| Library / Tipiṭaka / திபிடக • Tipiṭaka / மஹாவிப⁴ங்க³-அட்ட²கதா² • Mahāvibhaṅga-aṭṭhakathā |
3. மோஹனஸிக்கா²பத³வண்ணனா
3. Mohanasikkhāpadavaṇṇanā
444. ததியே – அன்வத்³த⁴மாஸந்தி அனுபடிபாடியா அத்³த⁴மாஸே அத்³த⁴மாஸே; யஸ்மா பன ஸோ உபோஸத²தி³வஸே உத்³தி³ஸியதி, தஸ்மா ‘‘அனுபோஸதி²க’’ந்தி பத³பா⁴ஜனே வுத்தங். உத்³தி³ஸ்ஸமானேதி உத்³தி³ஸியமானே . யஸ்மா பன ஸோ பாதிமொக்கு²த்³தே³ஸகே உத்³தி³ஸந்தே உத்³தி³ஸியமானோ நாம ஹோதி, தஸ்மா ‘‘உத்³தி³ஸந்தே’’தி பத³பா⁴ஜனே வுத்தங். யஞ்ச தத்த² ஆபத்திங் ஆபன்னோதி தஸ்மிங் அனாசாரே சிண்ணே யங் ஆபத்திங் ஆபன்னோ. யதா²த⁴ம்மோ காரேதப்³போ³தி அஞ்ஞாணேன ஆபன்னத்தா தஸ்ஸா ஆபத்தியா மொக்கோ² நத்தி², யதா² பன த⁴ம்மோ ச வினயோ ச டி²தோ, ததா² காரேதப்³போ³. தே³ஸனாகா³மினிஞ்சே ஆபன்னோ ஹோதி, தே³ஸாபேதப்³போ³, வுட்டா²னகா³மினிஞ்சே, வுட்டா²பேதப்³போ³தி அத்தோ². ஸாது⁴கந்தி ஸுட்டு². அட்டி²ங்கத்வாதி அத்தி²கபா⁴வங் கத்வா; அத்தி²கோ ஹுத்வாதி வுத்தங் ஹோதி.
444. Tatiye – anvaddhamāsanti anupaṭipāṭiyā addhamāse addhamāse; yasmā pana so uposathadivase uddisiyati, tasmā ‘‘anuposathika’’nti padabhājane vuttaṃ. Uddissamāneti uddisiyamāne . Yasmā pana so pātimokkhuddesake uddisante uddisiyamāno nāma hoti, tasmā ‘‘uddisante’’ti padabhājane vuttaṃ. Yañca tattha āpattiṃ āpannoti tasmiṃ anācāre ciṇṇe yaṃ āpattiṃ āpanno. Yathādhammo kāretabboti aññāṇena āpannattā tassā āpattiyā mokkho natthi, yathā pana dhammo ca vinayo ca ṭhito, tathā kāretabbo. Desanāgāminiñce āpanno hoti, desāpetabbo, vuṭṭhānagāminiñce, vuṭṭhāpetabboti attho. Sādhukanti suṭṭhu. Aṭṭhiṃkatvāti atthikabhāvaṃ katvā; atthiko hutvāti vuttaṃ hoti.
447. த⁴ம்மகம்மேதிஆதீ³ஸு மோஹாரோபனகம்மங் அதி⁴ப்பேதங். ஸேஸமெத்த² உத்தானமேவ. திஸமுட்டா²னங் – கிரியங், ஸஞ்ஞாவிமொக்க²ங், ஸசித்தகங், லோகவஜ்ஜங், காயகம்மங், வசீகம்மங், அகுஸலசித்தங், து³க்க²வேத³னந்தி.
447.Dhammakammetiādīsu mohāropanakammaṃ adhippetaṃ. Sesamettha uttānameva. Tisamuṭṭhānaṃ – kiriyaṃ, saññāvimokkhaṃ, sacittakaṃ, lokavajjaṃ, kāyakammaṃ, vacīkammaṃ, akusalacittaṃ, dukkhavedananti.
மோஹனஸிக்கா²பத³ங் ததியங்.
Mohanasikkhāpadaṃ tatiyaṃ.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 8. ஸஹத⁴ம்மிகவக்³கோ³ • 8. Sahadhammikavaggo
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 3. மோஹனஸிக்கா²பத³வண்ணனா • 3. Mohanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 3. மோஹனஸிக்கா²பத³வண்ணனா • 3. Mohanasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 3. மோஹனஸிக்கா²பத³ங் • 3. Mohanasikkhāpadaṃ
