| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
4. могхарааж̇ад̇т̇зраг̇аат̇ааван̣н̣анаа
4. Mogharājattheragāthāvaṇṇanā
чавибаабага жид̇д̇абхад̣̇д̣̇агаад̇и ааяасмад̇о могхарааж̇ад̇т̇зрасса г̇аат̇аа. гаа уббад̇д̇и? аяамби буримаб̣уд̣̇д̇хзсу гад̇аад̇хигааро бад̣̇умуд̇д̇арасса бхаг̇авад̇о гаалз гулаг̇зхз ниб̣б̣ад̇д̇ид̇ваа вин̃н̃уд̇ам̣ бад̇д̇о згад̣̇ивасам̣ сад̇т̇у санд̇игз д̇хаммам̣ сун̣анд̇о сад̇т̇аарам̣ згам̣ бхигкум̣ луукажийварад̇хараанам̣ аг̇г̇адтаанз табзнд̇ам̣ д̣̇исваа д̇ам̣ таананд̇арам̣ ааган̇канд̇о бан̣ид̇хаанам̣ гад̇ваа д̇ад̇т̇а д̇ад̇т̇а бхавз бун̃н̃аани гаронд̇о ад̇т̇ад̣̇ассисса бхаг̇авад̇о гаалз б̣раахман̣агулз ниб̣б̣ад̇д̇ид̇ваа б̣раахман̣аанам̣ виж̇ж̇аасиббзсу нибпад̇д̇им̣ г̇ад̇о б̣раахман̣амаан̣авз виж̇ж̇аасиббаани сигкаабзнд̇о згад̣̇ивасам̣ ад̇т̇ад̣̇ассим̣ бхаг̇аванд̇ам̣ бхигкусан̇гхабаривуд̇ам̣ г̇ажчанд̇ам̣ д̣̇исваа басаннамаанасо бан̃жабад̇идтид̇зна ванд̣̇ид̇ваа сираси ан̃ж̇алим̣ гад̇ваа ‘‘яаавад̇аа руубино сад̇д̇аа’’д̇иаад̣̇инаа чахи г̇аат̇аахи абхид̇т̇авид̇ваа бхааж̇анам̣ буурзд̇ваа мад̇хум̣ убанаамзси. сад̇т̇аа мад̇хум̣ бадиг̇г̇ахзд̇ваа анумод̣̇анам̣ агааси.
Chavipāpakacittabhaddakāti āyasmato mogharājattherassa gāthā. Kā uppatti? Ayampi purimabuddhesu katādhikāro padumuttarassa bhagavato kāle kulagehe nibbattitvā viññutaṃ patto ekadivasaṃ satthu santike dhammaṃ suṇanto satthāraṃ ekaṃ bhikkhuṃ lūkhacīvaradharānaṃ aggaṭṭhāne ṭhapentaṃ disvā taṃ ṭhānantaraṃ ākaṅkhanto paṇidhānaṃ katvā tattha tattha bhave puññāni karonto atthadassissa bhagavato kāle brāhmaṇakule nibbattitvā brāhmaṇānaṃ vijjāsippesu nipphattiṃ gato brāhmaṇamāṇave vijjāsippāni sikkhāpento ekadivasaṃ atthadassiṃ bhagavantaṃ bhikkhusaṅghaparivutaṃ gacchantaṃ disvā pasannamānaso pañcapatiṭṭhitena vanditvā sirasi añjaliṃ katvā ‘‘yāvatā rūpino sattā’’tiādinā chahi gāthāhi abhitthavitvā bhājanaṃ pūretvā madhuṃ upanāmesi. Satthā madhuṃ paṭiggahetvā anumodanaṃ akāsi.
со д̇зна бун̃н̃агаммзна д̣̇звамануссзсу сам̣саранд̇о гассабасса бхаг̇авад̇о гаалз гадтавааханасса наама ран̃н̃о амажжо худ̇ваа д̇зна сад̇т̇у аанаяанад̇т̇ам̣ бурисасахассзна бзсид̇о сад̇т̇у санд̇игам̣ г̇анд̇ваа д̇хаммам̣ суд̇ваа бадилад̣̇д̇хасад̣̇д̇хо баб̣б̣аж̇ид̇ваа вийсад̇ивассасахассаани саман̣ад̇хаммам̣ гад̇ваа д̇ад̇о жуд̇о згам̣ б̣уд̣̇д̇ханд̇арам̣ суг̇ад̇ийсуязва баривад̇д̇знд̇о имасмим̣ б̣уд̣̇д̇хуббаад̣̇з б̣раахман̣агулз ниб̣б̣ад̇д̇ид̇ваа могхарааж̇аад̇и лад̣̇д̇ханаамо б̣ааварийб̣раахман̣асса санд̇игз уг̇г̇ахид̇асиббо сам̣взг̇аж̇аад̇о д̇аабасабаб̣б̣аж̇ж̇ам̣ баб̣б̣аж̇ид̇ваа д̇аабасасахассабаривааро аж̇ид̇аад̣̇ийхи сад̣̇д̇хим̣ сад̇т̇у санд̇игам̣ бзсид̇о д̇зсам̣ баннарасамо худ̇ваа бан̃хз бужчид̇ваа бан̃хависсаж̇ж̇анабарияосаанз арахад̇д̇ам̣ баабун̣и. д̇зна вуд̇д̇ам̣ абад̣̇аанз (аба. т̇зра 1.4.64-83) –
So tena puññakammena devamanussesu saṃsaranto kassapassa bhagavato kāle kaṭṭhavāhanassa nāma rañño amacco hutvā tena satthu ānayanatthaṃ purisasahassena pesito satthu santikaṃ gantvā dhammaṃ sutvā paṭiladdhasaddho pabbajitvā vīsativassasahassāni samaṇadhammaṃ katvā tato cuto ekaṃ buddhantaraṃ sugatīsuyeva parivattento imasmiṃ buddhuppāde brāhmaṇakule nibbattitvā mogharājāti laddhanāmo bāvarībrāhmaṇassa santike uggahitasippo saṃvegajāto tāpasapabbajjaṃ pabbajitvā tāpasasahassaparivāro ajitādīhi saddhiṃ satthu santikaṃ pesito tesaṃ pannarasamo hutvā pañhe pucchitvā pañhavissajjanapariyosāne arahattaṃ pāpuṇi. Tena vuttaṃ apadāne (apa. thera 1.4.64-83) –
‘‘ад̇т̇ад̣̇ассий д̇у бхаг̇аваа, саяамбхуу абарааж̇ид̇о;
‘‘Atthadassī tu bhagavā, sayambhū aparājito;
бхигкусан̇гхабариб̣яуул̣хо, рат̇ияам̣ бадибаж̇ж̇ат̇а.
Bhikkhusaṅghaparibyūḷho, rathiyaṃ paṭipajjatha.
‘‘сиссзхи самбаривуд̇о, гхарамхаа абхинигкамим̣;
‘‘Sissehi samparivuto, gharamhā abhinikkhamiṃ;
нигкамид̇ваанахам̣ д̇ад̇т̇а, ад̣̇д̣̇асам̣ логанааяагам̣.
Nikkhamitvānahaṃ tattha, addasaṃ lokanāyakaṃ.
‘‘абхиваад̣̇ияа самб̣уд̣̇д̇хам̣, сирз гад̇ваана ан̃ж̇алим̣;
‘‘Abhivādiya sambuddhaṃ, sire katvāna añjaliṃ;
сагам̣ жид̇д̇ам̣ басаад̣̇зд̇ваа, сант̇авим̣ логанааяагам̣.
Sakaṃ cittaṃ pasādetvā, santhaviṃ lokanāyakaṃ.
‘‘яаавад̇аа руубино сад̇д̇аа, аруубий ваа асан̃н̃ино;
‘‘Yāvatā rūpino sattā, arūpī vā asaññino;
саб̣б̣з д̇з д̇ава н̃аан̣амхи, анд̇о хонд̇и самог̇ад̇хаа.
Sabbe te tava ñāṇamhi, anto honti samogadhā.
‘‘сукумажчигаж̇аалзна, уд̣̇агам̣ яо баригкибз;
‘‘Sukhumacchikajālena, udakaṃ yo parikkhipe;
яз гзжи уд̣̇агз баан̣аа, анд̇ож̇аалз бхаванд̇и д̇з.
Ye keci udake pāṇā, antojāle bhavanti te.
‘‘язсан̃жа жзд̇анаа ад̇т̇и, руубино жа аруубино;
‘‘Yesañca cetanā atthi, rūpino ca arūpino;
саб̣б̣з д̇з д̇ава н̃аан̣амхи, анд̇о хонд̇и самог̇ад̇хаа.
Sabbe te tava ñāṇamhi, anto honti samogadhā.
‘‘самуд̣̇д̇харасимам̣ логам̣, анд̇хагаарасамаагулам̣;
‘‘Samuddharasimaṃ lokaṃ, andhakārasamākulaṃ;
д̇ава д̇хаммам̣ сун̣ид̇ваана, ган̇каасод̇ам̣ д̇аранд̇и д̇з.
Tava dhammaṃ suṇitvāna, kaṅkhāsotaṃ taranti te.
‘‘авиж̇ж̇аанивуд̇з логз, анд̇хагаарзна од̇т̇адз;
‘‘Avijjānivute loke, andhakārena otthaṭe;
д̇ава н̃аан̣амхи ж̇од̇анд̇з, анд̇хагаараа бад̇хам̣сид̇аа.
Tava ñāṇamhi jotante, andhakārā padhaṃsitā.
‘‘д̇увам̣ жагкууси саб̣б̣зсам̣, махаад̇амабанууд̣̇ано;
‘‘Tuvaṃ cakkhūsi sabbesaṃ, mahātamapanūdano;
д̇ава д̇хаммам̣ сун̣ид̇ваана, ниб̣б̣ааяад̇и б̣ахуж̇ж̇ано.
Tava dhammaṃ suṇitvāna, nibbāyati bahujjano.
‘‘будагам̣ буураяид̇ваана, мад̇хукуд̣̇д̣̇аманзл̣агам̣;
‘‘Puṭakaṃ pūrayitvāna, madhukhuddamaneḷakaṃ;
убхо хад̇т̇зхи баг̇г̇аяха, убанзсим̣ махзсино.
Ubho hatthehi paggayha, upanesiṃ mahesino.
‘‘бадиг̇г̇ан̣хи махаавийро, сахад̇т̇зна махаа иси;
‘‘Paṭiggaṇhi mahāvīro, sahatthena mahā isi;
бхун̃ж̇ид̇ваа д̇ан̃жа саб̣б̣ан̃н̃уу, взхаасам̣ набхамуг̇г̇ами.
Bhuñjitvā tañca sabbaññū, vehāsaṃ nabhamuggami.
‘‘анд̇алигкз тид̇о сад̇т̇аа, ад̇т̇ад̣̇ассий нараасабхо;
‘‘Antalikkhe ṭhito satthā, atthadassī narāsabho;
мама жид̇д̇ам̣ басаад̣̇знд̇о, имаа г̇аат̇аа абхаасат̇а.
Mama cittaṃ pasādento, imā gāthā abhāsatha.
‘‘язнид̣̇ам̣ т̇авид̇ам̣ н̃аан̣ам̣, б̣уд̣̇д̇хасздто жа т̇омид̇о;
‘‘Yenidaṃ thavitaṃ ñāṇaṃ, buddhaseṭṭho ca thomito;
д̇зна жид̇д̇аббасаад̣̇зна, д̣̇уг̇г̇ад̇им̣ со на г̇ажчад̇и.
Tena cittappasādena, duggatiṃ so na gacchati.
‘‘жад̇уд̣̇д̣̇асан̃жа кад̇д̇ум̣ со, д̣̇звараж̇ж̇ам̣ гариссад̇и;
‘‘Catuddasañca khattuṃ so, devarajjaṃ karissati;
бат̇аб̣яаа раж̇ж̇ам̣ адтасад̇ам̣, васуд̇хам̣ аавасиссад̇и.
Pathabyā rajjaṃ aṭṭhasataṃ, vasudhaṃ āvasissati.
‘‘бан̃жзва сад̇агкад̇д̇ун̃жа, жаггавад̇д̇ий бхависсад̇и;
‘‘Pañceva satakkhattuñca, cakkavattī bhavissati;
бад̣̇зсараж̇ж̇ам̣ асан̇кзяяам̣, махияаа гаараяиссад̇и.
Padesarajjaṃ asaṅkheyyaṃ, mahiyā kārayissati.
‘‘аж̇жхааяаго манд̇ад̇харо, д̇ин̣н̣ам̣ взд̣̇аана баараг̇уу;
‘‘Ajjhāyako mantadharo, tiṇṇaṃ vedāna pāragū;
г̇од̇амасса бхаг̇авад̇о, саасанз баб̣б̣аж̇иссад̇и.
Gotamassa bhagavato, sāsane pabbajissati.
‘‘г̇амбхийрам̣ нибун̣ам̣ ад̇т̇ам̣, н̃аан̣зна вижиниссад̇и;
‘‘Gambhīraṃ nipuṇaṃ atthaṃ, ñāṇena vicinissati;
могхарааж̇аад̇и наамзна, хзссад̇и сад̇т̇у сааваго.
Mogharājāti nāmena, hessati satthu sāvako.
‘‘д̇ийхи виж̇ж̇аахи самбаннам̣, гад̇агижжаманаасавам̣;
‘‘Tīhi vijjāhi sampannaṃ, katakiccamanāsavaṃ;
г̇од̇амо сад̇т̇аваахаг̇г̇о, зд̇ад̣̇аг̇г̇з табзссад̇и.
Gotamo satthavāhaggo, etadagge ṭhapessati.
‘‘хид̇ваа маанусагам̣ яог̇ам̣, чзд̇ваана бхаваб̣анд̇ханам̣;
‘‘Hitvā mānusakaṃ yogaṃ, chetvāna bhavabandhanaṃ;
саб̣б̣аасавз барин̃н̃ааяа, вихараами анаасаво.
Sabbāsave pariññāya, viharāmi anāsavo.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
арахад̇д̇ам̣ бана бад̇ваа сад̇т̇алуукам̣ суд̇д̇алуукам̣ раж̇аналууканд̇и висзсзна д̇ивид̇хзнаби луукзна саманнааг̇ад̇ам̣ бам̣сугуулам̣ д̇хаарзси. д̇зна нам̣ сад̇т̇аа луукажийварад̇хараанам̣ аг̇г̇адтаанз табзси. абарабхааг̇з буримагаммаббажжаяаа барихаарасса агаран̣ад̇о т̇зрасса сарийрз д̣̇ад̣̇д̣̇убийл̣агаад̣̇ийни уббаж̇ж̇ид̇ваа вад̣дхим̣су. со ‘‘сзнаасанам̣ д̣̇уссад̇ий’’д̇и хзманд̇зби маг̇ад̇хагкзд̇д̇зсу балааласант̇аараани ад̇т̇арид̇ваа сзд̇и. д̇ам̣ згад̣̇ивасам̣ убадтаанам̣ убасан̇гамид̇ваа ванд̣̇ид̇ваа згаманд̇ам̣ нисиннам̣ сад̇т̇аа бадисант̇ааравасзна ‘‘чавибаабагаа’’д̇иаад̣̇инаа батамаг̇аат̇ааяа бужчи.
Arahattaṃ pana patvā satthalūkhaṃ suttalūkhaṃ rajanalūkhanti visesena tividhenapi lūkhena samannāgataṃ paṃsukūlaṃ dhāresi. Tena naṃ satthā lūkhacīvaradharānaṃ aggaṭṭhāne ṭhapesi. Aparabhāge purimakammappaccayā parihārassa akaraṇato therassa sarīre daddupīḷakādīni uppajjitvā vaḍḍhiṃsu. So ‘‘senāsanaṃ dussatī’’ti hemantepi magadhakkhettesu palālasanthārāni attharitvā seti. Taṃ ekadivasaṃ upaṭṭhānaṃ upasaṅkamitvā vanditvā ekamantaṃ nisinnaṃ satthā paṭisanthāravasena ‘‘chavipāpakā’’tiādinā paṭhamagāthāya pucchi.
207. д̇ад̇т̇а чавибаабагаад̇и д̣̇ад̣̇д̣̇угажчубийл̣агаахи бхиннажчавибхаавад̇о хийнажчавига д̣̇удтажчавига . жид̇д̇абхад̣̇д̣̇агаад̇и анавасзсагилзсаббахаанзна б̣рахмавихаарасзванааяа жа бхад̣̇д̣̇ажид̇д̇а сунд̣̇аражид̇д̇а. могхарааж̇аад̇и д̇асса аалабанам̣. сад̇ад̇ам̣ самаахид̇од̇и аг̇г̇апаласамаад̇хинаа нижжагаалам̣ абхин̣хам̣ самаахид̇амаанасо. хзманд̇игасийд̇агааларад̇д̇ияод̇и хзманд̇асамаяз сийд̇агааларад̇д̇ияо. ажжанд̇асам̣яог̇з жзд̇ам̣ убаяог̇аважанам̣. ‘‘хзманд̇игаа сийд̇агааларад̇д̇ияо’’д̇иби баал̣и. д̇ад̇т̇а хзманд̇игаад̇и хзманд̇ог̇ад̇хаа хзманд̇абарияаабаннаад̇и ад̇т̇о. бхигку д̇вам̣ сийд̇и бхигку го д̇вам̣ аси, звам̣бхууд̇о барзсу д̇ава сзнаасанам̣ гад̇ваа ад̣̇знд̇зсу сан̇гхиган̃жа сзнаасанам̣ абависанд̇о. гат̇ам̣ гариссасийд̇и яат̇аавуд̇д̇з сийд̇агаалз гат̇ам̣ ад̇д̇абхаавам̣ бавад̇д̇зсийд̇и сад̇т̇аа бужчи. звам̣ бана будто т̇зро сад̇т̇у д̇амад̇т̇ам̣ гат̇знд̇о –
207. Tattha chavipāpakāti daddukacchupīḷakāhi bhinnacchavibhāvato hīnacchavika duṭṭhacchavika . Cittabhaddakāti anavasesakilesappahānena brahmavihārasevanāya ca bhaddacitta sundaracitta. Mogharājāti tassa ālapanaṃ. Satataṃ samāhitoti aggaphalasamādhinā niccakālaṃ abhiṇhaṃ samāhitamānaso. Hemantikasītakālarattiyoti hemantasamaye sītakālarattiyo. Accantasaṃyoge cetaṃ upayogavacanaṃ. ‘‘Hemantikā sītakālarattiyo’’tipi pāḷi. Tattha hemantikāti hemantogadhā hemantapariyāpannāti attho. Bhikkhu tvaṃ sīti bhikkhu ko tvaṃ asi, evaṃbhūto paresu tava senāsanaṃ katvā adentesu saṅghikañca senāsanaṃ apavisanto. Kathaṃ karissasīti yathāvutte sītakāle kathaṃ attabhāvaṃ pavattesīti satthā pucchi. Evaṃ pana puṭṭho thero satthu tamatthaṃ kathento –
208.
208.
‘‘самбаннасассаа маг̇ад̇хаа, гзвалаа ид̇и мз суд̇ам̣;
‘‘Sampannasassā magadhā, kevalā iti me sutaṃ;
балаалажчаннаго сзяяам̣, яат̇ан̃н̃з сукаж̇ийвино’’д̇и. – г̇аат̇амааха;
Palālacchannako seyyaṃ, yathaññe sukhajīvino’’ti. – gāthamāha;
д̇ад̇т̇а самбаннасассаад̇и нибпаннасассаа. маг̇ад̇хаад̇и маг̇ад̇харадтам̣ вад̣̇ад̇и. маг̇ад̇хаа наама ж̇аанабад̣̇ино рааж̇агумаараа, д̇зсам̣ ниваасо згоби ж̇анабад̣̇о рул̣хийвасзна ‘‘маг̇ад̇хаа’’д̇взва б̣ахуважанзна вужжад̇и. гзвалаад̇и анавасзсаа. ид̇и мз суд̇анд̇и звам̣ маяаа суд̇ам̣. д̇ад̇т̇а яо ад̣̇идто бад̣̇зсо, д̇асса васзна суд̇анд̇и вуд̇д̇ам̣. д̇зна зд̣̇исз гаалз маг̇ад̇хзсу яад̇т̇а гад̇т̇ажи маяаа васид̇ум̣ саггаад̇и д̣̇ассзд̇и. балаалажчаннаго сзяяам̣, яат̇ан̃н̃з сукаж̇ийвинод̇и яат̇аа ан̃н̃з сукаж̇ийвино бхигкуу сзнаасанасаббааяам̣ лад̣̇д̇хаа сунд̣̇арзхи ад̇т̇аран̣абаавуран̣зхи сукзна саяанд̇и, звам̣ ахамби балааласант̇аарамзва хздтаа сант̇арид̇ваа убари д̇ирияан̃жа балаалажчад̣̇анзнзва чаад̣̇ид̇асарийрад̇ааяа балаалажчаннаго сзяяам̣ саяим̣, сзяяам̣ габбзсинд̇и ад̇д̇ано яат̇аалаабхасанд̇осам̣ вибхаавзд̇и.
Tattha sampannasassāti nipphannasassā. Magadhāti magadharaṭṭhaṃ vadati. Magadhā nāma jānapadino rājakumārā, tesaṃ nivāso ekopi janapado ruḷhīvasena ‘‘magadhā’’tveva bahuvacanena vuccati. Kevalāti anavasesā. Iti me sutanti evaṃ mayā sutaṃ. Tattha yo adiṭṭho padeso, tassa vasena sutanti vuttaṃ. Tena edise kāle magadhesu yattha katthaci mayā vasituṃ sakkāti dasseti. Palālacchannako seyyaṃ, yathaññe sukhajīvinoti yathā aññe sukhajīvino bhikkhū senāsanasappāyaṃ laddhā sundarehi attharaṇapāvuraṇehi sukhena sayanti, evaṃ ahampi palālasanthārameva heṭṭhā santharitvā upari tiriyañca palālacchadaneneva chāditasarīratāya palālacchannako seyyaṃ sayiṃ, seyyaṃ kappesinti attano yathālābhasantosaṃ vibhāveti.
могхарааж̇ад̇т̇зраг̇аат̇ааван̣н̣анаа нидтид̇аа.
Mogharājattheragāthāvaṇṇanā niṭṭhitā.
Next: 5. висаакабан̃жаалабуд̇д̇ад̇т̇зраг̇аат̇ааван̣н̣анаа • 5. Visākhapañcālaputtattheragāthāvaṇṇanā
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 4. могхарааж̇ад̇т̇зраг̇аат̇аа • 4. Mogharājattheragāthā
