| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
3. மோஹனஸிக்கா²பத³ங்
3. Mohanasikkhāpadaṃ
444. ததியே அனுஸத்³தோ³ படிபாடிஅத்த²ங் அந்தோகத்வா விச்ச²த்த²வாசகோதி ஆஹ ‘‘அனுபடிபாடியா அத்³த⁴மாஸே அத்³த⁴மாஸே’’தி. ஸோதி பாதிமொக்கோ². உபோஸதே² உபோஸதே² உத்³தி³ஸிதப்³ப³ந்தி அனுபோஸதி²கங். எத்தா²பி ஹி அனுஸத்³தோ³ விச்ச²த்த²வாசகோ. ஸோதி பாதிமொக்கோ². உத்³தி³ஸியமானோ நாம ஹோதீதி யோஜனா. ‘‘தஸ்மிங் அனாசாரே’’தி பதே³ன ‘‘தத்தா²’’தி பத³ஸ்ஸத்த²ங் த³ஸ்ஸேதி. ‘‘யங் ஆபத்தி’’ந்தி பதே³ன யங்ஸத்³த³ஸ்ஸ விஸயங் த³ஸ்ஸேதி. யதா²த⁴ம்மோதி எத்த² த⁴ம்மஸத்³தே³ன த⁴ம்மோ ச வினயோ ச அதி⁴ப்பேதோதி ஆஹ ‘‘த⁴ம்மோ ச வினயோ சா’’தி. யதா²தி யேனாகாரேன. ஸாது⁴ஸத்³தோ³ ஸுந்த³ரத்தோ², கஸத்³தோ³ பத³பூரணோதி ஆஹ ‘‘ஸுட்டூ²’’தி. அட்டி²ந்தி ச ‘‘கத்வா’’தி ச த்³வே பதா³னி த³ட்ட²ப்³பா³னி. ‘‘அட்டி²கத்வா’’தி வா ஏகங் பத³ங். தத்த² புப்³ப³னயே அத்தோ² யஸ்ஸத்தீ²தி அட்டி² த்த²காரஸ்ஸ ட்ட²காரங் கத்வா, தங் அட்டி²ங். கத்வாதி த்வாபச்சயந்தஉத்தரபதே³ன ஸமாஸோ ந ஹோதி. அட்டி²கபா⁴வந்தி எத்த² இகஸத்³தே³ன ‘‘அட்டீ²’’தி எத்த² ஈபச்சயங் த³ஸ்ஸேதி. ‘‘பா⁴வ’’ந்திபதே³ன பா⁴வபச்சயேன வினா பா⁴வத்த²ஸ்ஸ ஞாபேதப்³ப³தங் த³ஸ்ஸேதி. அத்தோ² பனேவங் த³ட்ட²ப்³போ³ – அட்டி²பா⁴வங் கத்வாதி. பச்சி²மனயே அத்தோ² யஸ்ஸத்தீ²தி அட்டி²கோ புரிமனயேனேவ த்த²காரஸ்ஸ ட்ட²காரங் கத்வா. அத்த²யிதப்³போ³ இச்சி²தப்³போ³தி வா அட்டி²கோ, அட்டி²கஇதி நாமஸத்³த³தோ த்வாபச்சயோ காதப்³போ³. ‘‘அட்டி²கத்வா’’தி இத³ங் பத³ங் கிரியாவிஸேஸனங். கிரியாவிஸேஸனே வத்தமானே கரதா⁴து வா பூ⁴தா⁴து வா யோஜேதப்³பா³தி த³ஸ்ஸேபு⁴ங் வுத்தங் ‘‘கத்வா ஹுத்வா’’தி. தங் ஸப்³ப³ங் த³ஸ்ஸெந்தோ ஆஹ ‘‘அட்டி²கத்வாதி அட்டி²கபா⁴வங் கத்வா, அட்டி²கோ ஹுத்வா’’தி. ததியங்.
444. Tatiye anusaddo paṭipāṭiatthaṃ antokatvā vicchatthavācakoti āha ‘‘anupaṭipāṭiyā addhamāse addhamāse’’ti. Soti pātimokkho. Uposathe uposathe uddisitabbanti anuposathikaṃ. Etthāpi hi anusaddo vicchatthavācako. Soti pātimokkho. Uddisiyamāno nāma hotīti yojanā. ‘‘Tasmiṃ anācāre’’ti padena ‘‘tatthā’’ti padassatthaṃ dasseti. ‘‘Yaṃ āpatti’’nti padena yaṃsaddassa visayaṃ dasseti. Yathādhammoti ettha dhammasaddena dhammo ca vinayo ca adhippetoti āha ‘‘dhammo ca vinayo cā’’ti. Yathāti yenākārena. Sādhusaddo sundarattho, kasaddo padapūraṇoti āha ‘‘suṭṭhū’’ti. Aṭṭhinti ca ‘‘katvā’’ti ca dve padāni daṭṭhabbāni. ‘‘Aṭṭhikatvā’’ti vā ekaṃ padaṃ. Tattha pubbanaye attho yassatthīti aṭṭhi tthakārassa ṭṭhakāraṃ katvā, taṃ aṭṭhiṃ. Katvāti tvāpaccayantauttarapadena samāso na hoti. Aṭṭhikabhāvanti ettha ikasaddena ‘‘aṭṭhī’’ti ettha īpaccayaṃ dasseti. ‘‘Bhāva’’ntipadena bhāvapaccayena vinā bhāvatthassa ñāpetabbataṃ dasseti. Attho panevaṃ daṭṭhabbo – aṭṭhibhāvaṃ katvāti. Pacchimanaye attho yassatthīti aṭṭhiko purimanayeneva tthakārassa ṭṭhakāraṃ katvā. Atthayitabbo icchitabboti vā aṭṭhiko, aṭṭhikaiti nāmasaddato tvāpaccayo kātabbo. ‘‘Aṭṭhikatvā’’ti idaṃ padaṃ kiriyāvisesanaṃ. Kiriyāvisesane vattamāne karadhātu vā bhūdhātu vā yojetabbāti dassebhuṃ vuttaṃ ‘‘katvā hutvā’’ti. Taṃ sabbaṃ dassento āha ‘‘aṭṭhikatvāti aṭṭhikabhāvaṃ katvā, aṭṭhiko hutvā’’ti. Tatiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 8. ஸஹத⁴ம்மிகவக்³கோ³ • 8. Sahadhammikavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 3. மோஹனஸிக்கா²பத³வண்ணனா • 3. Mohanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. மோஹனஸிக்கா²பத³வண்ணனா • 3. Mohanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. மோஹனஸிக்கா²பத³வண்ணனா • 3. Mohanasikkhāpadavaṇṇanā
