| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
5. மோக⁴ராஜத்தே²ரஅபதா³னவண்ணனா
5. Mogharājattheraapadānavaṇṇanā
அத்த²த³ஸ்ஸீ து ப⁴க³வாதிஆதி³கங் ஆயஸ்மதோ மோக⁴ராஜத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே குலகே³ஹே நிப்³ப³த்தித்வா விஞ்ஞுதங் பத்தோ ஏகதி³வஸங் ஸத்து² ஸந்திகே த⁴ம்மங் ஸுணந்தோ ஸத்தா²ரங் ஏகங் பி⁴க்கு²ங் லூக²சீவரத⁴ரானங் அக்³க³ட்டா²னே ட²பெந்தங் தி³ஸ்வா தங் டா²னந்தரங் ஆகங்க²ந்தோ பணிதா⁴னங் கத்வா தத்த² தத்த² ப⁴வே புஞ்ஞானி கரொந்தோ அத்த²த³ஸ்ஸிஸ்ஸ ப⁴க³வதோ காலே புன ப்³ராஹ்மணகுலே நிப்³ப³த்தித்வா ப்³ராஹ்மணானங் விஜ்ஜாஸிப்பேஸு நிப்ப²த்திங் க³தோ ஏகதி³வஸங் அத்த²த³ஸ்ஸிங் ப⁴க³வந்தங் பி⁴க்கு²ஸங்க⁴பரிவுதங் ரதி²யங் க³ச்ச²ந்தங் தி³ஸ்வா பஸன்னமானஸோ பஞ்சபதிட்டி²தேன வந்தி³த்வா ஸிரஸி அஞ்ஜலிங் கத்வா ‘‘யாவதா ரூபினோ ஸத்தா²’’திஆதீ³ஹி ச²ஹி கா³தா²ஹி அபி⁴த்த²வித்வா பா⁴ஜனங் பூரெத்வா மது⁴ங் உபனேஸி. ஸத்தா² தங் படிக்³க³ஹெத்வா அனுமோத³னங் அகாஸி. ஸோ தேன புஞ்ஞகம்மேன தே³வமனுஸ்ஸேஸு ஸங்ஸரந்தோ கஸ்ஸபப⁴க³வதோ காலே கட்ட²வாஹனஸ்ஸ நாம ரஞ்ஞோ அமச்சோ ஹுத்வா நிப்³ப³த்தோ தேன ஸத்து² ஆனயனத்தா²ய பேஸிதோ ஸத்து² ஸந்திகங் க³ந்த்வா த⁴ம்மங் ஸுத்வா படிலத்³த⁴ஸத்³தோ⁴ பப்³ப³ஜித்வா வீஸதிவஸ்ஸஸஹஸ்ஸானி ஸமணத⁴ம்மங் கத்வா ததோ சுதோ ஏகங் பு³த்³த⁴ந்தரங் ஸுக³தீஸுயேவ பரிவத்தெந்தோ இமஸ்மிங் பு³த்³து⁴ப்பாதே³ ப்³ராஹ்மணகுலே நிப்³ப³த்தித்வா மோக⁴ராஜாதி லத்³த⁴னாமோ பா³வரீயப்³ராஹ்மணஸ்ஸ ஸந்திகே உக்³க³ஹிதஸிப்போ ஸங்வேக³ஜாதோ தாபஸபப்³ப³ஜ்ஜங் பப்³ப³ஜித்வா தாபஸஸஹஸ்ஸபரிவாரோ அஜிதாதீ³ஹி ஸத்³தி⁴ங் ஸத்து² ஸந்திகங் பேஸிதோ தேஸங் பன்னரஸமோ ஹுத்வா பஞ்ஹங் புச்சி²த்வா விஸ்ஸஜ்ஜனபரியோஸானே அரஹத்தங் பாபுணி. அரஹத்தங் பன பத்வா ஸத்த²லூக²ங் ஸுத்தலூக²ங் ரஜனலூக²ந்தி விஸேஸேன திவிதே⁴னபி லூகே²ன ஸமன்னாக³தங் பங்ஸுகூலங் தா⁴ரேஸி. தேன நங் ஸத்தா² லூக²சீவரத⁴ரானங் அக்³க³ட்டா²னே ட²பேஸி.
Atthadassī tu bhagavātiādikaṃ āyasmato mogharājattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle kulagehe nibbattitvā viññutaṃ patto ekadivasaṃ satthu santike dhammaṃ suṇanto satthāraṃ ekaṃ bhikkhuṃ lūkhacīvaradharānaṃ aggaṭṭhāne ṭhapentaṃ disvā taṃ ṭhānantaraṃ ākaṅkhanto paṇidhānaṃ katvā tattha tattha bhave puññāni karonto atthadassissa bhagavato kāle puna brāhmaṇakule nibbattitvā brāhmaṇānaṃ vijjāsippesu nipphattiṃ gato ekadivasaṃ atthadassiṃ bhagavantaṃ bhikkhusaṅghaparivutaṃ rathiyaṃ gacchantaṃ disvā pasannamānaso pañcapatiṭṭhitena vanditvā sirasi añjaliṃ katvā ‘‘yāvatā rūpino satthā’’tiādīhi chahi gāthāhi abhitthavitvā bhājanaṃ pūretvā madhuṃ upanesi. Satthā taṃ paṭiggahetvā anumodanaṃ akāsi. So tena puññakammena devamanussesu saṃsaranto kassapabhagavato kāle kaṭṭhavāhanassa nāma rañño amacco hutvā nibbatto tena satthu ānayanatthāya pesito satthu santikaṃ gantvā dhammaṃ sutvā paṭiladdhasaddho pabbajitvā vīsativassasahassāni samaṇadhammaṃ katvā tato cuto ekaṃ buddhantaraṃ sugatīsuyeva parivattento imasmiṃ buddhuppāde brāhmaṇakule nibbattitvā mogharājāti laddhanāmo bāvarīyabrāhmaṇassa santike uggahitasippo saṃvegajāto tāpasapabbajjaṃ pabbajitvā tāpasasahassaparivāro ajitādīhi saddhiṃ satthu santikaṃ pesito tesaṃ pannarasamo hutvā pañhaṃ pucchitvā vissajjanapariyosāne arahattaṃ pāpuṇi. Arahattaṃ pana patvā satthalūkhaṃ suttalūkhaṃ rajanalūkhanti visesena tividhenapi lūkhena samannāgataṃ paṃsukūlaṃ dhāresi. Tena naṃ satthā lūkhacīvaradharānaṃ aggaṭṭhāne ṭhapesi.
64. ஏவங் ஸோ பணிதா⁴னானுரூபேன அரஹத்தப²லங் பத்வா அத்தனோ புப்³ப³ஸம்பா⁴ரங் தி³ஸ்வா புப்³ப³கம்மாபதா³னங் பகாஸெந்தோ அத்த²த³ஸ்ஸீ து ப⁴க³வாதிஆதி³மாஹ. தங் ஸப்³ப³ங் உத்தானத்த²மேவ.
64. Evaṃ so paṇidhānānurūpena arahattaphalaṃ patvā attano pubbasambhāraṃ disvā pubbakammāpadānaṃ pakāsento atthadassī tu bhagavātiādimāha. Taṃ sabbaṃ uttānatthameva.
73. புடகங் பூரயித்வானாதி புடகங் வுச்சதி வாரகங், க⁴டங் வா. அனேளகங் நித்³தோ³ஸங் மக்கி²கண்ட³விரஹிதங் கு²த்³த³மது⁴னா க⁴டங் பூரெத்வா தங் உபோ⁴ஹி ஹத்தே²ஹி பக்³க³ய்ஹ பகாரேன ஆத³ரேன க³ஹெத்வா மஹேஸினோ ப⁴க³வதோ உபனேஸிந்தி ஸம்ப³ந்தோ⁴. ஸேஸங் ஸுவிஞ்ஞெய்யமேவாதி.
73.Puṭakaṃ pūrayitvānāti puṭakaṃ vuccati vārakaṃ, ghaṭaṃ vā. Aneḷakaṃ niddosaṃ makkhikaṇḍavirahitaṃ khuddamadhunā ghaṭaṃ pūretvā taṃ ubhohi hatthehi paggayha pakārena ādarena gahetvā mahesino bhagavato upanesinti sambandho. Sesaṃ suviññeyyamevāti.
மோக⁴ராஜத்தே²ரஅபதா³னவண்ணனா ஸமத்தா.
Mogharājattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 5. மோக⁴ராஜத்தே²ரஅபதா³னங் • 5. Mogharājattheraapadānaṃ
