| Library / Tipiṭaka / д̇ибидага • Tipiṭaka / сам̣яуд̇д̇анигааяа • Saṃyuttanikāya |
4. мог̇г̇аллаанасуд̇д̇ам̣
4. Moggallānasuttaṃ
826. звам̣ мз суд̇ам̣ – згам̣ самаяам̣ бхаг̇аваа саавад̇т̇ияам̣ вихарад̇и буб̣б̣аараамз миг̇аарамаад̇убаасаад̣̇з. д̇зна ко бана самаязна самб̣ахулаа бхигкуу хздтаамиг̇аарамаад̇убаасаад̣̇з вихаранд̇и уд̣̇д̇хад̇аа уннал̣аа жабалаа мукараа вигин̣н̣аваажаа мудтассад̇ино асамбаж̇аанаа асамаахид̇аа бханд̇ажид̇д̇аа 1 баагад̇инд̣̇рияаа.
826. Evaṃ me sutaṃ – ekaṃ samayaṃ bhagavā sāvatthiyaṃ viharati pubbārāme migāramātupāsāde. Tena kho pana samayena sambahulā bhikkhū heṭṭhāmigāramātupāsāde viharanti uddhatā unnaḷā capalā mukharā vikiṇṇavācā muṭṭhassatino asampajānā asamāhitā bhantacittā 2 pākatindriyā.
ат̇а ко бхаг̇аваа ааяасманд̇ам̣ махаамог̇г̇аллаанам̣ ааманд̇зси – ‘‘зд̇з ко, мог̇г̇аллаана, саб̣рахмажаарино хздтаамиг̇аарамаад̇убаасаад̣̇з вихаранд̇и уд̣̇д̇хад̇аа уннал̣аа жабалаа мукараа вигин̣н̣аваажаа мудтассад̇ино асамбаж̇аанаа асамаахид̇аа бханд̇ажид̇д̇аа баагад̇инд̣̇рияаа. г̇ажча, мог̇г̇аллаана, д̇з бхигкуу сам̣взж̇зхий’’д̇и.
Atha kho bhagavā āyasmantaṃ mahāmoggallānaṃ āmantesi – ‘‘ete kho, moggallāna, sabrahmacārino heṭṭhāmigāramātupāsāde viharanti uddhatā unnaḷā capalā mukharā vikiṇṇavācā muṭṭhassatino asampajānā asamāhitā bhantacittā pākatindriyā. Gaccha, moggallāna, te bhikkhū saṃvejehī’’ti.
‘‘звам̣, бханд̇з’’д̇и ко ааяасмаа махаамог̇г̇аллаано бхаг̇авад̇о бадиссуд̇ваа д̇ат̇ааруубам̣ ид̣̇д̇хаабхисан̇каарам̣ абхисан̇каарзси 3 яат̇аа баад̣̇ан̇г̇удтагзна миг̇аарамаад̇убаасаад̣̇ам̣ сан̇гамбзси самбагамбзси самбажаалзси. ат̇а ко д̇з бхигкуу сам̣виг̇г̇аа ломахадтаж̇аад̇аа згаманд̇ам̣ адтам̣су – ‘‘ажчарияам̣ вад̇а, бхо, аб̣бхуд̇ам̣ вад̇а, бхо! ниваад̇ан̃жа вад̇а аяан̃жа миг̇аарамаад̇убаасаад̣̇о г̇амбхийранзмо суникаад̇о ажало асамбагамбий, ат̇а жа бана сан̇гамбид̇о самбагамбид̇о самбажаалид̇о’’д̇и!
‘‘Evaṃ, bhante’’ti kho āyasmā mahāmoggallāno bhagavato paṭissutvā tathārūpaṃ iddhābhisaṅkhāraṃ abhisaṅkhāresi 4 yathā pādaṅguṭṭhakena migāramātupāsādaṃ saṅkampesi sampakampesi sampacālesi. Atha kho te bhikkhū saṃviggā lomahaṭṭhajātā ekamantaṃ aṭṭhaṃsu – ‘‘acchariyaṃ vata, bho, abbhutaṃ vata, bho! Nivātañca vata ayañca migāramātupāsādo gambhīranemo sunikhāto acalo asampakampī, atha ca pana saṅkampito sampakampito sampacālito’’ti!
ат̇а ко бхаг̇аваа язна д̇з бхигкуу д̇знубасан̇гами; убасан̇гамид̇ваа д̇з бхигкуу бхаг̇аваа зд̇ад̣̇авожа – ‘‘гим̣ ну д̇умхз, бхигкавз, сам̣виг̇г̇аа ломахадтаж̇аад̇аа згаманд̇ам̣ тид̇аа’’д̇и? ‘‘ажчарияам̣, бханд̇з, аб̣бхуд̇ам̣ бханд̇з! ниваад̇ан̃жа вад̇а аяан̃жа миг̇аарамаад̇убаасаад̣̇о г̇амбхийранзмо суникаад̇о ажало асамбагамбий, ат̇а жа бана сан̇гамбид̇о самбагамбид̇о самбажаалид̇о’’д̇и! ‘‘д̇умхзва ко, бхигкавз, сам̣взж̇зд̇угаамзна мог̇г̇аллаанзна бхигкунаа баад̣̇ан̇г̇удтагзна миг̇аарамаад̇убаасаад̣̇о, сан̇гамбид̇о самбагамбид̇о самбажаалид̇о. д̇ам̣ гим̣ ман̃н̃ат̇а, бхигкавз, гад̇амзсам̣ д̇хаммаанам̣ бхаавид̇ад̇д̇аа б̣ахулийгад̇ад̇д̇аа мог̇г̇аллаано бхигку звам̣махид̣̇д̇хиго звам̣махаанубхааво’’д̇и ? ‘‘бхаг̇авам̣муулагаа но, бханд̇з, д̇хаммаа, бхаг̇авам̣нзд̇д̇игаа бхаг̇авам̣бадисаран̣аа. саад̇ху вад̇а, бханд̇з, бхаг̇аванд̇ам̣язва бадибхаад̇у зд̇асса бхаасид̇асса ад̇т̇о. бхаг̇авад̇о суд̇ваа бхигкуу д̇хаарзссанд̇ий’’д̇и.
Atha kho bhagavā yena te bhikkhū tenupasaṅkami; upasaṅkamitvā te bhikkhū bhagavā etadavoca – ‘‘kiṃ nu tumhe, bhikkhave, saṃviggā lomahaṭṭhajātā ekamantaṃ ṭhitā’’ti? ‘‘Acchariyaṃ, bhante, abbhutaṃ bhante! Nivātañca vata ayañca migāramātupāsādo gambhīranemo sunikhāto acalo asampakampī, atha ca pana saṅkampito sampakampito sampacālito’’ti! ‘‘Tumheva kho, bhikkhave, saṃvejetukāmena moggallānena bhikkhunā pādaṅguṭṭhakena migāramātupāsādo, saṅkampito sampakampito sampacālito. Taṃ kiṃ maññatha, bhikkhave, katamesaṃ dhammānaṃ bhāvitattā bahulīkatattā moggallāno bhikkhu evaṃmahiddhiko evaṃmahānubhāvo’’ti ? ‘‘Bhagavaṃmūlakā no, bhante, dhammā, bhagavaṃnettikā bhagavaṃpaṭisaraṇā. Sādhu vata, bhante, bhagavantaṃyeva paṭibhātu etassa bhāsitassa attho. Bhagavato sutvā bhikkhū dhāressantī’’ti.
‘‘д̇зна хи, бхигкавз, сун̣аат̇а. жад̇уннам̣ ко, бхигкавз, ид̣̇д̇хибаад̣̇аанам̣ бхаавид̇ад̇д̇аа б̣ахулийгад̇ад̇д̇аа мог̇г̇аллаано бхигку звам̣махид̣̇д̇хиго звам̣махаанубхааво. гад̇амзсам̣ жад̇уннам̣? ид̇ха, бхигкавз, мог̇г̇аллаано бхигку чанд̣̇асамаад̇хиббад̇хаанасан̇каарасаманнааг̇ад̇ам̣ ид̣̇д̇хибаад̣̇ам̣ бхаавзд̇и, вийрияасамаад̇хи…бз… жид̇д̇асамаад̇хи…бз… виймам̣саасамаад̇хиббад̇хаанасан̇каарасаманнааг̇ад̇ам̣ ид̣̇д̇хибаад̣̇ам̣ бхаавзд̇и – ‘ид̇и мз виймам̣саа на жа ад̇илийнаа бхависсад̇и, на жа ад̇иббаг̇г̇ахид̇аа бхависсад̇и; на жа аж̇жхад̇д̇ам̣ сам̣кид̇д̇аа бхависсад̇и, на жа б̣ахид̣̇д̇хаа вигкид̇д̇аа бхависсад̇и’. бажчаабурзсан̃н̃ий жа вихарад̇и – яат̇аа бурз д̇ат̇аа бажчаа, яат̇аа бажчаа д̇ат̇аа бурз; яат̇аа ад̇хо д̇ат̇аа уд̣̇д̇хам̣ яат̇аа уд̣̇д̇хам̣ д̇ат̇аа ад̇хо; яат̇аа д̣̇иваа д̇ат̇аа рад̇д̇им̣, яат̇аа рад̇д̇им̣ д̇ат̇аа д̣̇иваа. ид̇и вивадзна жзд̇асаа абарияонад̣̇д̇хзна саббабхаасам̣ жид̇д̇ам̣ бхаавзд̇и. имзсам̣ ко, бхигкавз, жад̇уннам̣ ид̣̇д̇хибаад̣̇аанам̣ бхаавид̇ад̇д̇аа б̣ахулийгад̇ад̇д̇аа мог̇г̇аллаано бхигку звам̣махид̣̇д̇хиго звам̣махаанубхааво. имзсан̃жа бана, бхигкавз, жад̇уннам̣ ид̣̇д̇хибаад̣̇аанам̣ бхаавид̇ад̇д̇аа б̣ахулийгад̇ад̇д̇аа мог̇г̇аллаано бхигку анзгавихид̇ам̣ ид̣̇д̇хивид̇хам̣ бажжанубход̇и…бз… яаава б̣рахмалогааби гааязна васам̣ вад̇д̇зд̇и…бз… имзсан̃жа бана, бхигкавз, жад̇уннам̣ ид̣̇д̇хибаад̣̇аанам̣ бхаавид̇ад̇д̇аа б̣ахулийгад̇ад̇д̇аа мог̇г̇аллаано бхигку аасаваанам̣ каяаа анаасавам̣ жзд̇овимуд̇д̇им̣ бан̃н̃аавимуд̇д̇им̣ д̣̇идтзва д̇хаммз саяам̣ абхин̃н̃аа сажчигад̇ваа убасамбаж̇ж̇а вихарад̇ий’’д̇и. жад̇уд̇т̇ам̣.
‘‘Tena hi, bhikkhave, suṇātha. Catunnaṃ kho, bhikkhave, iddhipādānaṃ bhāvitattā bahulīkatattā moggallāno bhikkhu evaṃmahiddhiko evaṃmahānubhāvo. Katamesaṃ catunnaṃ? Idha, bhikkhave, moggallāno bhikkhu chandasamādhippadhānasaṅkhārasamannāgataṃ iddhipādaṃ bhāveti, vīriyasamādhi…pe… cittasamādhi…pe… vīmaṃsāsamādhippadhānasaṅkhārasamannāgataṃ iddhipādaṃ bhāveti – ‘iti me vīmaṃsā na ca atilīnā bhavissati, na ca atippaggahitā bhavissati; na ca ajjhattaṃ saṃkhittā bhavissati, na ca bahiddhā vikkhittā bhavissati’. Pacchāpuresaññī ca viharati – yathā pure tathā pacchā, yathā pacchā tathā pure; yathā adho tathā uddhaṃ yathā uddhaṃ tathā adho; yathā divā tathā rattiṃ, yathā rattiṃ tathā divā. Iti vivaṭena cetasā apariyonaddhena sappabhāsaṃ cittaṃ bhāveti. Imesaṃ kho, bhikkhave, catunnaṃ iddhipādānaṃ bhāvitattā bahulīkatattā moggallāno bhikkhu evaṃmahiddhiko evaṃmahānubhāvo. Imesañca pana, bhikkhave, catunnaṃ iddhipādānaṃ bhāvitattā bahulīkatattā moggallāno bhikkhu anekavihitaṃ iddhividhaṃ paccanubhoti…pe… yāva brahmalokāpi kāyena vasaṃ vatteti…pe… imesañca pana, bhikkhave, catunnaṃ iddhipādānaṃ bhāvitattā bahulīkatattā moggallāno bhikkhu āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharatī’’ti. Catutthaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 4. мог̇г̇аллаанасуд̇д̇аван̣н̣анаа • 4. Moggallānasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 4. мог̇г̇аллаанасуд̇д̇аван̣н̣анаа • 4. Moggallānasuttavaṇṇanā
