அஜ்ஜொ²த்த²டோ. தஸ்மா பாஸாணேன ஆஸீனத்தா ‘‘பாஸாணாஸீனோ’’தி வத்தப்³பே³ ப்³யஞ்ஜனஸந்தி⁴வஸேன மகாரங் ஆதா³ய ‘‘பாஸாணமாஸீனோ’’தி வுத்தங். பாஸாணங் வா ஆஸீனோ, தங் கு²ரசக்கங் ஆஸஜ்ஜ பாபுணித்வா டி²தோதி அத்தோ². யஸ்மா ஜீவங் ந மொக்க²ஸீதி யஸ்மா கு²ரசக்கா யாவ தே பாபங் ந கீ²யதி, தாவ ஜீவந்தோயேவ ந முச்சிஸ்ஸஸி, தங் ஆஸீனோஸீதி.
Tattha ramaṇakanti tasmiṃ kāle phalikassa nāmaṃ, phalikapāsādañca atikkantosīti dīpeti. Sadāmattañcāti rajatassa nāmaṃ, rajatapāsādañca atikkantosīti dīpeti. Dūbhakanti maṇino nāmaṃ, maṇipāsādañca atikkantosīti dīpeti. Svāsīti so asi tvaṃ. Pāsāṇamāsīnoti khuracakkaṃ nāma pāsāṇamayaṃ vā hoti rajatamayaṃ vā maṇimayaṃ vā, taṃ pana pāsāṇamayameva. So ca tena āsīno atiniviṭṭho ajjhotthaṭo. Tasmā pāsāṇena āsīnattā ‘‘pāsāṇāsīno’’ti vattabbe byañjanasandhivasena makāraṃ ādāya ‘‘pāsāṇamāsīno’’ti vuttaṃ. Pāsāṇaṃ vā āsīno, taṃ khuracakkaṃ āsajja pāpuṇitvā ṭhitoti attho. Yasmā jīvaṃ na mokkhasīti yasmā khuracakkā yāva te pāpaṃ na khīyati, tāva jīvantoyeva na muccissasi, taṃ āsīnosīti.
இமங் கா³த²ங் வத்வா போ³தி⁴ஸத்தோ அத்தனோ வஸனட்டா²னங்யேவ க³தோ. மித்தவிந்த³கோபி கு²ரசக்கங் உக்கி²பித்வா மஹாது³க்க²ங் அனுப⁴வமானோ பாபகம்மே பரிக்கீ²ணே யதா²கம்மங் க³தோ.
Imaṃ gāthaṃ vatvā bodhisatto attano vasanaṭṭhānaṃyeva gato. Mittavindakopi khuracakkaṃ ukkhipitvā mahādukkhaṃ anubhavamāno pāpakamme parikkhīṇe yathākammaṃ gato.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ மித்தவிந்த³கோ து³ப்³ப³சபி⁴க்கு² அஹோஸி, தே³வராஜா பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā mittavindako dubbacabhikkhu ahosi, devarājā pana ahameva ahosi’’nti.
மித்தவிந்த³கஜாதகவண்ணனா து³தியா.
Mittavindakajātakavaṇṇanā dutiyā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 82. மித்தவிந்த³கஜாதகங் • 82. Mittavindakajātakaṃ
