| Library / Tipiṭaka / ཏིཔིཊཀ • Tipiṭaka / སཾཡུཏྟནིཀཱཡ • Saṃyuttanikāya |
༢. མོལི༹ཡཕགྒུནསུཏྟཾ
2. Moḷiyaphaggunasuttaṃ
༡༢. སཱཝཏྠིཡཾ ཝིཧརཏི…པེ॰… ‘‘ཙཏྟཱརོམེ , བྷིཀྑཝེ, ཨཱཧཱརཱ བྷཱུཏཱནཾ ཝཱ སཏྟཱནཾ ཋིཏིཡཱ སམྦྷཝེསཱིནཾ ཝཱ ཨནུགྒཧཱཡ། ཀཏམེ ཙཏྟཱརོ? ཀབལཱི༹ཀཱརོ ཨཱཧཱརོ – ཨོལཱ༹རིཀོ ཝཱ སུཁུམོ ཝཱ, ཕསྶོ དུཏིཡོ, མནོསཉྩེཏནཱ ཏཏིཡཱ, ཝིཉྙཱཎཾ ཙཏུཏྠཾ། ཨིམེ ཁོ, བྷིཀྑཝེ, ཙཏྟཱརོ ཨཱཧཱརཱ བྷཱུཏཱནཾ ཝཱ སཏྟཱནཾ ཋིཏིཡཱ སམྦྷཝེསཱིནཾ ཝཱ ཨནུགྒཧཱཡཱ’’ཏི།
12. Sāvatthiyaṃ viharati…pe… ‘‘cattārome , bhikkhave, āhārā bhūtānaṃ vā sattānaṃ ṭhitiyā sambhavesīnaṃ vā anuggahāya. Katame cattāro? Kabaḷīkāro āhāro – oḷāriko vā sukhumo vā, phasso dutiyo, manosañcetanā tatiyā, viññāṇaṃ catutthaṃ. Ime kho, bhikkhave, cattāro āhārā bhūtānaṃ vā sattānaṃ ṭhitiyā sambhavesīnaṃ vā anuggahāyā’’ti.
ཨེཝཾ ཝུཏྟེ, ཨཱཡསྨཱ མོལི༹ཡཕགྒུནོ བྷགཝནྟཾ ཨེཏདཝོཙ – ‘‘ཀོ ནུ ཁོ, བྷནྟེ, ཝིཉྙཱཎཱཧཱརཾ ཨཱཧཱརེཏཱི’’ཏི? ‘‘ནོ ཀལློ པཉྷོ’’ཏི བྷགཝཱ ཨཝོཙ – ‘‘‘ཨཱཧཱརེཏཱི’ཏི ཨཧཾ ན ཝདཱམི། ‘ཨཱཧཱརེཏཱི’ཏི ཙཱཧཾ ཝདེཡྻཾ, ཏཏྲསྶ ཀལློ པཉྷོ – ‘ཀོ ནུ ཁོ, བྷནྟེ, ཨཱཧཱརེཏཱི’ཏི ? ཨེཝཾ ཙཱཧཾ ན ཝདཱམི། ཨེཝཾ མཾ ཨཝདནྟཾ ཡོ ཨེཝཾ པུཙྪེཡྻ – ‘ཀིསྶ ནུ ཁོ, བྷནྟེ, ཝིཉྙཱཎཱཧཱརོ’ཏི, ཨེས ཀལློ པཉྷོ། ཏཏྲ ཀལླཾ ཝེཡྻཱཀརཎཾ – ‘ཝིཉྙཱཎཱཧཱརོ ཨཱཡཏིཾ པུནབྦྷཝཱབྷིནིབྦཏྟིཡཱ པཙྩཡོ, ཏསྨིཾ བྷཱུཏེ སཏི སལཱ༹ཡཏནཾ, སལཱ༹ཡཏནཔཙྩཡཱ ཕསྶོ’’’ཏི།
Evaṃ vutte, āyasmā moḷiyaphagguno bhagavantaṃ etadavoca – ‘‘ko nu kho, bhante, viññāṇāhāraṃ āhāretī’’ti? ‘‘No kallo pañho’’ti bhagavā avoca – ‘‘‘āhāretī’ti ahaṃ na vadāmi. ‘Āhāretī’ti cāhaṃ vadeyyaṃ, tatrassa kallo pañho – ‘ko nu kho, bhante, āhāretī’ti ? Evaṃ cāhaṃ na vadāmi. Evaṃ maṃ avadantaṃ yo evaṃ puccheyya – ‘kissa nu kho, bhante, viññāṇāhāro’ti, esa kallo pañho. Tatra kallaṃ veyyākaraṇaṃ – ‘viññāṇāhāro āyatiṃ punabbhavābhinibbattiyā paccayo, tasmiṃ bhūte sati saḷāyatanaṃ, saḷāyatanapaccayā phasso’’’ti.
‘‘ཀོ ནུ ཁོ, བྷནྟེ, ཕུསཏཱི’’ཏི? ‘‘ནོ ཀལློ པཉྷོ’’ཏི བྷགཝཱ ཨཝོཙ – ‘‘‘ཕུསཏཱི’ཏི ཨཧཾ ན ཝདཱམི། ‘ཕུསཏཱི’ཏི ཙཱཧཾ ཝདེཡྻཾ, ཏཏྲསྶ ཀལློ པཉྷོ – ‘ཀོ ནུ ཁོ, བྷནྟེ, ཕུསཏཱི’ཏི? ཨེཝཾ ཙཱཧཾ ན ཝདཱམི། ཨེཝཾ མཾ ཨཝདནྟཾ ཡོ ཨེཝཾ པུཙྪེཡྻ – ‘ཀིཾཔཙྩཡཱ ནུ ཁོ, བྷནྟེ, ཕསྶོ’ཏི, ཨེས ཀལློ པཉྷོ། ཏཏྲ ཀལླཾ ཝེཡྻཱཀརཎཾ – ‘སལཱ༹ཡཏནཔཙྩཡཱ ཕསྶོ, ཕསྶཔཙྩཡཱ ཝེདནཱ’’’ཏི།
‘‘Ko nu kho, bhante, phusatī’’ti? ‘‘No kallo pañho’’ti bhagavā avoca – ‘‘‘phusatī’ti ahaṃ na vadāmi. ‘Phusatī’ti cāhaṃ vadeyyaṃ, tatrassa kallo pañho – ‘ko nu kho, bhante, phusatī’ti? Evaṃ cāhaṃ na vadāmi. Evaṃ maṃ avadantaṃ yo evaṃ puccheyya – ‘kiṃpaccayā nu kho, bhante, phasso’ti, esa kallo pañho. Tatra kallaṃ veyyākaraṇaṃ – ‘saḷāyatanapaccayā phasso, phassapaccayā vedanā’’’ti.
‘‘ཀོ ནུ ཁོ, བྷནྟེ, ཝེདཡཏཱི’’ཏི 1? ‘‘ནོ ཀལློ པཉྷོ’’ཏི བྷགཝཱ ཨཝོཙ – ‘‘‘ཝེདཡཏཱི’ཏི ཨཧཾ ན ཝདཱམི། ‘ཝེདཡཏཱི’ཏི ཙཱཧཾ ཝདེཡྻཾ, ཏཏྲསྶ ཀལློ པཉྷོ – ‘ཀོ ནུ ཁོ, བྷནྟེ, ཝེདཡཏཱི’ཏི? ཨེཝཾ ཙཱཧཾ ན ཝདཱམི། ཨེཝཾ མཾ ཨཝདནྟཾ ཡོ ཨེཝཾ པུཙྪེཡྻ – ‘ཀིཾཔཙྩཡཱ ནུ ཁོ, བྷནྟེ, ཝེདནཱ’ཏི, ཨེས ཀལློ པཉྷོ། ཏཏྲ ཀལླཾ ཝེཡྻཱཀརཎཾ – ‘ཕསྶཔཙྩཡཱ ཝེདནཱ, ཝེདནཱཔཙྩཡཱ ཏཎྷཱ’’’ཏི།
‘‘Ko nu kho, bhante, vedayatī’’ti 2? ‘‘No kallo pañho’’ti bhagavā avoca – ‘‘‘vedayatī’ti ahaṃ na vadāmi. ‘Vedayatī’ti cāhaṃ vadeyyaṃ, tatrassa kallo pañho – ‘ko nu kho, bhante, vedayatī’ti? Evaṃ cāhaṃ na vadāmi. Evaṃ maṃ avadantaṃ yo evaṃ puccheyya – ‘kiṃpaccayā nu kho, bhante, vedanā’ti, esa kallo pañho. Tatra kallaṃ veyyākaraṇaṃ – ‘phassapaccayā vedanā, vedanāpaccayā taṇhā’’’ti.
‘‘ཀོ ནུ ཁོ, བྷནྟེ, ཏསཏཱི’’ཏི 3? ‘‘ནོ ཀལློ པཉྷོ’’ཏི བྷགཝཱ ཨཝོཙ – ‘‘‘ཏསཏཱི’ཏི ཨཧཾ ན ཝདཱམི ། ‘ཏསཏཱི’ཏི ཙཱཧཾ ཝདེཡྻཾ, ཏཏྲསྶ ཀལློ པཉྷོ – ‘ཀོ ནུ ཁོ, བྷནྟེ, ཏསཏཱི’ཏི? ཨེཝཾ ཙཱཧཾ ན ཝདཱམི། ཨེཝཾ མཾ ཨཝདནྟཾ ཡོ ཨེཝཾ པུཙྪེཡྻ – ‘ཀིཾཔཙྩཡཱ ནུ ཁོ, བྷནྟེ, ཏཎྷཱ’ཏི, ཨེས ཀལློ པཉྷོ། ཏཏྲ ཀལླཾ ཝེཡྻཱཀརཎཾ – ‘ཝེདནཱཔཙྩཡཱ ཏཎྷཱ, ཏཎྷཱཔཙྩཡཱ ཨུཔཱདཱན’’’ནྟི།
‘‘Ko nu kho, bhante, tasatī’’ti 4? ‘‘No kallo pañho’’ti bhagavā avoca – ‘‘‘tasatī’ti ahaṃ na vadāmi . ‘Tasatī’ti cāhaṃ vadeyyaṃ, tatrassa kallo pañho – ‘ko nu kho, bhante, tasatī’ti? Evaṃ cāhaṃ na vadāmi. Evaṃ maṃ avadantaṃ yo evaṃ puccheyya – ‘kiṃpaccayā nu kho, bhante, taṇhā’ti, esa kallo pañho. Tatra kallaṃ veyyākaraṇaṃ – ‘vedanāpaccayā taṇhā, taṇhāpaccayā upādāna’’’nti.
‘‘ཀོ ནུ ཁོ, བྷནྟེ, ཨུཔཱདིཡཏཱི’’ཏི? ‘‘ནོ ཀལློ པཉྷོ’’ཏི བྷགཝཱ ཨཝོཙ – ‘‘‘ཨུཔཱདིཡཏཱི’ཏི ཨཧཾ ན ཝདཱམི། ‘ཨུཔཱདིཡཏཱི’ཏི ཙཱཧཾ ཝདེཡྻཾ, ཏཏྲསྶ ཀལློ པཉྷོ – ‘ཀོ ནུ ཁོ, བྷནྟེ, ཨུཔཱདིཡཏཱི’ཏི? ཨེཝཾ ཙཱཧཾ ན ཝདཱམི། ཨེཝཾ མཾ ཨཝདནྟཾ ཡོ ཨེཝཾ པུཙྪེཡྻ – ‘ཀིཾཔཙྩཡཱ ནུ ཁོ, བྷནྟེ, ཨུཔཱདཱན’ནྟི, ཨེས ཀལློ པཉྷོ། ཏཏྲ ཀལླཾ ཝེཡྻཱཀརཎཾ – ‘ཏཎྷཱཔཙྩཡཱ ཨུཔཱདཱནཾ; ཨུཔཱདཱནཔཙྩཡཱ བྷཝོ’ཏི…པེ॰… ཨེཝམེཏསྶ ཀེཝལསྶ དུཀྑཀྑནྡྷསྶ སམུདཡོ ཧོཏི།
‘‘Ko nu kho, bhante, upādiyatī’’ti? ‘‘No kallo pañho’’ti bhagavā avoca – ‘‘‘upādiyatī’ti ahaṃ na vadāmi. ‘Upādiyatī’ti cāhaṃ vadeyyaṃ, tatrassa kallo pañho – ‘ko nu kho, bhante, upādiyatī’ti? Evaṃ cāhaṃ na vadāmi. Evaṃ maṃ avadantaṃ yo evaṃ puccheyya – ‘kiṃpaccayā nu kho, bhante, upādāna’nti, esa kallo pañho. Tatra kallaṃ veyyākaraṇaṃ – ‘taṇhāpaccayā upādānaṃ; upādānapaccayā bhavo’ti…pe… evametassa kevalassa dukkhakkhandhassa samudayo hoti.
‘‘ཚནྣཾ ཏྭེཝ, ཕགྒུན, ཕསྶཱཡཏནཱནཾ ཨསེསཝིརཱགནིརོདྷཱ ཕསྶནིརོདྷོ; ཕསྶནིརོདྷཱ ཝེདནཱནིརོདྷོ; ཝེདནཱནིརོདྷཱ ཏཎྷཱནིརོདྷོ; ཏཎྷཱནིརོདྷཱ ཨུཔཱདཱནནིརོདྷོ; ཨུཔཱདཱནནིརོདྷཱ བྷཝནིརོདྷོ; བྷཝནིརོདྷཱ ཛཱཏིནིརོདྷོ; ཛཱཏིནིརོདྷཱ ཛརཱམརཎཾ སོཀཔརིདེཝདུཀྑདོམནསྶུཔཱཡཱསཱ ནིརུཛ྄ཛྷནྟི། ཨེཝམེཏསྶ ཀེཝལསྶ དུཀྑཀྑནྡྷསྶ ནིརོདྷོ ཧོཏཱི’’ཏི། དུཏིཡཾ།
‘‘Channaṃ tveva, phagguna, phassāyatanānaṃ asesavirāganirodhā phassanirodho; phassanirodhā vedanānirodho; vedanānirodhā taṇhānirodho; taṇhānirodhā upādānanirodho; upādānanirodhā bhavanirodho; bhavanirodhā jātinirodho; jātinirodhā jarāmaraṇaṃ sokaparidevadukkhadomanassupāyāsā nirujjhanti. Evametassa kevalassa dukkhakkhandhassa nirodho hotī’’ti. Dutiyaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / སཾཡུཏྟནིཀཱཡ (ཨཊྛཀཐཱ) • Saṃyuttanikāya (aṭṭhakathā) / ༢. མོལི༹ཡཕགྒུནསུཏྟཝཎྞནཱ • 2. Moḷiyaphaggunasuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / སཾཡུཏྟནིཀཱཡ (ཊཱིཀཱ) • Saṃyuttanikāya (ṭīkā) / ༢. མོལི༹ཡཕགྒུནསུཏྟཝཎྞནཱ • 2. Moḷiyaphaggunasuttavaṇṇanā
