| Library / Tipiṭaka / திபிடக • Tipiṭaka / ஸுத்தனிபாத-அட்ட²கதா² • Suttanipāta-aṭṭhakathā |
15. மோக⁴ராஜஸுத்தவண்ணனா
15. Mogharājasuttavaṇṇanā
1123. த்³வாஹங் ஸக்கந்தி மோக⁴ராஜஸுத்தங். தத்த² த்³வாஹந்தி த்³வே வாரே அஹங். ஸோ ஹி புப்³பே³ அஜிதஸுத்தஸ்ஸ ச திஸ்ஸமெத்தெய்யஸுத்தஸ்ஸ ச அவஸானே த்³விக்க²த்துங் ப⁴க³வந்தங் புச்சி². ப⁴க³வா பனஸ்ஸ இந்த்³ரியபரிபாகங் ஆக³மயமானோ ந ப்³யாகாஸி. தேனாஹ – ‘‘த்³வாஹங் ஸக்கங் அபுச்சி²ஸ்ஸ’’ந்தி. யாவததியஞ்ச தே³வீஸி, ப்³யாகரோதீதி மே ஸுதந்தி யாவததியஞ்ச ஸஹத⁴ம்மிகங் புட்டோ² விஸுத்³தி⁴தே³வபூ⁴தோ இஸி ப⁴க³வா ஸம்மாஸம்பு³த்³தோ⁴ ப்³யாகரோதீதி ஏவங் மே ஸுதங். கோ³தா⁴வரீதீரேயேவ கிர ஸோ ஏவமஸ்ஸோஸி. தேனாஹ – ‘‘ப்³யாகரோதீதி மே ஸுத’’ந்தி.
1123.Dvāhaṃsakkanti mogharājasuttaṃ. Tattha dvāhanti dve vāre ahaṃ. So hi pubbe ajitasuttassa ca tissametteyyasuttassa ca avasāne dvikkhattuṃ bhagavantaṃ pucchi. Bhagavā panassa indriyaparipākaṃ āgamayamāno na byākāsi. Tenāha – ‘‘dvāhaṃ sakkaṃ apucchissa’’nti. Yāvatatiyañca devīsi, byākarotīti me sutanti yāvatatiyañca sahadhammikaṃ puṭṭho visuddhidevabhūto isi bhagavā sammāsambuddho byākarotīti evaṃ me sutaṃ. Godhāvarītīreyeva kira so evamassosi. Tenāha – ‘‘byākarotīti me suta’’nti.
1124. அயங் லோகோதி மனுஸ்ஸலோகோ. பரோ லோகோதி தங் ட²பெத்வா அவஸேஸோ. ஸதே³வகோதி ப்³ரஹ்மலோகங் ட²பெத்வா அவஸேஸோ உபபத்திதே³வஸம்முதிதே³வயுத்தோ, ‘‘ப்³ரஹ்மலோகோ ஸதே³வகோ’’தி ஏதங் வா ‘‘ஸதே³வகே லோகே’’திஆதி³னயனித³ஸ்ஸனமத்தங், தேன ஸப்³போ³பி ததா²வுத்தப்பகாரோ லோகோ வேதி³தப்³போ³.
1124.Ayaṃ lokoti manussaloko. Paro lokoti taṃ ṭhapetvā avaseso. Sadevakoti brahmalokaṃ ṭhapetvā avaseso upapattidevasammutidevayutto, ‘‘brahmaloko sadevako’’ti etaṃ vā ‘‘sadevake loke’’tiādinayanidassanamattaṃ, tena sabbopi tathāvuttappakāro loko veditabbo.
1125. ஏவங் அபி⁴க்கந்தத³ஸ்ஸாவிந்தி ஏவங் அக்³க³த³ஸ்ஸாவிங், ஸதே³வகஸ்ஸ லோகஸ்ஸ அஜ்ஜா²ஸயாதி⁴முத்திக³திபராயணாதீ³னி பஸ்ஸிதுங் ஸமத்த²ந்தி த³ஸ்ஸேதி.
1125. Evaṃ abhikkantadassāvinti evaṃ aggadassāviṃ, sadevakassa lokassa ajjhāsayādhimuttigatiparāyaṇādīni passituṃ samatthanti dasseti.
1126. ஸுஞ்ஞதோ லோகங் அவெக்க²ஸ்ஸூதி அவஸியபவத்தஸல்லக்க²ணவஸேன வா துச்ச²ஸங்கா²ரஸமனுபஸ்ஸனாவஸேன வாதி த்³வீஹி காரணேஹி ஸுஞ்ஞதோ லோகங் பஸ்ஸ. அத்தானுதி³ட்டி²ங் ஊஹச்சாதி ஸக்காயதி³ட்டி²ங் உத்³த⁴ரித்வா. ஸேஸங் ஸப்³ப³த்த² பாகடமேவ.
1126.Suññato lokaṃ avekkhassūti avasiyapavattasallakkhaṇavasena vā tucchasaṅkhārasamanupassanāvasena vāti dvīhi kāraṇehi suññato lokaṃ passa. Attānudiṭṭhiṃ ūhaccāti sakkāyadiṭṭhiṃ uddharitvā. Sesaṃ sabbattha pākaṭameva.
ஏவங் ப⁴க³வா இமம்பி ஸுத்தங் அரஹத்தனிகூடேனேவ தே³ஸேஸி. தே³ஸனாபரியோஸானே ச வுத்தஸதி³ஸோ ஏவ த⁴ம்மாபி⁴ஸமயோ அஹோஸீதி.
Evaṃ bhagavā imampi suttaṃ arahattanikūṭeneva desesi. Desanāpariyosāne ca vuttasadiso eva dhammābhisamayo ahosīti.
பரமத்த²ஜோதிகாய கு²த்³த³க-அட்ட²கதா²ய
Paramatthajotikāya khuddaka-aṭṭhakathāya
ஸுத்தனிபாத-அட்ட²கதா²ய மோக⁴ராஜஸுத்தவண்ணனா நிட்டி²தா.
Suttanipāta-aṭṭhakathāya mogharājasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஸுத்தனிபாதபாளி • Suttanipātapāḷi / 15. மோக⁴ராஜமாணவபுச்சா² • 15. Mogharājamāṇavapucchā
