| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৭. মোগ্গল্লানসুত্তং
7. Moggallānasuttaṃ
৪১৬. অথ খো ৰচ্ছগোত্তো পরিব্বাজকো যেনাযস্মা মহামোগ্গল্লানো তেনুপসঙ্কমি; উপসঙ্কমিত্ৰা আযস্মতা মহামোগ্গল্লানেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো ৰচ্ছগোত্তো পরিব্বাজকো আযস্মন্তং মহামোগ্গল্লানং এতদৰোচ –
416. Atha kho vacchagotto paribbājako yenāyasmā mahāmoggallāno tenupasaṅkami; upasaṅkamitvā āyasmatā mahāmoggallānena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako āyasmantaṃ mahāmoggallānaṃ etadavoca –
‘‘কিং নু খো, ভো মোগ্গল্লান, সস্সতো লোকো’’তি? ‘‘অব্যাকতং খো এতং, ৰচ্ছ, ভগৰতা – ‘সস্সতো লোকো’’’তি। ‘‘কিং পন, ভো মোগ্গল্লান, অসস্সতো লোকো’’তি? ‘‘এতম্পি খো, ৰচ্ছ, অব্যাকতং ভগৰতা – ‘অসস্সতো লোকো’’’তি। ‘‘কিং নু খো, ভো মোগ্গল্লান, অন্তৰা লোকো’’তি? ‘‘অব্যাকতং খো এতং, ৰচ্ছ, ভগৰতা – ‘অন্তৰা লোকো’’’তি। ‘‘কিং পন, ভো মোগ্গল্লান, অনন্তৰা লোকো’’তি? ‘‘এতম্পি খো, ৰচ্ছ, অব্যাকতং ভগৰতা – ‘অনন্তৰা লোকো’’’তি। ‘‘কিং নু খো, ভো মোগ্গল্লান, তং জীৰং তং সরীর’’ন্তি? ‘‘অব্যাকতং খো এতং, ৰচ্ছ, ভগৰতা – ‘তং জীৰং তং সরীর’’’ন্তি। ‘‘কিং পন, ভো মোগ্গল্লান, অঞ্ঞং জীৰং অঞ্ঞং সরীর’’ন্তি? ‘‘এতম্পি খো, ৰচ্ছ, অব্যাকতং ভগৰতা – ‘অঞ্ঞং জীৰং অঞ্ঞং সরীর’’’ন্তি। ‘‘কিং নু খো, ভো মোগ্গল্লান, হোতি তথাগতো পরং মরণা’’তি? ‘‘অব্যাকতং খো এতং, ৰচ্ছ, ভগৰতা – ‘হোতি তথাগতো পরং মরণা’’’তি। ‘‘কিং পন, ভো মোগ্গল্লান, ন হোতি তথাগতো পরং মরণা’’তি? ‘‘এতম্পি খো, ৰচ্ছ, অব্যাকতং ভগৰতা – ‘ন হোতি তথাগতো পরং মরণা’’’তি। ‘‘কিং নু খো, ভো মোগ্গল্লান, হোতি চ ন চ হোতি তথাগতো পরং মরণা’’তি? ‘‘অব্যাকতং খো এতং, ৰচ্ছ, ভগৰতা – ‘হোতি চ ন চ হোতি তথাগতো পরং মরণা’’’তি। ‘‘কিং পন, ভো মোগ্গল্লান, নেৰ হোতি ন ন হোতি তথাগতো পরং মরণা’’তি? ‘‘এতম্পি খো, ৰচ্ছ, অব্যাকতং ভগৰতা – ‘নেৰ হোতি ন ন হোতি তথাগতো পরং মরণা’’’তি।
‘‘Kiṃ nu kho, bho moggallāna, sassato loko’’ti? ‘‘Abyākataṃ kho etaṃ, vaccha, bhagavatā – ‘sassato loko’’’ti. ‘‘Kiṃ pana, bho moggallāna, asassato loko’’ti? ‘‘Etampi kho, vaccha, abyākataṃ bhagavatā – ‘asassato loko’’’ti. ‘‘Kiṃ nu kho, bho moggallāna, antavā loko’’ti? ‘‘Abyākataṃ kho etaṃ, vaccha, bhagavatā – ‘antavā loko’’’ti. ‘‘Kiṃ pana, bho moggallāna, anantavā loko’’ti? ‘‘Etampi kho, vaccha, abyākataṃ bhagavatā – ‘anantavā loko’’’ti. ‘‘Kiṃ nu kho, bho moggallāna, taṃ jīvaṃ taṃ sarīra’’nti? ‘‘Abyākataṃ kho etaṃ, vaccha, bhagavatā – ‘taṃ jīvaṃ taṃ sarīra’’’nti. ‘‘Kiṃ pana, bho moggallāna, aññaṃ jīvaṃ aññaṃ sarīra’’nti? ‘‘Etampi kho, vaccha, abyākataṃ bhagavatā – ‘aññaṃ jīvaṃ aññaṃ sarīra’’’nti. ‘‘Kiṃ nu kho, bho moggallāna, hoti tathāgato paraṃ maraṇā’’ti? ‘‘Abyākataṃ kho etaṃ, vaccha, bhagavatā – ‘hoti tathāgato paraṃ maraṇā’’’ti. ‘‘Kiṃ pana, bho moggallāna, na hoti tathāgato paraṃ maraṇā’’ti? ‘‘Etampi kho, vaccha, abyākataṃ bhagavatā – ‘na hoti tathāgato paraṃ maraṇā’’’ti. ‘‘Kiṃ nu kho, bho moggallāna, hoti ca na ca hoti tathāgato paraṃ maraṇā’’ti? ‘‘Abyākataṃ kho etaṃ, vaccha, bhagavatā – ‘hoti ca na ca hoti tathāgato paraṃ maraṇā’’’ti. ‘‘Kiṃ pana, bho moggallāna, neva hoti na na hoti tathāgato paraṃ maraṇā’’ti? ‘‘Etampi kho, vaccha, abyākataṃ bhagavatā – ‘neva hoti na na hoti tathāgato paraṃ maraṇā’’’ti.
‘‘কো নু খো, ভো মোগ্গল্লান, হেতু কো পচ্চযো, যেন অঞ্ঞতিত্থিযানং পরিব্বাজকানং এৰং পুট্ঠানং এৰং ৰেয্যাকরণং হোতি – সস্সতো লোকোতি ৰা, অসস্সতো লোকোতি ৰা, অন্তৰা লোকোতি ৰা, অনন্তৰা লোকোতি ৰা, তং জীৰং তং সরীরন্তি ৰা, অঞ্ঞং জীৰং অঞ্ঞং সরীরন্তি ৰা, হোতি তথাগতো পরং মরণাতি ৰা, ন হোতি তথাগতো পরং মরণাতি ৰা, হোতি চ ন চ হোতি তথাগতো পরং মরণাতি ৰা, নেৰ হোতি ন ন হোতি তথাগতো পরং মরণাতি ৰা? কো পন, ভো মোগ্গল্লান, হেতু কো পচ্চযো, যেন সমণস্স গোতমস্স এৰং পুট্ঠস্স ন এৰং ৰেয্যাকরণং হোতি – সস্সতো লোকোতিপি, অসস্সতো লোকোতিপি, অন্তৰা লোকোতিপি, অনন্তৰা লোকোতিপি, তং জীৰং তং সরীরন্তিপি, অঞ্ঞং জীৰং অঞ্ঞং সরীরন্তিপি, হোতি তথাগতো পরং মরণাতিপি, ন হোতি তথাগতো পরং মরণাতিপি, হোতি চ ন চ হোতি তথাগতো পরং মরণাতিপি, নেৰ হোতি ন ন হোতি তথাগতো পরং মরণাতিপী’’তি?
‘‘Ko nu kho, bho moggallāna, hetu ko paccayo, yena aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti – sassato lokoti vā, asassato lokoti vā, antavā lokoti vā, anantavā lokoti vā, taṃ jīvaṃ taṃ sarīranti vā, aññaṃ jīvaṃ aññaṃ sarīranti vā, hoti tathāgato paraṃ maraṇāti vā, na hoti tathāgato paraṃ maraṇāti vā, hoti ca na ca hoti tathāgato paraṃ maraṇāti vā, neva hoti na na hoti tathāgato paraṃ maraṇāti vā? Ko pana, bho moggallāna, hetu ko paccayo, yena samaṇassa gotamassa evaṃ puṭṭhassa na evaṃ veyyākaraṇaṃ hoti – sassato lokotipi, asassato lokotipi, antavā lokotipi, anantavā lokotipi, taṃ jīvaṃ taṃ sarīrantipi, aññaṃ jīvaṃ aññaṃ sarīrantipi, hoti tathāgato paraṃ maraṇātipi, na hoti tathāgato paraṃ maraṇātipi, hoti ca na ca hoti tathāgato paraṃ maraṇātipi, neva hoti na na hoti tathāgato paraṃ maraṇātipī’’ti?
‘‘অঞ্ঞতিত্থিযা খো, ৰচ্ছ, পরিব্বাজকা চক্খুং ‘এতং মম, এসোহমস্মি, এসো মে অত্তা’তি সমনুপস্সন্তি…পে॰… জিৰ্হং ‘এতং মম, এসোহমস্মি, এসো মে অত্তা’তি সমনুপস্সন্তি…পে॰… মনং ‘এতং মম, এসোহমস্মি, এসো মে অত্তা’তি সমনুপস্সন্তি। তস্মা অঞ্ঞতিত্থিযানং পরিব্বাজকানং এৰং পুট্ঠানং এৰং ৰেয্যাকরণং হোতি – সস্সতো লোকোতি ৰা…পে॰… নেৰ হোতি ন ন হোতি তথাগতো পরং মরণাতি ৰা। তথাগতো চ খো, ৰচ্ছ, অরহং সম্মাসম্বুদ্ধো চক্খুং ‘নেতং মম, নেসোহমস্মি, ন মেসো অত্তা’তি সমনুপস্সতি…পে॰… জিৰ্হং ‘নেতং মম, নেসোহমস্মি, ন মেসো অত্তা’তি সমনুপস্সতি…পে॰… মনং ‘নেতং মম, নেসোহমস্মি, ন মেসো অত্তা’তি সমনুপস্সতি। তস্মা তথাগতস্স এৰং পুট্ঠস্স ন এৰং ৰেয্যাকরণং হোতি – সস্সতো লোকোতিপি…পে॰… নেৰ হোতি ন ন হোতি তথাগতো পরং মরণাতিপী’’তি।
‘‘Aññatitthiyā kho, vaccha, paribbājakā cakkhuṃ ‘etaṃ mama, esohamasmi, eso me attā’ti samanupassanti…pe… jivhaṃ ‘etaṃ mama, esohamasmi, eso me attā’ti samanupassanti…pe… manaṃ ‘etaṃ mama, esohamasmi, eso me attā’ti samanupassanti. Tasmā aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti – sassato lokoti vā…pe… neva hoti na na hoti tathāgato paraṃ maraṇāti vā. Tathāgato ca kho, vaccha, arahaṃ sammāsambuddho cakkhuṃ ‘netaṃ mama, nesohamasmi, na meso attā’ti samanupassati…pe… jivhaṃ ‘netaṃ mama, nesohamasmi, na meso attā’ti samanupassati…pe… manaṃ ‘netaṃ mama, nesohamasmi, na meso attā’ti samanupassati. Tasmā tathāgatassa evaṃ puṭṭhassa na evaṃ veyyākaraṇaṃ hoti – sassato lokotipi…pe… neva hoti na na hoti tathāgato paraṃ maraṇātipī’’ti.
অথ খো ৰচ্ছগোত্তো পরিব্বাজকো উট্ঠাযাসনা যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ – ‘‘কিং নু খো, ভো গোতম, সস্সতো লোকো’’তি? অব্যাকতং খো এতং, ৰচ্ছ, মযা – ‘সস্সতো লোকো’তি…পে॰…। ‘‘কিং পন, ভো গোতম, নেৰ হোতি ন ন হোতি তথাগতো পরং মরণা’’তি? ‘‘এতম্পি খো, ৰচ্ছ, অব্যাকতং মযা – ‘নেৰ হোতি ন ন হোতি তথাগতো পরং মরণা’’’তি।
Atha kho vacchagotto paribbājako uṭṭhāyāsanā yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca – ‘‘kiṃ nu kho, bho gotama, sassato loko’’ti? Abyākataṃ kho etaṃ, vaccha, mayā – ‘sassato loko’ti…pe…. ‘‘Kiṃ pana, bho gotama, neva hoti na na hoti tathāgato paraṃ maraṇā’’ti? ‘‘Etampi kho, vaccha, abyākataṃ mayā – ‘neva hoti na na hoti tathāgato paraṃ maraṇā’’’ti.
‘‘কো নু খো, ভো গোতম, হেতু কো পচ্চযো, যেন অঞ্ঞতিত্থিযানং পরিব্বাজকানং এৰং পুট্ঠানং এৰং ৰেয্যাকরণং হোতি – ‘সস্সতো লোকো’তি ৰা…পে॰… ‘নেৰ হোতি ন ন হোতি তথাগতো পরং মরণা’তি ৰা? কো পন, ভো গোতম, হেতু কো পচ্চযো, যেন ভোতো গোতমস্স এৰং পুট্ঠস্স ন এৰং ৰেয্যাকরণং হোতি – ‘সস্সতো লোকো’তিপি…পে॰… ‘নেৰ হোতি ন ন হোতি তথাগতো পরং মরণা’তিপী’’তি?
‘‘Ko nu kho, bho gotama, hetu ko paccayo, yena aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti – ‘sassato loko’ti vā…pe… ‘neva hoti na na hoti tathāgato paraṃ maraṇā’ti vā? Ko pana, bho gotama, hetu ko paccayo, yena bhoto gotamassa evaṃ puṭṭhassa na evaṃ veyyākaraṇaṃ hoti – ‘sassato loko’tipi…pe… ‘neva hoti na na hoti tathāgato paraṃ maraṇā’tipī’’ti?
‘‘অঞ্ঞতিত্থিযা খো, ৰচ্ছ, পরিব্বাজকা চক্খুং ‘এতং মম, এসোহমস্মি , এসো মে অত্তা’তি সমনুপস্সন্তি…পে॰… জিৰ্হং ‘এতং মম, এসোহমস্মি, এসো মে অত্তা’তি সমনুপস্সন্তি…পে॰… মনং ‘এতং মম, এসোহমস্মি, এসো মে অত্তা’তি সমনুপস্সন্তি। তস্মা অঞ্ঞতিত্থিযানং পরিব্বাজকানং এৰং পুট্ঠানং এৰং ৰেয্যাকরণং হোতি – ‘সস্সতো লোকো’তি ৰা…পে॰… ‘নেৰ হোতি ন ন হোতি তথাগতো পরং মরণা’তি ৰা। তথাগতো চ খো, ৰচ্ছ, অরহং সম্মাসম্বুদ্ধো চক্খুং ‘নেতং মম, নেসোহমস্মি, ন মেসো অত্তা’তি সমনুপস্সতি…পে॰… জিৰ্হং ‘নেতং মম, নেসোহমস্মি, ন মেসো অত্তা’তি সমনুপস্সতি…পে॰… মনং ‘নেতং মম, নেসোহমস্মি, ন মেসো অত্তা’তি সমনুপস্সতি। তস্মা তথাগতস্স এৰং পুট্ঠস্স ন এৰং ৰেয্যাকরণং হোতি – ‘সস্সতো লোকো’তিপি, ‘অসস্সতো লোকো’তিপি, ‘অন্তৰা লোকো’তিপি, ‘অনন্তৰা লোকো’তিপি, ‘তং জীৰং তং সরীর’ন্তিপি, ‘অঞ্ঞং জীৰং অঞ্ঞং সরীর’ন্তিপি, ‘হোতি তথাগতো পরং মরণা’তিপি, ‘ন হোতি তথাগতো পরং মরণা’তিপি, ‘হোতি চ ন চ হোতি তথাগতো পরং মরণা’তিপি, ‘নেৰ হোতি ন ন হোতি তথাগতো পরং মরণা’তিপী’’তি।
‘‘Aññatitthiyā kho, vaccha, paribbājakā cakkhuṃ ‘etaṃ mama, esohamasmi , eso me attā’ti samanupassanti…pe… jivhaṃ ‘etaṃ mama, esohamasmi, eso me attā’ti samanupassanti…pe… manaṃ ‘etaṃ mama, esohamasmi, eso me attā’ti samanupassanti. Tasmā aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti – ‘sassato loko’ti vā…pe… ‘neva hoti na na hoti tathāgato paraṃ maraṇā’ti vā. Tathāgato ca kho, vaccha, arahaṃ sammāsambuddho cakkhuṃ ‘netaṃ mama, nesohamasmi, na meso attā’ti samanupassati…pe… jivhaṃ ‘netaṃ mama, nesohamasmi, na meso attā’ti samanupassati…pe… manaṃ ‘netaṃ mama, nesohamasmi, na meso attā’ti samanupassati. Tasmā tathāgatassa evaṃ puṭṭhassa na evaṃ veyyākaraṇaṃ hoti – ‘sassato loko’tipi, ‘asassato loko’tipi, ‘antavā loko’tipi, ‘anantavā loko’tipi, ‘taṃ jīvaṃ taṃ sarīra’ntipi, ‘aññaṃ jīvaṃ aññaṃ sarīra’ntipi, ‘hoti tathāgato paraṃ maraṇā’tipi, ‘na hoti tathāgato paraṃ maraṇā’tipi, ‘hoti ca na ca hoti tathāgato paraṃ maraṇā’tipi, ‘neva hoti na na hoti tathāgato paraṃ maraṇā’tipī’’ti.
‘‘অচ্ছরিযং, ভো গোতম, অব্ভুতং, ভো গোতম! যত্র হি নাম সত্থু চ 1 সাৰকস্স চ অত্থেন অত্থো ব্যঞ্জনেন ব্যঞ্জনং সংসন্দিস্সতি সমেস্সতি ন ৰিরোধযিস্সতি, যদিদং অগ্গপদস্মিং। ইদানাহং, ভো গোতম, সমণং মহামোগ্গল্লানং উপসঙ্কমিত্ৰা এতমত্থং অপুচ্ছিং। সমণোপি মে মোগ্গল্লানো এতেহি পদেহি এতেহি ব্যঞ্জনেহি তমত্থং ব্যাকাসি, সেয্যথাপি ভৰং গোতমো। অচ্ছরিযং, ভো গোতম, অব্ভুতং, ভো গোতম ! যত্র হি নাম সত্থু চ সাৰকস্স চ অত্থেন অত্থো ব্যঞ্জনেন ব্যঞ্জনং সংসন্দিস্সতি সমেস্সতি ন ৰিরোধযিস্সতি, যদিদং অগ্গপদস্মি’’ন্তি। সত্তমং।
‘‘Acchariyaṃ, bho gotama, abbhutaṃ, bho gotama! Yatra hi nāma satthu ca 2 sāvakassa ca atthena attho byañjanena byañjanaṃ saṃsandissati samessati na virodhayissati, yadidaṃ aggapadasmiṃ. Idānāhaṃ, bho gotama, samaṇaṃ mahāmoggallānaṃ upasaṅkamitvā etamatthaṃ apucchiṃ. Samaṇopi me moggallāno etehi padehi etehi byañjanehi tamatthaṃ byākāsi, seyyathāpi bhavaṃ gotamo. Acchariyaṃ, bho gotama, abbhutaṃ, bho gotama ! Yatra hi nāma satthu ca sāvakassa ca atthena attho byañjanena byañjanaṃ saṃsandissati samessati na virodhayissati, yadidaṃ aggapadasmi’’nti. Sattamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩-৮. পঠমসারিপুত্তকোট্ঠিকসুত্তাদিৰণ্ণনা • 3-8. Paṭhamasāriputtakoṭṭhikasuttādivaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩-৮. পঠমসারিপুত্তকোট্ঠিকসুত্তাদিৰণ্ণনা • 3-8. Paṭhamasāriputtakoṭṭhikasuttādivaṇṇanā
